bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
1 Samuel 22
1 Samuel 22
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 23 →
1
Aur Dáúd waháṉ se chalá, aur ‘Adullám ke mag̣áre meṉ bhág áyá: aur us ke bháí, aur us ke báp ká sárá gharáná yih sunkar us ke pás waháṉ pahuṉchá.
2
Aur sáre kaṉgál, aur sáre qarzdár, aur sáre bigṛe dil us ke pás jama‘ húe; aur wuh un ká sardár baná: aur us ke sáth qaríban chár sau ádmí ho gaye.
3
Aur waháṉ se Dáúd Moáb ke Misfáh ko gayá, aur Moáb ke bádsháh se kahá, Mere máṉ báp ko zará yahíṉ ákar apne háṉ rahne de, jab tak ki mujhe ma‘lúm na ho, ki Ḳhudá mere liye kyá karegá.
4
Aur wuh un ko sháh i Moáb ke sámne le áyá; so wuh jab tak Dáúd gaṛh meṉ rahá, usí ke sáth rahe.
5
Tab Jád nabí ne Dáúd se kahá, Is gaṛh meṉ mat rah; rawána ho, aur Yahúdáh ke mulk meṉ já. So Dáúd rawána húá, aur Hárát ke ban meṉ chalá gayá.
6
Aur Sáúl ne suná, ki Dáúd aur us ke sáthíoṉ ká patá lagá hai; aur Sáúl us waqt Rámah ke Jibi‘ah meṉ jháú ke daraḳht ke níche apná bhálá apne háth meṉ liye baiṭhá thá, aur us ke ḳhádim us ke chaugird khaṛe the.
7
Tab Sáúl ne apne ḳhádimoṉ se jo us ke chaugird khaṛe the kahá, Suno to, ai Binyamínío! kyá Yassí ká beṭá tum meṉ se har ek ko khet aur angúrí bág̣ degá, aur tum sab ko hazároṉ aur saikṛoṉ ká sardár banáegá,
8
jo tum sab ne mere ḳhiláf sázish kí hai; aur jab merá beṭá Yassí ke beṭe se ‘ahd o paimán kartá hai, to tum meṉ koí mujh par záhir nahíṉ kartá, aur tum meṉ koí nahíṉ jo mere liye g̣amgín ho aur mujhe batáe ki mere beṭe ne mere naukar ko mere ḳhiláf ghát lagáne ko ubhárá hai, jaisá áj ke din hai?
9
Tab Adomí Doeg ne jo Sáúl ke ḳhádimoṉ ke barábar khaṛá thá jawáb diyá, ki Maiṉ ne Yassí ke beṭe ko Nob meṉ Aḳhítob ke beṭe Aḳhímalik káhin ke pás áte dekhá.
10
Aur us ne us ke liye Ḳhudáwand se suwál kiyá, aur use zád i ráh diyá, aur Filistí Joliyat kí talwár dí.
11
Tab bádsháh ne Aḳhítob ke beṭe Aḳhímalik káhin ko, aur us ke báp ke sáre gharáne ko, ya‘ní un káhinoṉ ko jo Nob meṉ the, bulwá bhejá: aur wuh sab bádsháh ke pás házir húe.
12
Aur Sáúl ne kahá, Ai Aḳhítob ke beṭe, tu sun! Us ne kahá, Ai mere málik, maiṉ házir húṉ.
13
Aur Sáúl ne us se kahá, ki Tum ne, ya‘ní tú ne aur Yassí ke beṭe ne, kyúṉ mere ḳhiláf sázish kí hai, ki tú ne use roṭí aur talwár dí, aur us ke liye Ḳhudá se suwál kiyá, táki wuh mere barḳhiláf uṭhkar ghát lagáe, jaisá áj ke din hai?
14
Tab Aḳhímalik ne bádsháh ko jawáb diyá, ki Tere sab ḳhádimoṉ meṉ Dáúd kí tarah amánatdár kaun hai? Wuh bádsháh ká dámád hai, aur tere darbár meṉ házir húá kartá, aur tere ghar meṉ mu‘azzaz hai?
15
Aur kyá maiṉ ne áj hí us ke liye Ḳhudá se suwál karná shurú‘ kiyá? aisí bát mujh se dúr rahe; bádsháh apne ḳhádim par aur mere báp ke sáre gharáne par koí ilzám na lagáe; kyúṉki terá ḳhádim in bátoṉ ko kuchh nahíṉ jántá, na thoṛá na bahut.
16
Bádsháh ne kahá, Ai Aḳhímalik, tú aur tere báp ká sárá gharáná zarúr már ḍálá jáegá.
17
Phir bádsháh ne un sipáhíoṉ ko jo us ke pás khaṛe the hukm kiyá, ki Muṛo, aur Ḳhudáwand ke káhinoṉ ko már ḍálo; kyúṉki Dáúd ke sáth in ká bhí háth hai, aur inhoṉ ne yih jánte húe bhí ki wuh bhágá húá hai, mujhe nahíṉ batáyá. Lekin bádsháh ke ḳhádimoṉ ne Ḳhudáwand ke káhinoṉ par hamla karne ke liye háth baṛháná na cháhá.
18
Tab bádsháh ne Doeg se kahá, Tú muṛ, aur in káhinoṉ par hamla kar. So Adomí Doeg ne muṛkar káhinoṉ par hamla kiyá; aur us din us ne pachásí ádmí jo katán ke afod pahine the qatl kiye.
19
Aur us ne káhinoṉ ke shahr Nob ko talwár kí dhár se márá, aur mardoṉ, aur ‘auratoṉ, aur laṛkoṉ, aur dúdh píte bachchoṉ, aur bailoṉ, aur gadhoṉ, aur bheṛ bakriyoṉ ko tah i teg̣ kiyá.
20
Aur Aḳhítob ke beṭe Aḳhímalik ke beṭoṉ meṉ se ek, jis ká nám Abíyátar thá, bach niklá, aur Dáúd ke pás bhág gayá.
21
Aur Abíyátar ne Dáúd ko ḳhabar dí, ki Sáúl ne Ḳhudáwand ke káhinoṉ ko qatl kar ḍálá hai.
22
Dáúd ne Abíyátar se kahá, Maiṉ usí din jab Adomí Doeg waháṉ milá, to ján gayá thá, ki wuh zarúr Sáúl ko ḳhabar degá: tere báp ke sáre gharáne ke máre jáne ká bá‘is maiṉ húṉ.
23
So tú mere sáth rah, aur mat ḍar: jo terí ján ká ḳhwáháṉ hai, wuh merí ján ká ḳhwáháṉ hai: so tú mere sáth salámat rahegá.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 23 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31