2 Samuel 21

Zande

← Chapter 20 Jump to: Chapter 22 →

1Were ngbongi ati ni gu rago Dawidi adu ni bakindo garã ki du biata, na garã na agarã; Dawidi ki gbata kpakpu Yekova. Yekova ki ya, “Si tipa Saura na angbatungako nga aukakure, bambiko ko aimi aGibono.”

2Si du bakindo ki yambu aGibono, ki fura na yo. Were aGibono adu nga ni ngbatunga awiri aYisaraere te, ono ni ngbatunga yangara aAmoro; zavura wa awiri aYisaraere azunga he fu yo ka batasa yo; ono Saura agbata yo ka imo yo rogo gakonyemuawiri aYisaraere na aYudo.

3Dawidi ki ya fu aGibono, “Gini pai mi ka manga fu roni? Waĩ ka mi mangi motumo dada ingapai, ya oni fu maku fu ga Yekova aboro?”

4AGibono ki ya fu ko, “A nga pa feda na dahabu du dagba rani na Saura watadu angbatungako te; si wo fu rani nga ani imi gu boro dagba aYisaraere yo a te.” Ko ki ya, “Gini pai ya oni, mi mángi he fu roni?”

5I ki ya fu bakindo, “Gu kumba nanyasi rani, ki sangi pai kuti rani, ya i ba tungarani ti yangara abangbandarago nga ga aYisaraere,

6i kúsi awiriko saba fu rani, ani ki asi yo ku ari fu Yekova Giba yo ga Saura bakporo, nga ga Yekova siasia rago.” Bakindo ki ya, “Mi afú yo.”

7Ono bakindo abatasi Mefibosete, tita Saura, ni wiri Yonatana, bambiko gu ga Yekova zungahe naadu dagba yo, dagba aDawidi na Yonatana wiri Saura.

8Ono bakindo arogo awiri Risepa ue, nga agu yo ri avungu yo fu Saura, nga Arumoni na Mefibosete; Risepa nangia wiri Aya. Bakindo ki rogo awiri Mikara bisue, agu yo ri abatika yo fu Aduriere wiri Baruzirai boro Meora. Mikara nangia wiri Saura.

9Ko ki kusi yo fu aGibono, i ki aasi yo ri bagangara yo ku bara bangiri Yekova, i ki kpiki dũ wa i adu saba. I aimi yo ti rago ke ahe, ti bambata uru, ti tonatona regbo ke zende he wa ga mapunga.

10Risepa wiri Aya ki di mbuzaroko, ki gbaragi he ri mbia ki sungu auru he, tona ti regbo ke ahe ki da ho mai ana ni angbangbaturũ ari yo; ka ri ambu nga azire ari ami ti ku auru he uru, na anya nga ga nvuo ra yuru a ya.

11I ki gumba gu pai fu Dawidi Risepa wiri Aya, badia Saura amangi.

12Dawidi ki ndu ki rogo ameme Saura na ameme Yonatana nga wiriko be aboro Yabese-girada, nga agu yo nadi he ti gene bakporo nga ga Bete-sana, yo aFereseto aasi yo ni, ni gu uru aFereseto aimi Saura Giriboa yo.

13Ko ki yega na ameme Saura yo na ameme Yonatana wiri Saura; i ki dungura ameme agu yo i aasi yo.

14I ki kpisidi ameme Saura na ameme Yonatana nangia wiriko Sera yo rogo gu ringara nga ga Benyamina du rogo ga bako murã nangia Kisi. Aboro ki mangi agu apai dunduko bakindo arugu yo na ni. Fuo gure i ki zúngadi Mbori tipa gu ringara re ko ki gi pa yo.

15AFereseto ki tona vura berewe na aYisaraere. Dawidi ki ndu koyo, na avuruko, ki so vura kuti aFereseto; Dawidi ki tona rungbura.

16Yisebi-benoba ki berẽ pa imo Dawidi, ko adu ni tita Rafa nangia gbangagbanga aboro, barõa gako baso sirigi adu wa sekere 300, ko ki vodi tiko na vovo basape.

17Ono Abisai wiri Seruya aye ka unda Dawidi, ki rũ gu Fereseto re, ki imi ko. Ga Dawidi aboro ki zunga he fu ko, ki ya, “Mo andú nga na ani sa vura berewe te, mo ka bisa ga aYisaraere we.”

18Si adu wa gere fuo gure, vura ki du berewe na aFereseto Gobó yo. Sibekai boro Usa ki imi Safa, naadu dagba atita gbangagbanga aboro.

19Vura ki du berewe na aFereseto Gobo yo; Eranana wiri Yaro-rugima boro Betereme ki imi Goriata boro Gata. Para gako baso adu wa ga abaturoko ngbongbo.

20Vura ki du berewe Gata yo, yo bagbanga kumba adu ni, naadu na awirinzagako ni ba sita ti akpata beko, na awirinduko ni ba sita ti akpete nduko a, dunduko wa 24. Tita gbangagbanga aboro nangia ko a.

21Ho ko apayasi pa aYisaraere ni, Yonatana wiri Simi unvurua Dawidi ki imi ko.

22Agi yo biama re adu ni atita gbangagbanga aboro Gata. Dawidi naavuruko ki imi yo.

← Chapter 20 Jump to: Chapter 22 →