Nehemiah 8

Shan

← Chapter 7 Jump to: Chapter 9 →

1မိူဝ်ႈဢၼ်ႁွတ်ႈထိုင် လိူၼ်သတ်ႉတမႃႉလႄႈ ၵူၼ်းမဵဝ်း ဢီႉသရေႇလႃႉ တူၵ်းတီႈတူၵ်းလႅၼ် ၵႃႈၼႂ်းဝၢၼ်ႈၼႂ်းဝဵင်း တီႈယူႇၶဝ်ယဝ်ႉၼၼ်ႉၸိုင်၊ ၵူၼ်းတင်းသဵင်ႈတင်းလူင် ဢွၼ်ၵၼ်မႃးၸူႉတုမ်ၵၼ်ၵႃႈတီႈ ၼႂ်းၵၢင်ပၢင်ႇ ဢၼ်မီးၵႃႈတီႈၽၢႆႇၼႃႈၽၵ်းတူၼမ်ႉၼၼ်ႉမိူၼ်ၸိူဝ်ႉၼင်ႇဢၼ်ပဵၼ်တူဝ်လဵဝ်ၸႂ်လဵဝ်ၵူၺ်းၼၼ်ႉဢေႃႈ။ ၶဝ်ၼၼ်ႉဢွၼ်ၵၼ်လၢတ်ႈတီႈ ဢေးၸရႃႉ သြႃႇမေႃၵျၢမ်းၼၼ်ႉ ႁႂ်ႈမၼ်းဢဝ်ၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ဢၼ်ထႃႇဝရႃႉၽြႃးသင်ႇလၢတ်ႈဝႆႉ တီႈမဵဝ်း ဢီႉသရေႇလႃႉ ၼၼ်ႉမႃးဢေႃႈ။-

2ၼႂ်းလိူၼ်သတ်ႉတမႃႉ၊ ဝၼ်းပထမႃႉၼၼ်ႉ၊ ယိတ်ႈပရေႃးႁဵၵ်ႈ ဢေးၸရႃႉ ဢဝ်လိၵ်ႈပိင်းၺၢပ်ႈတီႉမႃးၵႃႈတီႈၽၢႆႇၼႃႈပရဵၵ်ႈသၢတ်ႈၵူၼ်းၸၢႆးၵူၼ်းယိင်း ၵႃႈဢၼ်ထွမ်ႇလႆႈႁူႉလႆႈၸိူဝ်းၼၼ်ႉလႄႈ၊-

3ၽတ်းရွတ်ႈၵႃႈတီႈၼႂ်းၵၢင်ပၢင်ႇ ဢၼ်မီးၵႃႈတီႈၽၢႆႇၼႃႈၽၵ်းတူၼမ်ႉ ၸႃႉၸဵမ်ၶိင်ႇၵၢင်ၼႂ် တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈ ၵႃႈတီႈၽၢႆႇၼႃႈၵူၼ်းၸၢႆးၵူၼ်းယိင်း ဢၼ်ႁူႉလႆႈၸိူဝ်းၼၼ်ႉဢေႃႈ။ ၵူၼ်းတင်းသဵင်ႈတင်းလူင် ဢွၼ်ၵၼ်ဢဝ်ႁူၶဝ်ထွမ်ႇငိၼ်းၵႂၢမ်းၵျၢမ်းလိၵ်ႈပိင်းၺၢပ်ႈတီႉ ၸေးၸေးၸွတ်ႇၸွတ်ႇဢေႃႈ။-

