Nehemiah 13

Shan

← Chapter 12 Jump to:

1ၼႂ်းဝၼ်းၼၼ်ႉ မိူဝ်ႈဢၼ်ၶဝ်ၽတ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၸိုင်၊ ၶဝ်ထူပ်းႁၼ်လွင်ႈဢၼ် ၵူၼ်းမဵဝ်း ဢမ်ႇမုၼ်ႇ တင်းၵူၼ်းမဵဝ်း မေႃႇၽႃႉ ဢမ်ႇမီးဢၶႂၢင်ႉဢၼ်လႆႈၶဝ်ႈၵႃႈၼႂ်းပရဵၵ်ႈသၢတ်ႈၽြႃးပဵၼ်ၸဝ်ႈယူႇသေႇသေႇၼၼ်ႉဢေႃႈ။-

2လွင်ႈမၼ်းၸမ်ႉ ၶဝ်ၼၼ်ႉဢမ်ႇဢဝ်ၶဝ်ႈမုၼ်းတင်းၼမ်ႉ ႁႄႉႁပ်ႉႁူဝ်တၢင်းၵူၼ်းမဵဝ်း ဢီႉသရေႇလႃႉ တင်းလၢႆ။ ၶဝ်ၼၼ်ႉဢွၼ်ၵၼ် ၸၢင်ႈငႃဢဝ် ပႃႇလၢမ်ႇ ႁႂ်ႈလႆႈၵိၼ်ႇလႃႇၶဝ်ဢေႃႈ။ ၵူၺ်းၵႃႈ ၽြႃးပဵၼ်ၸဝ်ႈႁဝ်းၼၼ်ႉ ႁႂ်ႈၵႂၢမ်းဢၼ်ၵိၼ်ႇလႃႇၼၼ်ႉ ပဵၼ်ၵႂၢမ်းဢၼ်ပၼ်တၢင်းလီသေဢေႃႈ။-

3မိူဝ်ႈဢၼ်ၶဝ်လႆႈငိၼ်းၵႂၢမ်းတြႃးၼၼ်ႉၸိုင် ၶဝ်ဢွၼ်ၵၼ်ၽႄၶဝ်ၸိူဝ်းဢၼ် မဵဝ်းဢမ်ႇၸႅတ်ႈဢမ်ႇမၢၼ်ႇၵႃႈမီးၼၼ်ႉ ဢွၵ်ႇသေၵႃႈၼႂ်း မဵဝ်း ဢီႉသရေႇလႃႉ ဢေႃႈ။

4မိူဝ်ႈဢွၼ်တၢင်းၼၼ်ႉယိတ်ႈပရေႃးႁဵၵ်ႈ ဢေးလျႃႇသိပ်ႉ ဢၼ်လႆႈဢုပ်ႉၵႃႈၼိူဝ်လုၵ်း ဢၼ်ၵႃႈၼွၵ်ႈႁိူၼ်းၽြႃးပဵၼ်ၸဝ်ႈတင်းလၢႆလႄႈ ပဵၼ်ပီႈပဵၼ်ၼွင်ႉ တေႃႇၽီႉ ၼၼ်ႉ၊-

5မႄးႁႅၼ်းလုၵ်းလူင် ဢၼ်ယၢမ်ႈဢဝ်ၶိူင်ႈပုၵ်ႈၸေႃႇၽေႃးၸဵၼ်ႇလႂ်၊ ၼၢမ်ႇသႃႇလႂ်၊ ၶိူင်ႈယိပ်းၶိူင်ႈၵႅမ်းလႂ်၊ ၶဝ်ႈပိူၵ်ႇၶဝ်ႈသၢၼ်ၼမ်ႉၸပိတ်ႈ၊ ၼမ်ႉမၼ်းသိပ်းပုၼ်ႈပုၼ်ႈၼိုင်ႈ ဢၼ်လႆႈပၼ်တီႈၵူၼ်းမဵဝ်း လေႇဝီႉ ၊ ၶဝ်ၸိူဝ်းဢၼ်မေႃႁဵတ်းၵႂၢမ်းလႂ်၊ ၶဝ်ၸိူဝ်းဢၼ်ပႂ်ႉၽၵ်းတူၼၼ်ႉၸိူဝ်းၼၼ်ႉလႂ်၊ ဢိၵ်ႇတင်း တၢင်းလူႇတၢင်းတၢၼ်း ဢၼ်လႆႈလူႇတၢၼ်းတီႈယိတ်ႈပရေႃးႁဵၵ်ႈတင်းလၢႆလႂ် သႂ်ႇဝႆႉသိမ်းဝႆႉၼၼ်ႉ ပုၼ်ႈ တေႃႇၽီႉ ဢေႃႈ။-

