1 Samuel 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Aur Hannah ne du‘á kí, aur kahá, Merá dil Ḳhudáwand meṉ magan hai; Merá síṉg Ḳhudáwand ke tufail se úṉchá húá; Merá muṉh mere dushmanoṉ par khul gayá hai; Kyúṉki maiṉ terí naját se ḳhush húṉ.

2Ḳhudáwand kí mánind koí quddús nahíṉ; Kyúṉki tere siwá âur koí hai hí nahíṉ; Aur na koí chaṭán hai jo hamáre Ḳhudá kí mánind ho.

3Is qadr g̣urúr se âur báteṉ na karo; Aur baṛá bol tumháre muṉh se na nikle: Kyúṉki Ḳhudáwand Ḳhudá e ‘alím hai, Aur a‘mál ká tolnewálá.

4Zoráwaroṉ kí kamáneṉ ṭúṭ gayíṉ, Aur jo laṛkhaṛáte the wuh quwwat se kamarbasta húe.

5Wuh jo ásúda the roṭí kí ḳhátir mazdúr bane, Aur jo bhúke the aise na rahe; Balki jo báṉjh thí, us ke sát húe, Aur jis ke pás bahut bachche haiṉ wuh ghultí játí hai.

6Ḳhudáwand mártá hai aur jilátá hai; Wuhí qabr meṉ utártá aur us se nikáltá hai.

7Ḳhudáwand miskín kar detá aur daulatmand banátá hai: Wuhí past kartá aur sarfaráz bhí kartá hai.

8Wuh g̣aríb ko ḳhák par se uṭhátá Aur kaṉgál ko ghúre meṉ se nikál khaṛá kartá hai, Táki in ko sháhzádoṉ ke sáth biṭháe, Aur jalál ke taḳht ká wáris banáe; Kyúṉki zamín ke sutún Ḳhudáwand ke haiṉ, Us ne dunyá ko un hí par qáim kiyá hai.

9Wuh apne muqaddasoṉ ke páṉwoṉ ko sambhále rahegá, Par sharír andhere meṉ ḳhámosh kiye jáeṉge; Kyúṉki quwwat hí se koí fath nahíṉ páegá.

10Jo Ḳhudáwand se jhagaṛte haiṉ wuh ṭukṛe ṭukṛe kar diye jáeṉge; Wuh un ke ḳhiláf ásmán meṉ garjegá. Ḳhudáwand zamín ke kanároṉ ká insáf karegá; Wuh apne bádsháh ko zor baḳhshegá, Aur apne mamsúh ke síṉg ko baland karegá.

11Tab Ilqánah Rámah ko apne ghar chalá gayá. Aur ‘Elí káhin ke sámne wuh laṛká Ḳhudáwand kí ḳhidmat karne lagá.

12Aur ‘Elí ke beṭe bahut sharír the; unhoṉ ne Ḳhudáwand ko na pahcháná.

13Aur káhinoṉ ká dastúr logoṉ ke sáth yih thá, ki jab koí shaḳhs qurbání chaṛhátá thá, to káhin ká naukar gosht ubálne ke waqt ek sihsháḳha káṉṭá apne háth meṉ liye húe átá thá,

14aur us ko kaṛáh, yá degche, yá hanḍe, yá háṉḍí meṉ ḍáltá, aur jitná gosht us káṉṭe meṉ lag játá use káhin áp letá thá. Yúṉ hí wuh Sailá meṉ sab Isráílíoṉ se kiyá karte the jo waháṉ áte the.

15Balki charbí jaláne se pahle káhin ká naukar á maujúd hotá aur us shaḳhs se jo qurbání chaṛhátá yih kahne lagtá thá, ki Káhin ke liye kabáb ke wáste gosht de; kyúṉki wuh tujh se ublá húá gosht nahíṉ, balki kachchá legá.

16Aur agar wuh shaḳhs yih kahtá, ki Abhí wuh charbí ko zarúr jaláeṉge, tab jitná terá jí cháhe le lená; to wuh use jawáb detá, Nahíṉ; tú mujhe abhí de, nahíṉ to maiṉ chhínkar le jáúṉgá.

17So un jawánoṉ ká gunáh Ḳhudáwand ke huzúr bahut baṛá thá; kyúṉki log Ḳhudáwand kí qurbání se ghin karne lage the.

18Par Samúel jo laṛká thá katán ká afod pahine húe Ḳhudáwand ke huzúr ḳhidmat kartá thá.

19Aur us kí máṉ us ke liye ek chhoṭá sá jubba banákar sál ba sál látí, jab wuh apne ḳhawind ke sáth sálána qurbání chaṛháne átí thí.

20Aur ‘Elí ne Ilqánah aur us kí bíwí ko du‘á dí, aur kahá, Ḳhudáwand tujh ko is ‘aurat se us qarz ke ‘iwaz meṉ jo Ḳhudáwand ko diyá gayá nasl de. Phir wuh apne ghar gaye.

