2 Samuel 16

Zande

← Chapter 15 Jump to: Chapter 17 →

1Ho Dawidi asusi ri babita ni ku ari toni, Ziba nangia ga Mefibosete moyambu ki gbia ko, na adongi ue ni vodivodi ra na tindiro, udiudi kpokuta ki du ri ra wa 200, na ugu kpura rindi bakakue 100, na zuzu angua nga ga garã 100, na kambu imekakue sa.

2Bakindo ki ya fu Ziba, “Tipagine ye mo ti ni na agi ahe re?” Ziba ki karaga ha ki ya, “Adongi du tipa ga bakindo aborokporo i nioro ri ra; kpokuta na zuzu angua nga ga garã tipa aparanga i ri he, na imekakue fu agu yo he ka maka yo ngbakungba no, i ki mbiri he.”

3Bakindo ki ya, “Wari du wiri bairaro ni?” Ziba ki ya fu bakindo, “Mo ngére, ko nye kina Yerusarema yo; bambiko ya ko, ‘Areme angbatunga aYisaraere ka karaga ga buba ngbi fere.’ ”

4Bakindo ki ya fu Ziba, “Mo ngére, agu ahe dunduko nga ga Mefibosete, gamo du.” Ziba ki ya, “Mi natumusa foro. Ako gbia nga bakindo, mi ngbá bangiro nye anye kindi.”

5Ho Bakindo Dawidi aye ni ku Baurima yo, kumba ki kuru yo dagba rika ngbatunga Saura, rimoko angia Simi, ni wiri Gera; ko akuru, ki nisenge he kindi wa ko aye.

6Ko ki nizumudi Dawidi ni ambia, na agu amoyambu dunduko nga ga Bakindo Dawidi yo. Avuruko dunduko na airanyaka dunduko ki du ku kumbabeko na ku garebeko yo.

7Ho Simi asenge he ni ko aya wẽ, “Mo ndú, Mo ndú, mo, baukakure, nga gbegberẽ sino boro!

8Yekova iri bape kure angbatunga Saura dunduko ku ri ro, nga gu ko mo azoga rago ku ba ko; Yekova ki fu ngbi ku be Abisaroma nga wiro. Mo bi, kina ga gbegberẽ pai zi ro; bambiko mo nga baukakure.”

9Abisai wiri Seruya ki ya fu bakindo. “Tipagine ka gi kangba ango atiwa gi gbia ti ni nga bakindo? Mi nakpara foro, mo idi he fere mi ndu sa ko, ka kata riko ti ko.”

10Ono bakindo ki ya, “Sa gimi na oni, oni awiri Seruya? Bambiko ka ngia ko natiwa re, bambiko Yekova agumba ha fu ko, ‘Mo tíwa Dawidi,’ da nikaya tie, ‘Tipagine mangi mo ho ti ni wo?’ ”

11Dawidi ki ya fu Abisai, na fu gako amoyambu dunduko, “Oni ngére, wire nakuru rogo re yo, ko nagbata ungare; waĩ susi ga gi boro Benyamina, ko amanga ha awere re! Oni mbú ko, ko tíwa re; bambiko Yekova nirugu ko.

12Si ngia Yekova abí gu gbegberẽpai i amangi fere, Yekova afú wenepai fere tipa ga gi ko re motiwa areme.”

13Si du Dawidi na gako aboro ki ndu ngba gayo gene, Simi ki nindu pavuru gangara ti ko tuturũ, ki nitiwa ko wa ko andu, ki nibafu ambia koyo du ko ni, ki nimi nvutu.

14Bakindo na agu aboro dunduko naadu na ko, ki da na mbugo; ko ki nyakasi tiko ho.

15Abisaroma na aboro dunduko nangia akumba aYisaraere, ki ye ku Yerusarema yo, na Aitofere a.

16Ho Usai aye ni nangia boro Aruko, nangia badia Dawiai, koyo du Abisaroma ni, Usai ki ya fu Abisaroma, “Mbori fú gbanga rame fu bakindo! Mbori fú gbanga rame fu bakindo!”

17Abisaroma ki ya fu Usai, “Gere nga ga weneringise fu badiaro? Tipagine mo andu nga ti ni na badiaro ya?”

18Usai ki ya fu Abisaroma, “Ai; kina gu ni Yekova asia ni, na agi aboro re a, na akumba aYisaraere dunduko, mi ará fu kina ni, ki nye fuo ni.

19Da mi ka manga pa ni tigimi berewe? Ka mi mángi nga pai ku bangiri wiriko, te? a wa mi anamanga pai ku bangiri bamo, kina wo mi ka manga ha ku bangiro.”

20Abisaroma ki ya fu Aitorere, “Mo gúmba sangbaro; gini pai ka ani mangi?”

21Aitofere ki ya fu Abisaroma, “Mo rími fuo ga bamo adebadia, nga agu yo ko ambu yo i nibanda kporo. AYisaraere agia ha dunduko ya mo ima gberã bangiri bamo, be agu yo dunduko dú na mo ki du nyanyaki.”

22I ki dua bamburoko fu Abisaroma ri bambu yo; Abisaroma ki rimi fuo ga bako adebadia ku bangiri aYisaraere dunduko.

23Ono gu rugapai nangia ga Aitofere nga gu ko arugu ni agu auru re si adu wa ka boro asana he tipa kina ga Mbori yuguyuguhe; wo ga Aitofere rugapai adu dunduko fu Dawidi na fu Abisaroma a wo.

← Chapter 15 Jump to: Chapter 17 →