Proverbs 13

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 12 Jump to: Chapter 14 →

1Dánishmand beṭá apne báp kí ta‘lím ko suntá hai: Lekin ṭhaṭṭhebáz sarzanish par kán nahíṉ lagátá.

2Ádmí apne kalám ke phal se achchhá kháegá: Lekin dag̣ábázoṉ kí ján ke liye sitam hai.

3Apne muṉh kí nigahbání karnewálá apní ján kí hifázat kartá hai: Lekin jo apne hoṉṭh pasártá hai halák hogá.

4Sust ádmí árzú kartá hai par kuchh nahíṉ pátá: Lekin mihnatí kí ján farbih hogí.

5Sádiq ko jhúṭh se nafrat hai: Lekin sharír nafratangez o ruswá hotá hai.

6Sadáqat rástrau kí hifázat kartí hai: Lekin sharárat sharír ko girá detí hai.

7Koí apne áp ko daulatmand jatátá hai lekin nádár hai: Aur koí apne áp ko kaṉgál batátá hai par baṛá maldár hai.

8Ádmí kí ján ká kaffára us ká mál hai: Par kaṉgál dhamkí ko nahíṉ suntá.

9Sádiqoṉ ká chirág̣ raushan rahegá: Lekin sharíroṉ ká diyá bujháyá jáegá.

10Takabbur se sirf jhagṛá paidá hotá hai: Lekin mashwaratpasand ke sáth hikmat hai.

11Jo daulat batálat se hásil kí jáe kam ho jáegí: Lekin mihnat se jama‘ karnewále kí daulat baṛhtí rahegí.

12Ummed ke bar áne meṉ táḳhír dil ko bímár kartí hai: Par árzú ká púrá honá zindagí ká daraḳht hai.

13Jo kalám kí tahqír kartá hai apne áp par halákat látá hai: Par jo farmán se ḍartá hai ajr páegá.

14Dánishmand kí ta‘lím hayát ká chashma hai, Jo maut ke phandoṉ se chhuṭkáre ká bá‘is ho.

15Fahm kí durustí maqbúlíyat baḳhshtí hai: Lekin dag̣ábázoṉ kí ráh kaṭhan hai.

16Har ek hoshyár ádmí dánáí se kám kartá hai: Par ahmaq apní hamáqat ko phailá detá hai.

17Sharír qásid balá meṉ giriftár hotá hai: Par diyánatdár elchí sihhatbaḳhsh hai.

18Tarbiyat ko radd karnewálá kaṉgál aur ruswá hogá: Par wuh jo tambíh ká liház rakhtá hai ‘izzat páegá.

19Jab murád bar átí hai, tab jí bahut ḳhush hotá hai: Par badí ko tark karne se ahmaq ko nafrat hai.

20Wuh jo dánáoṉ ke sáth chaltá hai dáná hogá: Par ahmaqoṉ ká sáthí halák kiyá jáegá.

21Badí gunahgároṉ ká píchhá kartí hai: Par sádiqoṉ ko nek jazá milegí.

22Nek ádmí apne potoṉ ke liye mírás chhoṛtá hai: Par gunahgár kí daulat sádiqoṉ ke liye faráham kí játí hai.

23Kaṉgáloṉ kí khetí meṉ bahut ḳhurák hotí hai: Par aise log bhí haiṉ jo beinsáfí se barbád ho játe haiṉ.

24Wuh jo apní chhaṛí ko báz rakhtá hai apne beṭe se kína rakhtá hai: Par wuh jo us se mahabbat rakhtá hai har waqt us ko tambíh kartá hai.

25Sádiq khákar ser ho játá hai: Par sharír ká peṭ nahíṉ bhartá.

← Chapter 12 Jump to: Chapter 14 →