bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Ezekiel 16
Ezekiel 16
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 17 →
1
Phir Ḳhudáwand ká kalám mujh par názil húá,
2
ki Ai ádamzád, Yarúshalem ko us ke nafratí kámoṉ se ágáh kar,
3
aur kah, Ḳhudáwand Ḳhudá Yarúshalem se yúṉ farmátá hai, ki Terí wiládat aur terí paidáish Kan‘án kí sarzamín kí hai; terá báp Amorí thá, aur terí máṉ Hittí thí.
4
Aur terí paidáish ká hál yúṉ hai, ki jis din tú paidá húí, terí náf káṭí na gayí, aur na safáí ke liye tujhe pání se g̣usl milá, aur na tujh par namak malá gayá, aur tú kapṛoṉ meṉ lapeṭí na gayí.
5
Kisí kí áṉkh ne tujh par rahm na kiyá, ki tere liye yih kám kare, aur tujh par mihrbání dikháe, balki tú apní wiládat ke roz báhar maidán meṉ pheṉkí gayí, kyúṉki tujh se nafrat rakhte the.
6
Tab maiṉ ne tujh par guzar kiyá, aur tujhe tere hí lahú meṉ loṭtí dekhá, aur maiṉ ne tujhe, jab tú apne ḳhún meṉ ág̣ishta thí, kahá, ki Jítí rah, háṉ, maiṉ ne tujh ḳhúnálúda se kahá, Jítí rah.
7
Maiṉ ne tujhe chaman ke shigúfoṉ kí mánind hazár chand baṛháyá, so tú baṛhí, aur bálig̣ húí, aur kamál o jamál tak pahuṉchí, terí chhátiyáṉ uṭhíṉ, aur terí zulfeṉ baṛhíṉ, lekin tú naṉgí aur barahna thí.
8
Phir maiṉ ne terí taraf guzar kiyá, aur tujh par nazar kí, aur kyá dekhtá húṉ, ki tú ‘ishqangez ‘umr ko pahuṉch gayí hai: pas maiṉ ne apná dáman tujh par phailáyá, aur terí barahnagí ko chhipáyá, aur qasam khákar tujh se ‘ahd báṉdhá, Ḳhudáwand Ḳhudá farmátá hai, aur tú merí ho gayí.
9
Phir maiṉ ne tujhe pání se g̣usl diyá, aur terá ḳhún bi’lkull dho ḍálá, aur tujh par ‘itr malá.
10
Aur maiṉ ne tujhe zardoz libás se mulabbas kiyá, aur tuḳhas kí khál kí jútí pahináí, nafís katán se terá kamarband banáyá, aur tujhe sarásar resham se mulabbas kiyá.
11
Maiṉ ne tujhe zewar se árásta kiyá, tere háthoṉ meṉ kangan pahináe, aur tere gale meṉ tauq ḍálá.
12
Aur maiṉ ne terí nák meṉ nath, aur tere kánoṉ meṉ báliyáṉ pahináíṉ, aur ek ḳhúbsúrat táj tere sir par rakkhá.
13
Aur tú sone chándí se árásta húí, aur terí poshák katání, aur reshmí, aur chikandozí kí thí; aur tú maida, aur shahd, aur chiknáí khátí thí: aur tú niháyat ḳhúbsúrat, aur iqbálmand malika ho gayí.
14
Aur aqwám i ‘álam meṉ terí ḳhúbsúratí kí shuhrat phail gayí, kyúṉki, Ḳhudáwand Ḳhudá farmátá hai, ki Tú merí us jalál se, jo maiṉ ne tujhe baḳhshá, kámil ho gayí thí.
15
Lekin tú ne apní ḳhúbsúratí par takiya kiyá, aur apní shuhrat ke wasíle se badkárí karne lagí, aur har ek ke sáth jis ká terí taraf guzar húá, ḳhúb fáhisha baní, aur usí kí ho gayí.
