Nehemiah 6

Shan

← Chapter 5 Jump to: Chapter 7 →

1မိူဝ်ႈၼၼ်ႉ မိူဝ်ႈဢၼ် သၼ်ႇပႃးလတ်ႉ ဢိၵ်ႇတင်း တေႃႇၽီႉ တင်း ၵေႇသိမ်ႇ ၵူၼ်း ဢရေႇပျႃႉ တင်းရၢၼ်ႇသူႇႁဝ်း ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ ငိၼ်းလွင်ႈဢၼ်ၵဝ်တႄႇႁဵတ်းလမ်းဝဵင်းလႄႈ ပိၵ်ႉသမ်ႉဢမ်ႇပႆႇလႆႈပူၵ်းတင်ႈၽၵ်းတူဝဵင်းသေၵေႃႈ လမ်းဝဵင်းလူင်ႉလီလွတ်ႈလီၼၼ်ႉၸိုင်၊-

2သၼ်ႇပႃးလတ်ႉ တင်း ၵေႇသိမ်ႇ ၸိူဝ်းၼၼ်ႉ သင်ႇလၢတ်ႈမႃးတီႈၵဝ်လႄႈဝႃႈ၊ မႃးသေၵမ်း။ ႁူပ်ႉထူပ်းၵၼ်ၵႃႈတီႈဝၢၼ်ႈဝၢၼ်ႈၼိုင်ႈ ၵႃႈၼႂ်းပၢင်ႇႁူၺ်ႈ ဢေႃးၼေႃး ၼၼ်ႉတႃႉႁဝ်း၊ ဝႃႈၼင်ႇၼႆလႄႈ သွင်ၶႃၼၼ်ႉ မီးတၢင်းၵျၢမ်ႇတၢင်းပွင် ဢၼ်ၶႂ်ႈႁဵတ်းဢၼ်ဢမ်ႇလီတီႈၵဝ်ဢေႃႈ။-

3ၵဝ်ၵေႃႈ၊ ပွႆႇၸႂ်ႉတမၢၼ်ႇ ၸူးတီႈသွင်ၶႃၼၼ်ႉလႄႈဝႃႈ၊ ၵွပ်ႈပိူဝ်ႈဢၼ်ၵဝ်လႆႈၵိုတ်ႉႁၢပ်ႇဢမူႉဢၼ်ယႂ်ႇၼႃႇလူင်လၢင်လႄႈၵဝ်ဢမ်ႇလူင်းဢမ်ႇၵႂႃႇလႆႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ယင်းဢမ်ႇၵိုတ်ႉႁၢပ်ႇဢမူႉၼႆႉလႄႈ တၵ်းလႆႈလူင်းၵႂႃႇတီႈဢၼ်သူမီးၼၼ်ႉသေလႄႈ ႁႂ်ႈဢမူႉၼႆႉလႆႈထၢတ်ႇၵႂႃႇၼင်ႇႁိုဝ်။ ဝႃႈၼင်ႇၼႆဢေႃႈ။-

4ၼင်ႇၼၼ်လႄႈ သွင်ၶႃၼၼ်ႉ သင်ႇလၢတ်ႈမႃးတီႈၵဝ် တေႃႇထိုင်ႁွတ်ႈသီႇပွၵ်ႈလႄႈ ၵဝ်ၵေႃႈၶိုၼ်းလၢတ်ႈမိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉဢေႃႈ။-

5လိုၼ်းၼၼ်ႉပွၵ်ႈပိၼ်ႇၸမႃႉ သၼ်ႇပႃးလတ်ႉ ၼၼ်ႉ ပွႆႇၸႂ်ႉၶႃႈမၼ်းမႃး မိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉလႄႈ ၶႃႈမၼ်းၼၼ်ႉပႃးဢဝ်လိၵ်ႈဢၼ်ဢမ်ႇတူပ်ႉဢမ်ႇႁမ်းမႃးဢေႃႈ။-

