Proverbs 22

Romani Baltic Latin (Biblija - Pe Baltitko Romani čib (Romanes) 2019)

← Chapter 21 Jump to: Chapter 23 →

1Lačhó lav isyn drogedyr (kučedyr) baré barvalypnastyr, i lačhí mavlýn (malva) isyn kučedyr rupéstyr i suvnakástyr.

2Barvaló i čororó manúš dykhenape jekh jekhésa: Raj Devél sozdyjá len dujén.

3Baré-godiákiro manúš dykhéla angíl bibáht (bída) i garadjola, ne prosto džála angíl i javéla sendiakirdo.

4Kon kandéla, i daréla Rástyr-Devléstyr, kodová doreséla barvalypén, patýv i džiibén.

5Phusadytka xrústy (tierny) i feliá isyn pe drom, kaj isyn mižeh manúš; a kon prirakhela péskiro di, kodová javéla te durjol léndyr.

6Sykliákir terné čhavés adiáke, syr léske trej duredýr te dživél, i, kiéli jov javéla phuró, jov na džála krig dalé droméstyr.

7Barvaló rikiréla zor pe čororeste: i kon isyn vužlo, odová isyn dynári kodoléske, savó pokerdia (konéske jov isyn bangó).

8Kon počhuvela (sieinela) načačipén syr giv pe félda, kodová keréla bibáht (bída) péske, i léskiri zor dre xolý končynelape.

9Kon isyn barvalé-iléskiro, kodová javéla bahtiakirdó, pal-dová so jov déla péskiro maró čororenge.

10Trade krig adasaves, savó isyn bipatyvakiro ke javír manušá, i čingárd durjola; i košybén, i obrakiriben pirijačena.

11Kon tyrdelape ke žužó iló, i konéste isyn bahtalypén pe léskire uštá, kadasavé manušéske králi isyn léskiro mal.

12Ráskire-Devléskire jakhá rakhena džinybén, ne Jov ravela telé lavá, savé isyn napatiaibnaskire manušéndyr.

13Nabutitko (kirne-maséngiro) manúš phenéla: “Ščer (liévo) isyn javrí! Me javáva muliakirdo, pe vulícy (pe gásy).”

14Fuje-džuvliengiro muj isyn xor ĥanbín (jama); peréla odorík kodová manúš, pe konéste Raj Devél xoliasóla.

15Dylnypén priphandiape ke čhavéskiro iló, ne ran (rozga), savjása sykliakiréna pharés, tradéla dylnypén krig.

16Kon tasavela (dukhavela) čorores te barjakirel péskiro barvalypén; i kodová, kon déla barvaleske, kadasavó manúš javéla čororó.

17Pričhúv péskiro kan i pošun god'varé-manušéngire lavá, i bandiakir tyró iló ke miro džinybén;

18pal-dová so kuč javéla, kóli tu javésa te rikirespe ke jone péskire ilésa, sob (kaj) jone te javén adiáke-pac' skedyné pe tyré uštá.

19Sob (kaj) túte te javél zoraló patiaibén dre Raste-Devléste, me sykliakirava tut i adadyvés, i tu rípir.

20Ci me na čhindjom túke trin móly naj kučedyr godé i džinybnytka lavá,

21sob (kaj) me moginavas te piridav túke patiaibnytka lavá pal čačipén, sob (kaj) tu moginesas te otphenes pale patiaibnytkone lavénca kodolénge, savé bičhavena tut.

22Na čor čororestyr, pal-dová so jov isyn čororó, na tasav odolén, savén pritasavéna pašýl pórta:

23pal-dová so Raj Devél zaterdjola pal léngiro réndo, i léla krig kodolengiro di, savé občorena len.

24Na jav mal (na družyn) xolynakire manušéske, na rákir [na džá-ju.o.] jaglune manušésa,

25sob (kaj) tu te na sykljos, syr jov keréla, i sob (kaj) tu te na čhuvés felý vaš tyró di.

26Na jav kadasavé manušésa, savó marela pir vastá dre symadý (zalogo), ci savó isyn dudvalo/iakhítko (svidietieljo) pal vužlypena (dlugi);

27pal-dová so, kóli nane túte sósa te pleskires, to tedy tútyr otlena tyrí pasindly (postiel').

28Na piričhuv ĥaratuny špéra pe phuv, saví tyré dadá čhudé.

29Ci tu dykhésa manušés, savó dobusoves keréla péskiri butý? Jov javéla te terdjol angíl kral'jénde; jov na javéla te terdjol angíl prostone (napatyvale) manušénde.

← Chapter 21 Jump to: Chapter 23 →