Nehemiah 2

Shan

← Chapter 1 Jump to: Chapter 3 →

1ၼႂ်းပီႊဢၼ်ၶုၼ်လူင် ဢႃႇတၸေႇရိတ်ႉ ၸၢမ်ႇႁၢင်ႈၸၢမ်ႇႁေႃသၢဝ်းပီႊ လိူၼ် ၼီႉသၼ်ႇ ၼၼ်ႉ၊ ၵဝ်ယိပ်းၵမ်ဢဝ်ၼမ်ႉၸပိတ်ႈ ဢၼ်တၢင်ႇဝႆႉၵႃႈတီႈၽၢႆႇၼႃႈၶုၼ်ႁေႃၶမ်းၼၼ်ႉသေလႄႈသၢၵ်ႈဢေႃႈ။ မိူဝ်ႈဢွၼ်တၢင်းၼၼ်ႉ ပိူဝ်ႈဢၼ်ၵဝ်ဢမ်ႇတွၼ်ႉၼႄပျႃးၼႃႈဢၼ်ႁဵဝ်ႇၸွပ်ႈ ၵႃႈတီႈၽၢႆႇၼႃႈၸဝ်ႈသေပွၵ်ႈလႄႈ၊-

2ၶုၼ်ႁေႃၶမ်းမီးဢမိင်ႉလႄႈဝႃႈ၊ မႂ်းၼႆႉယူႇလီၵိၼ်ဝၢၼ်ယူႇလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၼႃႈႁဵဝ်ႇၸွပ်ႈၼင်ႇႁိုဝ်။ မိူၼ်ၼင်ႇႁၢင်ႈမႂ်းၸႂ်လဵၵ်ႉငိၼ်းၽၢၼ်ထိုင်ၸႂ်ယူႇလူင်ပႄႇ၊ ဝႃႈၼင်ႇၼႆသေယဝ်ႉ၊ ၵဝ်ၵူဝ်ႁႄၼႃႇလူင်လၢင်လႄႈ၊-

3လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ႁႂ်ႈဢသၢၵ်ႈၸဝ်ႈၶုၼ်လူင်လိပ်းယူႇတႃႇသေႇသေၵမ်းလူၺ်ႈတီႈၶႃႈ။ ၵွပ်ႈပိူဝ်ႈဢၼ်ဝဵင်းတီႈဢၼ် ပႃႇႁဵဝ်ႈသၢင်းၶႅင်းပူႇမွၼ်ႇၶႃႈၸဝ်ႈၼႆႉၸိူဝ်းၼၼ်ႉ မီးၼၼ်ႉလူႉယူႇႁၢမ်းယူႇသေလႄႈ ၽၵ်းတူဝဵင်းတင်းလၢႆၵေႃႈ ၽႆးမႆႈပႅတ်ႈယဝ်ႉၼၼ်ႉလႄႈ၊ ၶႃႈၸဝ်ႈႁဝ်းၼႆႉ ၼႃႈယင်းဢမ်ႇႁဵဝ်ႇၸွပ်ႈလႄႈ တၵ်းယူႇလႆႈၸိူဝ်ႉၼင်ႇႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

4ၶုၼ်ႁေႃၶမ်းတွင်ႈထၢမ်လႄႈဝႃႈ၊ မႂ်းၶႂ်ႈလဝ်ႊယွၼ်းဢဝ်ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

5ၵဝ်သူးတွင်းတီႈၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်သေယဝ်ႉ၊ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ပေႃးဢလူဝ်ႇၸဝ်ႈ ၶုၼ်လူင်မီးလႄႈ ၶႃႈၸဝ်ႈၼႆႉထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင်၊ ၶႅၼ်းတေႃႈပွႆႇၸႂ်ႉၶႃႈၸဝ်ႈႁဝ်းၼႆႉၵႂႃႇၵႃႈတီႈမိူင်း ယူႉတႃႉ ၸူးၵႃႈတီႈဝဵင်း တီႈဢၼ်ပႃႇႁဵဝ်ႈသၢင်းၶႅင်းပူႇမွၼ်ႇၶႃႈၸဝ်ႈၼႆႉၸိူဝ်းၼၼ်ႉမီးၼၼ်ႉ ႁႂ်ႈလႆႈမႄးၵုမ်းမႄးႁဵတ်းဝဵင်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

