Nehemiah 5

Shan

← Chapter 4 Jump to: Chapter 6 →

1မိူဝ်ႈၼၼ်ႉ ၵူၼ်းတင်းလၢႆၸဵမ်ယိင်းၸဵမ်ၸၢႆး ဢွၼ်ၵၼ်ပွင်ႉၶၢင်းပွင်ႉမိူၼ်ႇၼႃႇလူင်လၢင်လႄႈ တၢင်ႇဢပႅတ်ႈတီႈၵူၼ်း ယူႉတႃႉ ဢၼ်ပဵၼ်ပီႈၶဝ်ၼွင်ႉၶဝ်ၸိူဝ်းၼၼ်ႉဢေႃႈ။-

2ၵမ်ႈၽွင်ႈလၢတ်ႈလႄႈဝႃႈ၊ ႁဝ်းဢိၵ်ႇလူၺ်ႈၵၼ်တင်းလုၵ်ႈၸၢႆးႁဝ်း လုၵ်ႈယိင်းႁဝ်းၼမ်ၼႃႇဢေႃႈ။ ႁႂ်ႈႁဝ်းလႆႈၶဝ်ႈပိူၵ်ႇၶဝ်ႈသၢၼ် ပုၼ်ႈဢၼ်ႁဝ်းတၵ်းၵိၼ်လႄႈ လဵင်ႉဢသၢၵ်ႈႁဝ်းၼၼ်ႉသေၵမ်း၊ ဝႃႈၼင်ႇၼႆဢေႃႈ။-

3ၵမ်ႈၽွင်ႈၵေႃႈဢွၼ်ၵၼ်လၢတ်ႈလႄႈဝႃႈ၊ ႁဝ်းၼႆႉဢဝ်ႁႆႊၼႃးသူၼ်ဢူးယဵၼ်ႇႁိူၼ်းႁဝ်း ပွင်ႇၵမ်ႉဝႆႉယဝ်ႉ၊ ႁႂ်ႈႁဝ်းလႆႈၶဝ်ႈပိူၵ်ႇၶဝ်ႈသၢၼ် ၵွပ်ႈပိူဝ်ႈဢၼ်ပဵၼ်ၶိင်ႇၵႃႇလႃႉ ဢၼ်တၢင်းၵိၼ်ၵႃႈပႅင်းၼႆႉၼၼ်ႉသေၵမ်း၊ ဝႃႈၼင်ႇၼႆဢေႃႈ။-

4ၵမ်ႈၽွင်ႈၵေႃႈလၢတ်ႈလႄႈဝႃႈ၊ ႁဝ်းဢဝ်ႁႆႊႁဝ်းၼႃးႁဝ်း သူၼ်ဢူးယဵၼ်ႇႁဝ်း ၵိူၼ်ႉၼၢႆသေလႄႈ ၵူႈဢဝ်ငိုၼ်းႁႂ်ႈလႆႈပၼ်ၶွၼ်ႇၶုၼ်ႁေႃၶမ်းယဝ်ႉယဝ်ႉ။-

5မိူဝ်ႈလဵဝ်ၼႆႉ၊ ၼိူဝ်ႉၼင်ႁဝ်းၼႆႉ ပဵၼ်ၸိူဝ်ႉၼင်ႇၼိူဝ်ႉၼင်ပီႈႁဝ်းၼွင်ႉႁဝ်းၸိူဝ်းၼၼ်ႉဢေႃႈ။ လုၵ်ႈလၢင်းႁဝ်းၵေႃႈ ပဵၼ်ၸိူဝ်ႉၼင်ႇလုၵ်ႈလၢင်းၶဝ်ၼၼ်ႉဢေႃႈ။ တူၺ်းလူး၊ ႁဝ်းတၵ်းလႆႈၶၢႆလုၵ်ႈလၢင်းႁဝ်း ႁႂ်ႈၶဝ်လႆႈၶၢမ်ႇႁဵတ်းၶႃႈပိူၼ်ႈလႄႈ လုၵ်ႈယိင်းႁဝ်းၵမ်ႈၽွင်ႈၵေႃႈ လႆႈၶၢမ်ႇႁဵတ်းၶႃႈပိူၼ်ႈယဝ်ႉယဝ်ႉ။ ႁဝ်းဢမ်ႇထုတ်ႇၼုၵ်ႈဢဝ်ၶဝ်လႆႈ။ ႁႆႊၼႃးသူၼ်ဢူးယဵၼ်ႇဢၼ်ႁဝ်းပိူင်ႇၼၼ်ႉ ႁွတ်ႈထိုင်ၵႃႈၼႂ်းမိုဝ်းပိူၼ်ႈယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