4ဢေးၸရႃႉ သြႃႇဢၼ်မေႃၵျၢမ်းၼၼ်ႉၸုၵ်းယူႇၵႃႈၼိူဝ်ပလၢင်ႇမႆႉၸိင် တီႈဢၼ်ႁေႃးတြႃး ဢၼ်ၶဝ်ဢွၼ်ၵၼ်ႁဵတ်းၼၼ်ႉသေလႄႈ မတ်ႉတီႉသီႉ၊ သေႇမႃႉ၊ ဢၼႃႇယႃႉ၊ ဢူႉရီႉယႃႉ၊ ႁီႉလၶီႉ၊ မႃႇသေႇယႃႉ ၸိူဝ်းၼၼ်ႉ ၸုၵ်းယူႇၵႃႈတီႈၽၢႆႇတၢင်းၶႂႃမၼ်းလႄႈ ပေႇတႃႇယႃႉ၊ မီႉသေႇလႃႉ၊ မႃႇလၶီႉ၊ ႁႃႇသုမ်ႇ၊ ႁႃႇသႃႉပတၼႃႉ၊ ၸႃႇၶရီႉ၊ မေႇသူႉလမ်ႇ ၸိူဝ်းၼၼ်ႉ ၸုၵ်းယူႇၵႃႈတီႈၽၢႆႇတၢင်းသၢႆႉမၼ်းဢေႃႈ။-

5ၼင်ႇၼၼ်လႄႈ ဢေးၸရႃႉ ၼၼ်ႉ မီးတီႈဢၼ်သုင်သေၵူၼ်းတင်းသဵင်ႈတင်းလူင်သေလႄႈ ၽုၺ်ႇလိတ်ႈၵျၢမ်းလိၵ်ႈသိုဝ်ႈၼႃႈတႂ်ႈတႃ ၵူၼ်းတင်းသဵင်ႈတင်းလူင်လႄႈ ၽုၺ်ႇလိတ်ႈသေယဝ်ႉ၊ ၵူၼ်းတင်းသဵင်ႈတင်းလူင် ဢွၼ်ၵၼ်လုၵ်ႉၸုၵ်းဢေႃႈ။-

6ဢေးၸရႃႉ ၼၼ်ႉ ယွင်ႈယေႃးပၼ်တၢင်းလီတီႈထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်ယႂ်ႇမျၢတ်ႈၼႃႇဢေႃႈ။ ၵူၼ်းတင်းသဵင်ႈတင်းလူင်ဢွၼ်ၵၼ်ယုၵ်ႉမိုဝ်းၶဝ်သေလႄႈ ႁပ်ႉတုင်းဢဝ်လႄႈဝႃႈ၊ ဢႃႇမိၼ်ႇ၊ ဢႃႇမိၼ်ႇ၊ ဝႃႈၼင်ႇၼႆလႄႈ ၵူမ်ႈၵွမ်းႁူဝ် ၶုပ်ႉမူပ်ႇၵႃႈၼိူဝ်လိၼ်ယူႇသေလႄႈ ၵူဝ်းၵႂၢႆႇထႃႇဝရႃႉၽြႃးဢေႃႈ။-

7ယေႃးသူႉ၊ ပႃႇၼီႇ၊ သေႇရၽီႉ၊ ယႃႇမိၼ်ႇ၊ ဢၵ်ႉၵုပ်ႉ၊ သပ်ႉပေႇသေး၊ ႁေႃးတီႉယႃႉ၊ မႃႇသေႇယႃႉ၊ ၵေႇလီႉတႃႉ၊ ဢႃႇၸရီႉ၊ ယေႃးၸပတ်ႉ၊ ႁႃႇၼၼ်ႇ၊ ပေႇလႃႇယႃႉ ဢိၵ်ႇတင်းၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ဢွၼ်ၵၼ်ၽုၺ်ႇဢွၵ်ႇၼႄပျႃး ဢၼၢၵ်ႈၵျၢမ်းလိၵ်ႈပိင်းၺၢပ်ႈတီႉ တီႈၵူၼ်းတင်းလၢႆဢေႃႈ။ ၵူၼ်းတင်းလၢႆၸိူဝ်းၼၼ်ႉၵေႃႈဢွၼ်ၵၼ်ၸုၵ်းယူႇၵႃႈၼႂ်းတီႈတူဝ်ၸဝ်ႈၵဝ်ႇဢေႃႈ။-

