Nehemiah 10

Shan

← Chapter 9 Jump to: Chapter 11 →

1ၶဝ်ၸိူဝ်းဢၼ်တွၵ်ႇတၼ်းသိၵ်ႈၼၼ်ႉၸမ်ႉ၊ ပဵၼ် ၼေႇႁမီႉ ၊ ၶုၼ်ဢၼ်ဢုပ်ႉၵႃႈၼိူဝ်မိူင်း ဢၼ်ပဵၼ်လုၵ်ႈၸၢႆး ႁႃႇၶလီႉ ၊ ၶဝ်ၸိူဝ်းဢၼ်ပဵၼ်ယိတ်ႈပရေႃးႁဵၵ်ႈ ဢၼ်ဝႃႈ ၸီႉတၵီႉယႃႉ ၊-

2ၸႃႇရႃႇယႃႉ၊ ဢႃႇၸရီႉ၊ ယေႇရမီႉ ၊-

3ပႃႇသူႉရႃႉ၊ ဢႃႇမရီႉ၊ မႃႇလၶီႉယႃႉ ၊-

4ႁတ်ႉတုတ်ႉ၊ သေးပၼီႉ၊ မႃႇလုၵ်ႉ ၊-

5ႁႃႇရိမ်း၊ မေႇရမုတ်ႉ၊ ဢေႃးပတီႉ ၊-

6တၢၼ်ႇယေႇလႃႉ၊ ၵိၼ်ႇၼေႇသုၼ်ႇ၊ ပႃႇရုၵ်ႉ ၊-

7မေႇသူႉလမ်ႇ၊ ဢၽီႉယႃႉ၊ မီႉယမိၼ်း ၊-

8မႃႇၸီႉ၊ ပီႉလၵေႇ၊ သေႇမႃႇယႃႉ ၸိူဝ်းၼၼ်ႉ၊-

9ၶဝ်ၸိူဝ်းဢၼ်ပဵၼ်ၵူၼ်းမဵဝ်း လေႇဝီႉ ဢၼ်ဝႃႈ ယေႃးသူႉ လုၵ်ႈၸၢႆး ဢႃႇၸၼီႉ ပႃးၼိုင်ႈ၊ ပီႉၼုၺ်ႇ လုၵ်ႈၸၢႆး ႁေႇၼတပ်ႉ ပႃးၼိုင်ႈ၊ ၵႃႇတမေႇလႃႉ ပႃးၼိုင်ႈ၊-

10ၼွင်ႉၸၢႆးၶဝ် သေးပၼီႉ၊ ႁေႃးတီႉယႃႉ၊ ၵေႇလီႉတႃႉ၊ ပေႇလႃႇယႃႉ၊ ႁႃႇၼၼ်ႇ ၊-

11မီႉၶႃႇ၊ ရေႇႁုပ်ႉ၊ ႁႃႇသပီႉ ၊-

12ၸၵ်ႉၵူႉရႃႉ၊ သေႇရၽီႉ၊ သေႇပၼီႉ ၊-

13ႁေႃးတီႉယႃႉ၊ ပႃႇၼီႇ၊ ပေႇၼီႉၼူႉ ၸိူဝ်းၼၼ်ႉ၊-

14ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၵူၼ်းတင်းလၢႆ၊ ဢၼ်ဝႃႈ ပႃႇရုတ်ႉ၊ ပႃႇႁတ်ႉမေႃႇၽႃႉ၊ ဢေႇလမ်ႇ၊ ၸတ်ႉတူႉ၊ ပႃႇၼီႇ ၊-

