1 Samuel 25 — Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

1Aur Samúel mar gayá; aur sab Isráílí jama‘ húe aur unhoṉ ne us par nauha kiyá, aur use Rámah meṉ usí ke ghar meṉ dafn kiyá. Aur Dáúd uṭhkar dasht i Fárán ko chalá gayá.

2Aur Ma‘ún meṉ ek shaḳhs rahtá thá, jis kí milkíyat Karmil meṉ thá; yih shaḳhs bahut baṛá thá, aur us ke pás tín hazár bheṛeṉ aur ek hazár bakriyáṉ thíṉ; aur yih Karmil meṉ apní bheṛoṉ ke bál katar rahá thá.

3Is shaḳhs ká nám Nábál, aur us kí bíwí ká nám Abíjel thá: yih ‘aurat baṛí samajhdár aur ḳhúbsúrat thí; par wuh mard baṛá beadab aur badkár thá; aur wuh Kálib ke ḳhándán se thá.

4Aur Dáúd ne biyábán meṉ suná ki Nábál apní bheṛoṉ ke bál katar rahá hai.

5So Dáúd ne das jawán rawána kiye, aur us ne un jawánoṉ se kahá, ki Tum Karmil par chaṛhkar Nábál ke pás jáo, aur merá nám lekar use salám kaho:

6aur us ḳhushhál ádmí se yúṉ kaho, ki Terí aur tere ghar kí aur tere mál asbáb kí salámatí ho.

7Maiṉ ne ab suná hai, ki tere háṉ bál katarnewále haiṉ; aur tere charwáhe hamáre sáth rahe, aur ham ne un ko nuqsán nahíṉ pahuṉcháyá, aur jab tak wuh Karmil meṉ hamáre sáth rahe, un kí koí chíz khoí na gayí.

8Tú apne jawánoṉ se púchh, aur wuh tujhe batáeṉge. Pas, in jawánoṉ par tere karam kí nazar ho, is liye ki ham achchhe din áe haiṉ: maiṉ terí minnat kartá húṉ, ki jo kuchh tere háth áe, apne ḳhádimoṉ ko aur apne beṭe Dáúd ko ‘atá kar.

9So Dáúd ke jawánoṉ ne jákar Nábál se Dáúd ká nám lekar yih báteṉ kahíṉ, aur chup ho rahe.

10Nábál ne Dáúd ke ḳhádimoṉ ko jawáb diyá, ki Dáúd kaun hai? aur Yassí ká beṭá kaun hai? In dinoṉ bahut se naukar aise haiṉ, jo apne áqá ke pás se bhág játe haiṉ.

11Kyá maiṉ apní roṭí, aur pání, aur zabíhe jo maiṉ ne apne katarnewáloṉ ke liye zabh kiye haiṉ, lekar un logoṉ ko dúṉ jin ko maiṉ nahíṉ jántá ki wuh kaháṉ ke haiṉ?

12So Dáúd ke jawán ulṭe páṉw phire, aur lauṭ gaye, aur ákar yih sab báteṉ use batáíṉ.

13Tab Dáúd ne apne logoṉ se kahá, Apní apní talwár báṉdh lo. So har ek ne apní talwár báṉdhí, aur Dáúd ne bhí apní talwár hamáil kí: so qaríban chár sau jawán Dáúd ke píchhe chale, aur do sau asbáb ke pás rahe.

14Aur jawánoṉ meṉ se ek ne Nábál kí bíwí Abíjel se kahá, ki Dekh, Dáúd ne biyábán se hamáre áqá ko mubárakbád dene ko qásid bheje; par wuh un par jhunjhláyá:

15lekin in logoṉ ne ham se baṛí nekí kí, aur hamárá nuqsán nahíṉ húá, aur maidánoṉ meṉ jab tak ham un ke sáth rahe, hamárí koí chíz gum na húí;

16balki jab tak ham un ke sáth bheṛ bakrí charáte rahe, wuh rát din hamáre liye goyá díwár the.

17So ab soch, samajh le, ki tú kyá karegí; kyúṉki hamáre áqá, aur us ke sab gharáne ke ḳhiláf badí ká mansúba báṉdhá gayá hai: kyúṉki yih aisá ḳhabís ádmí hai, ki koí is se bát nahíṉ kar saktá.

18Tab Abíjel ne jaldí kí, aur do sau roṭiyáṉ, aur mai ke do mashkíze aur páṉch pakí pakáí bheṛeṉ, aur bhune húe anáj ke páṉch paimáne, aur kishmish ke ek sau ḳhoshe aur anjír kí do sau ṭikkiyáṉ sáth líṉ, aur un ko gadhoṉ par lád liyá;

19aur apne chákaroṉ se kahá, Tum mujh se áge jáo; dekho, maiṉ tumháre píchhe píchhe átí húṉ. Aur us ne apne shauhar Nábál ko ḳhabar na kí.

20Aur aisá húá, ki júṉhí wuh gadhe par chaṛhkar paháṛ kí áṛ se utrí, Dáúd apne logoṉ samet utarte húe us ke sámne áyá; aur wuh un ko milí.

21Aur Dáúd ne kahá thá, ki Maiṉ ne is pájí ke sab mál kí jo biyábán meṉ thá befáida is tarah nigahbání kí, ki us kí chízoṉ meṉ se koí chíz gum na húí: kyúṉki us ne nekí ke badle mujh se badí kí.

22So agar maiṉ subh kí raushní hone tak us ke logoṉ meṉ se ek laṛká bhí báqí chhoṛúṉ, to Ḳhudá Dáúd ke dushmanoṉ se aisá hí, balki is se ziyáda hí kare.

23Aur Abíjel ne jo Dáúd ko dekhá to jaldí kí, aur gadhe se utrí, aur Dáúd ke áge auṉdhí girí, aur zamín par sarnigún ho gayí.

24Aur wuh us ke páṉwoṉ par girkar kahne lagí, Mujh par, ai mere málik, mujhí par yih gunáh ho, aur zará apní lauṉḍí ko ijázat de ki tere kán meṉ kuchh kahe, aur tú apní lauṉḍí kí ‘arz sun.

25Maiṉ terí minnat kartí húṉ, ki merá málik us ḳhabís ádmí Nábál ká kuchh ḳhayál na kare, kyúṉki jaisá us ká nám hai, waisá hí wuh hai; us ká nám Nábál hai, aur hamáqat us ke sáth hai: lekin maiṉ ne, jo terí lauṉḍí húṉ, apne málik ke jawánoṉ ko jin ko tú ne bhejá thá nahíṉ dekhá.

26Aur ab, ai mere málik, Ḳhudáwand kí hayát kí qasam, aur terí ján hí kí saugand, ki Ḳhudáwand ne, jo tujhe ḳhúnrezí se aur apne hí háthoṉ apná intiqám lene se báz rakkhá hai, is liye tere dushman, aur mere málik ke badḳhwáh, Nábál kí mánind ṭhahreṉ.

27Ab yih hadya jo terí lauṉḍí apne málik ke huzúr láí hai un jawánoṉ ko jo mere Ḳhudáwand kí pairawí karte haiṉ diyá jáe.

28Tú apní lauṉḍí ká gunáh mu‘áf kar de, kyúṉki Ḳhudáwand yaqínan mere málik ká ghar qáim rakkhegá; is liye ki merá málik Ḳhudáwand kí laṛáiyáṉ laṛtá hai, aur tujh meṉ tamám ‘umr buráí nahíṉ páí jáegí.

29Aur go insán terá píchhá karne, aur terí ján lene ko uṭhe, taubhí mere málik kí ján zindagí ke buqche meṉ Ḳhudáwand tere Ḳhudá ke sáth baṉdhí rahegí; par tere dushmanoṉ kí jáneṉ wuh goyá faláḳhun meṉ rakhkar pheṉk degá.

30Aur jab Ḳhudáwand mere málik se wuh sárí nekíáṉ jo us ne tere haqq meṉ farmáí haiṉ kar chukegá, aur tujh ko Isráíl ká sardár baná degá,

31to tujhe is ká g̣am aur mere málik ko yih dilí sadma na hogá, ki tú ne besabab ḳhún baháyá, yá mere málik ne apná intiqám liyá: aur jab Ḳhudáwand mere málik se bhaláí kare, to tú apní lauṉḍí ko yád karná.

32Dáúd ne Abíjel se kahá, ki Ḳhudáwand, Isráíl ká Ḳhudá, mubárak ho jis ne tujhe áj ke din mujh se milne ko bhejá;

33aur terí ‘aqlmandí mubárak, tú ḳhud bhí mubárak ho jis ne mujh ko áj ke din ḳhúnrezí aur apne háthoṉ se apná intiqám lene se báz rakkhá.

34Kyúṉki Ḳhudáwand Isráíl ke Ḳhudá kí hayát kí qasam jis ne mujhe tujh ko nuqsán pahuṉcháne se roká, ki agar tú jaldí na kartí, aur mujh se milne ko na átí, to subh kí raushní tak Nábál ke liye ek laṛká bhí na rahtá.

35Aur Dáúd ne us ke háth se jo kuchh wuh us ke liye láí thí, qubúl kiyá, aur us se kahá, Apne ghar salámat já: dekh, maiṉ ne terí bát mání, aur terá liház kiyá.

36Aur Abíjel Nábál ke pás áí; aur dekhá, ki us ne apne ghar meṉ sháhána ziyáfat kí tarah ziyáfat kar rakkhí hai. Aur Nábál ká dil us ke pahlú meṉ magan hai, is liye ki wuh nashe meṉ chúr thá; so us ne us se subh kí raushní tak, na thoṛá na bahut, kuchh na kahá.

37Subh ko, jab Nábál ká nasha utar gayá, to us kí bíwí ne yih báteṉ use batáíṉ; tab us ká dil us ke pahlú meṉ murda ho gayá, aur wuh patthar kí mánind sun paṛ gayá.

38Aur das din ke ba‘d aisá húá ki Ḳhudáwand ne Nábál ko márá, aur wuh mar gayá.

39Jab Dáúd ne suná, ki Nábál mar gayá, to wuh kahne lagá, ki Ḳhudáwand mubárak ho jo Nábál se merí ruswáí ká muqaddama laṛá aur apne bande ko badí se báz rakkhá: aur Ḳhudáwand ne Nábál kí sharárat ko usí ke sir par ládá. Aur Dáúd ne Abíjel ke báre meṉ paig̣ám bhejá táki us se biyáh kare.

40Aur jab Dáúd ke ḳhádim Karmil meṉ Abíjel ke pás áe, to unhoṉ ne us se kahá, ki Dáúd ne ham ko tere pás bhejá hai, táki ham tujhe us se biyáhne ko le jáeṉ.

41So wuh uṭhí, aur zamín par auṉdhe muṉh girí, aur kahne lagí, ki Dekh, terí lauṉḍí to naukar hai, táki apne málik ke ḳhádimoṉ ke páṉw dhoe.

42Aur Abíjel ne jaldí kí, aur uṭhkar gadhe par sawár húí, aur apní páṉch lauṉḍiyáṉ jo us ke jilau meṉ thíṉ sáth le líṉ: aur wuh Dáúd ke qásidoṉ ke píchhe píchhe gayí, aur us kí bíwí baní.

43Aur Dáúd ne Yazra‘el kí Aḳhinú‘am ko bhí biyáh liyá, so wuh donoṉ us kí bíwiyáṉ baníṉ.

44Aur Sáúl ne apní beṭí Míkal ko jo Dáúd kí bíwí thí Lais ke beṭe Jillímí Filtí ko de diyá thá.