Proverbs 14

Romani Baltic Latin (Biblija - Pe Baltitko Romani čib (Romanes) 2019)

← Chapter 13 Jump to: Chapter 15 →

1Godý džuvlý rikiréla kher, ne nabaré-godiakiri džuvlý phagiréla les péskire dylnypnasa.

2Kon keréla saró pir čačipén, kodová kutiakirela ke dar Ras-Devlés, ne kon keréla čoripén pefromi, odová na priléla ke godý Les.

3Dylynó rikiréla phut'kirdes ke ran pe péskiro dumo, ne godé uštá rakhena manušén.

4Kaj nane guruvén, odój jasla (khurly) isyn čhučí, ne baró pribytko (umaloto) javéla guruveskire zorjátyr.

5Patiaibnýtko jakhítko na javéla te xohavél, ne načačuno jakhítko javéla te phenél xohaibén.

6Bipatyvakiro manúš rodéla godypén, i na lathéla nisó, ne džinybén lokhes délape kodoléske, savó isyn godypnaskiro (god'varó).

7Durjov (naš krig) dylyné manušéstyr, saveskire uštendyr tu na šunesa džinybén (god'varé lavá).

8Baré-godiákiro manúš džinéla, so jov keréla akaná i duredýr, ne dylynó garavela péskiro dylnypén dro léskiri frentyma, sob (kaj) te xohavél.

9Dylynin'ka prosana péskire gréhi, ne maškír devlytkonende isyn jekh godý.

10Jekh iló džinéla péskiro kirkipen, ne čúžo na phenéla javireske pal péskiri rádyma.

11Fuje-manušéngiro kher ravena telé, ne devlytkonengiri šátra javéla naj šukaredyr.

12Isyn drom, savó zdelape manušéske, so jov isyn mamúj (priámo), ne pe kónco (pe jagóro) jov lydžála ke meribén.

13Mek manúš i salape, ne pe iló léste saštý te javél dukh; i bari rádyma javír mólo piridžala dro kalypén.

14Bede-iléskiro manúš čaljola péskire fujé butiendyr, ne lačhó manúš javéla čalo peskirendyr.

15Prostone-godiakire manušá patiána kažnoné lavéske, ne baré-godiákiro manúš obduminela lačhés kažno šago (lamny).

16Godó manúš daréla i durjola čoripnástyr, ne dylynó sýges xoliasóla i zoralés patiála dre péste.

17Hačkirdo manúš keréla nagod'vares, ne manušés, savó priduminela fuipén, zoralés na kaména.

18Prostone-godiakire manušá doreséna dylnypén syr meknó mištypén, ne baré-godiakirenge manušénge džinybén délape sýrby koróna.

19Čoré manušá bandiakirena šeró angíl lačhende, i fuj manušá angíl čačuné-manušéngiri pórta (vráty).

20Čororé manušés zoralés na kaména až léskire pašatuné manušá, ne barvaleste isyn but drúgi (malá).

21Kon dykhéla vučipnástyr pe péskire pašatuneste, kodová keréla grého; ne bahtaló isyn kodová manúš, kon isyn lačhé-iléskiro (žalinela) ke kodolé, savén pritasavéna.

22Ci na xohavenape odolé, savé priduminena čoripén? Ne kodolé, savé priduminena lačhipén, dykhéna javire manušéndyr drógo lačhipén i patiaibén.

23Kažnoné pharé butiátyr manušéske javéla kófo (pribyl'), ne čhučé (pustone) rakiribnastyr manúš javéla čororó.

24Godé manušá doreséna barvalypén syr koróna, ne dylynin'ko féni péskiro dylnypén.

25Čačunó jakhítko vyrakhela manušéngiro džiibén, ne frento jakhítko rakiréla xohaibén.

26Kon daréla Rástyr-Devléstyr, kodová manúš isyn zoralés terdó, i léskire čhavénge javéla štéto te garadjon.

27Kon daréla Rástyr-Devléstyr, kodová p'jela džiibnáskire ĥanyngatyr, sob (kaj) te riskires krig meribnaskire feliatyr.

28Kralískiro baripén rikirlape pe dová, syr but isyn léste manušá, ne kiéli kralíste isyn nábut manušá, tedy jov našavela saró.

29Manúš, savó liéntes (na sýges) xoliasóla, isyn baró godiari, ne kodová, savéste isyn xačkirdo dúho (fáno), sykavéla pe jakhá péskiro dylnypén.

30Lačhó iló déla džiibén masenge, ne zevlynypén kirniakirela kokalý.

31Kon pritasavela čorores, kodová sýrby obrakirela Ras-Devlés, Savó sozdyjá les. Ne kodová keréla patýv Léske, Savó isyn lačhé-dieskiro ke manušá, kon isyn dre trébima.

32Fuj manušá peréna péskire fuipnastyr, ne čačunó isyn zoralés terdó až dro sámo léskiro meribén.

33Godypén otkhinjola štylés dre baré-godiákiro iló, ne dová, so isyn dre dylynin'konengiro iló, džindló sarénge.

34Čačipén ĥazdéla manušén (narodo), ne grého léla krig patýv kažnoné manušéndyr.

35Králi sykavéla patýv godé dynaríske, ne jov zoralés xoliasóla pe odoléste, savó ladžakirela les.

← Chapter 13 Jump to: Chapter 15 →