6မိူဝ်ႈၼၼ်ႉ ၼႂ်းမိူဝ်ႈဢၼ်ၼၢင်းႁေႃၶမ်း ယင်းတိုၵ်ႉၼင်ႈယူႇၵႃႈတီႈႁိမ်းမၼ်းၸဝ်ႈၼၼ်ႉၸိုင်၊ ၶုၼ်ႁေႃၶမ်းမီးဢမိင်ႉတီႈၵဝ်လႄႈဝႃႈ၊ ပေႃးမႂ်းၵႂႃႇၸိုင်၊ တၵ်းႁိုင်ၶိင်ႇၵႃႈႁိုဝ်။ တၵ်းၶိုၼ်းမႃးမိူဝ်ႈလႂ်၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းမီးဢလူဝ်ႇၶႂ်ႈပွႆႇၸႂ်ႉၵဝ်လႄႈ၊ ၵဝ်လႆႈမၵ်းၶိၼ်းဝႆႉမိုဝ်ႉမၼ်းဝၼ်းမၼ်းဢေႃႈ။-

7ၵဝ်သမ်ႉလဝ်ႊယွၼ်းတီႈၶုၼ်ႁေႃၶမ်းလႄႈဝႃႈ၊ ပေႃးဢလူဝ်ႇၸဝ်ႈၶုၼ်လူင်မီးၸိုင်၊ ၶႅၼ်းတေႃႈဢဵတ်းလူပၼ် လိၵ်ႈဢမိင်ႉၸဝ်ႈတီႈၶႃႈၸဝ်ႈႁဝ်းၼႆႉ ပုၼ်ႈမဵဝ်ႉဝုၼ်ႇဢၼ်မီးၵႃႈတီႈၽၢႆႇဝၼ်းတူၵ်းၼမ်ႉႁွင်ႈၸိူဝ်းၼၼ်ႉ ႁႂ်ႈၶဝ်ဢမ်ႇလႆႈႁႄႉလႆႈႁၢမ်ႈလႄႈ ပွႆႇၸႂ်ႉၶႃႈၸဝ်ႈႁဝ်းၵႂႃႇ တေႃႇထိုင်ႁွတ်ႈမိူင်း ယူႉတႃႉ ပုၼ်ႉသေၵမ်းတီႈၶႃႈ၊-

8လိၵ်ႈဢမိင်ႉၸဝ်ႈတင်းၽိုၼ်ဢၼ်ႁႂ်ႈ ဢႃႇသပ်ႉ ၵူၼ်းပႂ်ႉသူၼ်ဢူးယဵၼ်ႇၸဝ်ႈၼၼ်ႉ ပၼ်မႆႉၸိင်ပုၼ်ႈဢၼ်တၵ်းႁဵတ်းသဝ်ၽၵ်းတူတိူၵ်ႈတီႈတိုၵ်းသိုၵ်း ၵႃႈတီႈပိၵ်ႈမၢၼ်ႇၸဝ်ႈ တင်းၶိုဝ်ႇၽၵ်းတူဢိၵ်ႇတင်းပုၼ်ႈလမ်းဝဵင်း တင်းပုၼ်ႈႁိူၼ်း ဢၼ်ၶႃႈၸဝ်ႈႁဝ်းၼႆႉတၵ်းယူႇၼၼ်ႉၵေႃႈ ၶႅၼ်းတေႃႈဢဵတ်းလူပၼ်သေၵမ်းတီႈၶႃႈ၊ ဝႃႈၼင်ႇၼႆလႄႈ၊ ၶုၼ်ႁေႃၶမ်းဢဵတ်းလူပၼ် ၵွပ်ႈပိူဝ်ႈၵျေးၸူးတၼ်းၶူဝ်းမိုဝ်းၽြႃးပဵၼ်ၸဝ်ႈ ဢၼ်မီးယူႇၵႃႈၼိူဝ်ၵဝ်ၼၼ်ႉဢေႃႈ။

9မိူဝ်ႈၼၼ်ႉၵဝ်ႁွတ်ႈထိုင်ၵႃႈတီႈမဵဝ်ႉဝုၼ်ႇ ၽၢႆႇဝၼ်းတူၵ်းၼမ်ႉႁွင်ႈၸိူဝ်းၼၼ်ႉလႄႈ ဢဝ်လိၵ်ႈဢမိင်ႉၸဝ်ႈၶုၼ်ႁေႃၶမ်း ဢွၵ်ႇၼႄပျႃးတီႈၶဝ်ၼၼ်ႉဢေႃႈ။ တပ်ႉမူးလႂ် တင်းႁူဝ်ႁၢၼ်ၶီႇမႃႉလႂ်ၵေႃႈ၊ ၶုၼ်ႁေႃၶမ်းပွႆႇၸႂ်ႉၸွမ်းလူၺ်ႈၵၼ်တင်းၵဝ်ဢေႃႈ။-

