2 Samuel 13

Zande

← Chapter 12 Jump to: Chapter 14 →

1Abisaroma nangia wiri Dawidi adu na dawiriko ni bawene de gbe, rimori angia Tamara; fuo bete rago Amanona wiri Dawidi ki nikpi nyemu ri.

2Wa Amanona adu na bakere rungo ko ki ti na kaza nyemu dawiriko nga Tamara; bambiko ri adu ni ngasu de. Si ki kpakara be Amanona ka manga pai na ri.

3Ono badia Amanona adu ho, rimoko angia Yonadaba, nangia wiri Sima unvurua Dawidi. Yonadaba adu ni kere irabirĩ.

4Ko ki ya fu ko, “Ako wiri bakindo, tipagine mo auguda ti ni na uru: ka mo gumba nga pa ha fere te?” Amanona ki ya fu ko. “Mi tigimi nakpi nyemu Tamara, nga dawiri unvuruami nga Abisaroma.”

5Yonadaba ki ya fu ko, “Mo pi ba ro barame yo, ki sa tiro wa boro kaza; ho bamo ka ye ni ka bi ro, mo yá fu ko, ‘Mi nakpara foro, dawire ye nga nga Tamara, ka fu nga kpokuta fere mi ri he, ka mbakada riahe ku bangire, mi nibi nga ha, ka ri nga ha kina be ri.’ ”

6Si Amanona api ti ni, ki sa tiko ni boro kaza. Ho bako aye m nga Dawidi ka bi ko, Amanona ki ya fu bakindo, “Mi nakpara foro, dawire ye nga nga Tamara ka manga rukutu kpokuta fere ku bangire, mi ri he kina be ri.”

7Dawidi ki kedi sunge ku kporo yo fuo Tamara, ki ya, “Mo ndú awere ku kawiro yo nga Amanona, ka manga riahe fu ko.”

8Si du Tamara ki ndu ku Amanona yo nga kawiriri. Ko api api sande. Ri ki di muramura ngungo, ki fio ho, ki mangi rukutu kpokuta ku bangiriko, ki zo ho.

9Ri ki di ngbadi, ki uka ha koyo kina ku bangiriko, ka ko ari nga ha ya. Amanona ki ya, “Oni kúsi aboro dunduko pati re.” Aboro ki kuru ku zegi yo dũ.

10Amanona ki ya fu Tamara, “Mo yé na riahe ku dimo no, mi ri nga ha kina be ro.” Tamara ki di gu rukutu kpokuta nga gu ri amangi he, ki ye na ni ku dimoyo fu Amanona nga kawiriri.

11Ono ho ri aye ni na ni mbembedi fu ko ko ri he, ko ki zi ri, ki ya fu ri, “Dawire, mo yé ka ra na mi.”

12Ri ki karaga ha fu ko ki ya, “Ai, kawire, ka mo sósodi nga re ya; bambiko ngbatunga pai wa gere arengba nga i mangi he dagba aYisaraere te; ka mo mángi nga gi pa mumungo pai re ya.

13Mi tigimi a, mi andú ku wari be gi zee? tipa ro a, mo tigamo mo adú wa kina agu airamungo du dagba aYisaraere. Si du awere, mi nakpara foro, mo gúmba ha fu bakindo; bambiko ko aká nga na mi be ro te.”

14Ono ko akpi nga nyemu ka dega tuko sa gari pai te. Ono wa ko anyaki ki susi ri, ko ki zi ri ni ome, ki ra na ri.

15Amanona ki sogo ri asoga ki susi asusa; bambiko gu ima ngbaduko ko asogo ri na ni si nasusi gu nyemuri naamanga ko. Amanona ki ya fu ri, “Mo gúari, ki ga.”

16Ono ri ki ya fu ko, “Kawire, wo te, bambiko gu gbegberẽpai nga ka kusa re, si gberẽ ki susi gu kura ha mangi mo re na ni.” Ono ko akpi nga nyemu ka dega tuko sa gari pai te.

17Ko ki yambu gu gako moyambu ninamanga sunge fu ko, ki ya, “Mo kúsi gi de re ti re ku zegi yo, ki kisi ngbadimo fuo ri.”

18Ri aukadi baukadi na dungu azehe ti ni; bambiko ngbatunga agu abaukadi re awiri bakindo anaukadi nga ngasu adegude. Gako moyambu ki kusi ri ku zegi yo, ki kisi ngbadimo fuo ri.