6မိူဝ်ႈဢၼ်ၵဝ်ငိၼ်းၵႂၢမ်းဢၼ်ပွင်ႉၶၢင်းပွင်ႉမိူၼ်ႇသေလႄႈ တၢင်ႇဢပႅတ်ႈၸိူဝ်းၼၼ်ႉၸိုင်၊ ၵဝ်မီးၸႂ်ဢၼ်မႆႈဢၼ်ႁွၼ်ႉၼႃႇလူင်လၢင်လႄႈ၊-

7ၶႆႈၸႂ်ဝူၼ်ႉၸႂ်ၵူၺ်းတူဝ်ၸဝ်ႈၵဝ်ႇသေလႄႈ သင်ႇသွၼ်မူးမၢတ်ႈၽွင်းမိူင်းတင်းလၢႆ ဢိၵ်ႇတင်းၶုၼ်ဢၼ်မီးဢရႃႇၸိူဝ်းၼၼ်ႉလႄႈဝႃႈ၊ သူၼႆႉၸၢင်ႈဢွၼ်ၵၼ်ၵိၼ်ၶီႈၶဝ်ႈၶီႈငိုၼ်း တီႈပီႈတီႈၼွင်ႉသူႁင်းၽႂ်ႁင်းမၼ်းလူင်ပႄႇ၊ ဝႃႈၼင်ႇၼႆသေယဝ်ႉ၊ ႁႂ်ႈၵူၼ်းၸူႉၵၼ်တုမ်ၵၼ် ပဵၼ်ပရဵၵ်ႈသၢတ်ႈဢၼ်ယႂ်ႇၼႃႇယူႇၽၢႆႇၼိုင်ႈတင်းၶဝ်ၼၼ်ႉသေလႄႈလၢတ်ႈဝႃႈ၊-

8ၵႃႈၼင်ႇဢၼ်ႁဝ်းတၢတ်ႈၼိူင်ႇလႆႈၼၼ်ႉ ႁဝ်းထုတ်ႇၼုၵ်ႈဢဝ်ၵူၼ်း ယူႉတႃႉ ဢၼ်ပဵၼ်ပီႈႁဝ်းၼွင်ႉႁဝ်း ဢၼ်လႆႈၶၢမ်ႇႁဵတ်းၶႃႈတီႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆၸိူဝ်းၼၼ်ႉမႃးသေယဝ်ႉ၊ သူသမ်ႉတၵ်းၶၢႆပီႈသူၼွင်ႉသူထႅင်ႈလူးၵွၼ်ႇႁိုဝ်။ ၶဝ်တၵ်းလႆႈၶၢမ်ႇတၢင်းဢၼ် ၶၢႆပၼ်တီႈႁဝ်းထႅင်ႈလူးၵွၼ်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉယင်းဢမ်ႇတၵ်းသဵင်လႄႈ ဢမ်ႇမီးၵႂၢမ်းတီႈဢၼ်တၵ်းၶိုၼ်းလၢတ်ႈသေၶေႃႈသေၵမ်း။-

9ၵဝ်ၵေႃႈလၢတ်ႈလႄႈဝႃႈ၊ လွင်ႈတၢင်းဢၼ်သူႁဵတ်းၼႆႉဢမ်ႇလီလူင်ပႄႇ။ သူထုၵ်ႇၸွမ်းသဵၼ်ႈတၢင်းဢၼ်ၵူဝ်ႁႄၽြႃးပဵၼ်ၸဝ်ႈ ၵွပ်ႈပိူဝ်ႈတၢင်းဢၼ်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ပဵၼ်ရၢၼ်ႇသူႇႁဝ်းၸိူဝ်းၼၼ်ႉ တၵ်းလႆႈသႄႉသွမ်းႁဝ်းၼၼ်ႉဢမ်ႇၸႂ်ႈႁိုဝ်။-

10ၵဝ်ဢိၵ်ႇတင်းၼွင်ႉၸၢႆးၵဝ်၊ ၶႃႈၵူၼ်းၵဝ်ၸိူဝ်းၼႆႉၵေႃႈ၊ ၵဝ်လႆႈပၼ်ၵူႈပၼ်ယိမ်ငိုၼ်း၊ ၶဝ်ႈပိူၵ်ႇ၊ ၶဝ်ႈသၢၼ်တီႈၶဝ်ၼၼ်ႉ ပုၼ်ႈဢတူဝ်းဢမျၢတ်ႈမၼ်းယူႇဢေႃႈ။ ၵူၺ်းၵႃႈ ဢွၼ်ၵၼ်ပႄႇပႅတ်ႈဢမူႉ တၢင်းဢၼ်ၵိၼ်ၶီႈၶဝ်ႈၶီႈငိုၼ်းၼၼ်ႉတႃႉႁဝ်း။-