10မိူဝ်ႈဢၼ် သၼ်ႇပႃးလတ်ႉ ၵူၼ်း ႁေႃႇရၼီႉ ဢိၵ်ႇတင်း တေႃႇၽီႉ ၵေႃႉဢၼ်ပဵၼ်ၶႃႈလႄႈ ပဵၼ်ၵူၼ်းမဵဝ်း ဢမ်ႇမုၼ်ႇ ၼၼ်ႉ ငိၼ်းလွင်ႈဢၼ်ၵူၼ်းၵေႃႉၼိုင်ႈ မႃးႁႂ်ႈလႆႈပွင်ႁဵတ်းလုမ်းလႃးဢၵျူဝ်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉၸိုင်၊ သွင်ၶႃၼၼ်ႉ ၽိတ်းၸႂ်ၸဵပ်းၸႂ်ၼႃႇလူင်လၢင်ဢေႃႈ။

11ၵဝ်ႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ လႄႈ ယူႇသၢမ်ဝၼ်းသေယဝ်ႉ၊-

12ၵဝ်ဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ် ပႃးတီႈၵဝ်ၼၼ်ႉၵမ်ႈၽွင်ႈ လုၵ်ႉၶိင်ႇၵၢင်ၶိုၼ်းသေလႄႈ ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်ၽြႃးပဵၼ်ၸဝ်ႈၵဝ် သႂၢင်းသႂ်ႇပၼ်ၵႃႈၼႂ်းႁူဝ်ၸႂ် ႁႂ်ႈလႆႈပွင်လႆႈႁဵတ်းပုၼ်ႈဝဵင်း ယေႇရူႉသလႅမ်ႇ ၼၼ်ႉ တီႈပိူၼ်ႈတၢင်ႇၵေႃႉသေၵေႃႉသေၵူၼ်း ၼွၵ်ႈသေမႃႉဢၼ်ၵဝ်ၶီႇၼၼ်ႉ ယင်းဢမ်ႇပႃးသေတူဝ်လႄႈ၊-

13ၼႂ်းၶိင်ႇၵၢင်ၶိုၼ်း ဢွၵ်ႇၽၵ်းတူၶူင်ႈႁူၺ်ႈလႄႈ ၵႂႃႇၽၢႆႇတၢင်းၼမ်ႉမေႃႇၼၵႃး တေႃႇထိုင်ႁွတ်ႈၽၵ်းတူၶီႈဝူဝ်းသေလႄႈ လူတူၺ်းလမ်းဝဵင်း ယေႇရူႉသလႅမ်ႇ ဢၼ်ၵိူၼ်ႇပင်းယဝ်ႉၼၼ်ႉသေလႄႈ ၽၵ်းတူမၼ်းတင်းလၢႆၵေႃႈ ၽႆးမႆႈပႅတ်ႈယဝ်ႉၼၼ်ႉသေယဝ်ႉ၊-

14သမ်ႉပူၼ်ႉၸူးၵႃႈတီႈၽၵ်းတူၼမ်ႉမေႃႇဢွၵ်ႇႁူး ဢိၵ်ႇတင်းၼမ်ႉၼွင်ၶုၼ်ႁေႃၶမ်းသေလႄႈ ၵွပ်ႈပိူဝ်ႈဢၼ်ဢမ်ႇမီးတၢင်းဢၼ် မႃႉၵႂႃႇလႆႈၼၼ်ႉလႄႈ၊-

15ၼႂ်းၶိင်ႇၵၢင်ၶိုၼ်းၼၼ်ႉ သမ်ႉတႆႇလတ်းၵႂႃႇၸွမ်းၵႃႈတီႈႁိမ်းၼမ်ႉႁွင်ႈလႄႈ လူတူၺ်းလမ်းဝဵင်းသေယဝ်ႉ၊ သမ်ႉဝၢႆႇၶိုၼ်းလႄႈ ၶဝ်ႈၽၵ်းတူၶူင်ႈႁူၺ်ႈသေလႄႈ ၶိုၼ်းမႃးဢေႃႈ။-

16ၶုၼ်ဢရႃႇသီႉတင်းလၢႆ ဢမ်ႇႁူႉလွင်ႈဢၼ်ၵဝ်ၵႂႃႇၵႃႈတီႈလႂ်၊ လွင်ႈဢၼ်ၵဝ်ႁဵတ်းၸိူဝ်ႉၼင်ႇႁိုဝ်ၼၼ်ႉ။ ၵဝ်ယင်းဢမ်ႇပႆႇမွၵ်ႇပႆႇလၢတ်ႈလွင်ႈတီႈႁဵင်းၼၼ်ႉ တီႈၵူၼ်း ယူႉတႃႉ ၊ ယိတ်ႈပရေႃးႁဵၵ်ႈ၊ မူးမၢတ်ႈၽွင်းမိူင်း၊ ၶုၼ်ဢရႃႇသီႉ ဢိၵ်ႇတင်းၶဝ်ၸိူဝ်းဢၼ်သၢင်ႈဢၼ်ႁဵတ်းၸိူဝ်းၼၼ်ႉသေၵေႃႉသေၵူၼ်းလႄႈယူႇဢေႃႈ။