19Tamara ki nduku kuke ku riri yo, ki siri gu gari baukadi nadu ti kpotori na dungu azehe. Ri ki uka beri ku riri yo, ki niga, ki nikpari ni wawa wa ri aga.

20Abisaroma nangia kawiriri ki ya fu ri, “Kawiro nga Amanona ra na mo? Ono mo óngo awere, dawire; kawiro du; ka mo ká nga na gi pai re ku kpotoro yo ya.” Si du Tamara ki nye ni rungorungo ri ku kawiriri yo nga Abisaroma.

21Ono ho Bakindo Dawidi agi pa agi apai ni dunduko re, gako zinga ki rungudi.

22Ono Abisaroma agumba nga pai fu Amanona ni wene he watadu ni gbegberẽ he a te; bambiko Abisaroma asoga Amanona asoga, bambiko ko amangi dawiriko ni ome nga Tamara.

23Si adu wa gere fuo garã ue nzunzu, Abisaroma adu na abakpemange akandoro Bara-asora yo, nga gu nadu mbembedi na Efuraima, Abisaroma ki yambu awiri bakindo dunduko.

24Abisaroma ki ye koyo du bakindo ni, ki ya, “Mo ngére, awere ga moyambu du na abakpemange akandoro; mi nakpara foro, bakindo ídi ka ndu na gako amoyambu wa sa na ga moyambu.”

25Bakindo ki ya fu Abisaroma, “Oó, wire, ka ani ndú nga dunduko ya, ani ka du ni umbugo foro.” Ko ki nidarĩ ko kindi, ono ko akpi nga nyemu ka ndu te, ko ki fu kina maku fu ko.

26Abisaroma ki ya, “Ka si adu nga wo ya, mi nakpara foro, ani ndú na tamere nga Amanona.” Bakindo ki ya fu ko. “Tipagine ka oni ndú ti ni na ko?”

27Ono Abisaroma ki nidarĩ ko kindi, ya Amanona ndu na ko na awiri bakindo dunduko.

28Abisaroma arugu gako amoyambu, ki ya, “Oni bí he awere, ho rago ka ngba ni ti Amanona be imekakue; ho ka mi ya ni fu roni, ‘Oni tá Amanona,’ oni ki imi ko, ka oni agúnde nga ya. A nga mi rugu roni te? Oni dú ngangarã, ki du na erá.”

29Ga Abisaroma amoyambu ki mangi Amanona wa Abisaroma arugu yo. Awiri bakindo ki guari dunduko, aboro dunduko ki biti gayo abaadongi ka ora.

30Ho i adu ni kina ngba gene, pai ki da koyo du Dawidi ni ki ya, “Abisaroma imi awiri bakindo dunduko, a nga gu ni ho sa nye te.”

31Bakindo ki mo ku ari, ki sipi gako aremu, ki pi sande. Gako amoyambu dunduko ki ru pati ko na gayo aroko ni sipisipi he.

32Yonadaba nangia wiri Sima, unvurua Dawidi, ki karaga ha ki ya, “Ka gi gbia bérẽ nga ha ya i imi paranga awiri bakindo dũ ya; bambiko kina Amanona sa nikpi. Ti gu rago ko asosodi dawiriko nga Tamara ri ra na ko, Abisaroma ki tona soa pai kuti ko ka imo ko.

33Si du awere ka gi gbia nga bakindo bérẽ nga gu pai re kpotoko yo, nga awiriko kpiki dunduko ya; ono kina Amanona kpi sa.”

34Ono Abisaroma aoro. Gu paranga napida rago ki tuka bangiriko, ka ngereka, oni ngére, badungu aboro ki niye ngba gu gene du pavuru bagangara gii he yo.

35Yonadaba ki ya fu bakindo, “Mo ngére, awiri bakindo nayega; wa ga moyambu nigumba ha, wo du he.”

36Si adu wa gere, wa ko adigisi fugo, awiri bakindo ki da, ki poi ni wawa, ki nikpari ni aume. Bakindo na gako amoyambu a dunduko ki nikpari akpara iimi.

37Ono Abisaroma ki oro koyo du Tarumai ni nangia wiri Amiura, bakindo Gesura. Dawidi ki nirungo tipa wiriko na uru dedede.

38Si du Abisaroma aoro ti ni, ki ndu ku Gesura yo, ki nye yo garã ki du biata.

39Ono nunga Abisaroma ki nirungosi mbisimo bakindo gbe, ko ki nikpi nyemu ka ndu fuo ko; bambiko gako rungo tipa Amanona azeredi, mbiko ko aima kpi.

← Chapter 12 Jump to: Chapter 14 →