15ပုၼ်ႇၼီႉ၊ ဢႃႇၸၵတ်ႉ၊ ပေႇပေႇ ၊-

16ဢတေႃးၼီႉယႃႉ၊ ပီႉၵဝေႇ၊ ဢႃႇတိၼ်ႇ ၊-

17ဢႃႇတႃႇ၊ ႁီႉၸၵီႉယႃႉ၊ ဢတ်ႉၸူႉရႃႉ ၊-

18ႁေႃးတီႉယႃႉ၊ ႁႃႇသုမ်ႇ၊ ပေႇၸေႇ ၊-

19ႁႃႇရိပ်ႉ၊ ဢႃႇၼသုတ်ႉ၊ ၼေႇပေႇ ၊-

20မႃႇၵပျႃႇသႃႉ၊ မေႇသူႉလမ်ႇ၊ ႁေႇၸီႉရႃႉ ၊-

21မေႇသၸႃႉပေႇလႃႉ၊ ၸႃႇတုၵ်ႉ၊ ယႃႇတႂႃႇ ၊-

22ပေႇလတီႉ၊ ႁႃႇၼၼ်ႇ၊ ဢၼႃႇယႃႉ ၊-

23ႁေႃးသေႇ၊ ႁႃႇၼၼီႉ၊ ႁႃႇသုပ်ႉ ၊-

24ႁႃႇလေႃးႁိတ်ႉ၊ ပီႉလႁႃႉ၊ သေႃးပိၵ်ႉ ၊-

25ရေႇႁုမ်ႇ၊ ႁႃႇသႃႇပၼႃႉ၊ မႃႇသေႇယႃႉ ၊-

26ဢႁီႉယႃႉ၊ ႁႃႇၼၼ်ႇ၊ ဢႃႇၼၼ်ႇ ၊-

27မႃႇလုၵ်ႉ၊ ႁႃႇရိမ်း၊ ပႃႇၼႃႇ ၸိူဝ်းၼၼ်ႉဢေႃႈ။

28ၵူၼ်းတင်းလၢႆဢၼ်ယင်းၵိုတ်းယင်းၵျၢၼ်ႇလႂ်၊ ယိတ်ႈပရေႃးႁဵၵ်ႈလႂ်၊ ၵူၼ်းမဵဝ်း လေႇဝီႉ လႂ်၊ ၶဝ်ၸိူဝ်းဢၼ်ပႂ်ႉၽၵ်းတူလႂ်၊ ၶဝ်ၸိူဝ်းဢၼ်မေႃႁဵတ်းၵႂၢမ်းလႂ်၊ ၶႃႈၽြႃးလႂ်၊ ၶဝ်ၵႃႈဢၼ်ၽၢတ်ႇၽႄၵၼ် တင်းၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼၼ်ႉ ႁႂ်ႈလႆႈၵမ်ၵျၢင်ႉတြႃး ၽြႃးပဵၼ်ၸဝ်ႈၸိူဝ်းၼၼ်ႉလႂ် ဢိၵ်ႇလူၺ်ႈၵၼ်တင်းမေးၶဝ် လုၵ်ႈၸၢႆးၶဝ် လုၵ်ႈယိင်းၶဝ်လႂ်၊ ၶဝ်ၸိူဝ်းဢၼ် ၸၢင်ႈႁူႉၸၢင်ႈၸႅင်ႈလႄႈ မီးၺၢၼ်ႇတင်းသဵင်ႈတင်းလူင်လႂ်ၸိူဝ်းၼၼ်ႉ၊-

29ၽွမ်ႉႁူမ်ႈလူၺ်ႈၵၼ်တင်းပီႈၼွင်ႉၶဝ်၊ မူးမၢတ်ႈၽွင်းမိူင်းၶဝ်ယူႇသေလႄႈ ဢွၼ်ၵၼ်ႁဵတ်းတၢင်းဢၼ်ၵိၼ်ႇဢၼ်ဝႃႈ ဢိၵ်ႇတင်းတၢင်းဢၼ်ဝႆႉသဵတ်ႈၸႃႇၵတီႉ လူၺ်ႈလွင်ႈဢၼ်တၵ်းၸွမ်းသဵၼ်ႈတၢင်းတြႃး ၽြႃးပဵၼ်ၸဝ်ႈဢၼ်မၼ်းၸဝ်ႈ ဢဝ် မူဝ်းသေႇ ၶႃႈၽြႃးပဵၼ်ၸဝ်ႈဢၢပ်ႈဝႆႉၼၼ်ႉ လွင်ႈဢၼ်တၵ်းပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈႁဝ်းၶႃႈ ထႃႇဝရႃႉၽြႃး ဢိၵ်ႇတင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉ၊ ထုင်းၽိင်ႈတြႃးမၼ်းၸဝ်ႈ ၵႃႈမီးၸိူဝ်းၼၼ်ႉ၊-