17လိုၼ်းၼၼ်ႉ ၵဝ်လၢတ်ႈတီႈၶဝ်လႄႈဝႃႈ၊ သူလႆႈႁူႉလႆႈႁၼ် လွင်ႈဢၼ်ႁဝ်းလႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်၊ လွင်ႈဢၼ်ဝဵင်း ယေႇရူႉသလႅမ်ႇ လူႉယူႇႁၢမ်းယူႇ၊ လွင်ႈဢၼ်ၽၵ်းတူဝဵင်းတင်းလၢႆ ၽႆးမႆႈပႅတ်ႈယဝ်ႉၼၼ်ႉယူႇဢေႃႈ။ မႃးမႃးဢိူၺ်း၊ ဢွၼ်ၵၼ်မႄးတႄႇမႄးႁဵတ်းဝဵင်း ယေႇရူႉသလႅမ်ႇ ႁႂ်ႈႁဝ်းၵၢင်းလွတ်ႈတင်းတၢင်းဢၼ်သႄႉသွမ်းတႃႉႁဝ်း၊ ဝႃႈၼင်ႇၼႆသေလႄႈ၊-

18ၽုၺ်ႇလၢတ်ႈပၼ်ငိၼ်း လွင်ႈဢၼ်ၵျေးၸူးမိုဝ်းၽြႃးပဵၼ်ၸဝ်ႈၵဝ် ႁဵတ်းဢၼ်လီဢၼ်ငၢမ်းတီႈၵဝ် ဢိၵ်ႇတင်းလွင်ႈၵႂၢမ်းဢၼ်ၶုၼ်ႁေႃၶမ်း မီးဢမိင်ႉတီႈၵဝ်ၼၼ်ႉတီႈၶဝ်လႄႈ၊ ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ ႁဝ်းဢွၼ်ၵၼ်လုၵ်ႉလႄႈ မႄးတႄႇမႄးႁဵတ်းတႃႉႁဝ်း၊ ဝႃႈၼင်ႇၼႆသေလႄႈ ၵေႃႉၼိုင်ႈတိုၵ်းယူင်းၸူဝ်းဢဝ်ၵေႃႉၼိုင်ႈ ႁႂ်ႈဢမူႉဢၼ်လီဢၼ်ငၢမ်းၼၼ်ႉ လႆႈယဝ်ႉလႆႈတူဝ်ႈဢေႃႈ။-

19မိူဝ်ႈဢၼ် သၼ်ႇပႃးလတ်ႉ ၵူၼ်း ႁေႃႇရၼီႉ၊ တေႃႇၽီႉ ၵေႃႉဢၼ်ပဵၼ်ၶႃႈလႄႈ ပဵၼ်ၵူၼ်း ဢမ်ႇမုၼ်ႇ တင်း ၵေႇသိမ်ႇ ၵူၼ်း ဢရေႇပျႃႉ ၸိူဝ်းၼၼ်ႉ ငိၼ်းလွင်ႈမၼ်းၼၼ်ႉၸိုင်၊ ၶဝ်ဢွၼ်ၵၼ်ႁဵတ်းပျၢၵ်ႈၶူဝ်လႄႈ ႁဵတ်းဢမ်ႇၼပ်ႉဢမ်ႇၶၢၼ်းတီႈႁဝ်းသေလႄႈဝႃႈ၊ သူတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။ သူတၵ်းပုင်ႇၵၢၼ်ႇၶုၼ်ႁေႃၶမ်းႁိုဝ်၊ ဝႃႈၼင်ႇၼႆဢေႃႈ။-

20ၵဝ်ၵေႃႈၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊ ၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉ တၵ်းပၼ်ဢၶႂၢင်ႉတီႈႁဝ်းဢေႃႈ။ ပိူဝ်ႈၼႆလႄႈ ႁဝ်းဢၼ်ပဵၼ်ၶႃႈမၼ်းၸဝ်ႈၼၼ်ႉၸိူဝ်းၼႆႉ တၵ်းဢွၼ်ၵၼ်လုၵ်ႉလႄႈ မႄးတႄႇမႄးႁဵတ်းဢေႃႈ။ သူၸမ်ႉ၊ ဢမ်ႇမီးပုၼ်ႈမီးတႃႇ၊ ဢမ်ႇမီးတီႈဢၼ်ဢုပ်ႉဢၼ်ပိူင်ႇ၊ ဢမ်ႇမီးတီႈမၢတ်ႈတီႈမၢႆ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်း ၵႃႈၼႂ်းဝဵင်း ယေႇရူႉသလႅမ်ႇ ၼႆႉလႃးလႃး၊ ဝႃႈၼင်ႇၼႆဢေႃႈ။

← Chapter 1 Jump to: Chapter 3 →