6ၵႂၢမ်းလိၵ်ႈၼၼ်ႉဝႃႈၸမ်ႉ၊ ၵူၼ်းၵူႈၸိူဝ်ႉၵူႈမဵဝ်းဢွၼ်ၵၼ်လၢတ်ႈလွင်ႈဢၼ်မႂ်း ဢိၵ်ႇတင်းၵူၼ်း ယူႉတႃႉ တင်းလၢႆ မီးတၢင်းၵျၢမ်ႇတၢင်းပွင်တၵ်းပုင်ႇၵၢၼ်ႇၼၼ်ႉဢေႃႈ။ ၵေႇသိမ်ႇ ၵေႃႈၶၢမ်ႇသၢၵ်ႈသေႇၸိူဝ်ႉၼင်ႇၼၼ်ဢေႃႈ။ မႅၼ်ႈၵၼ်တင်းၵႂၢမ်းၼၼ်ႉလႄႈ မႂ်းတႄႇႁဵတ်းလမ်းဝဵင်း ၵွပ်ႈပိူဝ်ႈလွင်ႈၼၼ်ႉလႄႈ မီးဢလူဝ်ႇၶႂ်ႈပဵၼ်ၶုၼ်ႁေႃၶမ်းၶဝ်ဢေႃႈ။-

7မႂ်းလႆႈၶၢၼ်းယိတ်ႈပရေႃးႁဵၵ်ႈတင်းလၢႆ ဝႆႉႁႂ်ႈလႆႈဢဝ်လွင်ႈမႂ်းႁေႃးလၢတ်ႈၵႃႈၼႂ်းဝဵင်း ယေႇရူႉသလႅမ်ႇ လႄႈဝႃႈ၊ ၵႃႈတီႈမိူင်း ယူႉတႃႉ မီးၶုၼ်ႁေႃၶမ်းယဝ်ႉ၊ ဝႃႈၼင်ႇၼႆၼၼ်ႉဢေႃႈ။ မီးတီႈဢၼ်တၵ်းလႆႈလဝ်ႊလၢတ်ႈတီႈၶုၼ်ႁေႃၶမ်း ၸွမ်းၵႃႈၼင်ႇဢၼ်ၵႂၢမ်းၼၼ်ႉမီးၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ တေႃႈလဵဝ်ၼႆႉ မႃးလႄႈတိူင်ႇပၢင်ႇၵၼ်တႃႉႁဝ်း၊ ဝႃႈၼင်ႇၼႆဢေႃႈ။-

8မိူဝ်ႈၼၼ်ႉၵဝ်ပွႆႇၸႂ်ႉၵႂႃႇတီႈမၼ်းလႄႈဝႃႈ၊ ၵႂၢမ်းဢၼ်မႂ်းလၢတ်ႈၼၼ်ႉ ဢမ်ႇမၢၼ်ႇဢမ်ႇမႅၼ်ႈသေၶေႃႈသေၵမ်း။ မႂ်းဢဝ်ၵႃႈၼႂ်းႁူဝ်ၸႂ်မႂ်းၵျၢမ်ႇပွင်ၵူၺ်းဢေႃႈ၊ ဝႃႈၼင်ႇၼႆဢေႃႈ။-

9လွင်ႈမၼ်းၸမ်ႉ ၶဝ်ၼၼ်ႉဢွၼ်ၵၼ်လွၵ်ႇငိုတ်ႈႁဝ်းသေလႄႈဝႃႈ၊ ႁႅင်းမိုဝ်းၶဝ်တၵ်းဢူၼ်ႈၵႂႃႇယွမ်းၵႂႃႇ ႁႂ်ႈဢမူႉၼၼ်ႉထၼ်ႈပေႃးဢမ်ႇယဝ်ႉဢမ်ႇတူဝ်ႈလႆႈဢေႃႈ၊ ဝႃႈၼင်ႇၼႆဢေႃႈ။ ၵူၺ်းၵႃႈ ၵွပ်ႈပိူဝ်ႈၵႂၢမ်းၼၼ်ႉလႄႈ ႁႅင်းမိုဝ်းၵဝ်ယဵင်ႈၶႅၼ်းယႂ်ႇမႃးတူဝ်းမႃးဢေႃႈ။

