Nehemiah 9 — Shan

1ၼႂ်းလိူၼ်ၼၼ်ႉ သၢဝ်းသီႇဝၼ်းၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ၵမ်တၢင်းၵိၼ်ယူႇ၊ ၼုင်ႈမႆၶူဝ်းၼုင်ႈၼင်ပေႃယူႇ၊ ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်တူဝ်ၸဝ်ႈၵဝ်ႇယူႇသေလႄႈ ၸူႉၵၼ်တုမ်ၵၼ်ဢေႃႈ။-

2မိူဝ်ႈၼၼ်ႉၶဝ်ၸိူဝ်းဢၼ်ပဵၼ်မဵဝ်း ဢီႉသရေႇလႃႉ ၸႅတ်ႈၸႅတ်ႈၼၼ်ႉ ဢွၼ်ၵၼ်ၽႄတူဝ်ၸဝ်ႈၵဝ်ႇ ၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးၼၼ်ႉသေလႄႈ ၽုၺ်ႇဢွၵ်ႇၼႄပျႃးဢပႅတ်ႈၶဝ် ဢိၵ်ႇတင်းဢပႅတ်ႈပူႇၶဝ်မွၼ်ႇၶဝ်ဢေႃႈ။-

3ၶဝ်ဢွၼ်ၵၼ်ၸုၵ်းယူႇၵႃႈၼႂ်းတီႈယူႇတူဝ်ၸဝ်ႈၵဝ်ႇသေလႄႈ ၽတ်းၵျၢမ်းလိၵ်ႈပိင်းၺၢပ်ႈတီႉထႃႇဝရႃႉၽြႃး ၽြႃးပဵၼ်ၸဝ်ႈၶဝ် ၼႂ်းမိုဝ်ႉဝၼ်းသီႇပုၼ်ႈပုၼ်ႈၼိုင်ႈဢေႃႈ။ ၶဝ်ဢွၼ်ၵၼ်ၽုၺ်ႇဢွၵ်ႇၼႄပျႃးတွင်းပၢၼ်ႇဢပႅတ်ႈလႄႈ ၵူဝ်းၵႂၢႆႇႁဵတ်းဝၢတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈၶဝ် ၼႂ်းမိုဝ်ႉဝၼ်းသီႇပုၼ်ႈပုၼ်ႈၼိုင်ႈဢေႃႈ။

4မိူဝ်ႈၼၼ်ႉ ယေႃးသူႉ၊ ပႃႇၼီႇ၊ ၵႃႇတမေႇလႃႉ၊ သေးပၼီႉ၊ ပုၼ်ႇၼီႉ၊ သေႇရၽီႉ၊ ပႃႇၼီႇ၊ ၶေးၼၼီႉ ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈၼိူဝ်ၶၼ်ႈလႆလႄႈ ႁဵတ်းတင်းသဵင်ဢၼ်ယႂ်ႇၼႃႇ ႁွင်ႉႁႃထႃႇဝရႃႉၽြႃး ၽြႃးပဵၼ်ၸဝ်ႈၶဝ်ဢေႃႈ။-

5လႆႈသမ်ႉ ယေႃးသူႉ၊ ၵႃႇတမေႇလႃႉ၊ ပႃႇၼီႇ၊ ႁႃႇသႃႉပၼီႉ၊ သေႇရၽီႉ၊ ႁေႃးတီႉယႃႉ၊ သေးပၼီႉ၊ ပေႇသႁီႉ ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်မွၵ်ႇလၢတ်ႈလႄႈဝႃႈ၊ ဢွၼ်ၵၼ်လုၵ်ႉလႄႈ ယွင်ႈယေႃးပၼ်တၢင်းလီတီႈထႃႇဝရႃႉၽြႃး ၽြႃးပဵၼ်ၸဝ်ႈသူလႄႈဝႃႈ၊ ႁႂ်ႈမၼ်းၸဝ်ႈမီးမင်ႇၵလႃႇသိုပ်ႇသိုပ်ႇတၢမ်းတၢမ်းတႃႇသေႇဢမ်ႇထၢတ်ႇသေၵမ်းလူၺ်ႈ၊ ဝႃႈၼင်ႇၼႆတႃႉ။ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်း ဢၼ်ယႂ်ႇသုင်လိူဝ်တွၼ်းၼႃႇသေ တၢင်းဢၼ်ပၼ်တၢင်းလီ၊ တၢင်းဢၼ်ယွင်ႈယေႃးၵူႈၸိူဝ်ႉၵူႈမဵဝ်းလႄႈ မုၼ်ၽုင်းယႂ်ႇၼၼ်ႉ မီးမင်ႇၵလႃႇသေၵမ်းလူၺ်ႈ။-