21Aur Ḳhudáwand ne Hannah par nazar kí, aur wuh hámila húí, aur us ke tín beṭe aur do beṭiyáṉ húíṉ. Aur wuh laṛká Samúel Ḳhudáwand ke huzúr baṛhtá gayá.

22Aur ‘Elí bahut buḍḍhá ho gayá thá, aur us ne sab kuchh suná, ki us ke beṭe sáre Isráíl se kyá kiyá karte haiṉ, aur un ‘auratoṉ se jo ḳhaima e ijtimá‘ ke darwáze par ḳhidmat kartí thíṉ hamág̣oshí karte haiṉ.

23Aur us ne un se kahá, Tum aisá kyúṉ karte ho, kyúṉki maiṉ tumhárí badzátíáṉ tamám qaum se suntá húṉ?

24Nahíṉ, mere beṭo; yih achchhí bát nahíṉ jo maiṉ suntá húṉ: tum Ḳhudáwand ke logoṉ se náfarmání karáte ho.

25Agar ek ádmí dúsre ká gunáh kare, to Ḳhudá us ká insáf karegá: lekin agar ádmí Ḳhudáwand ká gunáh kare, to us kí shafá‘at kaun karegá? Báwujúd is ke unhoṉ ne apne báp ká kahá na máná; kyúṉki Ḳhudáwand un ko már ḍálná cháhtá thá.

26Aur wuh laṛká Samúel baṛhtá gayá, aur Ḳhudáwand aur insán donoṉ ká maqbúl thá.

27Tab ek mard i Ḳhudá ‘Elí ke pás áyá, aur us se kahne lagá, Ḳhudáwand yúṉ farmátá hai, Kyá maiṉ tere ábáí ḳhándán par, jab wuh Misr meṉ Fir‘aun ke ḳhándán kí g̣ulámí meṉ thá, záhir nahíṉ húá?

28Aur kyá maiṉ ne use baní Isráíl ke sab qabíloṉ meṉ se chun na liyá, táki wuh merá káhin ho, aur mere mazbah ke pás jákar baḳhúr jaláe, aur mere huzúr afod pahine? Aur kyá maiṉ ne sab qurbáníáṉ jo baní Isráíl ág se guzránte haiṉ tere báp ko na díṉ?

29Pas tum kyúṉ mere us zabíhe aur hadye ko, jin ká hukm maiṉ ne apne maskan meṉ diyá, lát márte ho; aur kyúṉ tú apne beṭoṉ kí mujh se ziyáda ‘izzat kartá hai, táki tum merí qaum Isráíl ke achchhe se achchhe hadyoṉ ko khákar moṭe bano?

30Is liye Ḳhudáwand Isráíl ká Ḳhudá farmátá hai, ki Maiṉ ne to kahá thá, ki Terá gharáná aur tere báp ká gharáná hamesha mere huzúr chalegá; par ab Ḳhudáwand farmátá hai, ki Yih bát mujh se dúr ho; kyúṉki wuh jo merí ‘izzat karte haiṉ, maiṉ un kí ‘izzat karúṉgá; par wuh jo merí tahqír karte haiṉ beqadr hoṉge.

31Dekh, wuh din áte haiṉ, ki maiṉ terá bázú, aur tere báp ke gharáne ká bázú káṭ ḍálúṉgá, ki tere ghar meṉ koí buḍḍhá hone na páegá.

32Aur tú mere maskan kí musíbat dekhegá báwujúd us sárí daulat ke jo Ḳhudá Isráíl ko degá: aur tere ghar meṉ kabhí koí buḍḍhá hone na páegá.

33Aur tere jis ádmí ko maiṉ apne mazbah se káṭ nahíṉ ḍálúṉgá, wuh terí áṉkhoṉ ko ghuláne aur tere dil ko dukh dene ke liye rahegá: aur tere ghar kí sab baṛhtí apní bharí jawání meṉ mar miṭegí.

34Aur jo kuchh tere donoṉ beṭoṉ Hufní aur Fínihás par názil hogá, wuhí tere liye nishán ṭhahregá; wuh donoṉ ek hí din mar jáeṉge.

35Aur maiṉ apne liye ek wafádár káhin barpá karúṉgá jo sab kuchh merí marzí aur manshá ke mutábiq karegá: aur maiṉ us ke liye ek páedár ghar banáúṉgá; aur wuh hamesha mere mamsúh ke áge áge chalegá.

36Aur aisá hogá, ki har ek shaḳhs jo tere ghar meṉ bach rahegá, ek tukṛe chándí aur roṭí ke ek girde ke liye us ke sámne ákar sijda karegá, aur kahegá, ki Kahánat ká koí kám mujhe díjiye táki maiṉ roṭí ká niwála khá sakúṉ.

← Chapter 1 Jump to: Chapter 3 →