10မိူဝ်ႈၼၼ်ႉၵဝ်ၶဝ်ႈၵႂႃႇၵႃႈၼႂ်းႁိူၼ်း သေႇမႃႇယႃႉ လုၵ်ႈၸၢႆး တေႇလႃႇယႃႉ ဢၼ်ပဵၼ်လုၵ်ႈၸၢႆး မႁေႇတပေႇလႃႉ တီႈဢၼ်မၼ်း တဵတ်ႇမႅပ်ႉယူႇၼၼ်ႉလႄႈ မၼ်းၼၼ်ႉလၢတ်ႈလႄႈဝႃႈ၊ ႁဝ်းဢွၼ်ၵၼ်ၸူႉၵၼ်တုမ်ၵၼ် ၵႃႈၼႂ်းႁိူၼ်းၽြႃးပဵၼ်ၸဝ်ႈ ၵႃႈတီႈၼႂ်းပိၵ်ႈမၢၼ်ႇၸဝ်ႈသေလႄႈ ဢိုတ်းၽၵ်းတူပိၵ်ႈမၢၼ်ႇၸဝ်ႈဝႆႉတႃႉႁဝ်း။ ၶဝ်တၵ်းဢွၼ်ၵၼ်မႃး ႁႂ်ႈလႆႈဢဝ်ၸဝ်ႈႁဝ်းတၢႆဢေႃႈ။ တၵ်းမႃးၶိင်ႇၵၢင်ၶိုၼ်း ႁႂ်ႈလႆႈဢဝ်ၸဝ်ႈႁဝ်းတၢႆဢေႃႈ၊ ဝႃႈၼင်ႇၼႆဢေႃႈ။-

11ၵဝ်ၵေႃႈၶိုၼ်းလၢတ်ႈလႄႈဝႃႈ၊ ၵူၼ်းၸိူဝ်ႉၼင်ႇၵဝ်ၼႆႉ တၵ်းလႆႈပၢႆႈႁိုဝ်။ ၽူႈလႂ်ဢၼ်ပဵၼ်ၵူၼ်းဢၼ်မိူၼ်ၸိူဝ်ႉၼင်ႇၵဝ်ၼႆႉ တၵ်းၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈ ႁႂ်ႈဢသၢၵ်ႈလႆႈၵတ်းယဵၼ်ၶျၢမ်းသႃႇၼၼ်ႉ ၵဝ်ဢမ်ႇၶဝ်ႈၵူၺ်ႉ၊ ဝႃႈၼင်ႇၼႆဢေႃႈ။-

12ၵဝ်ႁူႉသၢႆငၢႆ လွင်ႈဢၼ်ၽြႃးပဵၼ်ၸဝ်ႈ ဢမ်ႇပွႆႇၸႂ်ႉမၼ်းလႄႈ မၼ်းႁေႃးလၢတ်ႈယူႇၽၢႆႇၼိုင်ႈတင်းၵဝ်ၸိူဝ်ႉၼင်ႇၼၼ် ၵွပ်ႈပိူဝ်ႈဢၼ် တေႃႇၽီႉ ဢိၵ်ႇတင်း သၼ်ႇပႃးလတ်ႉ ၸၢင်ႈငႃဢဝ်မၼ်းၼၼ်ႉယူႇဢေႃႈ။-

13လွင်ႈဢၼ်ၸၢင်ႈငႃဢဝ်မၼ်းၼၼ်ႉၸမ်ႉ၊ ပဵၼ်လွင်ႈဢၼ် တၵ်းႁႂ်ႈၵဝ်ၵူဝ်ႁႄလႄႈ ႁဵတ်းၸိူဝ်ႉၼင်ႇၼၼ်သေလႄႈ ၽိတ်းပိူင်ႈသေယဝ်ႉ၊ မီးလွင်ႈဢၼ်တၵ်းလႆႈလၢတ်ႈဢၼ်ဢမ်ႇလီဢမ်ႇငၢမ်းလႄႈ လႆႈဢၶႂၢင်ႉဢၼ်တၵ်းသႄႉတၵ်းသွမ်းတီႈၵဝ်ဢေႃႈ။-

14ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈမၢတ်ႈတွင်း တေႃႇၽီႉ တင်း သၼ်ႇပႃးလတ်ႉ ၸွမ်းလူၺ်ႈတၢင်းဢၼ် ၶဝ်ႁဵတ်းၸိူဝ်ႉၼင်ႇၼၼ် ဢိၵ်ႇတင်း ၼေႃႇတီႉ ပရေႃးၽႅတ်ႈမႄႈယိင်း တင်းပရေႃးၽႅတ်ႈ ဢၼ်လွၵ်ႇငိုတ်ႈၶႃႈၸဝ်ႈတင်းလၢႆၸိူဝ်းၼၼ်ႉသေၵမ်းတီႈၶႃႈ။

