1 Samuel 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Ifráím ke kohistání mulk meṉ Rámátím Sofím ká ek shaḳhs thá, jis ká nám Ilqánah thá; wuh Ifráímí thá aur Yarohám bin Ilíhú bin Túhú bin Súf ká beṭá thá:

2us ke do bíwiyáṉ thíṉ; ek ká nám Hannah thá, aur dúsrí ká Fanínah: aur Fanínah ke aulád húí, par Hannah beaulád thí.

3Yih shaḳhs har sál apne shahr se Sailá meṉ Rabb u’l afwáj ke huzúr sijda karne aur qurbání guzránne ko játá thá; aur ‘Elí ke donoṉ beṭe Hufní aur Fínihás jo Ḳhudáwand ke káhin the wahíṉ rahte the.

4Aur jis din Ilqánah zabíha guzrántá, wuh apní bíwí Fanínah ko aur us ke sab beṭe, beṭiyoṉ ko hisse detá thá:

5par Hannah ko dúná hissa diyá kartá thá, is liye ki wuh Hannah ko cháhtá thá; lekin Ḳhudáwand ne us ká rihm band kar rakkhá thá.

6Aur us kí saut use kuṛháne ke liye betarah chheṛtí thí, kyúṉki Ḳhudáwand ne us ká rihm band kar rakkhá thá.

7Aur chúṉki wuh sál ba sál aisá hí kartá thá, jab wuh Ḳhudáwand ke ghar játá, is liye Fanínah use chheṛtí thí: chunáṉchi wuh rotí aur kháná na khátí thí.

8So us ke ḳháwind Ilqánah ne us se kahá, Ai Hannah, tú kyúṉ rotí hai, aur kyúṉ nahíṉ khátí, aur terá dil kyúṉ ázurda hai? Kyá maiṉ tere liye das beṭoṉ se baṛhkar nahíṉ?

9Aur jab wuh Sailá meṉ khá pí chuke, to Hannah uṭhí. Us waqt ‘Elí káhin Ḳhudáwand kí haikal kí chaukhaṭ ke pás kursí par baiṭhá húá thá.

10Aur wuh niháyat dilgír thí; so wuh Ḳhudáwand se du‘á karne aur zár zár rone lagí;

11aur us ne mannat mání aur kahá, Ai Rabb u’l afwáj, agar tú apní lauṉḍí kí musíbat par nazar kare, aur mujhe yád farmáe, aur apní lauṉḍí ko farámosh na kare, aur apní lauṉḍí ko farzand i narína baḳhshe, to maiṉ use zindagí bhar ke liye Ḳhudáwand ko nazr kar dúṉgí; aur ustura us ke sir par kabhí na phiregá

12Aur jab wuh Ḳhudáwand ke huzúr du‘á kar rahí thí, to ‘Elí us ke muṉh ko g̣aur se dekh rahá thá.

13Aur Hannah to dil hí dil meṉ kah rahí thí; faqat us ke hoṉṭh hilte the, par us kí áwáz nahíṉ sunáí detí thí; pas ‘Elí ko gumán húá, ki wuh nashe meṉ hai.

14So ‘Elí ne us se kahá, ki Tú kab tak nashe meṉ rahegí? apná nasha utár.

15Hannah ne jawáb diyá, Nahíṉ, ai mere málik, maiṉ to g̣amgín ‘aurat húṉ: maiṉ ne na to mai na koí nasha piyá, par Ḳhudáwand ke áge apná dil unḍelá hai.

16Tú apní lauṉḍí ko ḳhabís ‘aurat na samajh; maiṉ to apne fikroṉ aur dukhoṉ ke hujúm ke bá‘is ab tak boltí rahí.

17Tab ‘Elí ne jawáb diyá, Tú salámat já; aur Isráíl ká Ḳhudá terí murád jo tú ne us se máṉgí hai púrí kare.

18Us ne kahá, Terí ḳhádima par tere karam kí nazar ho. Tab wuh ‘aurat chalí gayí, aur kháná kháyá, aur phir us ká chihra udás na rahá.

19Aur subh ko wuh sawere uṭhe, aur Ḳhudáwand ke áge sijda kiyá, aur Rámah ko apne ghar lauṭ gaye; aur Ilqánah ne apní bíwí Hannah se mubásharat kí, aur Ḳhudáwand ne use yád kiyá.

20Aur aisá húá, ki waqt par Hannah hámila húí aur us ke beṭá húá, aur us ne us ká nám Samúel rakkhá; kyúṉki wuh kahne lagí, Maiṉ ne use Ḳhudáwand se máṉgkar páyá hai.

21Aur wuh shaḳhs Ilqánah apne sáre gharáne samet Ḳhudáwand ke huzúr sálána qurbání chaṛháne aur apní mannat púrí karne ko gayá.

22Lekin Hannah na gayí; kyúṉki us ne apne ḳháwind se kahá, Jab tak laṛke ká dúdh chhuṛáyá na jáe, maiṉ yahíṉ rahúṉgí, aur tab use lekar jáúṉgí, táki wuh Ḳhudáwand ke sámne házir ho, aur phir hamesha wahíṉ rahe.

23Aur us ke ḳháwind Ilqánah ne us se kahá, Jo tujhe achchhá lage so kar: jab tak tú us ká dúdh na chhuṛáe, ṭhahrí rah; faqat itná ho ki Ḳhudáwand apne suḳhan ko barqarár rakkhe. So wuh ‘aurat ṭhahrí rahí, aur apne beṭe ko dúdh chhuṛáne ke waqt tak pilátí rahí.

24Aur jab us ne us ká dúdh chhuṛáyá, to use apne sáth liyá, aur tín bachhṛe, aur ek aifah áṭá, aur mai kí ek mashk apne sath le gayí, aur us laṛke ko Sailá meṉ Ḳhudáwand ke ghar láí: aur wuh laṛká bahut hí chhoṭá thá.

25Aur unhoṉ ne ek bachhṛe ko zabh kiyá, aur laṛke ko ‘Elí ke pás láe;

26aur wuh kahne lagí, Ai mere málik, terí ján kí qasam! ai mere málik, maiṉ wuhí ‘aurat húṉ jis ne tere pás yahíṉ khaṛí hokar Ḳhudáwand se du‘á kí thí.

27Maiṉ ne is laṛke ke liye du‘á kí thí; aur Ḳhudáwand ne merí murád jo maiṉ ne us se máṉgí púrí kí;

28isí liye maiṉ ne bhí use Ḳhudáwand ko de diyá; yih apní zindagí bhar ke liye Ḳhudáwand ko de diyá gayá hai. Tab us ne waháṉ Ḳhudáwand ke áge sijda kiyá.

Jump to: Chapter 2 →