Proverbs 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1Míro čháva! Rikir iló ke miro godypén i band'kir kan ke dová (prišunpe ke miro lavá), syr me ĥaljovava,

2sob (kaj) tu moginésa xor te rozles, sob (kaj) tyré uštá te zrakhen (te rikirenpe) ke džinybén.

3Pal-dová so čužoné-romniakire uštá občhuvenape avginesa i lákire lavá isyn kovledyr olivitkone dzetestyr (aliejostyr),

4ne pe kónco (pe jagóro) joj isyn kirkedyr palynostyr i vostro syr duje-rigitko kurtála (sablia).

5Lákire piré (stópy) lydžána ke meribén, joj štavela angíl ke liúno (ado).

6Sob (kaj) te ĥaljos mištés lákire džiibnáskire dromá, tu nijékhvar na udžinenas len, jone na čačuné (stala).

7Akaná šunén man, čhavé, na džán krig miré moskire lavéndyr.

8Durjon krig dasavé džuvliatyr, na džán pašýl vudár lákire kheréskiro.

9Sob (kaj) tyrí patýv (tyró sastypen) te na piridžal pe javirende, i tyré beršá biileskire manušéske.

10I sob (kaj) javire-theméskire manušá te na pherdjon tyré mištypnasa, i tyré butiarné te na džán dro kher ke čúžo manúš.

11I tu javésa zoralés te tugines pe kónco (pe jagóro), syr tyrí loč i tyré masá jačénape šuké (bizorjákire)

12i tu phenésa: “Syr davá sys, so me bidykcjom sykliakiribén (miro iló na kamdiá), kiéli sykliakirdé man čačipnaske!”

13Syr me na kandyjom miré sykliakiribnaskiren, na pričhudjom kan ke odolé sykliakiribnaskire, savé sykliakirdé man čačipnaske!

14Me sómas pe sámo kónco (jagóro), syr kerdjom fuipén maškír devlytkonende, kaj jone skedenaspe.

15Pi paní péskire venderjatyr (vodojomostyr), i paní, savó thadéla tyré ĥanyngatyr.

16Ci isyn bangé tyré folahara (fontany) te čhuvén javrí paní? Ci isyn bangé-paniengire valny (velny) te thaden javrí pir vulícy (pir gásy)?

17Mek jone te javén jekhdžineskire tyré, mek jone te na javén khetané čužoneske i túke.

18Mek tyrí ĥanýng te javél bahtiakirdy i rádynpe drieván romniása, saví isyn žužy tyré ternypnastyr,

19saví isyn sýrby drógo mirga (lan') i šukár ĥazel', savjakire goža masá te radynen čalés tut usady (sak), saví gudliakirela tyró kamiben.

20Vaš so túke, miro čhavó, te gudliakirespe čužoné džuvliása i te obles čúža masá?

21Raj Devél dykhéla manušéskire dromá, i Jov ublavela dre godý (važynela) saré léskire dromore.

22Fuj manúš kokoró xasjola péskire čoripnástyr, a léskiro grého sýrby šelenca phandela les kokores.

23Jov meréla, pal-dová so léske na uphendle, jov džála krig droméstyr pir péskiro baró dylnypén.

← Chapter 4 Jump to: Chapter 6 →