11ဝၼ်းမိူဝ်ႈၼႆႉ ဢွၼ်ၵၼ်ဢဝ်ႁႆႊၼႃးၶဝ်၊ သူၼ်ဢူးယဵၼ်ႇၸပိတ်ႈၶဝ်၊ သူၼ်ဢူးယဵၼ်ႇ သၢၼ်ႇလုၼ်ႇ ၶဝ်၊ ႁိူၼ်းယေးၶဝ် ဢိၵ်ႇတင်း ၵႃႈၼႂ်းငိုၼ်း၊ ၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႈ ၼမ်ႉမၼ်း ဢၼ်သူၽႃႇၵဵပ်းဢဝ်တီႈၶဝ်ယဝ်ႉၼၼ်ႉ ပၢၵ်ႇပုၼ်ႈပုၼ်ႈၼိုင်ႈၼၼ်ႉ ၶိုၼ်းပၼ်သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

12ၶဝ်ဢွၼ်ၵၼ်ႁပ်ႉတုင်းဢဝ်လႄႈဝႃႈ၊ ႁဝ်းၶႃႈတၵ်းၶိုၼ်းပၼ်ဢေႃႈ။ တၵ်းဢမ်ႇယွၼ်းဢဝ်ၵႃႈသင်။ တၵ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉၵဝ်ႁွင်ႉဢဝ်ယိတ်ႈပရေႃးႁဵၵ်ႈတင်းလၢႆမႃးလႄႈ ၵူၼ်းတင်းလၢႆတိူင်ႇဝႃႈၵိၼ်ႇဝႃႈ လွင်ႈဢၼ်ၶဝ်တၵ်းလႆႈႁဵတ်း ၸွမ်းၵႃႈၼင်ႇဢၼ်ဝႆႉၵတီႉၼၼ်ႉသေလႄႈ၊-

13ၽႅတ်းသၼ်ႇပိၵ်ႇသိူဝ်ႈၵဝ်လႄႈ လၢတ်ႈလႄႈဝႃႈ၊ ႁႂ်ႈၽြႃးပဵၼ်ၸဝ်ႈၽႅတ်းသၼ်ႇၶဝ်ၸိူဝ်းဢၼ်ႁႂ်ႈၵတီႉၼႆႉလူႉၼၼ်ႉပႅတ်ႈသေၵႃႈၼႂ်းႁိူၼ်းၸဝ်ႈ ဢိၵ်ႇတင်းဢမူႉၸဝ်ႈၸိူဝ်ႉၼင်ႇၼႆသေၵမ်းလူၺ်ႈ။ ႁႂ်ႈၶဝ်ၼၼ်ႉလႆႈၶၢမ်ႇတၢင်းဢၼ်ၽႅတ်းသၼ်ႇၸိူဝ်ႉၼင်ႇၼႆလႄႈ ပဵၼ်ဢၼ်ပဝ်ႇဢၼ်လၢပ်ႈသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊ ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ဢွၼ်ၵၼ်ႁပ်ႉတုင်းဢဝ်လႄႈဝႃႈ၊ ဢႃႇမိၼ်ႇ၊ ဝႃႈၼင်ႇၼႆလႄႈ ယွင်ႈယေႃးထႃႇဝရႃႉၽြႃးဢေႃႈ။ ၵူၼ်းတင်းလၢႆၵေႃႈ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ဝႆႉၵတီႉၼၼ်ႉဢေႃႈ။

14ၼွၵ်ႈသေၼၼ်ႉ ၼႂ်းၶိင်ႇဢၼ်ၵဝ်လႆႈၶၢမ်ႇဢဝ်ဢရႃႇမဵဝ်ႉဝုၼ်ႇ ၸႃႉၸဵမ်ပီႊဢၼ်ၶုၼ်လူင် ဢႃႇတၸေႇရိတ်ႉ ၸၢမ်ႇႁၢင်ႈၸၢမ်ႇႁေႃသၢဝ်းပီႊ တေႃႇထိုင်ႁွတ်ႈ သၢမ်သိပ်းပၢႆသွင်ပီႊၼၼ်ႉတဵမ်တဵမ်၊ ၵဝ်ဢိၵ်ႇတင်းၼွင်ႉၸၢႆးၵဝ်တင်းလၢႆ ဢမ်ႇၵိၼ်ၸရိပ်ႈမဵဝ်ႉဝုၼ်ႇ။-