6ၸဝ်ႈႁဝ်းဢၼ်ဝႃႈ ၸဝ်ႈႁဝ်းၵူၺ်း ပဵၼ်ထႃႇဝရႃႉၽြႃးတီႈၶႃႈဢေႃႈ။ ၸဝ်ႈႁဝ်းႁဵတ်းပဵၼ်ၵၢင်ႁၢဝ်ဢၼ်ဝႃႈ ၵၢင်ႁၢဝ်ဢၼ်သုင်ၼႃႇသေပိူၼ်ႈ ဢိၵ်ႇတင်းပူဝ်ႇပႃႇမၼ်းၵႃႈမီး၊ လိၼ်မိူင်းဢိၵ်ႇတင်း ၵႃႈဢၼ်မီးၵႃႈၼိူဝ်မၼ်း၊ ပၢင်ႇလၢႆႇဢိၵ်ႇတင်းၵႃႈဢၼ်မီးၵႃႈၼႂ်းမၼ်းၼၼ်ႉသေလႄႈ ပႂ်ႉလူတူၺ်းလုမ်းလႃးယူႇ ၵူႈၸိူဝ်ႉၵူႈပိူင်တီႈၶႃႈဢေႃႈ။ ပူဝ်ႇပႃႇၵၢင်ႁၢဝ်ၵႃႈမီးၼၼ်ႉ ဢွၼ်ၵၼ်ၵူဝ်းၵႂၢႆႇၸဝ်ႈႁဝ်းတီႈၶႃႈဢေႃႈ။-

7ၸဝ်ႈႁဝ်းပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်လိူၵ်ႈၵဵပ်းဢဝ် ဢႃႇပြမ်ႇ လႄႈ ႁွင်ႉဢဝ်မၼ်းဢွၵ်ႇသေၼႂ်းဝဵင်း ဢူႉရႃႉ မိူင်း ၶႃႇလတေး မႃးသေယဝ်ႉ၊ တၢင်ႇပၼ်ၸိုဝ်ႈမႂ်ႇသဵင်မႂ်ႇ ဢႃႇပြႃႇႁၢမ်ႇ လႄႈ၊-

8ထူပ်းႁၼ်ၸႂ်သၽေႃးမၼ်း ပဵၼ်ဢၼ်သိုဝ်ႈဢၼ်လီၵႃႈတီႈၽၢႆႇၼႃႈၸဝ်ႈႁဝ်းလႄႈ ႁဵတ်းပတီႉၺိၺ်ႇလူၺ်ႈၵၼ်တင်းမၼ်း လူၺ်ႈလွင်ႈဢၼ်ၸဝ်ႈႁဝ်း တၵ်းဢဝ်မိူင်းၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ဢႃႇမေႃးရီႉ ၊ ၵူၼ်း ၽေႇရၸီႉ ၊ ၵူၼ်း ယေႇပူႉသီႉ ၊ ၵူၼ်း ၵီႉရၵႃႇသီႉ ၸိူဝ်းၼၼ်ႉ ပၼ်တီႈမဵဝ်းၸိူဝ်ႉၶိူဝ်းမၼ်းၼၼ်ႉ သဵတ်ႈၸႃႇၸဝ်ႈႁဝ်းဢမ်ႇလူႉ ၵွပ်ႈပိူဝ်ႈဢၼ်ၸဝ်ႈႁဝ်း ဢၼ်သိုဝ်ႈလီတေႃႇလီၼၼ်ႉ တီႈၶႃႈဢေႃႈ။-

9ၸဝ်ႈႁဝ်းႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ပူႇမွၼ်ႇၶႃႈၸဝ်ႈႁဝ်းၸိူဝ်းၼၼ်ႉလႆႈၶၢမ်ႇၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈငိၼ်းသဵင်ဢၼ်ၶဝ်ႁွင်ႉသႅၼ်ႇ ၵႃႈတီႈႁိမ်းပၢင်ႇလၢႆႇ ဢေႇတုမ်ႇ ၼၼ်ႉတီႈၶႃႈဢေႃႈ။-

10ၸဝ်ႈႁဝ်းၼႄပျႃးၼီႉမိၵ်ႈလၢၵ်ႈၶၼႃႇလႂ်၊ လွင်ႈတၢင်းဢၼ်လီဢၢမ်းလႂ် ၵႃႈၼိူဝ် ၽႃႇရေႃး ဢိၵ်ႇတင်းၶႃႈမၼ်းၵူၼ်းမၼ်း တင်းသဵင်ႈတင်းလူင် ၵူၼ်းဝၢၼ်ႈၵူၼ်းမိူင်းမၼ်း တင်းသဵင်ႈတင်းလူင် ၵွပ်ႈပိူဝ်ႈဢၼ်ၸဝ်ႈႁဝ်းႁူႉလွင်ႈဢၼ် ၶဝ်ၸွၵ်ႇၵႃးလူလၢႆ ႁဵတ်းပႄႉႁဵတ်းၼႅင်ႇၶဝ်ၼၼ်ႉလႄႈ၊ သတၢင်းသဵင်ၶၢဝ်ႇၸဝ်ႈႁဝ်း ၸွတ်ႇသႃႈႁူင်ႁၢင်းယူႇ တေႃႇထိုင်ႁွတ်ႈဝၼ်းမိူဝ်ႈၼႆႉတီႈၶႃႈဢေႃႈ။-