6ၼႂ်းၶိင်ႇမိူဝ်ႈၼၼ်ႉတဵမ်တဵမ် ၵဝ်ဢမ်ႇမီးၵႃႈတီႈဝဵင်း ယေႇရူႉသလႅမ်ႇ ၊ ၼႂ်းပီႊဢၼ် ဢႃႇတၸေႇရိတ်ႉ ၶုၼ်ႁေႃၶမ်း ပႃႇပူႉလုၼ်ႇ ၸၢမ်ႇႁၢင်ႈၸၢမ်ႇႁေႃ သၢမ်သိပ်းပၢႆသွင်ပီႊၼၼ်ႉ ၵဝ်လႆႈၵႂႃႇတီႈၶုၼ်ႁေႃၶမ်းသေဢေႃႈ။ ႁိုင်တၢၼ်ႇတၢၼ်ႇသေယဝ်ႉ၊ ၵဝ်သမ်ႉလႆႈဢၶႂၢင်ႉတီႈၶုၼ်ႁေႃၶမ်းလႄႈ၊-

7မိူဝ်ႈဢၼ်ၵဝ် ႁွတ်ႈထိုင်ၵႃႈတီႈႁိမ်းဝဵင်း ယေႇရူႉသလႅမ်ႇ ၼၼ်ႉၸိုင်၊ ၵဝ်လႆႈႁူႉလႆႈငိၼ်း လွင်ႈတူႉၸရိူၵ်ႈဢၼ် ဢေးလျႃႇသိပ်ႉ လႆႈႁဵတ်း ၵွပ်ႈပိူဝ်ႈ တေႃႇၽီႉ ၼႂ်းတၢင်းဢၼ်မၼ်းမႄးႁႅၼ်း လုၵ်းၵႃႈၼႂ်းတမ်ႇတိူင်းႁိူၼ်းၽြႃးပဵၼ်ၸဝ်ႈဝႆႉပုၼ်ႈမၼ်းၼၼ်ႉဢေႃႈ။-

8မိူဝ်ႈၼၼ်ႉ ၵဝ်မီးၸႂ်ဢၼ်ၸဵပ်းၶိုၼ်ႈၼႃႇလူင်လၢင်လႄႈ ဢဝ်ဢုၵ်ႉၸႃႇၶူဝ်းလဵင်း တေႃႇၽီႉ ၵႃႈမီး ဢွၵ်ႇပႅတ်ႈသေၵႃႈၼႂ်းလုၵ်းၼၼ်ႉသေယဝ်ႉ၊-

9ၸီႇယၢင်ႇႁႂ်ႈလုၵ်းၶဝ်တင်းလၢႆမူတ်းသႂ်သေလႄႈ သမ်ႉဢဝ်ၶိူင်ႈပိူင်ႁိူၼ်းၽြႃးပဵၼ်ၸဝ်ႈလႂ်၊ ၶိူင်ႈပုၵ်ႈၸေႃႇၽေႃးၸဵၼ်ႇလႂ်၊ ၼၢမ်ႇသႃႇလႂ် မႃးသႂၢင်းသႂ်ႇဝႆႉဢေႃႈ။