16
Tú ne apní poshák se apne úṉche maqám munaqqash aur árásta kiye, aur un par aisí badkárí kí, ki na kabhí húí, aur na hogí:
17
aur tú ne apne sone chándí ke nafís zewaroṉ se, jo maiṉ ne tujhe diye the, apne liye mardoṉ kí múrateṉ banáíṉ, aur un se badkárí kí;
18
aur apní zardoz poshákoṉ se un ko mulabbas kiyá, aur merá ‘itr aur baḳhúr un ke sámne rakkhá;
19
aur merá kháná jo maiṉ ne tujhe diyá, ya‘ní maidá, aur chiknáí, aur shahd, jo maiṉ tujhe khilátá thá, tú ne un ke sámne ḳhushbú ke liye rakkhá; Ḳhudáwand Ḳhudá farmátá hai, ki Yúṉ hí húá.
20
Aur tú ne apne beṭoṉ aur apní beṭiyoṉ ko, jin ko tú ne mere liye janam diyá, lekar un ke áge qurbání kiyá, táki wuh un ko khá jáeṉ. Kyá terí badkárí koí chhoṭí bát thí,
21
ki tú ne mere bachchoṉ ko bhí zabh kiyá, aur un ko butoṉ ke liye ág ke hawále kiyá?
22
Aur tú ne apní tamám makrúhát aur badkárí meṉ apne bachpan ke dinoṉ ko, jab ki tú naṉgí aur barahna apne ḳhún meṉ loṭtí thí, kabhí yád na kiyá.
23
Aur Ḳhudáwand Ḳhudá farmátá hai, ki Apní is sárí badkárí ke ‘aláwa afsos! tujh par afsos!
24
Tú ne apne liye gumbad banáyá, aur har ek bázár meṉ úṉchá maqam taiyár kiyá:
25
tú ne ráste ke har kone par apná úṉchá maqám ta‘mír kiyá, aur apní ḳhúbsúratí ko nafratangez kiyá; aur har ek rahguzar ke liye apne páṉw pasáre, aur badkárí meṉ taraqqí kí.
26
Aur tú ne ahl i Misr apne paṛausiyoṉ se jo baṛe qadáwar haiṉ, badkárí kí, aur apní badkárí kí kasrat se mujhe g̣azabnák kiyá.
27
Pas dekh, maiṉ ne apná háth tujh par chaláyá, aur tere wazífa ko kam kar diyá, aur tujhe terí badḳhwáh Filistíoṉ kí beṭiyoṉ ke qábú meṉ kar diyá, jo terí ḳharab rawish se sharminda hotí thíṉ.
28
Phir tú ne ahl i Asúr se badkárí kí, kyúṉki tú ser na ho saktí thí; háṉ, tú ne un se bhí badkárí kí, par taubhí tú ásúda na húí.
29
Aur tú ne mulk i Kan‘án se Kasdíoṉ ke mulk tak apní badkárí ko phailáyá, lekin is se bhí ser na húí.
30
Ḳhudáwand Ḳhudá farmátá hai, Terá dil kaisá beiḳhtiyár hai, ki tú yih sab kuchh kartí hai jo belagám fáhisha ‘aurat ká kám hai;
31
is liye ki tú har ek saṛak ke sire par apná gumbad banátí hai, aur har ek bázár meṉ apná úṉchá maqám taiyár kartí hai; aur tú kasbí kí mánind nahíṉ, kyúṉki tú ujrat lená haqír jántí hai;
32
balkí badkár bíwí kí mánind hai, jo apne shauhar ke ‘iwaz g̣airoṉ ko qubúl kartí hai.
33
Log sab kasbíoṉ ko hadye dete haiṉ, par tú apne yároṉ ko hadye aur tuhfe detí hai, táki wuh chároṉ taraf se tere pás áeṉ, aur tere sáth badkárí kareṉ.
