Isaiah 63

Kirundi (Bibliya Yera 1951, 1967 (Burundi))

← Chapter 62 Jump to: Chapter 64 →

1Uriya ni nde aturutse muri Edomu, i Bosira, yambaye imyambaro y’agahama, yambaye impuzu zikayangana, araramanga ari n’inkomezi nyinshi? Ni jewe mvuga mu bugororotsi, umunyabushobozi bgo gukiza.

2N’iki gitumye impuzu zawe ziba agatuku, n’imyambaro yawe igasa n’iy’ ūganisha ibirenge vino mu bgato?

3Nīganishije mu bgato nd’umwe; mu bantu bo mu mahanga yose nta n’umwe twari kumwe; n’ukuri nabaganishije ibirenge mu burake bganje, mbanyukuza ubushangashirwe bganje; kand’ amaraso yabo yatarukiye ku myambaro yanje, impuzu zanje zose zirayoberana.

4Kuko nari narashinze mu mutima umusi wo kwīhōra, kand’ umwaka wo gucungura abantu banje urashitse.

5Narēraguje, mbona nta wutabaye; ntangazwa n’ukw ata wo kundwanira; ni co catumye ukwanje kuboko ari kwo nitabarishije, kand’ ubushangashirwe bganje ni bgo bgampagarikiye.

6Nanyukuje amahanga uburake bganje, mbamenaguza ubushangashirwe bganje, mpondoganiriza amaraso yabo kw isi.

7Nzokwamamaza ukugira neza kw’Uhoraho n’ishimwe ryiwe, nk’ ukw ivyo Uhoraho yatugiriye vyose bingana; mvuge n’ivyiza vyinshi yagiriye inzu ya Isirayeli, nk’ukw imbabazi ziwe ziri, kandi nk’uk’ ukugira neza kwiwe kwinshi kungana.

8Kuko yavuze, ati N’ukuri n’abantu banje, abana batogunga; nuko rer’ ababera Umukiza.

9Yababaranye na bo mu mibabaro yabo yose, kand’ umumarayika yama ahagaze mu nyonga ziwe yarabakiza: urukundo rwiwe n’ikigongwe ciwe ni vyo vyamuteye kubacungura; yarabaterura akabaheka imisi yose ya kera.

10Ariko baragarariza, bababaza Mpwemu wiwe yera; bituma ahinduka umwansi wabo, ubgiwe arwana na bo.

11Maz’ abantu biwe bibuka ibihe vya kera n’ivya Mose, bat’ Uwabadūgananye n’umwungere w’intama ziwe abakūye mu kiyaga ari hehe? Uwashize Mpwemu wiwe yera hagati muri bo ari hehe?

12Ni nde yatumye ukuboko kwiwe kw’ icubahiro kugendera ku ruhande rw’i buryo bga Mose? Ni nde yatandukanije amazi imbere yabo, akīhesha izina ritazoshira?

13Ni nde yabacishije ahār’ i bgina, nk’ah’ ar’ ifarasi ica mu bugaragwa, ntibatsitare?

14Nk’ ukw inka zishōka ku mwonga, ni ko Mpwemu w’Uhoraho yabaruhura; uko ni ko warōngōye abantu bawe, kugira ngo wiheshe izina ry’icubahiro.

15Tereza inyonga hasi uri mw ijuru, witegereze ur’ i wawe, ah’ ukwera kwawe n’icubahiro cawe biri: rya shaka ryawe n’ibikorwa vyawe vy’ubushobozi biri hehe? Igishika n’imbabazi umfitiye ko bibujijwe kunshikīra!

16Kuko wewe uri Data wa twese, naho Aburahamu atatuzi, kandi na Isirayeli ntatwemere: wewe ubgawe, Uhoraho, ni wewe Data; Umucunguzi wacu ni ryo zina ryawe uhereye kera hose.

17Ewe Uhoraho, n’iki gituma utuzimiza inzira zawe, ugakomantaza imitima yacu ntitukwubahe? Garuka kubg’ abasavyi bawe, imiryango y’ishamvu yawe.

18Abantu bawe bera bāhaganje igihe gito gusa; abarwanizi bacu bāsiribanze ahantu hawe hēra.

19Twahindutse nk’abatigeze kuganzwa nawe, nk’abatigeze kwitirirwa izina ryawe.

← Chapter 62 Jump to: Chapter 64 →