30လွင်ႈဢၼ်ႁဝ်းၶႃႈယင်း ဢမ်ႇဢဝ်လုၵ်ႈယိင်းႁဝ်းၶႃႈ ပၼ်တီႈၵူၼ်းဝၢၼ်ႈၵူၼ်းမိူင်းၸိူဝ်းၼႆႉ၊ ယင်းဢမ်ႇသိမ်းဢမ်ႇဢဝ်လုၵ်ႈယိင်းၵူၼ်းဝၢၼ်ႈၵူၼ်းမိူင်းၸိူဝ်းၼႆႉပုၼ်ႈလုၵ်ႈၸၢႆးႁဝ်းၶႃႈလႄႈတၵ်းယူႇ။-

31လွင်ႈဢၼ်ပေႃးၵူၼ်းဝၢၼ်ႈၵူၼ်းမိူင်းၸိူဝ်းၼႆႉ ဢဝ်ဢုၵ်ႉၸႃႇၶူဝ်းလဵင်း၊ တၢင်းၵိၼ်တၢင်းၶူပ်းမႃးၼႂ်းဝၼ်းၵမ်သိၼ် ႁႂ်ႈလႆႈၶၢႆၸိုင်၊ ပဵၼ်ဝၼ်းၵမ်သိၼ်သေဢမ်ႇဝႃႈ၊ ဝၼ်းထမ်ႇမႃႉတင်းဝၼ်းသေဢမ်ႇဝႃႈ၊ ႁဝ်းၶႃႈတၵ်းဢမ်ႇသိုဝ်ႉဢမ်ႇလႅၵ်ႈ၊ ဢိၵ်ႇတင်းလွင်ႈတၢင်းဢၼ် ႁဝ်းၶႃႈတၵ်းဢမ်ႇႁဵတ်းႁႆႊႁဵတ်းၼႃး ၼႂ်းပီႊသတ်ႉတမႃႉၼၼ်ႉလႄႈ ယင်းဢမ်ႇႁဵတ်းပႄႉႁဵတ်းၼႅင်ႇ ယွၼ်းဢဝ်ၼီႈဢဝ်ၶွတ်ႇလႄႈ တၵ်းယူႇၼၼ်ႉဢေႃႈ။

32လိူဝ်သေၼၼ်ႉ၊ ႁဝ်းဢွၼ်ၵၼ်ၸီႇယၢင်ႇႁဵတ်းထုင်းႁဵတ်းၽိင်ႈဝႆႉပုၼ်ႈတူဝ်ႁဝ်း လူၺ်ႈလွင်ႈဢၼ်ႁဝ်းၵူႈၵေႃႉၵူႈၵူၼ်းယေႈပီႊယေႈပီႊ ယေႈၵေႃႉတၵ်းလႆႈပၼ်ငိုၼ်းၵျၢပ်ႈ သၶေးလႃႉ သၢမ်ပုၼ်ႈပုၼ်ႈၼိုင်ႈ ပုၼ်ႈဢၼ်တၵ်းၵိုတ်ႉႁၢပ်ႇဢမူႉႁိူၼ်းၽြႃးပဵၼ်ၸဝ်ႈႁဝ်း၊-

33ဢၼ်ဝႃႈ ၸႃႉၸဵမ်ပုၼ်ႈၶဝ်ႈမုၼ်းၽၢႆႇၼႃႈၸဝ်ႈ ပုၼ်ႈၶိူင်ႈပုၵ်ႈၸေႃႇၽေႃးၸဵၼ်ႇဢၼ်သေႇသေႇ၊ ပုၼ်ႈယိတ်ႈဢၼ်တုတ်ႇၽႆးဢၼ်သေႇသေႇ၊ ဢိၵ်ႇတင်းဢၼ်ပဵၼ်ၼႂ်းဝၼ်းၵမ်သိၼ်လႂ် တင်းဝၼ်းလိူၼ်မႂ်ႇလႂ်ၼၼ်ႉ၊ ပုၼ်ႈပွႆးထမ်ႇမႃႉလႂ်၊ ပုၼ်ႈၶိူင်ႈယိပ်းၶိူင်ႈၵႅမ်းဢၼ်မူတ်းၸၢင်ႇလႂ်၊ ပုၼ်ႈယိတ်ႈဢၼ်ၽေႇဢပႅတ်ႈ ႁႂ်ႈလႆႈၽေႇဢပႅတ်ႈမဵဝ်း ဢီႉသရေႇလႃႉ ဢိၵ်ႇတင်းပုၼ်ႈဢမူႉႁိူၼ်းၽြႃးပဵၼ်ၸဝ်ႈႁဝ်းၼၼ်ႉၵူႈၸိူဝ်ႉၵူႈပိူင်ၼၼ်ႉဢေႃႈ။-