11ၸဝ်ႈႁဝ်းၽႃႇၼမ်ႉပၢင်ႇလၢႆႇ ၵႃႈတီႈၽၢႆႇၼႃႈၶဝ်ၼၼ်ႉ ႁႂ်ႈၶဝ်ၼၼ်ႉ လႆႈပႆၵႂႃႇၵႃႈၼိူဝ်လိၼ် ၵႃႈၼႂ်းၵၢင်ပၢင်ႇလၢႆႇတီႈၶႃႈဢေႃႈ။ ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၸိူဝ်းၼၼ်ႉၸမ်ႉ၊ ၸဝ်ႈႁဝ်းဢဝ်ထိမ်ႈတူၵ်းသႂ်ႇၵႃႈၼႂ်းၼမ်ႉဢၼ်လိုၵ်ႉဢၼ်လမ်ႇၼၼ်ႉ မိူၼ်ၸိူဝ်ႉၼင်ႇဢၼ်ဢဝ်မၢၵ်ႇႁိၼ်ထိမ်ႈတူၵ်းသႂ်ႇၵႃႈၼႂ်းၼမ်ႉ ဢၼ်ယႂ်ႇၼႃႇၼၼ်ႉတီႈၶႃႈဢေႃႈ။-

12ၼွၵ်ႈသေၼၼ်ႉ ၶိင်ႇၵၢင်ဝၼ်းၸဝ်ႈႁဝ်း ဢဝ်တင်းသဝ်မွၵ်ႇၵုမ်ႈလႄႈ ၶိင်ႇၵၢင်ၶိုၼ်းၸဝ်ႈႁဝ်းဢဝ် သဝ်ၽႆးဢၼ်ႁႂ်ႈသဵၼ်ႈတၢင်းဢၼ်ၶဝ်ၵႂႃႇၼၼ်ႉလႅင်းၼၼ်ႉ ဢဝ်ၶဝ်ၼၼ်ႉၵႂႃႇသူင်ႇတီႈၶႃႈဢေႃႈ။-

13တူဝ်ၸဝ်ႈႁဝ်းၵေႃႈ လူင်းမႃးၵႃႈၼိူဝ်လွႆ သီႉၼႃႉ လႄႈ လၢတ်ႈတေႃႇၶဝ်ၼၼ်ႉသေၵႃႈၼိူဝ်ၽႃႉၵၢင်ႁၢဝ်သေလႄႈ ဢၢပ်ႈပၼ်လွင်ႈတၢင်းဢၼ်ၸီႇယၢင်ႇဝႆႉ ဢၼ်မၢၼ်ႇဢၼ်မႅၼ်ႈတြႃးၸဝ်ႈ ဢၼ်ၸိုဝ်ႈၸႂ်ႈသိုဝ်ႈတေႃႇ၊ ထုင်းၽိင်ႈတြႃး တင်းပိင်းၺၢပ်ႈၸဝ်ႈတင်းလၢႆတီႈၶႃႈဢေႃႈ။-

14ၸဝ်ႈႁဝ်းၽုၺ်ႇဢွၵ်ႇၼႄပျႃး မိုဝ်ႉဝၼ်းၵမ်သိၼ်ၸဝ်ႈႁဝ်းဢၼ်မူတ်းၸၢင်ႇၼၼ်ႉလႄႈ ဢဝ်ၶႃႈၸဝ်ႈႁဝ်း မူဝ်းသေႇ သင်ႇလၢတ်ႈဝႆႉ ၼႄးဢူႉပတေႇလႂ်၊ ထုင်းၽိင်ႈတြႃးလႂ်၊ တြႃးၸဝ်ႈလႂ်တီႈၶႃႈဢေႃႈ။-

15ၸဝ်ႈႁဝ်းဢဝ်ၶဝ်ႈမုၼ်းၽႃႉၵၢင်ႁၢဝ် ပၼ်တီႈၶဝ်ပုၼ်ႈတၢင်းဢၼ်ၶဝ်တွင်ႉမႆႈသႆႈလိူတ်ႇၼၼ်ႉလႄႈ ဢဝ်ၼမ်ႉဢၼ်ၸဝ်ႈႁဝ်း ႁႂ်ႈဢွၵ်ႇၵႃႈၼႂ်းမၢၵ်ႇႁိၼ်ၼၼ်ႉ ပၼ်ပုၼ်ႈတၢင်းဢၼ်ၶဝ်ယၢၵ်ႇၼမ်ႉၶေႃးႁွင်ၼၼ်ႉတီႈၶႃႈဢေႃႈ။ ၸဝ်ႈႁဝ်းမီးဢမိင်ႉ ႁႂ်ႈၶဝ်လႆႈၶဝ်ႈလႄႈသိမ်းဢဝ် မိူင်းဢၼ်ၸဝ်ႈႁဝ်း ယုၵ်ႉမိုဝ်းၸဝ်ႈႁဝ်းသေလႄႈ ၵိၼ်ႇဝႃႈလွင်ႈဢၼ်တၵ်းပၼ်တီႈၶဝ်ၼၼ်ႉတီႈၶႃႈဢေႃႈ။-