10ၵဝ်ထွၵ်ႈလူၺ်ႈၵူၼ်းမဵဝ်း လေႇဝီႉ တင်းၶဝ်ၸိူဝ်းဢၼ်မေႃႁဵတ်းၵႂၢမ်း ဢၼ်ပႂ်ႉဢမူႉၸဝ်ႈၸိူဝ်းၼၼ်ႉ ဢွၼ်ၵၼ်ဢွၵ်ႇပၢႆႈၵႂႃႇၸူး ၵႃႈတီႈႁႆႊၶဝ်ၼႃးၶဝ်ႁင်းၽႂ်ႁင်းမၼ်းၼၼ်ႉလႄႈ ႁူႉသၢႆငၢႆလွင်ႈဢၼ်ၶဝ် ဢမ်ႇလႆႈၶၢမ်ႇဢဝ်ပုၼ်ႈဢဝ်တႃႇ ၵူၼ်းမဵဝ်း လေႇဝီႉ ၼၼ်ႉသေလႄႈ၊-

11တၢင်ႇဢပႅတ်ႈတီႈၶုၼ် ဢၼ်မီးဢရႃႇတင်းလၢႆလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁိူၼ်းၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ၸုၼ်ႉပႅတ်ႈသေၼင်ႇႁိုဝ်။ ဝႃႈၼင်ႇၼႆသေလႄႈ ႁႂ်ႈၶဝ်ၼၼ်ႉၸူႉၵၼ်တုမ်ၵၼ်သေယဝ်ႉ၊ သမ်ႉၶိုၼ်းၶၢၼ်းၶဝ်ဝႆႉၵႃႈၼႂ်းတီႈၶဝ်ဢေႃႈ။-

12မိူဝ်ႈၼၼ်ႉၵူၼ်း ယူႉတႃႉ တင်းလၢႆ သမ်ႉၶိုၼ်းဢွၼ်ၵၼ်ဢဝ်ၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႈ၊ ၼမ်ႉမၼ်း သိပ်းပုၼ်ႈပုၼ်ႈၼိုင်ႈ မႃးတီႈတိူၵ်ႈၽၼ်ႇတႃႇၸဝ်ႈဢေႃႈ။-

13ၵဝ်ၶၢၼ်းၽၼ်ႇတႃႇၸူဝ်းဝႆႉ ၵႃႈၼိူဝ်တိူၵ်ႈၽၼ်ႇတႃႇၸဝ်ႈတင်းလၢႆဢၼ်ဝႃႈ ယိတ်ႈပရေႃးႁဵၵ်ႈ သေႇလမီႉ၊ ၸႃႇတုၵ်ႉ ဢၼ်ပဵၼ်ၵူၼ်းမေႃၵျၢမ်း၊ ပေႇတႃႇယႃႉ ဢၼ်ပဵၼ်ၵူၼ်းမဵဝ်း လေႇဝီႉ ၊ လိုၼ်းမၼ်းၼၼ်ႉ ႁႃႇၼၼ်ႇ ဢၼ်ပဵၼ်လုၵ်ႈၸၢႆး ၸၵ်ႉၵူႉရႃႉ လုၵ်ႈၸၢႆး မတ်ႉတၼီႉ ၼၼ်ႉၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၶဝ်ၼၼ်ႉမီးသရေႇလူၺ်ႈလွင်ႈဢၼ်ပႂ်ႉသဵတ်ႈၸႃႇၼၼ်ႉလႄႈ လႆႈႁဵတ်းဢမူႉတၢင်းဢၼ် မႅင်ႇပၼ်ၽႄပၼ်တီႈပီႈၶဝ်ၼွင်ႉၶဝ်ဢေႃႈ။-

14ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်းသေၵမ်းတီႈၶႃႈ။ ယႃႇပေၶႄမွတ်ႇထူမွတ်ႇၵျေးၸူးဢၼ်ၶႃႈၸဝ်ႈႁဝ်း လႆႈႁဵတ်းပုၼ်ႈႁိူၼ်းၽြႃးပဵၼ်ၸဝ်ႈၵဝ်ၶႃႈ ဢိၵ်ႇတင်းပုၼ်ႈတၢင်းဢၼ်ပႂ်ႉဢမူႉႁိူၼ်းၸဝ်ႈၼၼ်ႉပႅတ်ႈသေၵမ်းတီႈၶႃႈ။

15ၼႂ်းၶိင်ႇၵႃႇလႃႉမိူဝ်ႈၼၼ်ႉ ၵႃႈၼႂ်းမိူင်း ယူႉတႃႉ ၵဝ်လႆႈႁၼ်ၵမ်ႈၽွင်ႈ ယဵပ်ႇၼူတ်ႈမၢၵ်ႇၸပိတ်ႈၼႂ်းဝၼ်းၵမ်သိၼ်ယူႇ။ ဢဝ်လိုၼ်ႈၶဝ်ႈသႂၢင်းၶဝ်ႈယူႇ။ ဢဝ်ၶူဝ်းတၢင်ႇၵႃႈၼိူဝ်လီႈယူႇသေလႄႈ ဢဝ်ၼမ်ႉၸပိတ်ႈ၊ မၢၵ်ႇလိူဝ်ႇသၢင်းၽေႃး၊ ၶူဝ်းႁၢပ်ႇၶူဝ်းပႃးၵူႈၸိူဝ်ႉၵူႈမဵဝ်း မႃးၵႃႈၼႂ်းဝဵင်း ယေႇရူႉသလႅမ်ႇ ဝၼ်းၵမ်သိၼ်ၼၼ်ႉလႄႈ ၵဝ်ၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၶဝ် ၼႂ်းဝၼ်းဢၼ် ၶဝ်ၶၢႆတၢင်းၵိၼ်တၢင်းၶူပ်းယူႇၼၼ်ႉဢေႃႈ။-

16ၵူၼ်း တူႉရူႉ ဢၼ်ယူႇၵႃႈတီႈၼၼ်ႈၸိူဝ်းၼၼ်ႉၵေႃႈ ၸၢင်ႈဢွၼ်ၵၼ်ဢဝ်ပႃလႂ် တင်းဢုၵ်ႉၸႃႇၶူဝ်းလဵင်း ၵူႈၸိူဝ်ႉၵူႈပိူင်လႂ်မႃးလႄႈ ၶၢႆပၼ်တီႈၵူၼ်းမဵဝ်း ယူႉတႃႉ တင်းလၢႆ ၵႃႈၼႂ်းဝဵင်း ယေႇရူႉသလႅမ်ႇ ၼႂ်းဝၼ်းၵမ်သိၼ်ဢေႃႈ။-

17မိူဝ်ႈၼၼ်ႉၵဝ်တၢင်ႇဢပႅတ်ႈတီႈမူးမၢတ်ႈၽွင်းမိူင်း ယူႉတႃႉ တင်းလၢႆလႄႈဝႃႈ၊ တူႉၸရိူၵ်ႈဢၼ်သူႁဵတ်းလႄႈ ယႃႉဝၼ်းၵမ်သိၼ်ၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။-

18ပူႇသူမွၼ်ႇသူၼၼ်ႉႁဵတ်းၸိူဝ်ႉၼင်ႇၼႆလႄႈ ၽြႃးပဵၼ်ၸဝ်ႈႁဝ်းႁႂ်ႈတုၵ်ႉၶႃႉတၢင်းၽၢၼ်ဢၼ်ယႂ်ႇၼႃႇၵႃႈမီးၼႆႉႁွတ်ႈထိုင်ၵႃႈၼိူဝ်ႁဝ်း ဢိၵ်ႇတင်းၵႃႈၼိူဝ်ဝဵင်းၼႆႉဢမ်ႇၸႂ်ႈႁိုဝ်။ သူယႃႉဝၼ်းၵမ်သိၼ်ၼႆႉလႄႈ တၵ်းႁႂ်ႈတၢင်းၸႂ်မႆႈၶႆႈၸႃႉၸဝ်ႈ ဢၼ်ယဵင်ႈၶႅၼ်းႁႅင်းယႂ်ႇၼႃႇၼၼ်ႉ ႁွတ်ႈထိုင်ၵႃႈၼိူဝ်မဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆသေလႄႈ၊-