34ႁဝ်းဢၼ်ဝႃႈ ယိတ်ႈပရေႃးႁဵၵ်ႈလႂ် ၵူၼ်းမဵဝ်း လေႇဝီႉ လႂ် တင်းၵူၼ်းဝၢၼ်ႈၵူၼ်းမိူင်းလႂ် ဢွၼ်ၵၼ်တူၵ်းၸႃႇၵွၵ်ႈလူၺ်ႈလွင်ႈၶိူင်ႈပုၵ်ႈၸေႃႇ ၽိုၼ်းႁႂ်ႈလႆႈဢဝ်မႃးၵႃႈတီႈႁိူၼ်းၽြႃးပဵၼ်ၸဝ်ႈ ၸွမ်းလူၺ်ႈမဵဝ်းပူႇမဵဝ်းပေႃႈႁဝ်း ၼႂ်းၶိင်ႇဢၼ်မၵ်းၶိၼ်းဝႆႉၼၼ်ႉၵူႈပီႊၵူႈပီႊ ႁႂ်ႈလႆႈသႂ်ႇၽႆးၵႃႈၼိူဝ်ယိတ်ႈပလၢင်ႇ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ၸွမ်းၵႃႈၼင်ႇဢၼ်တႅမ်ႈဝႆႉ ၼႂ်းၵျၢမ်းလိၵ်ႈပိင်းၺၢပ်ႈတီႉၼၼ်ႉ၊-

35ဢိၵ်ႇတင်း လွင်ႈဢၼ်တၵ်းလႆႈဢဝ်မၢၵ်ႇလိၼ်ႁူင်းလိၼ်ႁဝ်း ဢၼ်မၢၵ်ႇဢွၼ်တၢင်း တင်းမၢၵ်ႇမႆႉမၢၵ်ႇတွၵ်ႇဢၼ်မၢၵ်ႇဢွၼ်တၢင်းၵူႈၸိူဝ်ႉၵူႈပိူင် မႃးၵႃႈတီႈႁိူၼ်းထႃႇဝရႃႉၽြႃးၵူႈပီႊၵူႈပီႊ၊-

36တင်းလွင်ႈဢၼ် တၵ်းလႆႈဢဝ်လုၵ်ႈၸၢႆးတူၼ်ႈႁဝ်း တင်းတရိၵ်ႈသၢၼ်ႇႁဝ်း ၸွမ်းၵႃႈၼင်ႇဢၼ်တႅမ်ႈဝႆႉ ၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉၼၼ်ႉ ဢိၵ်ႇတင်းတူဝ်ဢၼ်ၵိူတ်ႇလဵင်ႉဢွၼ်တၢင်း ၵႃႈၼႂ်းၽုင်သူဝ်းၽုင်ဝူဝ်းႁဝ်းၸိူဝ်းၼၼ်ႉ မႃးၵႃႈတီႈႁိူၼ်းၽြႃးပဵၼ်ၸဝ်ႈႁဝ်းၸူးၵႃႈတီႈယိတ်ႈပရေႃးႁဵၵ်ႈ ဢၼ်ပႂ်ႉဢမူႉႁိူၼ်းၽြႃးပဵၼ်ၸဝ်ႈႁဝ်းၸိူဝ်းၼၼ်ႉ