16ၵူၺ်းၵႃႈ ၵဝ်ဢိၵ်ႇတင်းပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ ဢွၼ်ၵၼ်မႃႇၼႃႉပူၵ်းပႅၼ်လႄႈ၊ ႁႂ်ႈလမ်းၶေႃးၶဝ်ၵႅၼ်ႇၶႅင်ယူႇသေလႄႈ ယင်းဢမ်ႇထွမ်ႇဢဝ်ပိင်းၺၢပ်ႈၸဝ်ႈႁဝ်းတင်းလၢႆလႄႈ တွပ်ႇပႅတ်ႈထဵင်ပႅတ်ႈတီႈၶႃႈဢေႃႈ။-

17ၶဝ်ဢမ်ႇၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်လီဢၢမ်းတင်းလၢႆ ဢၼ်ၸဝ်ႈႁဝ်းႁဵတ်းၵႃႈၼႂ်းၶဝ်ၼၼ်ႉလႄႈ ႁႂ်ႈလမ်းၶေႃးၶဝ်ၵႅၼ်ႇၶႅင်သေလႄႈ တွပ်ႇထဵင်ပူၼ်ႉလိူဝ်ဢႃႇၼႃႇၸဝ်ႈယူႇသေလႄႈ ဢွၼ်ၵၼ်ယုၵ်ႉယွင်ႈ ၵူၼ်းၵေႃႉၼိုင်ႈ ႁဵတ်းငဝ်ႈႁဵတ်းႁူဝ်ၶဝ် ႁႂ်ႈလႆႈၶိုၼ်းမိူဝ်းၸူး ၵႃႈတီႈဢၼ်ၶဝ်ၶၢမ်ႇႁဵတ်းၶႃႈၼၼ်ႉတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ ၸဝ်ႈႁဝ်းပဵၼ်ၽြႃးဢၼ်ၸၢင်ႈပွႆႇလွတ်ႈဢပႅတ်ႈ၊ ၽြႃးဢၼ်ၸၢင်ႈႁဵတ်းၵျေးၸူးလႄႈ ပျေႉၸုမ်ႇဝႆႉတင်း တၢင်းႁၵ်ႉမႅတ်ႈတႃႇၵရူႉၼႃႇ၊ ၽြႃးဢၼ်မၢၵ်ႈမီးလိူင်ႇၼမ်ဝႆႉတင်းတၢင်းဢၼ်ၸႂ်ယႂ်ႇၸႂ်ယၢဝ်း၊ တၢင်းဢၼ်ၸၢင်ႈႁဵတ်းၵရူႉၼႃႇတၢင်းဢဵတ်းလူလႄႈ ၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်တီႈၶႃႈ၊-

18ထၢၼ်ႇၼၼ်ႉၵူၺ်းဢမ်ႇၵႃး၊ မိူဝ်ႈဢၼ်ၶဝ်သွၼ်းလေႃႇ ႁဵတ်းဝူဝ်းဢွၼ်ႇသေလႄႈလၢတ်ႈလႄႈဝႃႈ၊ ဢၼ်ၼႆႉၸမ်ႉ၊ ပဵၼ်ၽြႃးမႂ်းဢၼ်ၼုၵ်ႈဢဝ်မႂ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉယဝ်ႉ၊ ဝႃႈၼင်ႇၼႆသေလႄႈ ႁဵတ်းတၢင်းဢၼ်ၽိတ်းပိူင်ႈ ၸဝ်ႈႁဝ်းၼႃႇလူင်လၢင်ၼၼ်ႉၸိုင်၊-

19ၸဝ်ႈႁဝ်းပဵၼ်ၽြႃးဢၼ်ၸၢင်ႈဢဵတ်းလူႁၵ်ႉပႅင်း လိူဝ်တွၼ်းၼႃႇလူင်လၢင်လႄႈ ၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်ဝႆႉ ၵႃႈၼႂ်းထိူၼ်ႇၼၼ်ႉတီႈၶႃႈ။ သဝ်မွၵ်ႇၵုမ်ႈဢမ်ႇႁၢႆသေၶိင်ႇၵၢင်ဝၼ်းႁႂ်ႈလႆႈၼႄပျႃးသဵၼ်ႈတၢင်းၶဝ်ယူႇလႄႈ သဝ်ၽႆးဢမ်ႇႁၢႆသေၶိင်ႇၵၢင်ၶိုၼ်း ႁႂ်ႈသဵၼ်ႈတၢင်းဢၼ်ၶဝ်ၵႂႃႇၼၼ်ႉ လႅင်းယူႇတီႈၶႃႈဢေႃႈ။-

20ၸဝ်ႈႁဝ်းပၼ်ဝီႉၺိၺ်ႇၸဝ်ႈဢၼ်လီဢၼ်ငၢမ်း ပုၼ်ႈဢၼ်တၵ်းသင်ႇသွၼ်ၶဝ်တီႈၶႃႈဢေႃႈ။ ၸဝ်ႈႁဝ်းဢမ်ႇၵူႈဢဝ်သိမ်းဢဝ်ၶဝ်ႈမုၼ်း မၼ်ႇၼႃႉ သေ ၵႃႈတီႈသူပ်းၶဝ်လႄႈ ဢဝ်ၼမ်ႉပၼ်ပုၼ်ႈတၢင်းဢၼ်ၶဝ်ယၢၵ်ႇၼမ်ႉၶေႃးႁွင်ၼၼ်ႉတီႈၶႃႈဢေႃႈ။-

