Nehemiah 4

Shan

← Chapter 3 Jump to: Chapter 5 →

1မိူဝ်ႈဢၼ် သၼ်ႇပႃးလတ်ႉ ငိၼ်းလွင်ႈဢၼ်ႁဝ်းတႄႇႁဵတ်းလမ်းဝဵင်းၼၼ်ႉၸိုင်၊ တေႃးသႃႉမၼ်းဢွၵ်ႇ မၼ်းမီးတၢင်းဢၼ်ၸႂ်မႆႈၶႆႈၸႃႉၼႃႇလူင်လၢင်ယူႇသေလႄႈ ႁဵတ်းပျၢၵ်ႈၶူဝ်ၵူၼ်း ယူႉတႃႉ တင်းလၢႆသေလႄႈ၊-

2လၢတ်ႈၵႃႈတီႈၽၢႆႇၼႃႈပီႈၼွင်ႉမၼ်း ဢိၵ်ႇတင်းတပ်ႉၵူၼ်းသိုၵ်း သမႃႇရီႉ တင်းလၢႆလႄႈဝႃႈ၊ ၵူၼ်း ယူႉတႃႉ ဢၼ်ႁႅင်းလဵၵ်ႉႁႅင်းၵေႇၸိူဝ်းၼၼ်ႉ တၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။ ၶဝ်တၵ်းႁဵတ်းႁႂ်ႈတူဝ်ၸဝ်ႈၵဝ်ႇ မီးတပ်ႉဢၼ်မၼ်ႈၶိူင်ႇႁိုဝ်။ ၶဝ်တၵ်းပုၵ်ႈၸေႃႇယိတ်ႈႁိုဝ်။ ၶဝ်တၵ်းႁႂ်ႈယဝ်ႉႁႂ်ႈတူဝ်ႈၼႂ်းဝၼ်းလဵဝ်ၵူၺ်းႁိုဝ်။ ၶဝ်တၵ်းဢဝ်မၢၵ်ႇႁိၼ်ဢၼ်ၽႆးမႆႈယဝ်ႉၸိူဝ်းၼၼ်ႉ ဢွၵ်ႇသေၵႃႈၼႂ်းၵွင်ၶီႈၽုၼ်ႇၶီႈလိၼ်ယိူဝ်ႈယႃႈယိူဝ်ႈယုၵ်းၼၼ်ႉလႄႈ မႄးၵုမ်းမႄးႁဵတ်းႁိုဝ်။ ဝႃႈၼင်ႇၼႆဢေႃႈ။-

3တေႃႇၽီႉ ၵူၼ်းမဵဝ်း ဢမ်ႇမုၼ်ႇ မီးယူႇၵႃႈတီႈႁိမ်းမၼ်းလႄႈ ၶိုၼ်းလၢတ်ႈတီႈမၼ်းလႄႈဝႃႈ၊ ဢၼ်ၶဝ်တႄႇႁဵတ်းၼၼ်ႉၸမ်ႉ၊ ပေႃးမႃထိူၼ်ႇၶိုၼ်ႈၵႃႈၼိူဝ်မၼ်းၸိုင်၊ တၵ်းႁႂ်ႈလမ်းမၢၵ်ႇႁိၼ်ၶဝ်ၼၼ်ႉ ၵိူၼ်ႇတူၵ်းပင်းတူၵ်းဢေႃႈ၊ ဝႃႈၼင်ႇၼႆဢေႃႈ။-

4ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ထွမ်ႇငိၼ်းသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ် ႁဵတ်းဢမ်ႇပေႃးၼင်ႇႁိုဝ်တီႈၶႃႈဢေႃႈ။ ႁႂ်ႈၵႂၢမ်းဢၼ်ၶဝ်သႄႉသွမ်းၼၼ်ႉ ၶိုၼ်းတၵ်းႁွတ်ႈၵႃႈၼိူဝ်ႁူဝ်ၶဝ်သေၵမ်းလူၺ်ႈ။ ႁႂ်ႈၶဝ်လႆႈၶၢမ်ႇတၢင်းဢၼ်ႁိမ်ဢၼ်ႁူင်ႇ ၵႃႈၼႂ်းမိူင်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉသေၵမ်းလူၺ်ႈ။-

