1 Samuel 9

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 8 Jump to: Chapter 10 →

1Aur Binyamín ke qabíle ká ek shaḳhs thá, jis ká nám Qís, bin Abíel, bin Saror, bin Bakorat, bin Afíḳh thá: wuh ek Binyamíní ká beṭá aur zabardast súrmá thá.

2Us ká ek jawán aur ḳhúbsúrat beṭá thá jis ká nám Sáúl thá; aur baní Isráíl ke darmiyán us se ḳhúbsúrat koí shaḳhs na thá: wuh aisá qaddáwar thá, ki log us ke kandhe tak áte the.

3Aur Sáúl ke báp Qís ke gadhe kho gaye. So Qís ne apne beṭe Sáúl se kahá, ki Naukaroṉ meṉ se ek ko apne sáth le, aur uṭhkar gadhoṉ ko ḍhúṉḍh lá.

4So wuh Ifráím ke kohistání mulk aur Salísah kí sarzamín se hokar guzrá, par wuh un ko na mile. Tab wuh Sa‘lím kí sarzamín meṉ gaye, aur wuh waháṉ bhí na the; phir wuh Binyamíníoṉ ke mulk meṉ áe, par un ko waháṉ bhí na páyá.

5Jab wuh Súf ke mulk meṉ pahuṉche, to Sáúl apne naukar se jo us ke sáth thá kahne lagá, Á, ham lauṭ jáeṉ, tá na ho ki merá báp gadhoṉ kí fikr chhoṛkar hamárí fikr karne lage.

6Us ne us se kahá, Dekh, is shahr meṉ ek mard i Ḳhudá hai, jis kí baṛí ‘izzat hotí hai; jo kuchh wuh kahtá hai, wuh sab zarúr hí púrá hotá hai; so ham udhar chaleṉ, sháyad wuh ham ko batá de ki ham kidhar jáeṉ.

7Sáúl ne apne naukar se kahá, Lekin dekh, agar ham waháṉ chaleṉ, to us shaḳhs ke liye kyá lete jáeṉ? roṭiyáṉ to hamáre toshadán kí ho chukíṉ, aur koí chíz hamáre pás hai nahíṉ jise ham us mard i Ḳhudá kí nazr kareṉ: hamáre pás hai kya?

8Naukar ne Sáúl ko jawáb diyá, Dekh, páo misqál chándí mere pás hai: usí ko maiṉ us mard i Ḳhudá ko dúṉgá, táki wuh ham ko rásta batá de.

9(Agle zamáne meṉ Isráílíoṉ meṉ jab koí shaḳhs Ḳhudá se mashwara karne játá, to yih kahtá thá, ki Áo, ham g̣aibbín ke pás chaleṉ; kyúṉki jis ko ab nabí kahte haiṉ us ko pahle g̣aibbín kahte the.)

10Tab Sáúl ne apne naukar se kahá, Tú ne kyá ḳhúb kahá: á, ham chaleṉ. So wuh us shahr ko, jaháṉ wuh mard i Ḳhudá thá, chale.

11Aur us shahr kí taraf ṭíle par chaṛhte húe un ko kaí jawán laṛkiyáṉ milíṉ jo pání bharne játí thíṉ; unhoṉ ne un se púchhá, Kyá g̣aibbín yaháṉ hai?

12Unhoṉ ne un ko jawáb diyá, Háṉ, hai; dekho, wuh tumháre sámne hí hai; so jaldí karo, kyúṉki wuh áj hí shahr meṉ áyá hai; is liye ki áj ke din úṉche maqám meṉ logoṉ kí taraf se qurbání hotí hai.

13Júṉhí tum shahr meṉ dáḳhil hoge, wuh tum ko, peshtar us se ki wuh úṉche maqám meṉ kháná kháne jáe, milegá: kyúṉki jab tak wuh na pahuṉche, log kháná nahíṉ kháeṉge, is liye ki wuh qurbání ko barakat detá hai; us ke ba‘d mihmán kháte haiṉ. So ab tum chaṛh jáo, kyúṉki is waqt wuh tum ko mil jáegá.

