Proverbs 27

Romani Baltic Latin (Biblija - Pe Baltitko Romani čib (Romanes) 2019)

← Chapter 26 Jump to: Chapter 28 →

1Na šarpe atasiatune dyvesesa, pal-dová so tu na džinésa, so dyvés janéla túke.

2Mek javír manúš te šarel tut, a na tyró muj; mek te javél čúžo manúš, a na tyré uštá.

3Bar isyn pharó i práho isyn pharovato, ne kiéli dylynó zoralés xoliasóla, davá isyn pharedyr dujendyr.

4Baró xoliakiribén isyn bimanušytko, i xolý isyn trašany, ne kon saštý (moginéla) te terdjol proti baró zevlynypén?

5Te sykaves bang manušéske angíl jakhá isyn fedýr, syr te sykaves patýv čorahanés.

6Dabá (pekaibena) patiaibnytkone malestyr (drugostyr) isyn fedýr vergoskire čamudypnastyr.

7Čalo di na dykhéla i pe avgín, ne bokhalé dieske kažno kirko kotér isyn gudló.

8Syr čirikly, saví lodela péskire gniazdátyr (kufóstyr), adiáke-pac' isyn i manúš, savó lodela péskire štetóstyr.

9Makhiben (mazilki) i gudló thuvliakiriben (kurinyben) zoralés radynena iló, i gudló isyn kažno mal, kon déla godý iléstyr.

10Na mek péskire males, ci tyré-dadéskire males; na džá ke tyré-pšaleskiro kher dro dyvés, kiéli túte isyn bari bída. Fedýr isyn pašatuno, kon isyn pašyledýr ke tu, syr pšal, savó isyn dur.

11Mro čháva! Jav godó i radyn miro iló, sob (kaj) mánge saštý te javél te otphenav kodoléske, savó obrakirela man.

12Baré-godiákiro manúš dykhéla angíl bibáht (bída), i garadjola, a balvalitko manúš džála duredýr i doreséla kára.

13Le ídia kodolestyr, savó jacián jakhitkonesa (poručitieljosa) pal čužoné manušéste; i rikir la syr symadý, kiéli jov isyn jakhítko pal javire džuvliáte rigátyr.

14Kon ĥazdéla šarindoj péskire males zoralé zaniása (glosasa) tasiárles (ránes) pe zlóko (pe ránko), davá moginéla te zaginelpe syr prokošybén léske.

15Pani, so ŭsády (sak) peréla dro bryšyndytko dyvés, i džuvlý, kon usady (sak) čingardelape, isyn šerá (rávnes):

16kon sučhakirela la; odová sýrby obrikirela balvál, i sýrby léskiro čačó vast rikiréla olivítko dzet (jeliejo).

17Sastýr vostrinela sastýr, adiáke-pac' manúš vostrinela lačhipén péskire maleste.

18Kon rakhéla inžyritko kašt (smokovnica), kodová javéla te xal léskiri phabaj; adiáke-pac', kon prirakhela péskire xulás, odová javéla dre patýv.

19Syr dro paní muj sykavéla, savó jov isyn; adiáke-pac' i manušéskiro iló sykavéla, savó manúš isyn.

20Liúno (ado) i Avvadono (mulykano štéto) nijékhvar nane pherdé, adiáke-pac' i manušéskire jakhá nijékhvar nane čale.

21Dre kakávi (kotlo) bilavena rup, a dro bov suvnakái, ne, savó manúš isyn, sykavéla mavlýn (malva), saví phenéna javír manušá.

22Mek tu te toŭčynes (te kures) dylynes dre stupa toŭkačosa, ne usajékh léskiro dylnypén na durjola léstyr,

23Dykh kučes pal péskiro bakrengiro gurto, i pridykh mištés pal péskiri kherítko stada:

24pal-dová so barvalypén nane pe saré viéki, i, kralítko stadyk (koróna) ža na jačélape pe saré ródy?

25Khas ukedena krig i jalý (sviážo) čar sykadjola, i bergitka zelena čarjá skedéna.

26Bakré isyn túke vaš uribén, i buzne (kozly) isyn vaš túke, sob (kaj) te den lové pe feldakiri timín;

27túke javéla te uhtylel (te javél dósi) buznytko (kozlytko) thud vaš tyró xabén, vaš xabén tyré kheritkonenge, i te čaliakiren tyré dynaricen.

← Chapter 26 Jump to: Chapter 28 →