15ၼႂ်းလိူၼ် ဢေးလူႉလႃႉ သၢဝ်းႁႃႈဝၼ်းၼၼ်ႉ ႁိုင်ႁႃႈသိပ်းပၢႆသွင်ဝၼ်းလႄႈ လမ်းဝဵင်းယဝ်ႉတူဝ်ႈဢေႃႈ။-

16မိူဝ်ႈဢၼ်ရၢၼ်ႇသူႇႁဝ်းတင်းသဵင်ႈတင်းလူင် လႆႈငိၼ်းလွင်ႈမၼ်းၼၼ်ႉၸိုင် ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ယူႇၵႃႈတီႈလဵပ်ႈႁွပ်ႈႁဝ်းၸိူဝ်းၼၼ်ႉၵူဝ်ႁႄလႄႈ ဢွၼ်ၵၼ်မီးတၢင်းဢၼ် ၶျႃးတူၵ်းတီႈတႅမ်ႇသိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇဢေႃႈ။ လွင်ႈမၼ်းၸမ်ႉ ၶဝ်ႁူႉသၢႆငၢႆလွင်ႈဢၼ်ဢမူႉၼၼ်ႉယဝ်ႉတူဝ်ႈလူၺ်ႈဢၶႂၢင်ႉၽြႃးပဵၼ်ၸဝ်ႈႁဝ်းၼၼ်ႉဢေႃႈ။-

17ၼႂ်းၶိင်ႇၵႃႇလႃႉမိူဝ်ႈၼၼ်ႉ မူးမၢတ်ႈၽွင်းမိူင်း ယူႉတႃႉ တင်းလၢႆ ပၼ်လိၵ်ႈမႅတ်ႈတႃႇၵႂႃႇတီႈ တေႃႇၽီႉ ၼမ်ၼႃႇလႄႈ လိၵ်ႈ တေႃႇၽီႉ ၵေႃႈၶိုၼ်းတွပ်ႇမႃးတီႈၶဝ်ၼမ်ၼႃႇဢေႃႈ။-

18ၵူၼ်း ယူႉတႃႉ ၼမ်ၼႃႇ ၶၢမ်ႇသဵတ်ႈၸႃႇတီႈ တေႃႇၽီႉ ၵွပ်ႈပိူဝ်ႈဢၼ်မၼ်းၼၼ်ႉ ပဵၼ်လုၵ်ႈၶူၺ် သေႇၵၼီႉ လုၵ်ႈၸၢႆး ဢႃႇရႃႉ ဢိၵ်ႇတင်း ၵွပ်ႈပိူဝ်ႈဢၼ် ယေႃးႁၼၼ်ႇ လုၵ်ႈၸၢႆးမၼ်းၼၼ်ႉ ပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈယိင်း မေႇသူႉလမ်ႇ လုၵ်ႈၸၢႆး ပေႇရၶီႉ ၼၼ်ႉဢေႃႈ။-

19ၶဝ်ၼၼ်ႉ ၸၢင်ႈဢွၼ်ၵၼ်ဢဝ်လွင်ႈတၢင်းဢၼ်လီဢၼ်ငၢမ်း ဢၼ် တေႃႇၽီႉ ႁဵတ်းၼၼ်ႉ ၶိုၼ်းလၢတ်ႈတီႈၵဝ်လႄႈ ၵႂၢမ်းၵဝ်ၵေႃႈ ၸၢင်ႈဢွၼ်ၵၼ်ဢဝ်ၶိုၼ်းလၢတ်ႈ တီႈ တေႃႇၽီႉ ဢေႃႈ။ တေႃႇၽီႉ ၵေႃႈပၼ်လိၵ်ႈပုၼ်ႈဢၼ်တၵ်းႁႂ်ႈၵဝ်ၵူဝ်ႁႄၼၼ်ႉမႃးဢေႃႈ။

← Chapter 5 Jump to: Chapter 7 →