Proverbs 17

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 16 Jump to: Chapter 18 →

1Salámatí ke sáth ḳhushk nawála is se bihtar hai Ki ghar ni‘mat se pur ho, aur us ke sáth jhagṛá ho.

2‘Aqlmand naukar us beṭe par jo ruswá kartá hai hukmrán hogá; Aur bháiyoṉ meṉ shámil hokar mírás ká hissa legá.

3Chándí ke liye kuṭhálí hai aur sone ke liye bhaṭṭí: Par diloṉ ko Ḳhudáwand parakhtá hai.

4Badkirdár jhúṭhe laboṉ kí suntá hai, Aur darog̣go mufsid zabán ká shanawá hotá hai.

5Miskín par haṉsnewálá us ke ḳháliq kí ihánat kartá hai: Aur jo auroṉ kí musíbat se ḳhush hotá hai besazá na chhúṭegá.

6Beṭoṉ ke beṭe búṛhoṉ ke liye táj haiṉ: Aur beṭoṉ ke faḳhr ká bá‘is un ke bápdádá haiṉ.

7Ḳhushgoí ahmaq ko nahíṉ sajtí: To kis qadr kam darog̣goí sharíf ko sajegí.

8Rishwat jis ke háth meṉ hai us kí nazar meṉ giráṉbahá jauhar hai; Aur wuh jidhar tawwajuh kartá hai kámyáb hotá hai.

9Jo ḳhatáposhí kartá hai dostí ká joyán hai: Par jo aisí bát ko bár bár chheṛtá hai dostoṉ meṉ judáí ḍáltá hai.

10Sáhib i fahm par ek jhiṛkí Ahmaq par sau koṛoṉ se ziyáda asar kartí hai.

11Sharír mahz sarkashí ká joyán hai, Us ke muqábale meṉ saṉgdil qásid bhejá jáegá.

12Jis ríchhní ke bachche pakṛe gaye hoṉ ádmí ká us se dochár honá Is se bihtar hai ki ahmaq kí hamáqat meṉ us ke sámne áe.

13Jo nekí ke badle meṉ badí kartá hai, Us ke ghar se badí hargiz judá na hogí.

14Jhagṛe ká shurú‘ pání ke phúṭ nikalne kí mánind hai; Is liye laṛáí se pahle jhagṛe ko chhoṛ do

15Jo sharír ko sádiq aur jo sádiq ko sharír ṭhahrátá hai, Ḳhudáwand ko un donoṉ se nafrat hai.

16Hikmat ḳharídne ko ahmaq ke háth meṉ qímat se kyá fáida hai, Háláṉki us ká dil us kí taraf nahíṉ?

17Dost har waqt mahabbat dikhátá hai, Aur bháí musíbat ke din ke liye paidá húá hai.

18Be‘aql ádmí háth par háth mártá hai, Aur apne hamsáye ke rúbarú zámin hotá hai.

19Fasádpasand ḳhatápasand hai, Aur apne darwáze ko baland karnewálá halákat ká tálib.

20Kajdilá bhaláí ko na dekhegá: Aur jis kí zabán kajgo hai musíbat meṉ paṛegá.

21Bewuqúf ke wálid ke liye g̣am hai; Kyúṉki ahmaq ke báp ko ḳhushí nahíṉ.

22Shádmán dil shifá baḳhshtá hai: Lekin afsurdadilí haḍḍiyoṉ ko ḳhushk kar detí hai.

23Sharír bag̣al meṉ rishwat rakh letá hai, Táki ‘adálat kí ráheṉ bigáṛe.

24Hikmat sáhib i fahm ke rúbarú hai: Lekin ahmaq kí áṉkheṉ zamín ke kanároṉ par lagí haiṉ.

25Ahmaq beṭá apne báp ke liye g̣am Aur apní máṉ ke liye talḳhí hai.

26Sádiq ko sazá dená Aur sharífoṉ ko un kí rástí ke sabab se márná ḳhúb nahíṉ.

27Sáhib i ‘ilm kamgo hai: Aur sáhib i fahm matín hai.

28Ahmaq bhí jab tak ḳhámosh hai ‘aqlmand giná játá hai: Jo apne lab band rakhtá hai hoshyár hai.

← Chapter 16 Jump to: Chapter 18 →