Proverbs 21

Romani Baltic Latin (Biblija - Pe Baltitko Romani čib (Romanes) 2019)

← Chapter 20 Jump to: Chapter 22 →

1Kralískiro iló isyn dre Ráskire-Devléskire vastá sýrby panitka ručai, so thadena: Jov riskiréla len, syr Léske isyn trej.

2Kažnoné-manušéskiro drom isyn čačunó dre léskire jakhá, ne Raj Devél ublavela (važynela) ile.

3Te kerén čačipén i čačunó séndo isyn kučedyr Ráske-Devléske syr svénta dyibená.

4Jakhá, savé zadenape, phut'kirdo iló-davá isyn momolýtko (svietíl'niko) fujé-manušéngiro, savó isyn grého.

5Dobusovo manúš priduminela dová, so déla pribaripen, ne kodová, savó keréla sygnymasa, javéla dre urieža (ubytko).

6Kon kedela kučipén xohané čibása (čibjasa), odová isyn sýrby sýgno balvál, saví rodéla meribén.

7Nahratyma fujé-manušéngiro xasiakiréla len, pal-dová so jone na kaména te kerén čačó séndo.

8Zlydnia manúš skedelape te kerél čoripén pefromi (smyslosa), ne bidošengire-manušéngire butiá isyn čačuné.

9Fedýr isyn te dživés dro kunto pe kheréskiri stréha (čhakín), syr te javes dro jekh kher džuvliása, saví čingardelape.

10Fuje-manušéngiro di drieván prityrdela bibáht: léskiro pašatuno na lathéla láska dre léskire jakhá.

11Kiéli manúš, savó isyn bipatyvakiro ke javír manušá, sendiakirdo, tedy prostone-godiakire manušá jačénape godedyr, i kiéli sykliakiréna godé manušés, jov kedela džinybén.

12Čačunó manúš pridykhelape ke kher, kaj isyn fuj manúš; ne Devél ravela telé fujé manušén pal léngiro fuipén.

13Kon zaphandela kan, kiéli čororó manúš déla gódla, kodová adiáke-pac' javéla te del gódla čororipnastyr i les na javéna te šunén.

14Dáro, savó délape, sob (kaj) nikón te na dykhél, štyliakirela bari xolý, i myto (vziatka), so délape paló dumo, keréla baró xoliakiribén.

15Davá isyn rádyma vaš čačuné manušéske te kerél pir čačipén, ne xasiakiriben vaš fujé manušéske.

16Kon džála dre rig čačuné droméstyr, kodová javéla te otkhinjol mulenca pe skedyibén.

17Kon kaméla lokho džiibén, kodová javéla čororó manúš; konéske isyn pir iló mol i olivítko dzet (jeliejo), kodová na javéla barvaló.

18Fuj manúš javéla syr vykinybén pal čačuneste, i napatiaibnaskiro pal devlytkoneste.

19Fedýr te dživás pe čhučí phuv, syr xoliamé džuvliása, saví čingardelape.

20Kaj dživéla godó manúš, odój isyn kučipén i olivítko dzet, ne dylynó rozmekela len.

21Kon rodéla i džála duredýr pir čačipén i lačhé-ilýtkima, odová manúš lathéla džiibén, čačipén i patýv.

22Godó manúš ublavela (važynela) fóro, kaj zoralé manušá isyn, i phagiréla telé foróskiro rikiriben, dro savó jone zoralés patiána.

23Kon prirakhela péskiro muj i čib, odová manúš rakhéla péskiro džiibén pharipnastyr.

24Phut'kirdo manúš, i manúš, savó zadelape, kharélape bipatyvakiro, jov keréla saró xoliamé phut'kiribnasa.

25Dová, so zoralés trej kirne-masengire manušéske, muliakiréla les, pal-dová so léskire vastá otphenenape te kerén pharí butý;

26jov isyn ĥálko i skempo saró dyvés, ne čačunó manúš déla i na tanginela.

27Fuje-manušéngiro svénto dyibén vykharela džungalypén (brytkima), pe kicý džungaledyr (brytkedyr) isyn davá čuin, kiéli jov janéla svénto dyibén, fujes dumindoj.

28Xohanó jakhítko xasjola (peréla), ne manúš, savó rakiréla saró, so jov džinéla, javéla te rakirél usady (sak).

29Fuj manúš kaštaliakirela péskiro muj, ne devlýtko zoralés džinéla péskiro drom.

30Ni godypén, ni ĥalyibén, i ni savó godypén na terdjona proti Raste-Devléste.

31Gres skedéna vaš maribnýtko dyvés, ne zrakhibén javéla Rástyr-Devléstyr.

← Chapter 20 Jump to: Chapter 22 →