Proverbs 24

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 23 Jump to: Chapter 25 →

1Tú sharíroṉ par rashk na karná, Aur un kí suhbat kí ḳhwáhish na rakhná.

2Kyúṉki un ke dil zulm kí fikr karte haiṉ, Aur un ke lab sharárat ká charchá.

3Hikmat se ghar ta‘mír kiyá játá hai; Aur fahm se us ko qiyám hotá hai.

4Aur ‘ilm ke wasíle se koṭhriyáṉ Nafís o latíf mál se ma‘múr kí játí haiṉ.

5Dáná ádmí zoráwar hai; Balki sáhib i ‘ilm ká zor baṛhtá rahtá hai.

6Kyúṉki tú nek saláh lekar jang kar saktá hai; Aur saláhkároṉ kí kasrat meṉ salámatí hai.

7Hikmat ahmaq ke liye bahut baland hai; Wuh pháṭak par muṉh nahíṉ khol saktá.

8Jo badí ke mansúbe báṉdhtá hai, Fitnaangez kahláegá.

9Hamáqat ká mansúba bhí gunáh hai; Aur ṭhaṭṭhá karnewále se logoṉ ko nafrat hai.

10Agar tú musíbat ke din bedil ho jáe, To terí táqat bahut kam hai.

11Jo qatl ke liye ghasíṭe játe haiṉ, un ko chhuṛá; Jo máre jáne ko haiṉ, un ko hawála na kar.

12Agar tú kahe, Dekho, ham ko yih ma‘lúm na thá, To kyá diloṉ ko jáṉchnewálá yih nahíṉ samajhtá? Aur kyá terí ján ká nigahbán yih nahíṉ jántá? Aur kyá wuh har shaḳhs ko us ke kám ke mutábiq ajr na degá?

13Ai mere beṭe, tú shahd khá, kyúṉki wuh achchhá hai; Aur shahd ká chhattá bhí, kyúṉki wuh tujhe míṭhá lagtá hai:

14Hikmat bhí terí ján ke liye aisí hí hogí; Agar wuh tujhe mil jáe to tere liye ajr hogá, Aur terí ás nahíṉ ṭúṭegí.

15Ai sharír, tú sádiq ke ghar kí ghát meṉ na baiṭhná: Us kí árámgáh ko g̣árat na karná.

16Kyúṉki sádiq sát bár girtá hai, aur phir uṭh khaṛá hotá hai: Lekin sharír balá meṉ girkar paṛá hí rahtá hai.

17Jab terá dushman gir paṛe, to ḳhushí na karná: Aur jab wuh pichháṛ kháe, to dilshád na honá.

18Mabádá Ḳhudáwand ise dekhkar náráz ho, Aur apná qahr us par se uṭhá le.

19Tú badkirdároṉ ke sabab se bezár na ho; Aur sharíroṉ par rashk na kar.

20Kyúṉki badkirdár ke liye kuchh ajr nahíṉ; Sharíroṉ ká chirág̣ bujhá diyá jáegá.

21Ai mere beṭe, Ḳhudáwand se aur bádsháh se ḍar: Aur mufsidoṉ ke sáth suhbat na rakh:

22Kyúṉki un par nágahán áfat áegí, Aur un donoṉ kí taraf se ánewálí halákat ko kaun jántá hai?

23Yih bhí dánáoṉ ke aqwál haiṉ. ‘Adálat meṉ tarafdárí karná achchhá nahíṉ.

24Jo sharír se kahtá hai, Tú sádiq hai, Log us par la‘nat kareṉge, aur ummateṉ us se nafrat rakkheṉgí.

25Lekin jo us ko ḍáṉṭte haiṉ ḳhush hoṉge, Aur un ko baṛí barakat milegí.

26Jo haqq bát kahtá hai, Laboṉ par bosá detá hai.

27Apná kám báhar taiyár kar, Use apne liye khet meṉ durust kar le, Aur us ke ba‘d apná ghar baná.

28Besabab apne hamsáye ke ḳhiláf gawáhí na dená, Aur apne laboṉ se fareb na dená.

29Yúṉ na kah, Maiṉ us se waisá hí karúṉgá jaisá us ne mujh se kiyá; Maiṉ us ádmí se us ke kám ke mutábiq sulúk karúṉgá.

30Maiṉ káhil ke khet aur be‘aql ke tákistán Ke pás se guzrá;

31Aur dekho, wuh sab ká sab káṉṭoṉ se bhará thá, Aur bichchhúbúṭí se ḍhaká thá, Aur us kí saṉgín díwár giráí gayí thí.

32Tab maiṉ ne dekhá, aur us par ḳhúb g̣aur kiyá: Háṉ, maiṉ ne us par nigáh kí, aur ‘ibrat páí.

33Thoṛí sí níṉd, ek âur jhapkí, Zará paṛe rahne ko háth par háth:

34Isí tarah terí muflisí ráhzan kí tarah, Aur terí tangdastí musallah ádmí kí tarah á paṛegí.

← Chapter 23 Jump to: Chapter 25 →