5ယႃႇပေႁူမ်ႇငမ်းတူႉၸရိူၵ်ႈ ဢၼ်ၶဝ်ႁဵတ်းၼၼ်ႉဝႆႉသေၵမ်းတီႈၶႃႈ။ ယႃႇပေႁႂ်ႈဢပႅတ်ႈၶဝ်လႆႈမီးတၢင်းဢၼ်ၵႄႈမွတ်ႇပႅတ်ႈသေၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ ၶဝ်ဢွၼ်ၵၼ်တိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈႁဝ်း ၵႃႈတီႈၽၢႆႇၼႃႈၶဝ်ၸိူဝ်းဢၼ် တႄႇႁဵတ်းလမ်းဝဵင်းၼၼ်ႉယဝ်ႉလူင်ပႄႇ။-

6ၵူၺ်းၵႃႈ ႁဝ်းဢွၼ်ၵၼ်တႄႇႁဵတ်းလမ်းဝဵင်းယူႇလႄႈ လမ်းဝဵင်းယဝ်ႉတူဝ်ႈတေႃႇထိုင်ႁွတ်ႈ ဢၼ်သုင်လမ်းဝဵင်းၶိုင်ႈၼိုင်ႈ လဵပ်ႈႁွပ်ႈဝဵင်းၵွပ်ႈပိူဝ်ႈဢၼ်ၶဝ်ၸိူဝ်းဢၼ် တႄႇႁဵတ်းၼၼ်ႉမီးၸေႇတၼႃႇသေလႄႈႁဵတ်းၼၼ်ႉဢေႃႈ။

7မိူဝ်ႈဢၼ် သၼ်ႇပႃးလတ်ႉ ဢိၵ်ႇတင်း တေႃႇၽီႉ တင်းၵူၼ်း ဢရေႇပျႃႉ လႂ်၊ ၵူၼ်း ဢမ်ႇမုၼ်ႇ လႂ်၊ ၵူၼ်း ဢႃႇၸုတ်ႉ လႂ်ၸိူဝ်းၼၼ်ႉငိၼ်းလွင်ႈဢၼ် ယင်းတိုၵ်ႉဢွၼ်ၵၼ်မႄးၵုမ်းမႄးႁဵတ်းလမ်းဝဵင်း ယေႇရူႉသလႅမ်ႇ လႄႈ မႄးဢုတ်းမႄးယႃ တီႈဢၼ်ၵိူၼ်ႇပင်းလူႉလႅဝ်ၸိူဝ်းၼၼ်ႉယူႇၼၼ်ႉၸိုင်၊ ၶဝ်မီးၸႂ်တေႃးသႃႉ ၶႆႈၸႃႉၶႆႈၸဵတ်ႉၼႃႇလူင်လၢင်လႄႈ၊-

8တိူင်ႇပၢင်ႇၵၼ်ႁႂ်ႈလႆႈၽွမ်ႉၵၼ်ၶီႇမႃးလႄႈ တိုၵ်းတေႃးဝဵင်း ယေႇရူႉသလႅမ်ႇ လႄႈ ယႃႉဢမူႉၼၼ်ႉဢေႃႈ။-

9ၵူၺ်းၵႃႈ ႁဝ်းသူးတွင်းတီႈၽြႃးပဵၼ်ၸဝ်ႈႁဝ်းသေလႄႈ ဢွၼ်ၵၼ်ဝႆႉၶဝ်ၸိူဝ်းဢၼ်ပႂ်ႉယူႇဝၼ်းဝၼ်းၶိုၼ်းၶိုၼ်းဢမ်ႇထၢတ်ႇ ၵွပ်ႈပိူဝ်ႈၶဝ်ၼၼ်ႉဢေႃႈ။-