19မိူဝ်ႈဢၼ်ၸႃႉငႃလပ်းသိင်ႇဝွၼ်ႉဝႅၼ်ႉတီႈၽၵ်းတူဝဵင်း ယေႇရူႉသလႅမ်ႇ တင်းလၢႆ ၼႂ်းဝၼ်းၽိတ်ႈၼၼ်ႉၸိုင်၊ ၵဝ်ၸီႇယၢင်ႇႁႂ်ႈဢိုတ်းႁပ်းၽၵ်းတူၸိူဝ်းၼၼ်ႉဝႆႉလႄႈ မီးဢမိင်ႉဝႆႉႁႂ်ႈဢမ်ႇလႆႈၽုၺ်ႇ တေႃႇထိုင်ႁွတ်ႈထၼ်ႈပေႃးပူၼ်ႉဝၼ်းၵမ်သိၼ်ၼၼ်ႉသေလႄႈ ၶၢၼ်းၶႃႈၵူၼ်းၵဝ်ၵမ်ႈၽွင်ႈဝႆႉ ၵႃႈတီႈၽၵ်းတူၸိူဝ်းၼၼ်ႉ ႁႂ်ႈဢမ်ႇလႆႈဢဝ်ၶူဝ်းႁၢပ်ႇၶူဝ်းပႃး ၶဝ်ႈၵႃႈၼႂ်းဝဵင်းၼႂ်းဝၼ်းၵမ်သိၼ်ဢေႃႈ။-

20လိုၼ်းၼၼ်ႉ ၸဝ်ႈၵုၼ်ႇၸဝ်ႈသိၼ်ဢိၵ်ႇတင်းၶဝ်ၸိူဝ်းဢၼ်ၶၢႆၶူဝ်းၶၢႆလဵင်းၵူႈၸိူဝ်ႉၵူႈပိူင်ၼၼ်ႉၸိူဝ်းၼၼ်ႉ လႆႈဢွၼ်ၵၼ်ၼွၼ်းၵႃႈတီႈၼွၵ်ႈဝဵင်း ယေႇရူႉသလႅမ်ႇ ပွၵ်ႈၼိုင်ႈ သွင်ပွၵ်ႈဢေႃႈ။-

21ၵဝ်ၵေႃႈပၼ်သတီႉတီႈၶဝ်လႄႈ လၢတ်ႈတီႈၶဝ်လႄႈဝႃႈ၊ ႁဵတ်းသင်လႄႈသူဢွၼ်ၵၼ်ၼွၼ်းၵႃႈတီႈလဵပ်ႈႁွပ်ႈလမ်းဝဵင်းၼင်ႇႁိုဝ်။ ၵမ်းလိုၼ်းပေႃးသူႁဵတ်းၸိူဝ်ႉၼင်ႇၼၼ်ထႅင်ႈၸိုင်၊ ၵဝ်တၵ်းတီႉဢဝ်ၵမ်ဢဝ်သူဢေႃႈ၊ ဝႃႈၼင်ႇၼႆဢေႃႈ။ ၸႃႉၸဵမ်မိူဝ်ႈၼၼ်ႉၵႂႃႇလႄႈ ၶဝ်ယင်းဢမ်ႇဢွၼ်ၵၼ်မႃးၼႂ်းဝၼ်းၵမ်သိၼ်လႄႈယူႇဢေႃႈ။-

