Proverbs 8

Romani Baltic Latin (Biblija - Pe Baltitko Romani čib (Romanes) 2019)

← Chapter 7 Jump to: Chapter 9 →

1Ci godypén na déla gódla zoralés? Ci ĥalyibén na ĥazdéla péskiri zan?

2Godypén isyn terdó pe sámo vučó štéto pe vučipená, pašýl drom, pe trušulytka dromá.

3Godypén déla gódla portatyr (vratendyr), syr te džas andré dro fóro, kiéli džása pirdál vudár:

4“O muršale. Me kharáva tumen; i mirí zan (glos) kharéla tumen, manušéngire čhavé:

5Tumé, prostone-godiakire, sykljon te javén baré-godiakire! Tumé, dylynin'ka, sykljon te javén godé.

6Šunén! Me javáva te rakiráv naj fededýr lavá, i miré uštá phenéna jekh čačipén.

7Pal-dová so miré-moskiro taloj (njobo) phenéla patiaibén, fuipén isyn džungaló (brydko) uštenge.

8Saré lavá miré móstyr isyn čačipnaskire, ni savó xohaibén, ci čoripén pefromi (naročnes) nane dre miré lavá.

9Len prostes te ĥaljon, jone isyn čačuné odolénge, savé džinéna pal davá.

10Šunén, so me sykliakirava, savó vaš tuménge isyn fedýr rupéstyr, i vykedeno džinybén vaš tuménge isyn drogedyr čikade suvnakástyr.

11Pal-dová so godypén Devléstyr isyn fedýr rubinendyr, i saró, so manúš kamdiá, naštý te priparuves (te priravnines) ke godypén.

12“Me, godypén Devléstyr, dživáva baré godiása, mánde isyn džinybén, sob (kaj) xor te rozlav (te rozĥaljovav).

13Sob (kaj) te des patýv ke dar Ráske-Devléske, trej drieván te na kames fuipén, phut'kiribén, i odolén, kon pes barjakiréla, čoré réndy (diély) i, kon pefromi rakiréla čoripén – me drieván na kamám.

14Me dáva godý i čačunó godypén: mánde isyn xor ĥalyibén i mánde isyn zor.

15Mánca králja kralinena; theméskire barydyrá (viel'možy) keréna čačuné statúty (ustavy).

16Mánca thagárja rikiréna zor, i baré rajo, i saré sendárja pe phuv.

17Me kamám te sykavav patýv odolénge, savé sykavav patýv mánge, i kodolé, kon dobusoves rodéla man, jone lathéna man.

18Mánde isyn barvalypena i patýv; drógima, saví na xasjola, čačipén;

19mánde barjakirdó (plódo) isyn fedýr čikade rupéstyr i mándyr l'góta butýr čikade (vykedyné) rupéstyr.

20Me psirava čačuné droménca, maškír dromore, kaj isyn čačipén,

21sob (kaj) mánge te keráv adiáke, sob (kaj) odolé, savé kaména man, te doresen meknó mištypén; sob (kaj) me te pherdiakirav léngiri piralý (sokroviščnica).

22Raj Devél sozdyjá man dro sámo anglypén, angíl, syr Jov sozdyjá saró ĥarym ĥará.

23Me, godypén, sómas pomakhno samone viekendyr, anglypnástyr, angíl dová, syr phuv sys čhudý.

24Kiéli iščo (inké) na sys xor štéty, Me lotijom (bijandyjom), i kiéli iščo (inké) na sys panieskire ĥanyngorja pherdé paniésa:

25angíl dová, syr bérgi sys začhude, angíl dová, syr sys bérgicy, me ŭže lotijom (bijandyjom);

26angíl dová, syr Raj Devél sozdyjá phuv, ci féldy, ci pérva prahitka častyra (časticy) dro svéto (lot).

27Kiéli Jov kerélas bolybén, me, godypén, sómas odój; kiéli Jov prolydžija krugo uprál xore šteténdyr:

28kiéli Jov čhudiá óbloki upralestyr, kiéli Jov zorjakirdia panieskire ĥanyngorja xore šteténdyr;

29kiéli Jov uphendia morjoske kustýk, sob (kaj) paniá te na pirithaden léskiro priphenybén; kiéli Jov čhudiá phuvjákiro fundámiento;

30tén'či me, godypén, sómas, pašýl Ráskire-Devléskiri rig, syr Léskiro pomogibnaskiro dre butý: Jov radynelaspe mándyr; me sómas usady (sak) bahtaló angíl Léste.

31Me bahtalyjom dre Léskire-phuvjákiri paš, i me, godypén, zoralés radyndjompe manušéngire čhavénca.

32I akaná, čhavé, šunén man, pal-dová so bahtalé isyn odolé, savé džána pir miré dromá:

33šunén, so me sykliakirava, i javén godé i na vyčhurden iléstyr miré lavá.

34Bahtaló isyn odová manúš, savó kandéla man; savó dykhéla ciamkes so dyvés pašýl mirí pórta; savó užakiréla pašýl vudará.

35Manúš, savó lathéla man – godypén, lathéla džiibén i Raj Devél javéla te bahtiakirél les;

36ne manúš, kon bistrela pal mánde, kodová keréla čoripén péskire dieske; saré, konéske me na som pir iló, sýrby užakiréna meribén.

← Chapter 7 Jump to: Chapter 9 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Romanes Study Bible →