Proverbs 16

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 15 Jump to: Chapter 17 →

1Dil kí tadbíreṉ insán se haiṉ: Lekin zabán ká jawáb Ḳhudáwand kí taraf se hai.

2Insán kí nazar meṉ us kí sab rawisheṉ pák haiṉ: Lekin Ḳhudáwand rúhoṉ ko jáṉchtá hai.

3Apne sab kám Ḳhudáwand par chhoṛ de, To tere iráde qáim raheṉge.

4Ḳhudáwand ne har ek chíz ḳháss maqsad ke liye banáí; Háṉ, sharíroṉ ko bhí us ne bure din ke liye banáyá.

5Har ek se jis ke dil meṉ g̣urúr hai Ḳhudáwand ko nafrat hai: Yaqínan wuh besazá na chhúṭegá.

6Shafaqat aur sachcháí se badí ká kaffára hotá hai: Aur log Ḳhudáwand ke ḳhauf ke sabab se badí se báz áte haiṉ.

7Jab insán kí rawisheṉ Ḳhudáwand ko pasand átí haiṉ, To wuh us ke dushmanoṉ ko bhí us ke dost banátá hai.

8Sadáqat ke sáth thoṛá sá mál Beinsáfí kí baṛí ámadaní se bihtar hai.

9Ádmí ká dil apní ráh ṭhahrátá hai: Par Ḳhudáwand us ke qadamoṉ kí rahnumáí kartá hai.

10Kalám i rabbání bádsháh ke laboṉ se nikaltá hai, Aur us ká muṉh ‘adálat karne meṉ ḳhatá nahíṉ kartá.

11Ṭhík tarázú aur palṛe Ḳhudáwand ke haiṉ: Thailí ke sab báṭ us ká kám haiṉ.

12Sharárat karne se bádsháhoṉ ko nafrat hai; Kyúṉki taḳht kí páedárí sadáqat se hai.

13Sádiq lab bádsháhoṉ kí ḳhushnúdí haiṉ, Aur wuh sach bolnewáloṉ ko dost rakhte haiṉ.

14Bádsháh ká qahr maut ká qásid hai: Par dáná ádmí use ṭhanḍá kartá hai.

15Bádsháh ke chihre ke núr meṉ zindagí hai, Aur us kí nazar i ‘ináyat áḳhirí barsát ke bádal kí mánind hai.

16Hikmat ká husúl sone se bahut bihtar hai: Aur fahm ká husúl chándí se bahut pasandída hai.

17Rástkár ádmí kí sháhráh yih hai ki badí se bháge: Aur apní ráh ká nigahbán apní ján kí hifázat kartá hai.

18Halákat se pahle takabbur, Aur zawál se pahle ḳhudbíní.

19Miskínoṉ ke sáth firotan banná, Mutakabbiroṉ ke sáth lúṭ ká mál taqsím karne se bihtar hai.

20Jo kalám par tawajjuh kartá hai bhaláí dekhegá: Aur jis ká tawakkul Ḳhudáwand par hai mubárak hai.

21Dáná dil hoshyár kahláegá: Aur shírín zabání se ‘ilm ki firáwání hotí hai.

22‘Aqlmand ke liye ‘aql hayát ká chashma hai: Par ahmaqoṉ kí tarbiyat hamáqat hai.

23Dáná ká dil us ke muṉh kí tarbiyat kartá hai, Aur us ke laboṉ ko ‘ilm baḳhshtá hai.

24Dilpasand báteṉ shahd ká chhattá haiṉ, Wuh jí ko míṭhí lagtí haiṉ, aur haḍḍiyoṉ ke liye shifá haiṉ.

25Aisí ráh bhí hai jo insán ko sídhí ma‘lúm hotí hai, Par us kí intihá meṉ maut kí ráheṉ haiṉ.

26Mihnat karnewále kí ḳhwáhish us se kám karátí hai, Kyúṉki us ká peṭ us ko ubhártá hai.

27Ḳhabís ádmí sharárat ko khodkar nikáltá hai, Aur us ke laboṉ meṉ goyá jalánewálí ág hai.

28Kajrau ádmí fitnaangez hai: Aur g̣íbat karnewálá dostoṉ meṉ judáí ḍáltá hai.

29Tundḳho ádmí apne hamsáye ko warg̣alátá hai, Aur us ko burí ráh par le játá hai.

30Áṉkh márnewálá kají íjád kartá hai: Aur lab chabánewálá fasád barpá kartá hai.

31Safed sir shaukat ká táj hai, Wuh sadáqat kí ráh par páyá jáegá.

32Jo qahr karne meṉ dhímá hai pahlawán se bihtar hai: Aur wuh jo apní rúh par zábit hai us se jo shahr ko le letá hai.

33Qur‘a god meṉ ḍálá játá hai, Par us ká sárá intizám Ḳhudáwand kí taraf se hai.

← Chapter 15 Jump to: Chapter 17 →