2 Samuel 14

Zande

← Chapter 13 Jump to: Chapter 15 →

1Yoaba wiri Seruya ki ini he kpotoko yo ya ngbadu bakindo kina koyo du Abisaroma ni.

2Yoaba ki kedi sunge ku Tekua yo, ki di tatamana de yo, ki ya fu ri, “Mi nakpara foro, mo rúngosi tiro wa kparikpe, ki ukadi roko gira. Ka mo mbédi nga nzeme ya, mo ki du wa gu de ima tipa gbanga rago na rungo tipa kpio boro.

3Mo ki rimi koyo du bakindo ni, ki gumba gi pai fu ko re.” Si du Yoaba ki moi apai ku ngbari.

4Ho de Tekua ada ni koyo du bakindo ni, ri ki ti ni kpakpuri ku sende, ki tumusa fu ko, ki ya, “Ako bakindo, mo únda re.”

5Bakindo ki ya fu ri, “Gini pai nafuda ro?” Ri ki karaga ha ki ya, “Mi nga dekurugbo ni rengo, kumbami kpi.

6Awiri ga moyambu ki du ue ni akumba, i ue nata kpata ati yo; ka boro adu nga ho ka za yo ya, gu ni ki nari kura ni, ki imi ni.

7Rika ngbatungare dunduko zingi kuti ga moyambu, va yo, ‘Mo kúsi gu ni naimi tameni, ani imi ni tipa gu wirinani ni aimi ni’, si du i ka imo dikumbo ti ni a. I abísa gi we nanye, ka i ambú nga rimo fu kumbami watadu yangara agumere auru kpotosende ya.”

8Bakindo ki ya fu de, “Mo gá ku kpuro yo, mi ni tire arúga pai tipa ro.”

9Gu de nga boro Tekua re ki ya fu bakindo, “Ako bakindo, gi gbia, gu irairapai re du ku ri re, na ku ri angbatunga buba; bakindo ki zanga pai ku ri ko na gako mbatabakindo a.”

10Bakindo ki ya, “Gu boro nikagumba pai foro, mo ki ye na ni fere, ni azáda nga ro berewe te.”

11Ri ki ya, “Mi nakpara foro, bakindo tíngidi pa Yekova ga Mbori, ya ka bairibape kure boro ími nga boro berewe ya, i ka imo wire.” Ko ki ya, “Wa du Yekova ni ungako, mangeri wiro sa ati nga ku sande te.”

12De ki ya, “Mi nakpara foro, mo idi fu ga moyambu, ri gumba nga pai sa fu gi gbia nga bakindo.” Ko ki ya, “Mo gúmba ha.”

13De ki ya, “Tipagine mo asanga ngbatunga pai ti ni kuti ga Mbori aboro? Bambiko rogo gumba gi pai yo re bakindo adu wa gu boro du na pai ku ri ni, wa bakindo akaraga nga gako bagibagi boro mbusa ya.

14Bambiko ani nikakpi, ki du wa kina gu ime fu ri sende, ka i adungura nga ha berewe ya. Ono ka Mbori di nga unga ti boro te, ono ko nasanga pai, gu ni nandu wa bagibagi boro, ka ni nyé nga ni merẽmerẽ boro kindi be ko ya.

15Si du ye mi ti ni were ka gumba gi pai re fu gi gbia nga bakindo, si bambiko aboro gundesi re. Ga moyambu ki ya, ‘Mi nikagumba pai awere fu bakindo; isoke bakindo amánga gu pai gako moyambu asana he tipa ha.

16Bambiko bakindo agia ha, ki batasi gako moyambu be gu kumba nikaimo re na wire a ki kusi rani dagba agu aboro nga ga Mbori yo.’

17Ga moyambu ki ya, ‘Gu pai nga ga gi gbia nga bakindo du ni pa wasa’; bambiko gi gbia nga bakindo du wa ga Mbori maraika ka wisiga wenepai na gbegberẽ he a. Yekova ga Mbori ki du na mo!”