37တင်းလွင်ႈဢၼ်တၵ်းလႆႈဢဝ်ၶဝ်ႈမုၼ်းလိပ်းႁဝ်း ဢၼ်ႁဵတ်းဢွၼ်တၢင်း၊ ၶိူင်ႈပုၵ်ႈၸေႃႇႁဝ်းဢၼ်ယုၵ်ႉယွင်ႈ၊ မၢၵ်ႇမႆႉမၢၵ်ႇတွၵ်ႇႁဝ်းၵူႈၸိူဝ်ႉၵူႈမဵဝ်း၊ ၼမ်ႉၸပိတ်ႈ၊ ၼမ်ႉမၼ်း မႃးၸူးတီႈယိတ်ႈပရေႃးႁဵၵ်ႈတင်းလၢႆ ၵႃႈတီႈလုၵ်းႁိူၼ်းၽြႃးပဵၼ်ၸဝ်ႈႁဝ်း ဢိၵ်ႇတင်းလွင်ႈဢၼ်တၵ်းလႆႈဢဝ် မၢၵ်ႇလိၼ်ႁူင်းလိၼ်ႁဝ်း သိပ်းပုၼ်ႈပုၼ်ႈၼိုင်ႈ မႃးတီႈၵူၼ်းမဵဝ်း လေႇဝီႉ တင်းလၢႆ ၵွပ်ႈပိူဝ်ႈဢၼ်ၵူၼ်းမဵဝ်း လေႇဝီႉ ၸိူဝ်းၼၼ်ႉ တၵ်းလႆႈၶၢမ်ႇဢဝ်သိပ်းပုၼ်ႈပုၼ်ႈၼိုင်ႈ ၵႃႈၼႂ်းဝၢၼ်ႈၼႂ်းဝဵင်း တီႈဢၼ်ႁဝ်းႁဵတ်းႁႆႊႁဵတ်းၼႃးၵႃႈမီးၼၼ်ႉဢေႃႈ။-

38ယၢမ်းမိူဝ်ႈဢၼ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ၶၢမ်ႇဢဝ်သိပ်းပုၼ်ႈပုၼ်ႈၼိုင်ႈၼၼ်ႉၸိုင်၊ ယိတ်ႈပရေႃးႁဵၵ်ႈ မဵဝ်း ဢႃႇရုၼ်ႇ တၵ်းလႆႈမီးလူၺ်ႈၵၼ်တင်းၵူၼ်းမဵဝ်း လေႇဝီႉ ၸိူဝ်းၼၼ်ႉဢေႃႈ။ ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ တၵ်းလႆႈဢွၼ်ၵၼ်ၼုၵ်ႈဢွၵ်ႇသိပ်းပုၼ်ႈပုၼ်ႈၼိုင်ႈသေၵႃႈၼႂ်းသိပ်းပုၼ်ႈပုၼ်ႈၼိုင်ႈၼၼ်ႉလႄႈ ဢဝ်သႂၢင်းၶဝ်ႈၵႃႈၼႂ်းႁိူၼ်းၽြႃးပဵၼ်ၸဝ်ႈႁဝ်း ၵႃႈၼႂ်းလုၵ်းတင်းလၢႆ ၵႃႈၼႂ်းတိူၵ်ႈၽၼ်ႇတႃႇဢေႃႈ။-

39ၵူၼ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆ တၵ်းလႆႈဢွၼ်ၵၼ်ဢဝ်ၶိူင်ႈပုၵ်ႈၸေႃႇ ၶဝ်ႈသၢၼ်ၶဝ်ႈပိူၵ်ႇ၊ ၼမ်ႉၸပိတ်ႈဢၼ်မႂ်ႇ၊ ၼမ်ႉမၼ်းပုၼ်ႈဢၼ်တၵ်းယုၵ်ႉယွင်ႈၼၼ်ႉ သႂၢင်းသႂ်ႇၶဝ်ႈၵႃႈၼႂ်းလုၵ်းတီႈဢၼ် ၶိူင်ႈပိူင်ထႃႇၼႃႉ တီႈမူတ်းၸၢင်ႇလႂ်၊ ယိတ်ႈပရေႃးႁဵၵ်ႈဢၼ်ပႂ်ႉဢမူႉၸဝ်ႈလႂ်၊ ၶဝ်ၸိူဝ်းဢၼ်ပႂ်ႉၽၵ်းတူလႂ်၊ ၶဝ်ၸိူဝ်းဢၼ်မေႃႁဵတ်းၵႂၢမ်းလႂ် ၸိူဝ်းၼၼ်ႉမီးၼၼ်ႉဢေႃႈ။ ႁဝ်းတၵ်းဢမ်ႇပႅတ်ႈႁိူၼ်းၽြႃးပဵၼ်ၸဝ်ႈႁဝ်းဝႆႉ။

← Chapter 9 Jump to: Chapter 11 →