10ၵူၼ်း ယူႉတႃႉ ၵမ်ႈၽွင်ႈ ဢွၼ်ၵၼ်လၢတ်ႈလႄႈဝႃႈ၊ ၶဝ်ၸိူဝ်းဢၼ်လႆႈႁၢပ်ႇလႆႈပႃးၸိူဝ်းၼၼ်ႉ ႁႅင်းသဵင်ႈၵႂႃႇယဝ်ႉ။ ၶီႈၽုၼ်ႇၶီႈလိၼ် ယိူဝ်ႈယႃႈယိူဝ်ႈယုၵ်းၼမ်ၼႃႇထၼ်ႈပေႃး ႁႂ်ႈႁဝ်းဢမ်ႇတၢတ်ႈၼိူင်ႇလႆႈ ႁႂ်ႈလမ်းဝဵင်းလႆႈယဝ်ႉလႆႈတူဝ်ႈဢေႃႈ၊ ဝႃႈၼင်ႇၼႆဢေႃႈ။-

11ရၢၼ်ႇသူႇႁဝ်းၸိူဝ်းၼၼ်ႉ ဢွၼ်ၵၼ်လၢတ်ႈလႄႈဝႃႈ၊ ၶဝ်တၵ်းဢမ်ႇႁူႉၶဝ်တၵ်းဢမ်ႇႁၼ်တေႃႇထိုင်ႁွတ်ႈႁဝ်းထၼ်ႈပေႃး ၶဝ်ႈႁွတ်ႈၶဝ်ႈထိုင်ၵႃႈၼႂ်းၵၢင်ၶဝ်ၵႂႃႇသေလႄႈ ၶႃႈၽၼ်းဢဝ်ၶဝ်တၢႆလႄႈ ႁႂ်ႈတၢင်းႁဵတ်းတၢင်းသၢင်ႈၶဝ် လႆႈထၢတ်ႇၵႂႃႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

12ၵူၼ်း ယူႉတႃႉ ဢၼ်ယူႇၵႃႈတီႈႁိမ်းၶဝ်ၼၼ်ႉၸိူဝ်းၼၼ်ႉၵေႃႈ မႃးလႄႈမွၵ်ႇလၢတ်ႈတီႈႁဝ်း သိပ်းပွၵ်ႈသိပ်းၽဝ်ႇလႄႈဝႃႈ၊ ၶဝ်ၼၼ်ႉ တၵ်းလုၵ်ႉသေၵႃႈတီႈ တီႈယူႇၶဝ်ၵူႈတီႈၵူႈလႅၼ်မႃးတိုၵ်းသူဢေႃႈ၊ ဝႃႈၼင်ႇၼႆဢေႃႈ။-

13ၵွပ်ႈပိူဝ်ႈၼင်ႇၼၼ်လႄႈ ၵႃႈၼႂ်းတီႈဢၼ်တႅမ်ႇ ၵႃႈတီႈၽၢႆႇလင်လမ်းဝဵင်း၊ ၵႃႈတီႈဢၼ်ပၢင်ႇဢၼ်ပဵင်းၸိူဝ်းၼၼ်ႉ ၵဝ်ၶၢၼ်းၵူၼ်းဢၼ်ပႃးလၢၵ်ႈၼၢၵ်ႈ၊ လၢပ်ႇ၊ ႁွၵ်ႇ၊ ၵၢင်ႇတင်းလၢႆၼၼ်ႉဝႆႉ ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းဢေႃႈ။-

14ၵဝ်လူတူၺ်းသေလႄႈ လုၵ်ႉလႄႈလၢတ်ႈတီႈမူးမၢတ်ႈၽွင်းမိူင်း၊ ၶုၼ်ဢၼ်မီးဢရႃႇ၊ ၵူၼ်းတင်းလၢႆ ဢၼ်ၵိုတ်းဢၼ်ၵျၢၼ်ႇၼၼ်ႉၸိူဝ်းၼၼ်ႉလႄႈဝႃႈ၊ ယႃႇပေၵူဝ်ႁႄၶဝ်။ ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း ထႃႇဝရႃႉၽြႃး ဢၼ်ယႂ်ႇမျၢတ်ႈလႄႈ လီၵူဝ်လီႁႄၼၼ်ႉတႃႉ။ ဢွၼ်ၵၼ်တိုၵ်းပုၼ်ႈပီႈၼွင်ႉသူ၊ လုၵ်ႈၸၢႆးသူ၊ လုၵ်ႈယိင်းသူ၊ မေးသူ၊ ႁိူၼ်းယေးသူတႃႉ၊ ဝႃႈၼင်ႇၼႆဢေႃႈ။-

