bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
1 Samuel 10
1 Samuel 10
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 11 →
1
Phir Samúel ne tel kí kuppí lí, aur us ke sir par unḍelí, aur use chúmá, aur kahá, ki Kyá yihí bát nahíṉ, ki Ḳhudáwand ne tujhe masah kiyá táki tú us kí mírás ká peshwá ho?
2
Jab tú áj mere pás se chalá jáegá, to Zilzah meṉ, jo Binyamín kí sarhadd meṉ hai Ráḳhil kí gor ke pás, do shaḳhs tujhe mileṉge; aur wuh tujh se kaheṉge, ki Wuh gadhe jin ke tú ḍhúṉḍhne gayá thá mil gaye: aur dekh, ab terá báp gadhoṉ kí taraf se befikr hokar tumháre liye fikrmand hai, aur kahtá hai, ki Maiṉ apne beṭe ke liye kyá karúṉ?
3
Phir waháṉ se áge baṛhkar, jab tú Tabúr ke balút ke pás pahuṉchegá, to waháṉ tín shaḳhs jo Baitel ko Ḳhudá ke pás játe hoṉge, tujhe mileṉge; ek to bakrí ke tín bachche, dúsrá roṭí ke tín girde aur tísrá mai ká ek mashkíza liye játá hogá.
4
Aur wuh tujhe salám kareṉge, aur roṭí ke do girde tujhe deṉge; tú un ko un ke háth se le lená.
5
Aur ba‘d us ke tú Ḳhudá ke paháṛ ko pahuṉchegá, jaháṉ Filistíoṉ kí chaukí hai; aur jab tú waháṉ shahr meṉ dáḳhil hogá, to nabíoṉ kí ek jamá‘at jo úṉche maqám se utartí hogí tujhe milegí, aur un ke áge sitár, aur daf, aur báṉslí, aur barbat hoṉge, aur wuh nubuwwat karte hoṉge.
6
Tab Ḳhudáwand kí rúh tujh par názil hogí, aur tú un ke sáth nubuwwat karne lagegá, aur badalkar âur hí ádmí ho jáegá.
7
So jab yih nishán tere áge áeṉ, to phir jaisá mauqa‘ ho, waisá hí kám karná; kyúṉki Ḳhudá tere sáth hai.
8
Aur tú mujh se peshtar Jiljál ko jáná, aur dekh, maiṉ tere pás áúṉgá, táki soḳhtaní qurbáníáṉ karúṉ, aur salámatí ke zabíhoṉ ko zabh karúṉ. Tú sát din tak wahíṉ rahná, jab tak maiṉ tere pás ákar tujhe batá na dúṉ, ki tujh ko kyá karná hogá.
9
Aur aisá húá, ki júṉhí us ne Samúel se ruḳhsat hokar píṭh pherí, Ḳhudá ne use dúsrí tarah ká dil diyá: aur wuh sab nishán usí din wuqú‘ meṉ áe.
10
Aur jab wuh udhar us paháṛ ke pás áe, to nabíoṉ kí ek jamá‘at us ko milí, aur Ḳhudá kí rúh us par názil húí, aur wuh bhí un ke darmiyán nubuwwat karne lagá.
11
Aur aisá húá, ki jab us ke agle jánpahchánoṉ ne yih dekhá, ki wuh nabíoṉ ke darmiyán nubuwwat kar rahá hai, to wuh ek dúsre se kahne lage, Qís ke beṭe ko kyá ho gayá? Kyá Sáúl bhí nabíoṉ meṉ shámil hai?
12
Aur waháṉ ke ek ádmí ne jawáb diyá, ki Bhalá, un ká báp kaun hai? Tab hí se yih masal chalí, Kyá Sáúl bhí nabíoṉ meṉ hai?
13
Aur jab wuh nubuwwat kar chuká, to úṉche maqám meṉ áyá.
14
Waháṉ Sáúl ke chachá ne us se aur us ke naukar se kahá, Tum kaháṉ gaye the? Us ne kahá, Gadhe ḍhúṉḍhne; aur jab ham ne dekhá ki wuh nahíṉ milte, to ham Samúel ke pás áe.
15
Phir Sáúl ke chachá ne kahá, ki Mujh ko zará batá to sahí, ki Samúel ne tum se kyá kyá kahá?
16
Sáúl ne apne chachá se kahá, Us ne ham ko sáf sáf batá diyá, ki gadhe mil gaye; par saltanat ká mazmún, jis ká zikr Samúel ne kiyá thá, na batáyá.
17
Aur Samúel ne logoṉ ko Misfáh meṉ Ḳhudáwand ke huzúr bulwáyá.
18
Aur us ne baní Isráíl se kahá, ki Ḳhudáwand Isráíl ká Ḳhuda yúṉ farmátá hai, ki Maiṉ Isráíl ko Misr se nikál láyá, aur maiṉ ne tum ko Misríoṉ ke háth se, aur sab saltanatoṉ ke háth se jo tum par zulm kartí thíṉ riháí dí.
19
Par tum ne áj apne Ḳhudá ko jo tum ko tumhárí sab musíbatoṉ aur taklífoṉ se riháí baḳhshtá hai haqír jáná; aur us se kahá, Hamáre liye ek bádsháh muqarrar kar. So ab tum qabíla qabíla hokar aur hazár hazár karke sab ke sab Ḳhudáwand ke áge házir ho.
20
Pas Samúel Isráíl ke sab qabíloṉ ko nazdík láyá, aur qur‘a Binyamín ke qabíle ke nám par niklá.
21
Tab wuh Binyamín ke qabíle ko ḳhándán ḳhándán karke nazdík láyá, to Matríoṉ ke ḳhándán ká nám niklá, aur phir Qís ke beṭe Sáúl ká nám niklá: lekin jab unhoṉ ne use ḍhúṉḍhá, to wuh na milá.
22
So unhoṉ ne Ḳhudáwand se phir púchhá, Kyá yaháṉ kisí âur ádmí ko bhí áná hai? Ḳhudáwand ne jawáb diyá, Dekho, wuh asbáb ke bích chhip gayá hai.
23
Tab wuh dauṛe, aur us ko waháṉ se láe: aur jab wuh logoṉ ke darmiyán khaṛá húá, to aisá qaddáwar thá, ki log us ke kandhe tak áte the.
24
Aur Samúel ne un logoṉ se kahá, Tum use dekhte ho jise Ḳhudáwand ne chun liyá, ki us kí mánind sab logoṉ meṉ ek bhí nahíṉ? Tab sab log lalkárkar bol uṭhe, ki Bádsháh jítá rahe!
25
Phir Samúel ne logoṉ ko hukúmat ká tarz batáyá, aur use kitáb meṉ likhkar Ḳhudáwand ke huzúr rakh diyá. Us ke ba‘d Samúel ne sab logoṉ ko ruḳhsat kar diyá, ki apne apne ghar jáeṉ.
26
Aur Sáúl bhí Jibi‘ah ko apne ghar gayá, aur logoṉ ká ek jathá bhí jin ke dil ko Ḳhudá ne ubhárá thá, us ke sáth ho liyá.
27
Par sharíroṉ meṉ se ba‘z kahne lage, ki Yih shaḳhs ham ko kis tarah bacháegá? So unhoṉ ne us kí tahqír kí, aur us ke liye nazráne na láe. Par wuh an suní kar gayá.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31