Proverbs 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Ai mere beṭe, merí hikmat par tawajjuh kar, Mere fahm par kán lagá:

2Táki tú tamíz ko mahfúz rakkhe, Aur tere lab ‘ilm ke nigahbán hoṉ.

3Kyúṉki begána ‘aurat ke hoṉṭhoṉ se shahd ṭapaktá hai, Aur us ká muṉh tel se ziyáda chikná hai:

4Par us ká anjám nágdaune kí mánind talḳh, Aur dodhárí talwár kí mánind tez hai.

5Us ke páṉw maut kí taraf játe haiṉ; Us ke qadam pátál tak pahuṉchte haiṉ;

6So use zindagí ká hamwár rásta nahíṉ miltá; Us kí ráheṉ beṭhikáná haiṉ, par wuh beḳhabar hai.

7Is liye, ai mere beṭo, merí suno, Aur mere muṉh kí bátoṉ se bargashta na ho.

8Us ‘aurat se apní ráh dúr rakh, Aur us ke ghar ke darwáze ke pás bhí na já:

9Aisá na ho ki tú apní ábrú kisí g̣air ke, Aur apní ‘umr berahm ke hawále kare:

10Aisá na ho ki begáne terí quwwat se ser hoṉ; Aur terí kamáí kisí g̣air ke ghar jáe;

11Aur jab terá gosht aur terá jism ghul jáeṉ, To tú apne anjám par nauha kare,

12Aur kahe, Maiṉ ne tarbiyat se kaisí ‘adáwat rakkhí, Aur mere dil ne malámat ko haqír jáná;

13Na maiṉ ne apne ustádoṉ ká kahá máná, Na apne tarbiyat karnewáloṉ kí suní.

14Maiṉ jamá‘at aur majlis ke darmiyán Qaríban sab buráiyoṉ meṉ mubtalá húá.

15Tú pání apne hí hauz se, Aur bahtá pání apne hí chashme se píná.

16Kyá tere chashme báhar bah jáeṉ, Aur pání kí nadiyáṉ kúchoṉ meṉ?

17Wuh faqat tere hí liye hoṉ, Na tere sáth g̣airoṉ ke liye bhí.

18Terá sotá mubárak ho; Aur tú apní jawání kí bíwí ke sáth shád rah.

19Piyárí harní aur dilfareb g̣azál kí mánind Us kí chhátiyáṉ tujhe har waqt ásúda kareṉ; Aur us kí mahabbat tujhe hamesha farefta rakkhe.

20Ai mere beṭe, tujhe begána ‘aurat kyúṉ farefta kare, Aur tú g̣air ‘aurat se kyúṉ hamág̣osh ho?

21Kyúṉki insán kí ráheṉ Ḳhudáwand kí áṉkhoṉ ke sámne haiṉ, Aur wuhí us ke sab rástoṉ ko hamwár banátá hai.

22Sharír ko usí kí badkárí pakṛegí, Aur wuh apne hí gunáh kí rassiyoṉ se jakṛá jáegá.

23Wuh tarbiyat na páne ke sabab se mar jáegá; Aur apní saḳht hamáqat ke sabab se gumráh hogá.

← Chapter 4 Jump to: Chapter 6 →