15မိူဝ်ႈဢၼ်ရၢၼ်ႇသူႇႁဝ်းၸိူဝ်းၼၼ်ႉ ႁူႉငိၼ်းလွင်ႈဢၼ်ႁဝ်းလႆႈသတီႉလႄႈ ၽြႃးပဵၼ်ၸဝ်ႈယႃႉတၢင်းၵျၢမ်ႇတၢင်းပွင်ၶဝ်ၼၼ်ႉၸိုင်၊ ႁဝ်းၵႃႈမီးဢွၼ်ၵၼ်သမ်ႉၶိုၼ်းတႄႇၶိုၼ်းႁဵတ်း ၵႃႈတီႈလမ်းဝဵင်း တီႈတၢင်းႁဵတ်းၽႂ်တၢင်းႁဵတ်းမၼ်းၼၼ်ႉဢေႃႈ။-

16ၸႃႉၸဵမ်ၶိင်ႇၼၼ်ႉၵႂႃႇလႄႈ ၶႃႈၵဝ်ၵူၼ်းၵဝ်ၶိုင်ႈၼိုင်ႈ ဢွၼ်ၵၼ်ႁဵတ်းတၢင်းႁဵတ်းလႄႈ ၶိုင်ႈၼိုင်ႈဢွၼ်ၵၼ်ယိပ်းၵမ်ႁွၵ်ႇ၊ ၶိူင်ႈႁႄႉလၢၵ်ႈၼၢၵ်ႈ၊ ၵၢင်ႇ၊ သိူဝ်ႈၶႅပ်းလဵၵ်းယူႇဢေႃႈ။ ၶုၼ်တင်းလၢႆ ယူႇၵႃႈတီႈၽၢႆႇလင်ၵူၼ်းမဵဝ်း ယူႉတႃႉ ၵႃႈမီးၼၼ်ႉဢေႃႈ။-

17ၶဝ်ၸိူဝ်းဢၼ်တႄႇႁဵတ်းလမ်းဝဵင်း ဢိၵ်ႇတင်းၶဝ်ၸိူဝ်းဢၼ်ႁၢပ်ႇဢၼ်ပႃးၸိူဝ်းၼၼ်ႉ ႁၢပ်ႇယူႇပႃးယူႇသေလႄႈ၊ ၵူႈၵေႃႉၵူႈၵူၼ်း ဢွၼ်ၵၼ်ဢဝ်မိုဝ်းၶွၼ်ၼိုင်ႈၵူၺ်းႁဵတ်းလႄႈ ဢဝ်မိုဝ်းၶွၼ်ၼိုင်ႈယိပ်းၵမ်လၢၵ်ႈၼၢၵ်ႈယူႇဢေႃႈ။-

18ၶဝ်ၵႃႈဢၼ်တႄႇႁဵတ်းၸိူဝ်းၼၼ်ႉ ဢွၼ်ၵၼ်ဢဝ်လၢပ်ႇမတ်ႉႁွႆႈဝႆႉၵႃႈတီႈဢႅဝ်ယူႇသေလႄႈ တႄႇႁဵတ်းဢေႃႈ။ ၵေႃႉဢၼ်ပဝ်ႇၼႄးၶရႃႇၼၼ်ႉၵေႃႈ ၸုၵ်းယူႇၵႃႈတီႈႁိမ်းၵဝ်ဢေႃႈ။