8ၼင်ႇၼၼ်လႄႈ ၶဝ်ဢွၼ်ၵၼ်ၽတ်းရွတ်ႈ ၵျၢမ်းလိၵ်ႈပိင်းၺၢပ်ႈတီႉ ၽြႃးပဵၼ်ၸဝ်ႈသေႇၶျႃႇလီငၢမ်းလႄႈ ၽုၺ်ႇဢွၵ်ႇဢၼၢၵ်ႈမၼ်းသေလႄႈ ႁဵတ်းႁႂ်ႈၵူၼ်းတင်းလၢႆ ႁူႉတီႈဢၼ်ၽတ်းဢၼ်ရွတ်ႈၼၼ်ႉဢေႃႈ။

9ၼေႇႁမီႉ ၶုၼ်ဢၼ်ဢုပ်ႉၵႃႈၼိူဝ်မိူင်း ဢိၵ်ႇတင်းယိတ်ႈပရေႃးႁဵၵ်ႈ ဢေးၸရႃႉ သြႃႇမေႃၵျၢမ်း တင်းၵူၼ်းမဵဝ်း လေႇဝီႉ ဢၼ်သင်ႇသွၼ်တီႈၵူၼ်းတင်းလၢႆ ၸိူဝ်းၼၼ်ႉလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ ဝၼ်းမိူဝ်ႈၼႆႉ ပဵၼ်ဝၼ်းဢၼ်မူတ်းၸၢင်ႇ ပုၼ်ႈထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။ ယႃႇပေဢွၼ်ၵၼ်ႁဵတ်းတၢင်းဢၼ်ၶၢင်းၶီၶၢင်းၽၢၼ်၊ တၢင်းဢၼ်ႁႆႈဢၼ်ႁွင်ႉပွင်ႉမိူၼ်ႇ။ လွင်ႈမၼ်းၸမ်ႉ ၵူၼ်းတင်းသဵင်ႈတင်းလူင် ဢွၼ်ၵၼ်ႁႆႈႁွင်ႉ ၼႂ်းမိူဝ်ႈဢၼ်ငိၼ်းၵႂၢမ်းၵျၢမ်းလိၵ်ႈပိင်းၺၢပ်ႈတီႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

10မၼ်းသမ်ႉလၢတ်ႈတီႈၶဝ်လႄႈဝႃႈ၊ ဢွၼ်ၵၼ်ၵႂႃႇလႄႈ ၵိၼ်တၢင်းၵိၼ်တၢင်းၶူပ်း ဢၼ်ပီးလီမၼ်းလီတႃႉ။ ဢွၼ်ၵၼ်သူတ်ႉၵိၼ်ၼမ်ႉ ဢၼ်ဝၢၼ်လီၸဵမ်းလီတႃႉ။ ဢွၼ်ၵၼ်ပၼ်ပုၼ်ႈပၼ်တႃႇၶဝ်ၸိူဝ်းဢၼ်ဢမ်ႇမီးၵႃႈသင်သေၸိူဝ်ႉသေပိူင်ၼၼ်ႉတႃႉ။ ဝၼ်းၼႆႉပဵၼ်ဝၼ်းဢၼ်မူတ်းၸၢင်ႇပုၼ်ႈၸဝ်ႈၽြႃးႁဝ်းဢေႃႈ။ ယႃႇပေဢွၼ်ၵၼ်ငိၼ်းၶီငိၼ်းၽၢၼ်။ လွင်ႈမၼ်းၸမ်ႉ ဢၶႂၢင်ႉတၢင်းဢၼ်ၸူမ်းသိူဝ်းဢၼ် ထႃႇဝရႃႉၽြႃးပၼ်ၼၼ်ႉ ပဵၼ်ႁႅင်းတၼ်းၶူဝ်းသူဢေႃႈ၊ ဝႃႈၼင်ႇၼႆဢေႃႈ။-

11ၼင်ႇၼၼ်လႄႈၵူၼ်းမဵဝ်း လေႇဝီႉ ၸိူဝ်းၼၼ်ႉ လၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ဝၼ်းၼႆႉပဵၼ် ဝၼ်းဢၼ်မူတ်းၸၢင်ႇလႄႈ ဢွၼ်ၵၼ်ယူႇသဵတ်ႇသဵတ်ႇယဵၼ်ယဵၼ်တႃႉ။ ယႃႇပေဢွၼ်ၵၼ်ငိၼ်းၶီငိၼ်းၽၢၼ်၊ ဝႃႈၼင်ႇၼႆလႄႈ ႁႂ်ႈၵူၼ်းတင်းသဵင်ႈတင်းလူင်တဵတ်ႇယဵၼ်ဢေႃႈ။-