34
Aur tú badkárí meṉ âur ‘auratoṉ kí mánind nahíṉ, kyúṉki badkárí ke liye tere píchhe koí nahíṉ átá; tú ujrat nahíṉ letí, balki ḳhud ujrat detí hai: pas tú anokhí hai.
35
Is liye, ai badkár, tú Ḳhudáwand ká kalám sun:
36
Ḳhudáwand Ḳhudá yúṉ farmátá hai, ki Chúṉki terí nápákí bah niklí, aur terí barahnagí terí badkárí ke bá‘is, jo tú ne apne yároṉ se kí, aur tere sab nafratí butoṉ ke sabab se, aur tere bachchoṉ ke ḳhún ke sabab se, jo tú ne un ke áge guzráná, záhir ho gayí;
37
is liye, dekh, maiṉ tere sab yároṉ ko, jin ko tú lazíz thí, aur un sab ko, jin ko tú cháhtí thí, aur un sab ko jin se tú kína rakhtí hai, jama‘ karúṉgá; maiṉ un ko chároṉ taraf se terí muḳhálafat par faráham karúṉgá, aur un ke áge terí barahnagí khol dúṉgá, táki wuh terí tamám barahnagí dekheṉ.
38
Aur maiṉ terí aisí ‘adálat karúṉgá, jaisí bewafá aur ḳhúní bíwí kí; aur maiṉ g̣azab aur g̣airat kí maut tujh par láúṉgá.
39
Aur maiṉ tujhe un ke hawále kar dúṉgá, aur wuh tere gumbad, aur úṉche maqámoṉ ko mismár kareṉge, tere kapṛe utáreṉge, aur tere ḳhushnumá zewar chhín leṉge, aur tujhe naṉgí aur barahna chhoṛ jáeṉge.
40
Aur wuh tujh par ek hujúm chaṛhá láeṉge, aur tujhe saṉgsár kareṉge, aur apní talwároṉ se tujhe chhed ḍáleṉge.
41
Aur wuh tere ghar ág se jaláeṉge, aur bahut sí ‘auratoṉ ke sámne tujhe sazá deṉge: aur maiṉ tujhe badkárí se rok dúṉgá, aur tú phir ujrat na degí.
42
Tab merá qahr tujh par dhímá ho jáegá, aur merí g̣airat tujh se játí rahegí, aur maiṉ taskín páúṉgá, aur phir g̣azabnák na húṉgá.
43
Chúṉki tú ne apne bachpan ke dinoṉ ko yád na kiyá, aur in sab bátoṉ se mujh ko afroḳhta kiyá, is liye Ḳhudáwand Ḳhudá farmátá hai, Dekh, maiṉ terí badráhí ká natíja tere sir par láúṉgá: aur tú áge ko apne sab ghinaune kámoṉ ke ‘aláwa aisí badzátí nahíṉ kar sakegí.
44
Dekh, sab masal kahnewále terí bábat yih masal kaheṉge, ki Jaisí máṉ waisí beṭí.
45
Tú apní us máṉ kí beṭí hai, jo apne shauhar aur apne bachchoṉ se ghin khátí thí; aur tú apní un bahinoṉ kí bahin hai, jo apne shauharoṉ aur apne bachchoṉ se nafrat rakhtí thíṉ: terí máṉ Hittí, aur terá báp Amorí thá.
46
Aur terí baṛí bahin Sámariya hai, jo terí báíṉ taraf rahtí hai, wuh aur us kí beṭiyáṉ; aur terí chhoṭí bahin, jo terí dahiní taraf rahtí hai, Sadúm aur us kí beṭiyáṉ haiṉ.
47
Lekin tú faqat un kí ráh par nahíṉ chalí; aur sirf un hí ke se ghinaune kám nahíṉ kiye; kyúṉki yih to goyá chhoṭí bát thí; balki tú apní tamám rawishoṉ meṉ un se badtar ho gayí.
48
Ḳhudáwand Ḳhudá farmátá hai, Mujhe apní hayát kí qasam ki terí bahin Sadúm ne aisá nahíṉ kiyá, na us ne na us kí beṭiyoṉ ne, jaisá tú ne, aur terí beṭiyoṉ ne kiyá hai.
