Proverbs 25

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 24 Jump to: Chapter 26 →

1Yih bhí Sulaimán kí amsál haiṉ, jin kí sháh i Yahúdáh Hizqiyáh ke logoṉ ne naql kí thí.

2Ḳhudá ká jalál rázdárí meṉ hai: Lekin bádsháhoṉ ká jalál mu‘ámalát kí taftísh meṉ.

3Ásmán kí úṉcháí aur zamín kí gahráí, Aur bádsháhoṉ ke dil kí intihá nahíṉ miltí.

4Chándí kí mail dúr karne se, Sunár ke liye bartan ban játá hai.

5Sharíroṉ ko bádsháh ke huzúr se dúr karne se, Us ká taḳht sadáqat par qáim ho jáegá.

6Bádsháh ke huzúr apní baṛáí na karná; Aur baṛe ádmíoṉ kí jagah khaṛá na honá.

7Kyúṉki yih bihtar hai ki hákim ke rúbarú, Jis ko terí áṉkheṉ ne dekhá hai, Tujh se kahá jáe, Áge baṛhkar baiṭh, Na ki tú píchhe haṭá diyá jáe.

8Jhagṛá karne meṉ jaldí na kar, Áḳhir kár jab terá hamsáya tujh ko zalíl kare, Tab tú kyá karegá?

9Tú hamsáye ke sáth apne da‘we ká charchá kar, Lekin kisí dúsre ká ráz fásh na kar;

10Mabádá jo koí use sune tujhe ruswá kare, Aur terí badnámí hotí rahe.

11Bámauqa‘ báteṉ Rupahlí ṭokriyoṉ meṉ sone ke seb haiṉ.

12Dáná malámat karnewále kí bát Sunnewále ke kán meṉ sone kí bálí aur kundan ká zewar hai.

13Wafádár elchí apne bhejnewáloṉ ke liye Aisá hai jaise fasl káṭne ke aiyám meṉ barf kí ṭhanḍak; Kyúṉki wuh apne málikoṉ kí ján ko tázadam kartá hai.

14Jo kisí jhúṭhí liyáqat par faḳhr kartá hai, Wuh bebárish bádal aur hawá kí mánind hai.

15Tahammul karne se hákim rází ho játá hai; Aur narm zabán haḍḍí ko bhí toṛ ḍáltí hai.

16Kyá tú ne shahd páyá? tú itná khá jitná tere liye káfí hai; Mabádá tú ziyáda khá jáe aur use ugal ḍále.

17Apne hamsáye ke ghar bár bár jáne se apne páṉwoṉ ko rok; Mabádá wuh diqq hokar tujh se nafrat kare.

18Jo apne hamsáye ke ḳhiláf jhúṭhí gawáhí detá hai, Wuh gurz aur talwár aur tez tír hai.

19Musíbat ke waqt bewafá ádmí par i‘timád Ṭúṭá dáṉt aur ukhṛá páṉw hai.

20Jo kisí g̣amgín ke sámne gít gátá nai, Wuh goyá jáṛe meṉ kisí ke kapṛe utártá, aur sajjí par sirka ḍáltá hai.

21Agar terá dushman bhúká ho, to use roṭí khilá; Aur agar wuh piyásá ho, to use pání pilá;

22Kyúṉki tú us ke sir par angároṉ ká ḍher lagáegá, Aur Ḳhudáwand tujh ko ajr degá.

23Shimálí hawá meṉh ko látí hai: Aur g̣íbatgo zabán turshrúí ko.

24Ghar kí chhat par ek kone meṉ rahná, Jhagṛálú bíwí ke sáth kusháda makán meṉ rahne se bihtar hai.

25Wuh ḳhushḳhabarí jo dúr ke mulk se áe, Aisí hai jaise thake mánde kí ján ke liye ṭhanḍá pání.

26Sádiq ká sharír ke áge girná, Goyá gadlá chashma aur nápák sotá hai.

27Bahut shahd kháná achchhá nahíṉ, Aur apní buzurgí ká tálib honá zebá nahíṉ hai.

28Jo apne nafs par zábit nahíṉ, Wuh befasíl aur mismárshuda shahr kí mánind hai.

← Chapter 24 Jump to: Chapter 26 →