12ၵူၼ်းတင်းသဵင်ႈတင်းလူင်ၼၼ်ႉ ၵွပ်ႈပိူဝ်ႈဢၼ်ၶဝ်ႁူႉၸႅင်ႈၵႂၢမ်းဢၼ် ႁေႃးလၢတ်ႈတီႈၶဝ်ၸိူဝ်းၼၼ်ႉလႄႈ၊ ဢွၼ်ၵၼ်ၵႂႃႇ ႁႂ်ႈလႆႈႁဵတ်းတၢင်းဢၼ်ၵိၼ်ဢၼ်ၶူပ်း၊ တၢင်းဢၼ်ပၼ်ပုၼ်ႈပၼ်တႃႇ၊ တၢင်းဢၼ်ၸူမ်းဢၼ်သိူဝ်းၼႃႇလူင်လၢင်ၼၼ်ႉဢေႃႈ။

13ၼႂ်းဝၼ်းတူႉတီႉယႃႉၼၼ်ႉ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် မဵဝ်းပူႇမဵဝ်းပေႃႈ ၼႂ်းၵူၼ်းတင်းသဵင်ႈတင်းလူင် ဢိၵ်ႇတင်းယိတ်ႈပရေႃးႁဵၵ်ႈတင်းလၢႆ တင်းၵူၼ်း လေႇဝီႉ တင်းလၢႆၸိူဝ်းၼၼ်ႉ ဢွၼ်ၵၼ်ၸူႉၵၼ်တုမ်ၵၼ် ၵႃႈတီႈ ဢေးၸရႃႉ သြႃႇမေႃၵျၢမ်းၼၼ်ႉ ႁႂ်ႈလႆႈထွမ်ႇငိၼ်းၵႂၢမ်း ၵျၢမ်းပိင်းၺၢပ်ႈတီႉၸေးၸေးၸွတ်ႇၸွတ်ႇဢေႃႈ။-

14ၶဝ်ဢွၼ်ၵၼ်ထူပ်းႁၼ် ဢၼ်တႅမ်ႈဝႆႉမီးယူႇ ၵႃႈၼႂ်းၵျၢမ်းပိင်းၺၢပ်ႈတီႉၼၼ်ႉ လူၺ်ႈလွင်ႈဢၼ် ထႃႇဝရႃႉၽြႃးဢဝ် မူဝ်းသေႇ ၸီႇယၢင်ႇဝႆႉ ႁႂ်ႈၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ယူႇၵႃႈၼႂ်းသုမ်ႉၼႂ်းထဵင် ၼႂ်းမိူဝ်ႈဢၼ်ၶဝ်ယင်းတိုၵ်ႉၶၢမ်ႇပွႆးၼႂ်းလိူၼ်သတ်ႉတမႃႉၼၼ်ႉယူႇၼၼ်ႉ၊-

15ဢိၵ်ႇတင်းႁႂ်ႈၶဝ်ဢွၼ်ၵၼ်ပၢဝ်ႇသေႃႇ ၵႃႈၼႂ်းဝဵင်း ယေႇရူႉသလႅမ်ႇ ဢိၵ်ႇတင်းဝၢၼ်ႈဝဵင်းၵႃႈမီးလႄႈဝႃႈ၊ လွင်ႈၼင်ႇႁိုဝ် တၵ်းလႆႈႁဵတ်းသုမ်ႉထဵင်တင်းလၢႆၸွမ်းၵႃႈၼင်ႇဢၼ် ပႃးၼႂ်းၵျၢမ်းလိၵ်ႈၼၼ်ႉၸိုင်၊ ဢွၼ်ၵၼ်ဢွၵ်ႇၸူးၵႃႈတီႈလွႆလႄႈ ဢဝ်ၵိင်ႇမႆႉၶႃႊမႆႉ သၢၼ်ႇလုၼ်ႇ ၊ ၵိင်ႇမႆႉၶႃႊမႆႉ သၢၼ်ႇလုၼ်ႇ ထိူၼ်ႇ၊ ၵိင်ႇမႆႉၶႃႊမႆႉ မူႉရတူႉ ၊ ၵၢၼ်ႈမႂ်တွင်ထၢၼ် တင်းၵိင်ႇမႆႉၶႃႊမႆႉဢၼ်ၽိူဝ်ၼႃလီပူင်းလီၼၼ်ႉမႃး ႁႂ်ႈလႆႈႁဵတ်းသုမ်ႉႁဵတ်းထဵင် ၸွမ်းၵႃႈၼင်ႇဢၼ်တႅမ်ႈဝႆႉၼၼ်ႉဢေႃႈ။