18Bakindo ki karaga ha Ki ya fu de, “Ka mo óko nga gu pai ti re mi akasana ro tini ya.” De ki ya, “Gi gbia nga bakindo gúmba ha.”

19Bakindo ki ya, “Oni na Yoaba dunduko du rogo gi pai re?” De ki karaga ha ki ya, “A wa du mbisimoro ni ungaha, gi gbia nga bakindo, a nga boro sa rengbe ka sa tini ku kumbabe yo watadu ku garebe yo, ti gu pai nga gu gbia nea bakindo agumba te re. Ga moyambu nga Yoaba, ko nayambu re, ko ki moi agi apai re dunduko ku ngba ga moyambu.

20Yoaba ga moyambu amangi he ka saka agi apai re. Gi gbia ki du ni iratatamana, wa kina gu tatamana nga ga maraika nga ga Mbori ni, ka ina pa agu apai dunduko du auru kpotosende.”

21Bakindo ki ya fu Yoaba, “Awere, mo ngére, mi idi gi pai re. Si du mo ndú, ki yega na gu paranga re nga Abisaroma berewe.”

22Yoaba ki ti sande ni kpakpuko, ki tumusa fu ko, ki sambua bakindo. Yoaba ki ya, “Ako gi gbia, nga bakindo, ga moyambu ini he areme ya mi bi undahe ku bangiro, rogo gu pai bakindo amangi tipa gu sanahe nga ga gako moyambu.”

23Si du Yoaba aguari ti ni ki ndu ku Gesura yo, ki yega na Abisaroma ku Yerusarema yo.

24Bakindo ki ya, “Ko gá ku kpuko yo, ono ka ko bi nga kpakpure ya.” Si du Abisaroma aga ti ni ku kpuko yo, ka ko abi nga kpakpu bakindo ya.

25Boro adu nga sa dagba aYisaraere dunduko tamani adu wa ga Abisaroma i atambua ni wa ko te; tona ti kpanduko ki da ti riko serõ adu nga ti ko wa sa te.

26Ko anikpe mangeriko ni gu rago, ko ki niringbisi barõa mangeriko, si ki nidu wa sekere 200 kuti kina ga bakindo ũringbisahe. Ko anakpe he ti digida garã na agarã; bambiko mangeriko adu ni rõrõi he fu ko, si du ko anakpe riko ti ni wo.

27I ki batika akumbagude fu Abisaroma biata, na degude sa, rimori angia Tamara; ri adu ni bawene de gbe.

28Abisaroma ki nye Yerusarema yo tipa garã ue nzunzu; ka ko abi nga kpakpu bakindo ya.

29Abisaroma ki kedi sunge fuo Yoaba, ka keda ko koyo du bakindo ni; ono Yoaba aye nga te. Ko ki kedi sunge ni ue he, ka ko aye nga a ya.

30Si du ko ki ya fu gako amoyambu, “Oni bí nga, ga Yoaba ati mbembedi na gimi, gako zende he wa ga mapunga du rogo ho; oni ndú ki moi we ti ni.” Ga Abisaroma amoyambu ki moi we ti ati.

31Yoaba ki guari, ki ye koyo du Abisaroma ni ku kpuko yo, ko ki ya fu ko, “Tipagine gamo amoyambu nimoi we ti ni ti gi ati?”

32Abisaroma ki karaga ha fu Yoaba ki ya, “Mo ngére, mi akedi sunge koyo du mo ni, niya, ‘Mo yé kono du mi ni, mi kedi ro koyo du bakindo ni, ka sana ko, “Tipagine mi aye ti ni Gesura yo? Si ngba ka mi anye kina koyo.” Bakindo ídi he fere awere tie mi bi kpakpuko; ka ngia irairapai du ti re, ko ki imi re.’ ”

33Si du Yoaba andu ti ni koyo du bakindo ni, ki gumba ha fu ko; bakindo ki yambu Abisaroma. Ko ki ye koyo du bakindo ni, ki vagadi sande ni kpakpuko bara bangiri bakindo; bakindo ki dungo Abisaroma.

← Chapter 13 Jump to: Chapter 15 →