2 Samuel 17

Zande

← Chapter 16 Jump to: Chapter 18 →

1Ku ri agi apai re Aitofere ki ya fu Abisaroma, “Mo ídi he fere mi sia aboro 12,000, mi agúari ka do fuo Dawidi ni gi yuru re.

2Mi agbía ko ho ko ka mbu ni ki du rurungbura, mi ki gundesi ko. Agu aboro du na ko i ki oro aora dũ. Mi ki imi kina bakindo sa,

3ki yega na aboro dunduko foro. Gu boro mo agbata ni tigamo ni kina sa, agu aboro ki du zezeredi tie dunduko.”

4Gi pai re ki ngba ti Abisaroma gbe, na agu abaakumba nga ga aYisaraere yo dunduko a.

5Abisaroma ki ya, “Oni yámbu Usai nga boro Aruko a, ani gí sangbako tipa gi pai re.”

6Ho Usai aye ni koyo du Abisaroma ni, Abisaroma ki ta gumba pai fu ko niya, “Aitofere nigumba pai wa gere. Ani mángi gu pai gumba ko? Ka si adú nga wo ya, mo gúmba gamo.”

7Usai ki ya fu Abisaroma, “Ngba nga sangba Aitofere ti gi rago re te.”

8Usai ki ya berewe, “Mo tigamo ini pa bamo na gako aboro, ya i du ni airanyaka, gayo berã ni zingizingi he wa ga gu nyarinde nga urisi, wa ka i rogo awiru be ru nvuo yo. Bamo nga bainipa sovura, ko ara nga kporo na aboro te.

9Mo ngére, ko naoka tiko awere due yo, watadu rogo kura ba. Si adú wa gere, ho bambata aboro ka tiwa ni, gu ni ka gi he ni aya, ‘Bakere imo aboro du dagba agu yo napeka Abisaroma.’

10Ka agu yo nivura du ni ngangarã aboro, na kpotoyo yo wa kpoto bahu yo, i azéra azera. Bambiko aYisaraere ini dunduko ya bamo nga kere iranyaka, na agu yo du na ko i nga ngangarã aboro a.

11Ono sangbare nga aYisaraere dunduko dungura tiyo kono du mo ni, tona Dana yo ki da ku Bera-saba yo, wa kina gu ngume du pangba baime tipa nge he. Mo ki nau a tigamo na gamo aboro ka so vura.

12Wa du he were ani atúnguo ko rogo gu rago ani ka bi ko ni, ani ki ti ku auru ko wa ndomo nati ku auru sende. Ani ahe nga ko na gu ni sa dagba gako yo ni ungani wa sa te.

13Ono ka ko aga ku rogo gu bakporo, aYisaraere dunduko ki ye na kina agire sa gu bakporo re, ani ki gbe he kina ku di yo, daho ka i abí nga umba mbia ni yo sa ya.”

14Abisaroma ki ya na akumba aYisaraere dunduko, “Ni rengo sangba Usai nga boro Aruko ru ti sangba Aitofere.” Bambiko Yekova aima ringbisa pa kandasi gu ruru sangba nangia ga Aitofere, bambiko Yekova akpi nyemu ka keda gbigbitapai ku ri Abisaroma.

15Usai ki ya fu aSadoka na Abiatara nangia aboromotumo, “Were Aitofere arugu Abisaroma, na ga aYisaraere abaakumba. Mi ki rugu yo tigimi were wa gere.

16Si du awere oni kédi sunge ti ni ni ipo, ki gumba ha fu Dawidi, ki ya, ‘Ka mo rá nga ngba gene abasigo ime nga ga ngbakungba ni gi yuru areme re ya, ono mo sí ku mbiti yo; i ka sura bakindo, na agu aboro dunduko du na ko.’ ”

17AYonatana na Aimasa anasunga pati Enerogere; de nangia moyambu anandu ka gumba gu pai fu yo nanidu; i ki nindu ka gumba ha fu Bakindo Dawidi. Ka i arima nga ku bakporo yo ku bangiri aboro ya.

18Ono gude abi yo, ko ki gumba ha fu Abisaroma. I ki ndu ue ni ngarã, ki da ti ga kumba bambu nangia Baurima, nga gu Ko gege guga adu vurukporo kpuko, i ki zorõ ku rogo ho.

19De ki kisi ngba guga na pipi ngbaha, ki di zende ahe ki gbaraei he auru he; ka boro aina nga pa ha ya.

20Ga Abisaroma amoyambu ki ye koyo du gi de ni re sa gari bambu; ki ya, “Wari du Aimasa na Yonatana ni?” De ki ya fu yo, “I si ku mbiti wiridi yo.” Ho i agbata yo ni vurũ, i ki karaga tiyo ku Yerusarema yo.

21Fuo ga yo, akumba akuru guga yo, ki ndu ka gumba pai fu Bakindo Dawidi. I ki ya fu Dawidi, “Mo gúari, ki si ku mbiti yo ni ngarã. Bambiko Aitofere arugu pai kuti ro were.”

22Dawidi ki guari, na agu aboro dunduko naadu na ko, i ki si ku mbiti Yaradene yo. Ho rago agiri ni wiso, boro adu nga sa nahe si ku mbiti Yaradene yo te.

23Ho Aitofere abi he ni ya i apeka nga gako rugapai te, ko ki moi basunga ku ri gako dongi, ki gu ku auru ru, ki ga ku kpuko yo. Ko ki ringbisi pai tipa kpuko, fuo ho ko ki asi tiko ki kpi, i ki kpisidi kangbako rogo ga bako murã.

24Dawidi ki ye ku Manaima yo. Abisaroma ki si ku mbiti Yaradene yo, na akumba aYisaraere dunduko.

25Abisaroma ki moi Amasa ni barutiri rimbasa aborovura ku ba Yoaba. Amasa nangia wiri gu kumba rimoko angia Yitera boro Yisamaere, nga gu ko narimi fuo Abigare nangia win Nasa, wirina Seruya nangia na Yoaba.

26AYisaraere ki zi bataya na Abisaroma rogo gu ringara nga ga Girada.

27Ho Dawidi aye ni ku Manaima yo, Sobi wiri Nasa nga boro Raba dagba aAmono yo, na Makera wiri Amiere boro Rodebara, na Baruzirai boro Girada naau Rogerima yo,

28i aye na abarame, na abaakurungbu, na aakoro, na nganu, na zende he wa ga mapunga, na ngungo, na ugu zende ahe, na abapu, na abakpa, na ugu abakpa,

29na nzeme anyege, na nzeme mamuanva, na akandoro, na kputakputa mamu bagara, tipa Dawidi, na tipa agu aboro naadu na ko, i ri he; bambiko i aya, “Gomoro na aboro gbe, na mbugo, na gomoro ime ngbakungba yo.”

← Chapter 16 Jump to: Chapter 18 →