14So wuh shahr ko chale, aur shahr meṉ dáḳhil hote hí dekhá, ki Samúel un ke sámne á rahá hai, táki wuh úṉche maqám ko jáe.

15Aur Ḳhudáwand ne Sáúl ke áne se ek din peshtar Samúel par záhir kar diyá thá, ki

16Kal isí waqt maiṉ ek shaḳhs ko Binyamín ke mulk se tere pás bhejúṉgá; tú use masah karná, táki wuh merí qaum Isráíl ká peshwá ho, aur wuh mere logoṉ ko Filistíoṉ ke háth se bacháegá; kyúṉki maiṉ ne apne logoṉ par nazar kí hai, is liye ki un kí faryád mere pás pahuṉchí hai.

17So jab Samúel Sáúl se dochár húá, to Ḳhudáwand ne us se kahá, Dekh, yihí wuh shaḳhs hai, jis ká zikr maiṉ ne tujh se kiyá thá; yihí mere logoṉ par hukúmat karegá.

18Phir Sáúl ne pháṭak par Samúel ke nazdík jákar us se kahá, ki Mujh ko zará batá de, ki g̣aibbín ká ghar kaháṉ hai.

19Samúel ne Sáúl ko jawáb diyá, ki Wuh g̣aibbín maiṉ hí húṉ: mere áge áge úṉche maqám ko já, kyúṉki tum áj ke din mere sáth kháná kháoge; aur subh ko maiṉ tujhe ruḳhsat karúṉgá, aur jo kuchh tere dil meṉ hai sab tujhe batá dúṉgá.

20Aur tere gadhe jin ko khoe húe tín din húe un ká ḳhayál mat kar; kyúṉki wuh mil gaye. Aur Isráílíoṉ meṉ jo kuchh marg̣úb i ḳhátir hai, wuh kis ke liye hai? kyá wuh tere aur tere báp ke sáre gharáne ke liye nahíṉ?

21Sáúl ne jawáb diyá, Kyá maiṉ Binyamíní ya‘ní Isráíl ke sab se chhoṭe qabíle ká nahíṉ? aur kyá merá gharáná Binyamín ke qabíle ke sab gharánoṉ meṉ sab se chhoṭá nahíṉ? so tú mujh se aisí báteṉ kyúṉ kahtá hai?

22Aur Samúel Sáúl aur us ke naukar ko mihmánḳháne meṉ láyá, aur un ko mihmánoṉ ke darmiyán jo koí tís ádmí the, sadr jagah meṉ bitháyá.

23Aur Samúel ne báwarchí se kahá, ki Wuh ṭukṛá jo maiṉ ne tujhe diyá, jis ke báre meṉ tujh se kahá thá, ki Ise apne pás rakh chhoṛná, le á.

24Báwarchí ne wuh rán ma‘ us ke jo us par thá, uṭhákar Sáúl ke sámne rakh dí. Tab Samúel ne kahá, Yih dekh, jo rakh liyá gayá thá; use apne sámne rakhkar khá le; kyúṉki wuh isí mu‘aiyan waqt ke liye tere wáste rakkhí rahí; kyúṉki maiṉ ne kahá, ki Maiṉ ne in logoṉ kí da‘wat kí hai. So Sáúl ne us din Samúel ke sáth kháná kháyá.

25Aur jab wuh úṉche maqám se utarkar shahr meṉ áe, to us ne Sáúl se ghar kí chhat par báteṉ kíṉ.

26Aur wuh sawere uṭhe: aur aisá húá ki jab din chaṛhne lagá, to Samúel ne Sáúl ko phir ghar kí chhat par bulákar us se kahá, Uṭh, ki maiṉ tujhe ruḳhsat karúṉ. So Sáúl uṭhá, aur wuh aur Samúel donoṉ báhar nikal gaye.

27Aur shahr ke sire ke utár par chalte chalte Samúel ne Sáúl se kahá, ki Apne naukar ko hukm kar ki wuh ham se áge baṛhe, (so wuh áge baṛh gayá;) par tú abhí khaṛá rah, táki maiṉ tujhe Ḳhudá kí bát sunáúṉ.

← Chapter 8 Jump to: Chapter 10 →