22ၵဝ်ၸီႇယၢင်ႇႁႂ်ႈၵူၼ်းမဵဝ်း လေႇဝီႉ တင်းလၢႆ ႁႂ်ႈတူဝ်ၸဝ်ႈၵဝ်ႇမူတ်းသႂ်သေလႄႈ မႃးပႂ်ႉၽၵ်းတူ ႁႂ်ႈဝၼ်းၵမ်သိၼ်လႆႈမူတ်းၸၢင်ႇဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်း ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၶႅၼ်းတေႃႈဢဵတ်းလူၵႄႇသႄႇၶျွတ်ႈဢဝ် ၶႃႈၸဝ်ႈႁဝ်းၸွမ်းၵႃႈၼင်ႇဢၼ်ၵရူႉၼႃႇၸဝ်ႈၼမ်ၼႃႇၼၼ်ႉသေၵမ်းတီႈၶႃႈ။

23ၼႂ်းၶိင်ႇၵႃႇလႃႉမိူဝ်ႈၼၼ်ႉ ၵဝ်ႁၼ်ၵူၼ်း ယူႉတႃႉ ဢၼ်ပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈယိင်း မဵဝ်း ဢႃႇၸုတ်ႉ မဵဝ်း ဢမ်ႇမုၼ်ႇ မဵဝ်း မေႃႇၽႃႉ ၵမ်ႈၽွင်ႈဢေႃႈ။-

24လုၵ်ႈၶဝ်လၢင်းၶဝ်ၼၼ်ႉမေႃလၢတ်ႈၵႂၢမ်း ဢႃႇၸုတ်ႉ ယေႈၶိုင်ႈၵူၺ်းလႄႈ၊ ယင်းဢမ်ႇမေႃလၢတ်ႈၵႂၢမ်း ယူႉတႃႉ လႄႈ လၢတ်ႈၸွမ်းၵႂၢမ်းၽႃႇသႃႇမဵဝ်းၽႂ်မဵဝ်းမၼ်းၼၼ်ႉဢေႃႈ။-

25ၵဝ်တၢင်ႇဢပႅတ်ႈတီႈၶဝ်လႄႈသႄႉသွမ်းၶဝ်ဢေႃႈ။ ၵဝ်ဢဝ်ၵမ်ႈၽွင်ႈပေႃႉယႅၼ်ႉလႄႈ ထူၺ်ႈၶူၼ်ႁူဝ်ၶဝ်ပႅတ်ႈသေလႄႈ ႁႂ်ႈၶဝ်ဢဝ်ၽြႃးပဵၼ်ၸဝ်ႈတိူင်ႇဝႃႈၵိၼ်ႇဝႃႈလႄႈဝႃႈ၊ သူၼႆႉဢမ်ႇလႆႈဢဝ်လုၵ်ႈယိင်းသူပၼ်တီႈလုၵ်ႈၸၢႆးၶဝ်ၼၼ်ႉ။ ဢမ်ႇလႆႈသိမ်းဢဝ်လုၵ်ႈယိင်းၶဝ်ပုၼ်ႈလုၵ်ႈၸၢႆးသူ ဢိၵ်ႇတင်းပုၼ်ႈတူဝ်သူ၊-

26သေႃးလမုၼ်ႇ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ႁဵတ်းၸိူဝ်ႉၼင်ႇၼၼ်လႄႈ ႁွတ်ႈထိုင်တၢင်းဢၼ်ၽိတ်းပိူင်ႈဢမ်ႇၸႂ်ႈႁိုဝ်။ ပိၵ်ႉသမ်ႉၵႃႈၼႂ်းၵူႈသိုင်ႇၵူႈမိူင်း ၶုၼ်ႁေႃၶမ်းဢၼ်မိူၼ်ၵၼ်တင်းမၼ်းၼၼ်ႉ ဢမ်ႇမီးလႄႈ မၼ်းပဵၼ်ၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈ တေႃႇထိုင်ႁွတ်ႈထၼ်ႈပေႃး ၽြႃးပဵၼ်ၸဝ်ႈႁႂ်ႈမၼ်းပဵၼ်ၶုၼ်ႁေႃၶမ်း ဢီႉသရေႇလႃႉ သေၵေႃႈ၊ မႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢွၼ်ၵၼ်ႁႂ်ႈမၼ်းၽိတ်းပိူင်ႈလူင်ပႄႇ။-