16ၼင်ႇၼၼ်လႄႈၵူၼ်းတင်းလၢႆ ဢွၼ်ၵၼ်ဢွၵ်ႇၵႂႃႇလႄႈ ဢဝ်ၵိင်ႇမႆႉၶႃႊမႆႉမႃးသေလႄႈ ႁဵတ်းသုမ်ႉႁဵတ်းထဵင် ၵႃႈၼိူဝ်မုင်းႁိူၼ်းၵႃႈၼႂ်းဝၢင်းၶဝ်၊ ၵႃႈၼႂ်းတမ်ႇတိူင်းႁိူၼ်းၽြႃးပဵၼ်ၸဝ်ႈ၊ ၵႃႈတီႈၼႂ်းၵၢင်ပၢင်ႇၽၵ်းတူၼမ်ႉ ဢိၵ်ႇတင်းၵႃႈတီႈၼႂ်းၵၢင်ပၢင်ႇၽၵ်းတူ ဢေႇၽရိမ်ႇ ဢေႃႈ။-

17ပရဵၵ်ႈသၢတ်ႈတင်းသဵင်ႈတင်းလူင် ဢၼ်ဢွၵ်ႇသေၵႃႈၼႂ်းမုၵ်ႉၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉမႃးၸိူဝ်းၼၼ်ႉ ဢွၼ်ၵၼ်ႁဵတ်းသုမ်ႉႁဵတ်းထဵင်သေလႄႈ ၼင်ႈယူႇၵႃႈတႂ်ႈသုမ်ႉထဵင်ၸိူဝ်းၼၼ်ႉဢေႃႈ။ ၸႃႉၸဵမ်ၸူဝ်ႈပၢၼ် ယေႃးသူႉ လုၵ်ႈၸၢႆး ၼုၼ်ႇ တေႃႇထိုင်ႁွတ်ႈဝၼ်းၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇတွၼ်ႉဢွၼ်ၵၼ်ႁဵတ်းၸိူဝ်ႉၼင်ႇၼၼ်သေၽဝ်ႇသေပွၵ်ႈ။ ၶဝ်ဢွၼ်ၵၼ်ၸူမ်းသိူဝ်းၼႃႇလူင်လၢင်သေလႄႈယူႇဢေႃႈ။-

18ၸႃႉၸဵမ်ဝၼ်းပထမႃႉ တေႃႇထိုင်ႁွတ်ႈဝၼ်းတီႈသုတ်းၼၼ်ႉလႄႈ၊ ဝၼ်းၼိုင်ႈယဝ်ႉဝၼ်းၼိုင်ႈ မၼ်းၽတ်းရွတ်ႈၵျၢမ်းလိၵ်ႈပိင်းၺၢပ်ႈတီႉ ၽြႃးပဵၼ်ၸဝ်ႈယူႇဢေႃႈ။ ၶဝ်ဢွၼ်ၵၼ်ၶၢမ်ႇပွႆးၼၼ်ႉၸဵတ်းဝၼ်းတဵမ်တဵမ်လႄႈ ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ ဢွၼ်ၵၼ်ၶၢမ်ႇပွႆးထမ်ႇမႃႉၸွမ်းၵႃႈၼင်ႇဢၼ် တြႃးၸဝ်ႈမီးၼၼ်ႉဢေႃႈ။

← Chapter 7 Jump to: Chapter 9 →