2 Samuel 1

Zande

Jump to: Chapter 2 →

1Si ki ta du wa gere fuo kpio Saura, ho Dawidi akaraga tiko ni ngba fuo imo aAmareko, Dawidi ki raki ue ku Zikeraga yo.

2Ti biata uru, oni ngére, boro Ki ye sa bataya yo yo du Saura ni na gako roko ni sipisipi he, na sende ti riko. Ho ko aye ni koyo du Dawidi ni, ko ki ti sande, ki tumusa fu ko.

3Dawidi ki ya fu ko, “Mo naye wari?” Ko ki ya fu ko, “Mi nimerẽ rogo ga aYisaraere bataya yo.”

4Dawidi ki ya fu ko. “Mi nakpara foro, mo gúmba nga ha fere, gini pai mangi yo?” Ko ki karaga ha ki ya, “Aboro oro be vura, dungu aboro ki tiwi a ki kpiki; aSaura na wiriko nga Yonatana i kpiki a.”

5Dawidi ki ya fu gu paranga re nagumba ha fu ko, “Ini mo ho waĩ ya aSaura kpiki na wiriko nga Yonatana?”

6Gu paranga re nagumba pai fu ko ki ya, “Mi akuru ni mamu ku ri Bagangara Giriboa yo, Saura api api ngba gako baso; angbagidavura na abanduri afarasi ki nido fuo ko.

7Ho ko angere ni gii ko, ko ki bi re, ki yambu re. Mi ki karaga ha ki ya, ‘Mi du re.’

8Ko ki ya fere, ‘Da nga mo?’ Mi ki ya fu ko, ‘Boro Amareko nga mi.’

9Ko ki ya fere, ‘Mi nakpara foro, mo rú pati re, ki imi re, bambiko imisiri ngbaduse zi re; mbiko mi ni ungare kindi.’

10Si du mi aru pati ko, ki imi ko, bambiko mi aini he ni rengo ya ko abáta nga fuo ti ko te. Mi ki di gu kpakpari bakindo naadu riko yo, na gu benge naadu beko yo, ki ye na ni fu gi gbia.”

11Dawidi ki zi gako aremu tie, ki sipi he; agu aboro dunduko naadu na ko i ki mangi kina wo a.

12I ki rungo nita ngbaduyo, ki nikpari ni aume, ki nigina riahe ki da ku nyemu, tipa Saura na Yonatana nangia wiriko, na tipa ga Yekova aboro, na tipa ngbatunga aYisaraere; bambiko i aimi yo ni basape.

13Dawidi ki ya fu gu paranga naagumba ha fu ko, “Mo nidu wari?” Ko ki karaga ha ki ya, “Mi nga wiri kungba boro, nga boro Amareko.”

14Dawidi ki ya fu ko, “Tipagine mo agunde nga ti ni tipa taã bero ka gbarasa ga Yekova mbedimbedi boro ya?”

15Dawidi ki yambu paranga sa dagba aparanga yo, ki ya, “Mo mbédi na ko, ki fo ko.” Ko ki fo ko ko ki kpi.

16Dawidi ki ya fu ko, “Kurero dú kina ku ri ro; bambiko kina ngbaro gumba ha kuti ro, niya, ‘Mi imi ga Yekova mbedimbedi boro.’ ”

17Dawidi ki kpari agi akpe re tipa aSaura na wiriko nangia Yonatana.

18Ko ki gumba ha i yugu gu bia nga Mboto fu awiri aYudo; oni ngére, si ni keke he rogo gu Kitabu nga ga Yasara. Ko aya:

19“Ako Yisaraere, ga taarimo imi yo ho ri gaha tumbatumba arago! Waĩ tiwi airanyaka!

20Ka i gúmba nga pa ha ku Gata yo ya, ka i táki nga pande he ngba agene Asekerona ya; awiri aFereseto nga ade ka ngi, awiri azangayeratise nga ade ka dia sima.

21“Ako abaagangara Giriboa, ka ndomo tí nga na mai ku ri ro ya, ka aati tumbatumba agamahe dú nga yo a ya! Bambiko yo i agbarasi ga airanyaka vurakube ni gbegberẽ, gu vurakube nangia ga Saura, i ambeda nga ha ni nzeme te.

22“Gu mboto nangia ga Yonatana asa nga tihe te, ti kure agu yo i aimi yo, na ti nzeme airanyaka, gu basape nangia ga Saura si ayega nga ni ku he te.

23“ASaura na Yonatana adu ni boro wene yo ni betedi yo wa i adu ni ungayo! Rago gayo kpio i akparaka nga a te; i aniipi ki susi adingimo, i adu na ome ki susi abahu.

24“Oni nga awiri aYisaraere nga ade, oni kpári ni aume tipa Saura, nangia gu ko naaukadi roni na zamba remu wenengaĩ, nangia gu ko naamoi afongo dahabu ti gaoni aroko.

25“Waĩ tiwi airanyaka ti ngba vura! “I aimi Yonatana auru ga tumbatumba arago.

26Ako Yonatana wirinami, rago nagberã ti re tipa ro; mo angba ti re gbe ni rengo; gu nyemuse naadu ti ro fere si airiwo, ki susi gu nyemuse nga ga ade.

27“Waĩ tiwi airanyaka! aũvura ki nyasi!”

Jump to: Chapter 2 →