Proverbs 14

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 13 Jump to: Chapter 15 →

1Dáná ‘aurat apná ghar banátí hai: Par ahmaq use apne hí háthoṉ se barbád kartí hai.

2Rástrau Ḳhudáwand se ḍartá hai: Par kajrau us kí hiqárat kartá hai.

3Ahmaq meṉ se g̣urúr phúṭ nikaltá hai: Par dánishmandoṉ ke lab un kí nigahbání karte haiṉ.

4Jaháṉ bail nahíṉ waháṉ charní sáf hai: Lekin g̣alle kí afzáish bail ke zor se hai.

5Diyánatdár gawáh jhúṭh nahíṉ boltá: Lekin jhúṭhá gawáh jhúṭhí báteṉ bayán kartá hai.

6Ṭhaṭṭhebáz hikmat kí talásh kartá hai aur nahíṉ pátá: Lekin sáhib i fahm ko ‘ilm ásání se hásil hotá hai.

7Ahmaq se kanára kar, Kyúṉki tú us meṉ ‘ilm kí báteṉ nahíṉ páegá.

8Hoshyár kí hikmat yih hai ki apní ráh pahcháne: Lekin ahmaqoṉ kí hamáqat dhoká hai.

9Ahmaq gunáh karke haṉste haiṉ: Par rástkároṉ meṉ razámandí hai.

10Apní talḳhí ko dil hí ḳhúb jántá hai: Aur begána us kí ḳhushí meṉ daḳhl nahíṉ rakhtá.

11Sharír ká ghar barbád ho jáegá: Par rást ádmí ká ḳhaima ábád rahegá.

12Aisí ráh bhí hai jo insán ko sídhí ma‘lúm hotí hai: Par us kí intihá meṉ maut kí ráheṉ haiṉ.

13Haṉsne meṉ bhí dil g̣amgín hai: Aur shádmání ká anjám g̣am hai.

14Bargashta dil apní rawish ká ajr pátá hai: Aur nek ádmí apne kám ká.

15Nádán har bát ká yaqín kar letá hai: Lekin hoshyár ádmí apní rawish ko dekhtá bháltá hai.

16Dáná ḍartá hai aur badí se alag rahtá hai: Par ahmaq jhunjhlátá hai aur bebák rahtá hai.

17Zúdranj bewuqúfí kartá hai: Aur bure mansúbe báṉdhnewálá ghinauná hai.

18Nádán hamáqat kí mírás páte haiṉ: Par hoshyároṉ ke sir par ‘ilm ká táj hai.

19Sharír nekoṉ ke sámne jhukte haiṉ, Aur ḳhabís sádiqoṉ ke darwázoṉ par.

20Kaṉgál se us ká hamsáya bhí bezár hai; Par máldár ke dost bahut haiṉ.

21Apne hamsáye ko haqír jánnewálá gunáh kartá hai: Lekin kaṉgál par rahm karnewálá mubárak hai.

22Kyá badí ke mújid gumráh nahíṉ hote? Aur shafaqat aur sachcháí nekí ke mújid ke liye haiṉ.

23Har tarah kí mihnat meṉ nafa‘ hai: Par muṉh kí bátoṉ meṉ mahz muhtájí hai.

24Dánáoṉ ká táj un kí daulat hai: Par ahmaqoṉ kí hamáqat hamáqat hí hai.

25Sachchá gawáh ján bachánewálá hai: Par darog̣go dag̣ábází kartá hai.

26Ḳhudáwand ke ḳhauf meṉ qawí ummed hai, Aur us ke farzandoṉ ko panáh kí jagah miltí hai.

27Ḳhudáwand ká ḳhauf hayát ká chashma hai, Jo maut ke phandoṉ se chhuṭkáre ká bá‘is hai.

28Ra‘áyá kí kasrat meṉ bádsháh kí shán hai: Par logoṉ kí kamí meṉ hákim kí tabáhí hai.

29Jo qahr karne meṉ dhímá hai baṛá ‘aqlmand hai: Par wuh jo jhakkí hai hamáqat ko baṛhátá hai.

30Mutma‘inn dil jism kí ján hai: Lekin hasad haḍḍiyoṉ kí bosídagí hai.

31Miskín par zulm karnewálá us ke ḳháliq kí ihánat kartá hai: Lekin us kí ta‘zím karnewálá muhtájoṉ par rahm kartá hai.

32Sharír apní sharárat meṉ past kiyá játá hai: Lekin sádiq marne par bhí ummedwár hai.

33Hikmat ‘aqlmand ke dil meṉ qáim rahtí hai: Par ahmaqoṉ ká dilí ráz fásh ho játá hai.

34Sadáqat qaum ko sarfarází baḳhshtí hai: Par gunáh se ummatoṉ kí ruswáí hai.

35‘Aqlmand ḳhádim par bádsháh kí nazar i ‘ináyat hai: Par us ká qahr us par hai jo ruswáí ká bá‘is hai.

← Chapter 13 Jump to: Chapter 15 →