21သီႇသိပ်းပီႊတဵမ်တဵမ်၊ ၸဝ်ႈႁဝ်းလဵင်ႉလူၶဝ် ႁႂ်ႈၶဝ်ဢမ်ႇလႆႈလူဝ်ႇထႅင်ႈသေၸိူဝ်ႉသေပိူင်လႃးလႃးတီႈၶႃႈဢေႃႈ။ ၶူဝ်းၼုင်ႈၶူဝ်းမႆၶဝ်ဢမ်ႇလႆႈၵဝ်ႇလႆႈမွင်လႄႈ တိၼ်ၶဝ်ၵေႃႈဢမ်ႇလႆႈၵႂ်ႈလႆႈပွင်းတီႈၶႃႈ၊-

22လိုၼ်းၼၼ်ႉၸဝ်ႈႁဝ်းဢဝ်သိုင်ႇၸိုင်ႈဝၢၼ်ႈမိူင်းတင်းလၢႆ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဢၢပ်ႈပၼ်တီႈၶဝ်လႄႈ ဢဝ်ၽႄမႅင်ႇပၼ် ၸွမ်းလူၺ်ႈပုၼ်ႈတႃႇၽႂ်ပုၼ်ႈတႃႇမၼ်းသေလႄႈ၊ ၶဝ်ဢွၼ်ၵၼ်သိမ်းဢဝ်မိူင်း ဢၼ် သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ ဢုပ်ႉပိူင်ႇဢိၵ်ႇတင်း မိူင်းဢၼ် ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ဢုပ်ႉပိူင်ႇၼၼ်ႉတီႈၶႃႈဢေႃႈ။-

23ၸဝ်ႈႁဝ်းႁႂ်ႈလုၵ်ႈၶဝ်လၢၼ်ၶဝ် ၼမ်ၼႃႇလူင်လၢင်မိူၼ်ၸိူဝ်ႉၼင်ႇလၢဝ်ၵၢင်ႁၢဝ်ၼၼ်ႉလႄႈ ဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်ၸဝ်ႈႁဝ်းဝႆႉၵတီႉ တီႈပူႇၶဝ်မွၼ်ႇၶဝ် လူၺ်ႈလွင်ႈဢၼ်တၵ်းလႆႈၶဝ်ႈလႄႈသိမ်းဢဝ်ၼၼ်ႉတီႈၶႃႈဢေႃႈ။-

24ၼင်ႇၼၼ်လႄႈၶဝ်ၸိူဝ်းဢၼ်ပဵၼ်လုၵ်ႈပဵၼ်လၢၼ်တင်းလၢႆ ဢွၼ်ၵၼ်ၶဝ်ႈလႄႈသိမ်းဢဝ်မိူင်းလႄႈ ၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၵူၼ်းဝၢၼ်ႈၵူၼ်းမိူင်းဢၼ်ဝႃႈ ၵူၼ်း ၶႃႇၼၼီႉ ၸိူဝ်းၼၼ်ႉ ၵႃႈတီႈၽၢႆႇၼႃႈၶဝ်သေလႄႈ ဢဝ်ၶုၼ်ႁေႃၶမ်းၶဝ်ၼၼ်ႉၸိူဝ်းၼၼ်ႉ ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵူႈၸိူဝ်ႉၵူႈမဵဝ်းၸိူဝ်းၼၼ်ႉ ဢၢပ်ႈပၼ်ၵႃႈတီႈမိုဝ်းၶဝ် ႁႂ်ႈၶဝ်လႆႈႁဵတ်းၸွမ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉတီႈၶႃႈဢေႃႈ။-

25ၼင်ႇၼၼ်လႄႈ ၶဝ်ဢွၼ်ၵၼ်သိမ်းဢဝ်ဝဵင်းဢၼ်မၼ်ႈၶိူင်ႇလႂ်၊ မိူင်းဢၼ်ၶွၼ်ႇၼမ်ႉမၼ်းလိၼ်လီလႄႈ လႆႈႁိူၼ်းလႆႈယေး ဢၼ်တဵမ်ဝႆႉတင်းဢုၵ်ႉၸႃႇ ဢၼ်လီဢၼ်ငၢမ်းၵူႈၸိူဝ်ႉၵူႈပိူင်လႂ်၊ ၼမ်ႉမေႃႇဢၼ်ၶုတ်းယဝ်ႉလႂ်၊ သူၼ်ဢူးယဵၼ်ႇၸပိတ်ႈလႂ်၊ သူၼ်ဢူးယဵၼ်ႇ သၢၼ်ႇလုၼ်ႇ လႂ်၊ တူၼ်ႈမႆႉဢၼ်မၢၵ်ႇမၢၵ်ႇၼမ်ၼႃႇလႂ်သေယဝ်ႉ၊ လႆႈၵိၼ်လႆႈၶူပ်းဢိမ်ႇဢိမ်ႇတဵမ်တဵမ်သေလႄႈ ၼိူဝ်ႉပီးလီမၼ်းလီမႃးလႄႈ ဢွၼ်ၵၼ်မူၼ်ႈပျေႃႇၵႃႈၼႂ်းတၢင်းဢၼ်ၵျေးၸူးၸဝ်ႈလိူင်ႇၼမ်ယႂ်ႇၼႃႇၼၼ်ႉယူႇတီႈၶႃႈဢေႃႈ။-