49
Dekh, terí bahin Sadúm kí taqsír yih thí; g̣urúr, aur roṭí kí serí, aur ráhat kí kasrat us meṉ aur us kí beṭiyoṉ meṉ thí; us ne g̣aríb aur muhtáj kí dastgírí na kí.
50
Aur wuh mutakabbir thíṉ, aur unhoṉ ne mere huzúr ghinaune kám kiye; is liye jab maiṉ ne dekhá, to un ko ukháṛ pheṉká.
51
Aur Sámariya ne tere gunáhoṉ ke ádhe bhí nahíṉ kiye; tú ne un kí nisbat apní makrúhát ko firáwán kiyá hai, aur tú ne apní in makrúhát se apní bahinoṉ ko bequsúr ṭhahráyá hai.
52
Pas tú áp jo apní bahinoṉ ko mujrim ṭhahrátí hai in gunáhoṉ ke sabab se jo tú ne kiye, jo un ke gunáhoṉ se ziyáda nafratangez haiṉ, malámat uṭhá: wuh tujh se ziyáda bequsúr haiṉ: pas tú bhí ruswá ho, aur sharm khá, kyúṉki tú ne apní bahinoṉ ko bequsúr ṭhahráyá hai.
53
Aur maiṉ un kí asírí ko badal dúṉgá, ya‘ní Sadúm aur us kí beṭiyoṉ kí asírí ko, aur Sámariya aur us kí beṭiyoṉ kí asírí ko, aur un ke darmiyán tere asíroṉ kí asírí ko
54
táki tú apní ruswáí uṭháe, aur apne sab kámoṉ se pashemán ho, kyúṉki tú un ke liye tasallí ká bá‘is hai.
55
Aur terí bahineṉ, Sadúm aur Sámariya apní apní beṭiyoṉ samet apní pahlí hálat par bahál ho jáeṉgí, aur tú aur terí beṭiyáṉ apní pahlí hálat par bahál ho jáogí.
56
Tú apne ghamanḍ ke dinoṉ meṉ apní bahin Sadúm ká nám tak zabán par na látí thí;
57
us se peshtar, ki terí sharárat fásh húí, jab Arám kí beṭiyoṉ ne aur un sab ne jo un ke ás pás thíṉ tujhe malámat kí, aur Filistíoṉ kí beṭiyoṉ ne chároṉ taraf se terí tahqír kí.
58
Ḳhudáwand farmátá hai, Tú ne apní badzátí aur ghinaune kámoṉ kí sazá páí.
59
Kyúṉki Ḳhudáwand Ḳhudá yúṉ farmátá hai, ki Maiṉ tujh se, jaisá tú ne kiyá, waisá hí sulúk karúṉgá, is liye ki tú ne qasam ko haqír jáná, aur ‘ahdshikaní kí.
60
Lekin maiṉ apne us ‘ahd ko, jo maiṉ ne terí jawání ke aiyám meṉ tere sáth báṉdhá, yád rakkhúṉgá, aur hamesha ká ‘ahd tere sáth qáim karúṉgá.
61
Aur jab tú apní baṛí aur chhoṭí bahinoṉ ko qubúl karegí, tab tú apní ráhoṉ ko yád karke pashemán hogí; aur maiṉ un ko tujhe dúṉgá, ki terí beṭiyáṉ hoṉ, lekin yih tere ‘ahd ke mutábiq nahíṉ.
62
Aur maiṉ apná ‘ahd tere sáth qáim karúṉgá; aur tú jánegí ki Ḳhudáwand maiṉ húṉ;
63
táki tú yád kare, aur pashemán ho, aur sharm ke máre phir kabhí muṉh na khole, jab ki maiṉ sab kuchh jo tú ne kiyá hai mu‘áf kar dúṉ, Ḳhudáwand Ḳhudá farmátá hai.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48