Proverbs 11

Romani Baltic Latin (Biblija - Pe Baltitko Romani čib (Romanes) 2019)

← Chapter 10 Jump to: Chapter 12 →

1Načačune ubladýtka (viesy) isyn džungalé Ráske-Devléske, ne čačunó pharipén vaš vieso zoralés radynela Les.

2Kiéli javéla phut'kiribén, javéla i ladž, ne naphut'kirde manušénde isyn godypén.

3Devlytkoné-manušéngiro lačhipén javéla te prirakhel len, ne napatiaibnaskire-manušéngiro čoripén xasiakiréla len.

4Barvalypén na déla ni savó lačhipén dro xasibnýtko dyvés, ne čačipén zrakhéla meribnástyr.

5Čačipén sykavéla drom bidošakire manušéske, ne fuj manušá peréna péskire fuipnastyr.

6Čačipén zrakhéla devlytkoné manušén, ne napatiaibnaskire peréna dre felý péskire frentymatyr, pal saví jone tradenape.

7Syr fuj manúš meréla, léskiro lačhó užakiribén (léskiri nadiéia) xasjola, i načačune-manušéngiro lačhó užakiribén bidatyr xasjola.

8Čačipnáskiro isyn zrakhno bidatyr, a fuj manúš peréla odorík pe štego léskiro.

9Duje-mujengiro manúš péskire lavénca xasiakiréla péskire pašatunes, ne čačunó zrakhélape péskire džinybnasa.

10Syr saró džála lačhés čačipnaskirenca, fóro drieván radynélape; i syr fuj manušá xasjona, fóro déla gódla radymátyr.

11Devlytka bahtiakirena (blagoslovinena) i ĥazdéna ke vučypen fóro, ne fuj-manušéngire muiá ravena telé les.

12Nabaré-godiákiro dykhéla vučipnástyr pe péskire pašatuné manušéste, ne manúš, savó ĥaljola, kodová rikiréla ramánjo/ miro [isyn štyl-r.s.].

13Phukaibnaskiro (pierienosčyko) rosphenéla čorahanyben, ne kodová, savéste isyn patiaibnýtko dúho (fáno), garavela réndo.

14Kaj na déna godypén manušénge, manušá peréna, ne kaj isyn but manušá te den godý, tedy odój nane dar.

15Odová, kon isyn dudvalo (jakhítko) pal čužoné manušéste, keréla fuj péske, ne kodová, kon drieván na kaméla te javél dudvalesa (poručytieljosa), isyn bidarakiro.

16Lačhé-ilytko džuvlý doreséla patýv, ne pharé-butiakire manušá doreséna barvalypén.

17Lačhé-iléskiro manúš keréla lačhipén péskire dieske, a biileskiro [holiamó-r.s.] manúš keréla doš péskire ločake (plotiake).

18Fuj manúš keréla došvaly butý, ne odová, kon rosčhuvela čačipén, doreséla mištó mazúri (nagrada).

19Čačipén lydžála ke džiibén, ne odová, kon rodéla čoripén, rodéla les vaš péskiro meribén.

20Raj Devél rikirlape krig odoléndyr, savé keréna čoripén pefromi (narošnes), ne bidošengire dre saré dromá zoralés radynena Les.

21Mek jone i khetaniakirenpe vasténca, ne fuj manušá na jačénape nabange; ne čačuné-manušéngiro ródo (mištypén) javéla rakhno.

22Suvnakuný angrusty dro balyčengiro nakh (piatako) isyn dová-pac', syr isyn šukár džuvlý, saví but na ĥaljola.

23Čačuné manušá drieván tyrdenape ke lačhipén, ne lačhó užakiribén (nadiéia) fujé-manušéngiri lydžála ke bari xolyn.

24Jekh manúš déla drieván but, ne i léske pribarjakirelape butýr, ne javír drieván pririkirela péske, i jov jačéla čororedyr.

25Kon rozdela but, odová javéla barvaló, kon paniakirela javirén, odová adiáke-pac' javéla paniakirdo.

26Manušá prokošena odolés, kon pririkirela giv, ne bahtaló javéla odoleskiro šeró, kon biknela les.

27Manušés, savó dobusoves (staratiel'nes) rodéla lačhipén, odová rodéla láska Devléstyr, ne pharó javéla kodoléske, savó rodéla čoripén.

28Kon zoralés patiála dro péskiro barvalypén, odová peréla, ne čačuné manušá javéna naj šukár syr patria (listy) pe kašt (drévo).

29Kon keréla doš (čoripén) péskire kheréske, odová doreséla balvál syr meknó mištypén, ne dylynin'ko manúš javéla pishári godé-iléskire manušéske.

30Čačipén isyn džiibnáskiro kašt (drévo) sýrby phabaj i godó manúš prityrdela dijá.

31Kóli čačunó manúš doreséla mazúri (nagrada) pe phuv, tedy butýr doreséla grehítko i fuj manúš.

← Chapter 10 Jump to: Chapter 12 →