26ၵူၺ်းၵႃႈ ၶဝ်ဢမ်ႇထွမ်ႇဢမ်ႇဢဝ် ဢမိင်ႉၸဝ်ႈလႄႈ ပုင်ႇၵၢၼ်ႇၸဝ်ႈႁဝ်းသေလႄႈ ဢဝ်တြႃးၸဝ်ႈႁဝ်းပႅတ်ႈဝႆႉ ၵႃႈတီႈၽၢႆႇတၢင်းလင်ၶဝ်သေတီႈၶႃႈဢေႃႈ။ ၶဝ်ဢွၼ်ၵၼ်ဢဝ်ပရေႃးၽႅတ်ႈၸဝ်ႈႁဝ်း ဢၼ်သင်ႇသွၼ်သုင်းမႃႉပၼ်ၶဝ် ႁႂ်ႈၶဝ်ၶိုၼ်းမႃးၸူးတီႈၸဝ်ႈႁဝ်းၸိူဝ်းၼၼ်ႉတၢႆလႄႈ ႁဵတ်းတၢင်းဢၼ်ၽိတ်းပိူင်ႈၸဝ်ႈႁဝ်းၼႃႇလူင်လၢင်တီႈၶႃႈဢေႃႈ။-

27ပိူဝ်ႈၼႆလႄႈ ၸဝ်ႈႁဝ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ် ဢၼ်ယႃႉယူၵ်ႉၶဝ်ယူႇၸိူဝ်းၼၼ်ႉတီႈၶႃႈဢေႃႈ။ ယၢမ်းမိူဝ်ႈဢၼ်ၶဝ်ၶၢမ်ႇတုၵ်ႉၶႃႉတၢင်းၽၢၼ်လႄႈ ႁွင်ႉသႅၼ်ႇတီႈၸဝ်ႈႁဝ်းၼၼ်ႉၸိုင်၊ ၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းလႄႈ ၸဝ်ႈႁဝ်းႁႂ်ႈၸဝ်ႈၵျေးၸူး ဢၼ်ၵႄႇသႄႇၶျွတ်ႈဢဝ်ၶဝ်လွတ်ႈဢွၵ်ႇသေ ၵႃႈၼႂ်းမိုဝ်းရၢၼ်ႇသူႇၶဝ်ၼၼ်ႉၸိူဝ်းၼၼ်ႉပေႃႇဢွၵ်ႇ ၸွမ်းၵႃႈၼင်ႇဢၼ် ၵျေးၸူးၵရူႉၼႃႇၸဝ်ႈႁဝ်း လိူင်ႇၼမ်ၼၼ်ႉတီႈၶႃႈဢေႃႈ။-

28လႆႈသမ်ႉ ယၢမ်းမိူဝ်ႈဢၼ်ၶဝ်လႆႈၵတ်းယဵၼ်ၶျၢမ်းသႃႇၼၼ်ႉၸိုင်၊ ၶဝ်သမ်ႉၶိုၼ်းႁဵတ်းတူႉၸရိူၵ်ႈၵႃႈတီႈၽၢႆႇၼႃႈၸဝ်ႈႁဝ်းထႅင်ႈတီႈၶႃႈဢေႃႈ။ ပိူဝ်ႈၼႆလႄႈၸဝ်ႈႁဝ်းသမ်ႉၶိုၼ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ် ႁႂ်ႈၶဝ်ၼၼ်ႉထၼ်ႈပေႃးလႆႈဢုပ်ႉပိူင်ႇၶဝ်တီႈၶႃႈဢေႃႈ။ ယၢမ်းမိူဝ်ႈဢၼ်ၶဝ်သမ်ႉၶိုၼ်းမႃးလႄႈ ႁွင်ႉသႅၼ်ႇတီႈၸဝ်ႈႁဝ်းၼၼ်ႉၸိုင် ၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းလႄႈ ၵႄႇသႄႇၶျွတ်ႈဢဝ်ၶဝ်ၶိူဝ်းၶိူဝ်းယႂ်းယႂ်း ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းမီးၼၼ်ႉတီႈၶႃႈဢေႃႈ။-

