1 Samuel 19

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 18 Jump to: Chapter 20 →

1Aur Sáúl ne apne beṭe Yúnatan aur apne sab ḳhádimoṉ se kahá, ki Dáúd ko már ḍálo.

2Lekin Sáúl ká beṭá Yúnatan Dáúd se bahut ḳhush thá; so Yúnatan ne Dáúd se kahá, Merá báp tere qatl kí fikr meṉ hai; is liye tú subh ko apná ḳhayál rakhná, aur kisí poshída jagah meṉ chhipá rahná.

3Aur maiṉ báhar jákar us maidán meṉ, jaháṉ tú hogá, apne báp ke pás khaṛá húṉgá, aur apne báp se terí bábat guftogú karúṉgá; aur agar mujhe kuchh ma‘lúm ho jáe, to tujhe batá dúṉgá.

4Aur Yúnatan ne apne báp Sáúl se Dáúd kí ta‘ríf kí, aur kahá, ki Bádsháh apne ḳhádim Dáúd se badí na kare; kyúṉki us ne terá kuchh gunáh nahíṉ kiyá, balki tere liye us ke kám bahut achchhe rahe haiṉ:

5kyúṉki us ne apní ján hathelí par rakkhí, aur us Filistí ko qatl kiyá, aur Ḳhudáwand ne sab Isráílíoṉ ke liye baṛí fath karáí; tú ne yih dekhá, aur ḳhush húá: pas, tú kis liye Dáúd ko besabab qatl karke begunáh ke ḳhún ká mujrim banná cháhtá hai?

6Aur Sáúl ne Yúnatan kí bát suní: aur Sáúl ne qasam khákar kahá, ki Ḳhudáwand kí hayát kí qasam hai, wuh márá nahíṉ jáegá.

7Aur Yúnatan ne Dáúd ko buláyá, aur us ne wuh sab báteṉ us ko batáíṉ. Aur Yúnatan Dáúd ko Sáúl ke pás láyá, aur wuh pahle kí tarah us ke pás rahne lagá.

8Aur phir jang húí, aur Dáúd niklá, aur Filistíoṉ se laṛá, aur baṛí ḳhúnrezí ke sáth un ko qatl kiyá; aur wuh us ke sámne se bháge.

9Aur Ḳhudáwand kí taraf se ek burí rúh Sáúl par jab wuh apne ghar meṉ apná bhálá háth meṉ liye baiṭhá thá, chaṛhí, aur Dáúd háth se bajá rahá thá.

10Aur Sáúl ne cháhá ki Dáúd ko díwár ke sath bhále se chhed de, par wuh Sáúl ke áge se haṭ gayá, aur bhálá díwár meṉ já ghusá: aur Dáúd bhágá, aur us rát bach gayá.

11Aur Sáúl ne Dáúd ke ghar par qásid bheje, ki us kí ták meṉ raheṉ, aur subh ko use már ḍáleṉ: so Dáúd kí bíwí Míkal ne us se kahá, Agar áj kí rát tú apní ján na bacháe, to kal márá jáegá.

12Aur Míkal ne Dáúd ko khiṛkí se utár diyá: so wuh chal diyá, aur bhágkar bach gayá.

13Aur Míkal ne ek but ko lekar palang par liṭá diyá, aur bakriyoṉ ke bál ká takya sirháne rakhkar use kapṛoṉ se ḍháṉk diyá.

14Aur jab Sáúl ne Dáúd ke pakaṛne ko qásid bheje, to wuh kahne lagí, ki Wuh bímár hai.

15Aur Sáúl ne harkároṉ ko bhejá, ki Dáúd ko dekheṉ; aur kahá, ki Use palang samet mere pás láo, ki maiṉ use qatl karúṉ.

16Aur jab wuh qásid andar áe, to dekhá, ki palang par but paṛá hai, aur us ke sirháne bakriyoṉ ke bál ká takya hai.

17Tab Sáúl ne Míkal se kahá, ki Tú ne mujh se kyúṉ aisí dag̣á kí, aur mere dushman ko aisá jáne diyá, ki wuh bach niklá? Míkal ne Sáúl ko jawáb diyá, ki Wuh mujh se kahne lagá, Mujhe jáne de; maiṉ kyúṉ tujhe már ḍalúṉ?

18Aur Dáúd bhágkar bach niklá, aur Rámah meṉ Samúel ke pás ákar jo kuchh Sáúl ne us se kiyá thá sab us ko batáyá. Tab wuh aur Samúel donoṉ Nayot meṉ jákar rahne lage.

19Aur Sáúl ko ḳhabar milí, ki Dáúd Rámah ke bích Nayot meṉ hai.

20Aur Sáúl ne Dáúd ke pakaṛne ko qásid bheje, aur unhoṉ ne jo dekhá, ki nabíoṉ ká majma‘ nubuwwat kar rahá hai, aur Samúel un ká peshwá baná khaṛá hai, to Ḳhudá kí rúh Sáúl ke qásidoṉ par názil húí, aur wuh bhí nubuwwat karne lage.

21Aur jab Sáúl tak yih ḳhabar pahuṉchí, to us ne âur qásid bheje, aur wuh bhí nubuwwat karne lage. Aur Sáúl ne phir tísrí bár âur qásid bheje, aur wuh bhí nubuwwat karne lage.

22Tab wuh áp Rámah ko chalá, aur us baṛe kúeṉ par jo Síko meṉ hai pahuṉchkar púchhne kahá, ki Samúel aur Dáúd kaháṉ haiṉ? Aur kisí ne kahá, ki Dekh, wuh Rámah ke bích Nayot meṉ haiṉ.

23Tab wuh udhar Rámah ke Nayot kí taraf chalá: aur Ḳhudá kí rúh us par bhí názil húí, aur wuh chalte chalte nubuwwat kartá húá Rámah ke Nayot meṉ pahuṉchá.

24Aur us ne bhí apne kapṛe utáre, aur wuh bhí Samúel ke áge nubuwwat karne lagá, aur us sáre din aur sárí rát naṉgá paṛá rahá. Is liye yih kaháwat chalí, Kyá Sáúl bhí nabíoṉ meṉ hai?

← Chapter 18 Jump to: Chapter 20 →