Isaiah 31

Kirundi (Bibliya Yera 1951, 1967 (Burundi))

← Chapter 30 Jump to: Chapter 32 →

1Bazobona ibara, abamanuka baja muri Egiputa gutabaza, bakishimira amafarasi, bakizigira imikogote ikwegwa n’ amafarasi kukw ari myinshi, bo n’abagendera ku mafarasi kukw ar’ abanyenkomezi nyinshi, ariko ntibashire umutima ku Wera w’Abisirayeli, kandi ntibarondere Uhoraho.

2Ariko rero na we azi ubgenge, azozana ivyago kandi ntazokwivuguruza, arikw azohagurukira inzu y’inkozi z’ibibi, bo n’abatabara abakora ivy’ ukugabitanya.

3Yamara rero Abanyegiputa s’Imana, n’abantu buntu; n’amafarasi yabo s’impwemu, n’ ay’ umubiri gusa: maz’ Uhoraho ni yabāngura ukuboko kwiwe, ūtabaye azotsitara, kandi n’ūtabawe azotemba, bose bahindikirane hamwe.

4Kuk’ ukw ari k’Uhoraho ambariye, ati Nk’ukw intambge, cank’ umugunza w’intambge igwangwarira ku co yishe, iy’ abungere benshi batabajwe kurwana na yo, ntikangwe n’amajwi yabo, kandi ntiteshwe n’urwamo rwabo, uko ni k’ Uhoraho Nyen’ ingabo azomanurwa no kurwanira ku musozi Siyoni no ku mutumba waho.

5Nk’ukw inyoni zizengerera hejuru y’ivyari vyazo, ni k’Uhoraho Nyen’ ingabo azorinda Yerusalemu; azoharinda ahakize, azohaca hejuru aharokore.

6Yemwe Bisirayeli, ni muhindukirire uwo mwagararije ruhebga.

7Maze kur’ uwo musi umuntu wese azoshibura ibigirwamana vyiwe vy’ifeza, n’ibigirwamana vyiwe vy’izahabu, ivyo mwacurishije intoke zanyu kubabera icaha.

8Ni ho Abashuri bazokwicwa n’inkota itar’ iy’ abantu, kand’ inkota itar’ iy’ abantu izobarya: bazohunga iyo nkota, kand’ imisore yabo izohinduka abagurano.

9Igitandara cabo kizokūrwaho no gucika ivutu, kand’ abaganwa babo bazokwihebeshwa n’ibendera, ni k’Uhoraho agize, afise umuriro wiwe i Siyoni, akagira itanure ryiwe i Yerusalemu.

← Chapter 30 Jump to: Chapter 32 →