29ပိၵ်ႉသမ်ႉၸဝ်ႈႁဝ်းသင်ႇသွၼ်သုင်းမႃႉၶဝ် ႁႂ်ႈၶဝ်ၶိုၼ်းၵမ်ၶိုၼ်းၵျၢင်ႉတြႃးၸဝ်ႈႁဝ်းသေၵေႃႈ၊ ၶဝ်ဢွၼ်ၵၼ်ႁဵတ်းတၢင်းဢၼ်မႃႇၼႃႉပူၵ်းပႅၼ်လႄႈ ဢမ်ႇထွမ်ႇဢမ်ႇဢဝ်တီႈၶႃႈ၊ ၶဝ်ဢွၼ်ၵၼ်ပူၼ်ႉလိူဝ်လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉ ဢၼ်ပဵၼ်လွင်ႈဢၼ်ဢသၢၵ်ႈလိပ်းတီႈၵေႃႉဢၼ်ၵမ်ၵျၢင်ႉၼၼ်ႉၸိူဝ်းၼၼ်ႉတီႈၶႃႈဢေႃႈ။ ၶဝ်ဢွၼ်ၵၼ်သုတ်ႉယိုတ်းႁူဝ်မႃႇ ပူတ်းဝၢင်းပႅတ်ႈသေလႄႈႁႂ်ႈလမ်းၶေႃးၶဝ်ၵႅၼ်ႇၶႅင်လႄႈ ယင်းဢမ်ႇထွမ်ႇဢမ်ႇဢဝ်လႄႈ ယူႇတီႈၶႃႈဢေႃႈ။-

30ပိၵ်ႉသမ်ႉၸဝ်ႈႁဝ်းယိူၼ်ႉၶၢမ်ႇၶဝ် ပီႊၼမ်ၼႃႇလႄႈဢဝ်ဝီႉၺိၺ်ႇၸဝ်ႈႁဝ်း ဢၼ်မီးတီႈပရေႃးၽႅတ်ႈၸဝ်ႈႁဝ်းၸိူဝ်းၼၼ်ႉ သင်ႇသွၼ်သုင်းမႃႉၶဝ်သေၵေႃႈ ၶဝ်ဢမ်ႇထွမ်ႇဢမ်ႇဢဝ်တီႈၶႃႈ။ ပိူဝ်ႈၼႆလႄႈၸဝ်ႈႁဝ်းဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းၵူၼ်းဝၢၼ်ႈၵူၼ်းမိူင်းတင်းလၢႆၸိူဝ်းၼႆႉတီႈၶႃႈဢေႃႈ။-

31ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ်ၵရူႉၼႃႇၸဝ်ႈႁဝ်း လိူင်ႇၼမ်ၼၼ်ႉလႄႈ၊ ၸဝ်ႈႁဝ်းဢမ်ႇယႃႉၽဵဝ်ႈၶဝ်ပႅတ်ႈ မူတ်းမူတ်းသဵင်ႈသဵင်ႈ၊ ၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်တီႈၶႃႈ၊ လွင်ႈမၼ်းၸမ်ႉ ၸဝ်ႈႁဝ်းပဵၼ်ၽြႃးဢၼ်ပျေႉၸုမ်ႇဝႆႉတင်း တၢင်းဢၼ်ႁၵ်ႉဢဵတ်းလူ၊ တၢင်းဢၼ်မီးမႅတ်ႈတႃႇၵရူႉၼႃႇတီႈၶႃႈဢေႃႈ။-

32ပိူဝ်ႈၼႆလႄႈ ၽြႃးပဵၼ်ၸဝ်ႈႁဝ်းၶႃႈ၊ ၽြႃးဢၼ်ယႂ်ႇမျၢတ်ႈၼႃႇလႄႈ ပျေႉၸုမ်ႇတင်းမႁႃႇတၼ်းၶူဝ်းလႄႈလီၵူဝ်လီႁႄ၊ ဢၼ်ပႂ်ႉပတီႉၺိၺ်ႇၵရူႉၼႃႇၸဝ်ႈတီႈၶႃႈ၊ ယႃႇပေမၢတ်ႈၽေးတၢမ်ႇၵႃႈမီး ဢၼ်တူၵ်းႁွတ်ႈ ၵႃႈၼိူဝ်ၶုၼ်ႁေႃၶမ်းၶႃႈၸဝ်ႈႁဝ်းၶဝ်လႂ် မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ ယိတ်ႈပရေႃးႁဵၵ်ႈၶႃႈၸဝ်ႈႁဝ်းၶဝ်၊ ပရေႃးၽႅတ်ႈၶႃႈၸဝ်ႈႁဝ်းၶဝ်၊ ပူႇပေႃႈၶႃႈၸဝ်ႈႁဝ်းၶဝ် တင်းၵူၼ်းၸဝ်ႈႁဝ်းတင်းသဵင်ႈတင်းလူင်ၸိူဝ်းၼၼ်ႉ ၸႃႉၸဵမ်မိူဝ်ႈၸူဝ်ႈပၢၼ်ၶုၼ်ႁေႃၶမ်း ဢႃႇသူႉရီႉ တင်းလၢႆ တေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉၸိူဝ်းၼၼ်ႉ ပဵၼ်ဢၼ်လဵၵ်ႉဢၼ်ဢွၼ်ႇသေၵမ်းတီႈၶႃႈ။-

33ၸဝ်ႈႁဝ်းၸမ်ႉ ႁဵတ်းၸွမ်းတြႃးၼႂ်းၵႃႈဢၼ်ႁွတ်ႈထိုင် ၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းဢမ်ႇတြႃးတီႈၶႃႈယဝ်ႉ။ ၸဝ်ႈႁဝ်းၸီႇယၢင်ႇၸွမ်းတြႃးၵူၺ်းတီႈၶႃႈယဝ်ႉ။-