15မဵဝ်ႉဝုၼ်ႇဢၼ်ဢွၼ်တၢင်းၸိူဝ်းၼၼ်ႉၸမ်ႉ၊ ဢွၼ်ၵၼ်ၶၢမ်ႇဢဝ်တၢင်းဢၼ်လဵင်ႉဢၼ်လူ တီႈၵူၼ်းတင်းလၢႆဢေႃႈ။ ယေႈဝၼ်းယေႈဝၼ်း ၶဝ်ဢွၼ်ၵၼ်ၶၢမ်ႇဢဝ် ၶဝ်ႈမုၼ်းတင်းၼမ်ႉၸပိတ်ႈ ဢိၵ်ႇတင်းငိုၼ်းသီႇသိပ်းၵျၢပ်ႈ သၶေးလႃႉ ဢေႃႈ။ ၵူၼ်းၸႂ်ႉၵူၼ်းသွႆ ၵူၼ်းဢွၼ်ႇၸၢႆးၶဝ်ၼၼ်ႉၵေႃႈ၊ ႁဵတ်းၶုၼ် ဝႆႉဢႃႇၼႃႇၵႃႈၼိူဝ်ၵူၼ်းတင်းလၢႆဢေႃႈ။ ၵဝ်ၸမ်ႉ၊ ၵွပ်ႈပိူဝ်ႈဢၼ် ၵူဝ်ႁႄၽြႃးပဵၼ်ၸဝ်ႈၼၼ်ႉလႄႈ ဢမ်ႇႁဵတ်းၸိူဝ်ႉၼင်ႇၼၼ်။-

16ၼွၵ်ႈသေၼၼ်ႉ ၵဝ်ႁဵတ်းလမ်းဝဵင်းယူႇတိၵ်းတိၵ်းဢေႃႈ။ ႁဝ်းဢမ်ႇႁဵတ်းတၢင်းဢၼ်သိုဝ်ႉဢဝ်ႁႆႊဢဝ်ၼႃးလႃးလႃး။ ၵဝ် ဢိၵ်ႇတင်းၶႃႈၵူၼ်းၵဝ်တင်းသဵင်ႈတင်းလူင် ဢွၼ်ၵၼ်ၽွမ်ႉႁူမ်ႈၸွႆႈထႅမ်ပွင်ႁဵတ်းဢမူႉ တၢင်းဢၼ်တႄႇႁဵတ်းလမ်းဝဵင်းၵူၺ်းဢေႃႈ။-

17ၼွၵ်ႈသေၼၼ်ႉ ယင်းဢမ်ႇဝႃႈပႃးၵူၼ်းတၢင်ႇၸိူဝ်ႉတင်းမဵဝ်းဢၼ်ယူႇၵႃႈတီႈလဵပ်ႈႁွပ်ႈႁဝ်းလႄႈမႃးၸူးၵႃႈတီႈၵဝ်ၸိူဝ်းၼၼ်ႉလႄႈ ၵူၼ်းမဵဝ်း ယူႉတႃႉ ဢိၵ်ႇတင်း ၶုၼ်ဢၼ်မီးဢရႃႇတင်းလၢႆ ဢၼ်ၵိၼ်ၵႃႈတီႈၶူင်ႇတီႈၵိၼ်ၵဝ်ယူႇသေႇသေႇၼၼ်ႉ မီးပၢၵ်ႇပၢႆႁႃႈသိပ်းၵေႃႉဢေႃႈ။-

18ၼႂ်းယေႈဝၼ်းယေႈဝၼ်း လႆႈၸီႇယၢင်ႇမႄးႁႅၼ်း ဝူဝ်းတူဝ်ၼိုင်ႈ ဢိၵ်ႇတင်းသူဝ်းဢၼ်လိူၵ်ႈၵဵပ်းဢဝ်ႁူၵ်းတူဝ်လႄႈ ၵႆႇၼမ်ၼႃႇၵေႃႈ လႆႈမႄးႁႅၼ်းပုၼ်ႈၵဝ်ဢေႃႈ။ သိပ်းဝၼ်းယေႈပွၵ်ႈ လႆႈဢဝ်ၼမ်ႉၸပိတ်ႈဢၼ်ၼမ်ၼႃႇၵူႈၸိူဝ်ႉၵူႈမဵဝ်း တၢင်ႇတမ်းဢေႃႈ။ သဵင်ႈထၢၼ်ႇၼၼ်ႉသေၵေႃႈ ၵဝ်ဢမ်ႇယွၼ်းဢဝ်ၸရိပ်ႈမဵဝ်ႉဝုၼ်ႇ ၵွပ်ႈပိူဝ်ႈဢၼ်ၵၢၼ်တၢင်းႁဵတ်းဢၼ်ၼၵ်းၼႃႇ မီးယူႇၵႃႈၼိူဝ်ၵူၼ်းတင်းလၢႆၼၼ်ႉဢေႃႈ။-

19ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်း ၵႃႈဢၼ်ၶႃႈၸဝ်ႈႁဵတ်းပုၼ်ႈ ၵူၼ်းတင်းလၢႆၸိူဝ်းၼႆႉလႄႈ ႁဵတ်းၵျေးၸူးသေၵမ်းတီႈၶႃႈ။

← Chapter 4 Jump to: Chapter 6 →