19ၵဝ်ၵေႃႈလၢတ်ႈတီႈမူးမၢတ်ႈၽွင်းမိူင်း၊ ၶုၼ်ဢၼ်မီးဢရႃႇ၊ ၶုၼ်တင်းလၢႆၵႃႈဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈဝႃႈ၊ တၢင်းႁဵတ်းၼႆႉယႂ်ႇၼႃႇလူင်လၢင်ဢေႃႈ။ ႁဝ်းလႆႈႁဵတ်းၵႃႈၼိူဝ်လမ်းဝဵင်း ယေႈၵေႃႉယေႈတီႈ ၵႆၵၼ်ယၢၼ်ၵၼ်ဢေႃႈ။-

20ပိူဝ်ႈဢၼ်ပဵၼ်ၼင်ႇၼႆလႄႈ သူမီးၵႃႈတီႈလႂ်သေဢမ်ႇဝႃႈ၊ ပေႃးငိၼ်းသဵင်ပဝ်ႇၶရႃႇၸိုင် ဢွၼ်ၵၼ်လုၵ်ႉလႄႈမႃးၸူႉၵၼ်တုမ်ၵၼ်ၵႃႈတီႈႁဝ်းၼႆႉတႃႉ။ ၽြႃးပဵၼ်ၸဝ်ႈႁဝ်း တၵ်းၸွႆႈသိုၵ်းထႅမ်သိုၵ်းယူႇၽၢႆႇႁဝ်းဢေႃႈ၊ ဝႃႈၼင်ႇၼႆဢေႃႈ။-

21ၼင်ႇၼၼ်လႄႈ ႁဝ်းဢွၼ်ၵၼ်ႁဵတ်းတၢင်းႁဵတ်းဢေႃႈ။ ၵူၼ်းၶိုင်ႈၼိုင်ႈၼၼ်ႉ ယိပ်းၵမ်လၢၵ်ႈၼၢၵ်ႈႁွၵ်ႇယူႇ ၸႃႉၸဵမ်မိူဝ်ႈမိူင်းၸႃႉလႅင်းလႄႈ တေႃႇထိုင်ႁွတ်ႈၶိင်ႇဢၼ်လၢဝ်ဢွၵ်ႇၼၼ်ႉဢေႃႈ။-

22မိူဝ်ႈၼၼ်ႉၵေႃႈ ၵဝ်လၢတ်ႈတီႈၵူၼ်းတင်းလၢႆလႄႈဝႃႈ၊ ႁႂ်ႈၵူႈၵေႃႉၵူႈၵူၼ်း ဢိၵ်ႇလူၺ်ႈၵၼ်တင်းၶႃႈၶဝ်ၵူၼ်းၶဝ်ၼွၼ်းၵႃႈၼႂ်းဝဵင်း ယေႇရူႉသလႅမ်ႇ ၶိင်ႇၵၢင်ၶိုၼ်းႁႂ်ႈလႆႈပဵၼ် ၵေႃႉဢၼ်ပႂ်ႉပုၼ်ႈႁဝ်းၶိင်ႇၵၢင်ၶိုၼ်းလႄႈ လႆႈႁဵတ်းလႆႈသၢင်ႈၶိင်ႇၵၢင်ဝၼ်းသေ၊ ဝႃႈၼင်ႇၼႆဢေႃႈ။-

23ၼင်ႇၼၼ်လႄႈ ၼွၵ်ႈသေပုၼ်ႈတၢင်းဢၼ် တၵ်းသၵ်ႉၶူဝ်းၼုင်ႈၼၼ်ႉ၊ ၵဝ်ဢိၵ်ႇတင်းၼွင်ႉၸၢႆးၵဝ်၊ ၶႃႈၵဝ်၊ ၵူၼ်းၵဝ်၊ ႁူဝ်ႁၢၼ်ၵူၼ်းသိုၵ်း ဢၼ်ၸွမ်းလင်ၵဝ်ၸိူဝ်းၼၼ်ႉ ယင်းဢမ်ႇထွတ်ႇၶူဝ်းၼုင်ႈတူဝ်ၸဝ်ႈၵဝ်ႇလႄႈ ယူႇဢေႃႈ။

← Chapter 3 Jump to: Chapter 5 →