34ၶုၼ်ႁေႃၶမ်းၶႃႈၸဝ်ႈႁဝ်းၶဝ်၊ မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ ယိတ်ႈပရေႃးႁဵၵ်ႈၶႃႈၸဝ်ႈႁဝ်းၶဝ်၊ ပူႇပေႃႈၶႃႈၸဝ်ႈႁဝ်းၶဝ်ၸိူဝ်းၼၼ်ႉ ဢမ်ႇဢွၼ်ၵၼ်ပႂ်ႉၵမ်ပႂ်ႉၸွမ်းတြႃးၸဝ်ႈႁဝ်းတီႈၶႃႈ၊ ဢမ်ႇဢွၼ်ၵၼ်ထွမ်ႇဢဝ်ပိင်းၺၢပ်ႈၸဝ်ႈႁဝ်း ဢိၵ်ႇတင်းလွင်ႈတၢင်းဢၼ်ၶၢမ်ႇသၢၵ်ႈသေႇ ဢၼ်ၸဝ်ႈႁဝ်းၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၶဝ်ၼၼ်ႉတီႈၶႃႈ။-

35ၶဝ်လႆႈယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢၼ်ၸဝ်ႈႁဝ်းႁဵတ်းၵျေးၸူး ဢၼ်ယႂ်ႇၼႃႇသေလႄႈ ဢၢပ်ႈပၼ်တီႈၶဝ်ဢၼ်မိူင်းလီမိူင်းငၢမ်း ဢၼ်ၸဝ်ႈႁဝ်းဢဵတ်းလူပၼ်တီႈၶဝ်ၼၼ်ႉသေလႄႈ ၶဝ်ဢမ်ႇၵိုတ်ႉဢမ်ႇႁၢပ်ႇဢမူႉၸဝ်ႈႁဝ်းတီႈၶႃႈ၊ ၶဝ်ယင်းဢမ်ႇဝႄႈပႅတ်ႈတူႉၸရိူၵ်ႈ ဢၼ်ၶဝ်ႁဵတ်းၼၼ်ႉလႄႈယူႇတီႈၶႃႈဢေႃႈ။-

36တူၺ်းတီႈၶႃႈလူး။ ၶႃႈၸဝ်ႈႁဝ်းၶဝ်ပဵၼ်ၶႃႈၸႂ်ႉၶႃႈသွႆယူႇဝၼ်းမိူဝ်ႈၼႆႉလႄႈ လႆႈၶၢမ်ႇႁဵတ်းၶႃႈယူႇၵႃႈၼႂ်းမိူင်းဢၼ် ၸဝ်ႈႁဝ်းဢဝ်ပၼ်တီႈပူႇမွၼ်ႇၶႃႈၸဝ်ႈႁဝ်းၶဝ် ႁႂ်ႈလႆႈၵိၼ်မၢၵ်ႇမၼ်းႁူင်းမၼ်း ဢိၵ်ႇတင်းဢၼ်လီဢၼ်ငၢမ်းမၼ်းၸိူဝ်းၼၼ်ႉၼႆႉယူႇတီႈၶႃႈဢေႃႈ။-

37တၢင်းဢၼ်ယႂ်ႇတူဝ်းတွၼ်းမႃးၵႃႈတီႈမိူင်းၼႆႉၼၼ်ႉ လႆႈပဵၼ်ပုၼ်ႈၶုၼ်ႁေႃၶမ်း ဢၼ်ၸဝ်ႈႁဝ်းၶၢၼ်းဝႆႉ ၵွပ်ႈပိူဝ်ႈဢပႅတ်ႈၶႃႈၸဝ်ႈႁဝ်းၶဝ်ၼႆႉၸိူဝ်းၼၼ်ႉၼမ်ၼႃႇလႄႈ ၶဝ်ၼၼ်ႉလႆႈဢုပ်ႉပိူင်ႇတူဝ်ၶႃႈၸဝ်ႈႁဝ်းၶဝ် ဢိၵ်ႇတင်းတရိၵ်ႈသၢၼ်ႇၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ် ဢလူဝ်ႇၶဝ်မီးၼၼ်ႉသေလႄႈ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ် ယၢၵ်ႈၽၢၼ်ၶၢၼ်ၸႂ်ၼႃႇလူင်လၢင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။

38ၵွပ်ႈပိူဝ်ႈၼင်ႇၼၼ်လႄႈ ႁဝ်းဢွၼ်ၵၼ်ႁဵတ်းသဵတ်ႈၸႃႇ ဢၼ်မၼ်ႈဢၼ်ၶိူင်ႇသေလႄႈ တႅမ်ႈမၢႆဝႆႉသေလႄႈ ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ႁဝ်း ၵူၼ်းမဵဝ်း လေႇဝီႉ ႁဝ်း ယိတ်ႈပရေႃးႁဵၵ်ႈႁဝ်းၸိူဝ်းၼၼ်ႉ ဢွၼ်ၵၼ်တွၵ်ႇတၼ်းသိၵ်ႈဢေႃႈ။