27ႁဝ်းတၵ်းလႆႈထွမ်ႇဢဝ်ၵႂၢမ်းသူသေလႄႈ ႁဵတ်းတူႉၸရိူၵ်ႈဢၼ်ယႂ်ႇၵႃႈမီးၼႆႉ ဢၼ်ဝႃႈတၢင်းဢၼ်ႁူမ်ႈပွင်းပဵၼ်ၵူပ်ႉပဵၼ်ၵူႈ လူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈ ၽိတ်းပိူင်ႈၽြႃးပဵၼ်ၸဝ်ႈႁဝ်းႁိုဝ်။ ဝႃႈၼင်ႇၼႆဢေႃႈ။-

28ၵွပ်ႈပိူဝ်ႈဢၼ်လုၵ်ႈၸၢႆး ယေႃးယတႃႉ ၊ ဢၼ်ပဵၼ်လုၵ်ႈၸၢႆး ဢေးလျႃႇသိပ်ႉ ၶုၼ်ယိတ်ႈပရေႃးႁဵၵ်ႈၼၼ်ႉၵေႃႉၼိုင်ႈ ပဵၼ်လုၵ်ႈၶူၺ် သၼ်ႇပႃးလတ်ႉ ၵူၼ်း ႁေႃႇရၼီႉ ၼၼ်ႉလႄႈ ၵဝ်ႁေႃႈမၼ်းၼၼ်ႉဢွၵ်ႇပႅတ်ႈသေဢေႃႈ။-

29ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၵွပ်ႈပိူဝ်ႈဢၼ်ၶဝ်ၼၼ်ႉ ႁဵတ်းႁႂ်ႈဢရႃႇယိတ်ႈပရေႃးႁဵၵ်ႈဢိၵ်ႇတင်းပတီႉၺိၺ်ႇဢၼ်ႁဵတ်းလူၺ်ႈၵၼ်တင်းယိတ်ႈပရေႃးႁဵၵ်ႈ တင်းၵူၼ်းမဵဝ်း လေႇဝီႉ ၼၼ်ႉ ၵူဝ်ႈၵိူၵ်ႇၼၼ်ႉလႄႈ ၶႅၼ်းတေႃႈမၢတ်ႈတွင်းၶဝ်ၼၼ်ႉသေၵမ်းတီႈၶႃႈ၊-

30ၼင်ႇၼၼ်လႄႈ ၵဝ်ႁႂ်ႈၶဝ်မူတ်းသႂ် ၵၢင်းလွတ်ႈတင်းၵူၼ်းတၢင်ႇၸိူဝ်ႉတၢင်ႇမဵဝ်းသေလႄႈ ၶၢၼ်းယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ ၸိူဝ်းၼၼ်ႉဝႆႉ ပဵၼ်မုၵ်ႉပဵၼ်ၸိူဝ်းပုၼ်ႈ တၢင်းႁဵတ်းၽႂ်တၢင်းႁဵတ်းမၼ်း၊-

31ဢိၵ်ႇတင်း ပုၼ်ႈဢၼ်တၵ်းပုၵ်ႈၸေႃႇ တၢင်းပုၵ်ႈၸေႃႇၽိုၼ်း ဢိၵ်ႇတင်း မၢၵ်ႇဢၼ်မၢၵ်ႇဢွၼ်တၢင်းၼႂ်းၶိင်ႇဢၼ်မၵ်းၶၢၼ်းဝႆႉၼၼ်ႉဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်း ပုၼ်ႈဢၼ်လီဢၼ်ငၢမ်းသေၵမ်းတီႈၶႃႈ။ လိၵ်ႈမၢတ်ႈလွင်ႈၼေႇႁမီႉယဝ်ႉယဝ်ႉဢေႃႈ။

← Chapter 12 Jump to: