1 Samuel 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Aur Samúel kí bát sab Isráílíoṉ ke pás pahuṉchí. Aur Isráílí Filistíoṉ se laṛne ko nikle, aur Aban‘azar ke áspás ḍere lagáe, aur Filistíoṉ ne Afíq meṉ ḳhaime khaṛe kiye.

2Aur Filistíoṉ ne Isráíl ke muqábale ke liye saffáráí kí: aur jab wuh báham laṛne lage, to Isráílíoṉ ne Filistíoṉ se shikast kháí, aur unhoṉ ne un ke lashkar meṉ se jo maidán meṉ thá qaríban chár hazár ádmí qatl kiye.

3Aur jab wuh log lashkargáh meṉ phir áe, to Isráíl ke buzurgoṉ ne kahá, ki Áj Ḳhudáwand ne ham ko Filistíoṉ ke sámne kyúṉ shikast dí? Áo, ham Ḳhudáwand ke ‘ahd ká sandúq Sailá se apne pás le áeṉ, táki wuh hamáre darmiyán ákar ham ko hamáre dushmanoṉ se bacháe.

4So unhoṉ ne Sailá meṉ log bheje, aur wuh karúbíoṉ ke úpar baiṭhnewále Rabb u’l afwáj ke ‘ahd ke sandúq ko waháṉ se le áe: aur ‘Elí ke donoṉ beṭe Hufní aur Fínihás Ḳhudá ke ‘ahd ke sandúq ke sáth waháṉ házir the.

5Aur jab Ḳhudáwand ke ‘ahd ká sandúq lashkargáh meṉ á pahuṉchá, to sab Isráílí aise zor se lalkárne lage, ki zamín gúṉj uṭhí.

6Aur Filistíoṉ ne jo lalkárne kí áwáz suní, to wuh kahne lage, ki In ‘Ibráníoṉ kí lashkargáh meṉ is baṛí lalkár ke shor ke kyá ma‘ní haiṉ? Phir un ko ma‘lúm húá, ki Ḳhudáwand ká sandúq lashkargáh meṉ áyá hai.

7So Filistí ḍar gaye, kyúṉki wuh kahne lage, ki Ḳhudá lashkargáh meṉ áyá hai. Aur unhoṉ ne kahá, ki Ham par wáwailá hai, is liye ki is se pahle aisá kabhí nahíṉ húá.

8Ham par wáwailá hai! aise zabardast deotáoṉ ke háth se ham ko kaun bacháegá? yih wuhí deotá haiṉ, jinhoṉ ne Misríoṉ ko biyábán meṉ har qism kí balá se márá.

9Ai Filistío, tum mazbút ho, aur mardánagí karo, táki tum ‘Ibráníoṉ ke g̣ulám na bano, jaise wuh tumháre bane: balki mardánagí karo, aur laṛo.

10Aur Filistí laṛe, aur baní Isráíl ne shikast kháí, aur har ek apne ḍere ko bhágá: aur waháṉ niháyat baṛí ḳhúnrezí húí, kyúṉki tís hazár Isráílí piyáde waháṉ khet áe.

11Aur Ḳhudá ká sandúq chhin gayá; aur ‘Elí ke donoṉ beṭe Hufní aur Fínihás máre gaye.

12Aur Binyamín ká ek ádmí lashkar meṉ se dauṛkar apne kapṛe pháṛe aur sir par ḳhák ḍále húe usí roz Sailá meṉ pahuṉchá.

13Aur jab wuh pahuṉchá, to ‘Elí ráh ke kanáre kursí par baiṭhá intizár kar rahá thá: kyúṉki us ká dil Ḳhudá de sandúq ke liye káṉp rahá thá. Aur jab us shaḳhs ne shahr meṉ ákar májará sunáyá, to sárá shahr chillá uṭha.

14Aur ‘Elí ne chilláne kí áwáz sunkar kahá, Is hullaṛ kí áwáz ke kyá ma‘ní haiṉ? Aur us ádmí ne jaldí kí aur ákar ‘Elí ko hál sunáyá.

15Aur ‘Elí aṭhánawe baras ká thá; aur us kí áṉkheṉ rah gayí thíṉ, aur use kuchh nahíṉ sújhtá thá.

16So us shaḳhs ne ‘Elí se kahá, Maiṉ fauj meṉ se átá húṉ, aur maiṉ áj hí fauj ke bích se bhágá húṉ. Us ne kahá, Ai mere beṭe, kyá hál rahá?

17Us ḳhabar lánewále ne jawáb diyá, Isráílí Filistíoṉ ke áge se bháge, aur logoṉ meṉ bhí baṛí ḳhúnrezí húí, aur tere donoṉ beṭe Hufní aur Fínihás bhí mar gaye, aur Ḳhudá ká sandúq chhin gayá.

18Jab us ne Ḳhudá ke sandúq ká zikr kiyá, to wuh kursí par se pachháṛ khákar pháṭak ke kanáre girá, aur us kí gardan ṭúṭ gayí, aur wuh mar gayá; kyúṉki wuh buḍḍhá aur bhárí ádmí thá. Wuh chálís baras baní Isráíl ká qází rahá.

19Aur us kí bahú, Fínihás kí bíwí peṭ se thí, aur us ke janne ká waqt nazdík thá: aur jab us ne yih ḳhabareṉ suníṉ, ki Ḳhudá ká sandúq chhin gayá, aur us ká ḳhusar aur ḳháwind mar gaye, to wuh jhukkar janí, kyúṉki dard i zih us ke lag gayá thá.

20Aur us ke marte waqt un ‘auratoṉ ne jo us ke pás khaṛí thíṉ use kahá, Mat ḍar, kyúṉki tere beṭá húá hai. Par us ne jawáb na diyá, aur na kuchh tawajjuh kí.

21Aur us ne us laṛke ká nám Yakbod rakkhá, aur kahne lagí, ki Hashmat Isráíl se játí rahí; is liye ki Ḳhudá ká sandúq chhin gayá thá aur us ká ḳhusar aur ḳháwind játe rahe the.

22So us ne kahá, ki Hashmat Isráíl se játí rahí, kyúṉki Ḳhudá ká sandúq chhin gayá hai.

← Chapter 3 Jump to: Chapter 5 →