2 Samuel 20

Zande

← Chapter 19 Jump to: Chapter 21 →

1Kumba sa adu yo nga gbegberẽ sino boro, rimoko angia Seba, wiri Bikiri, ni ngbatunga Benyamina. Ko ki vu nambongo, ki ya, “He tipa rani na ga Dawidi kumbo te, a nga mosoro tipa rani be wiri Yisai te; Ako aYisaraere! oni ni ba sa sa gá ku kpuroni yo!”

2Si du akumba aYisaraere dunduko ki ga ti fuo peka Dawidi, ki nipe fuo Seba wiri Bikiri. Ono akumba aYudo ki ka kuti gayo bakindo nyanyaki, tona Yaradene yo ki da ku Yerusarema yo.

3Dawidi ki da ku kpuko yo Yerusarema yo; bakindo ki rogo gu gako adebadia naadu bawe, nga agu yo ko ambu yo i nibanda kporo, ki moi yo ku rogo vuru bambu sa ni bandabanda yo, ki nifu ũngba fu yo, ka ko andu nga koyo du yo ni berewe ya. Si du i akpara yo ti ni koyo dati kina kpioyo, i ki niraki wa adekurugbo.

4Bakindo ki ya fu Amasa, “Mo yámbu akumba aYudo fere dunduko rogo uru biata, oni ki du kina erẽ du.”

5Si du Amasa ki ndu ka yamba akumba aYudo dunduko; ono ko aima koyo tipa gbanga rago ki susi gu rago i aringbisi he fu ko.

6Dawidi ki ya fu Abisai, “Awere Seba wiri Bikiri amánga rani na gbegberẽpai susi gu Abisaroma amangi rani na ni. Mo rogo avuru ga gbia, ka do fuo ko, ko ka dia abaakporo du na ngapa pati he, k, ndu ka merã be rani.”

7Ga Yoaba aboro ki ndu fuo Abisai na aKereto na aPereto, na airanyaka dunduko; i ki ndu kuru Yerusarema yo, ka do fuo Seba wiri Bikiri.

8Ho i ada ni ti bambia nga gu du Gibona yo, Amasa ki gbia yo. Yoaba ki du na roko vura ti ko nga gu ko avodi tiko na ni, giri dimose ki du auru he na basape ti ni dimoko rogo fukaha, wa ko andu ku mbata yo si ki ti.

9Yoaba ki ya fu Amasa, “Mo du zezeredi, tamere?” Yoaba ki zi ko ti maingbako ni kumba beko ki dungo ko.

10Ono Amasa aberã nga pa gu basape nadu be Yoaba te; si du Yoaba arũ ko na ni ti vuko, ki uka reko auka du ku sande, ka ko aru nga ko ni uehe ya; ko ki kpi. AYoaba na unvuruako nga Abisai ki nido fuo Seba wiri Bikiri.

11Boro aru pati Amasa sa nga ga Yoaba boro, ki ya, “Gu ni nairisa Yoaba, na gu ni du tipa Dawidi, ni péke fuo Yoaba.”

12Ono Amasa ki niwaranga rogo kureko bangiri bagene. Ho agu aboro nasusa pati ko abi ko ni, i ki ru zaa, ho gu ko abi he ni ya agu aboro dunduko ru zaa, ko ki tindi Amasa ngba bagene ku ati yo, ki ba roko ku auru ko.

13Ho i atindi ko ni ngba bagene, aboro dunduko ki ndu ku mbata yo fuo Yoaba, ka do fuo Seba wiri Bikiri.

14Seba ki nindu dagba angbatunga aYisaraere dunduko, ki da ku Abere yo, na ku Bete-maka yo; aboro Beri dunduko adungura tiyo adungura, ki nipeke fuo ko.

15Agu aboro dunduko naadu fuo Yoaba i ki ye ki ru nguru kuti ko Abere Bete-maka yo, i ki ba kanda kuti bakporo, si ki nyakasi ngapa, ka kua ha ku sande.

16De tatamana ki poi ku ari rogo gu bakporo re, ki ya, “Mi nakpara fu roni, Oni gi he! Oni gi he! Oni yá fu Yoaba, ‘Mo yé kono, mi fura nga na mo.’ ”

17Ko ki ye ki mbedi na ri, de ki ya, “Mo nga Yoaba?” Ko ki karaga ha ki ya, “Mi nga ko.” Ri ki ya fu ko, “Mo dége turo sa agu apai nga ga ga moyambu.” Ko ki karaga ha ki ya, “Mi nadega ture.”

18Ri ki ya, “I ainidi ka gumba pai bakuru yo, ki ya, ‘I sana he ni rengo tipa rugapai ku Abere yo’; si du i ki digisi gu pai re.

19Mi nga boro dagba agu aboro du Yisaraere yo naida pa zereda ki du ni airarengo. Mo nagbata pai ka gbarasa gu bakporo nga na aboro aYisaraere. Tipagine mo akpi nyemu ka nyasa ga Yekova aboro ti ni dunduko?”

20Yoaba ki karaga ha ki ya, “Si arengba nga te, si arengba nga na mi te, nga mi ka nyasa yo watadu gbarasa yo!

21Wo du gu pai te re. Ono gu kumba nga ga ringara bagangara Efuraima, i niya ti ko, Seba wiri Bikiri natumba beko kuti Bakindo Dawidi; oni kúsi kina ko, mi nikaguari ti bakporo.” De ki ya fu Yoaba, “Mo ngére, i abá kina riko foro ri ngapa bakporo.”

22De ki ndu koyo du aboro ni dunduko ni gari tatamana. I ki kati ri Seba wiri Bikiri, ki ba ha fu Yoaba ku zegi yo. Si du ko ki vu nambongo, i ki gbataka bakporo yo, aboro ni ba sa sa kina ku kpuyo yo. Yoaba ki karaga tiko ku Yerusarema yo koyo du bakindo ni.

23Yoaba adu ku ri rimbasa aborosovura nga ga aYisaraere yo dunduko; Benaya wiri Yoyada adu ku ri aKereto na aPereto;

24Adorama ki du ku ri zizi aborosunge. Yosefata wiri Airuda ki ngia batingidipai;

25Sewa ki ngia bakeapai; aSadoka na Abiatara ki ngia aboromotumo;

26Ira boro Yaira ki du ni boromotumo fu Dawidi.

← Chapter 19 Jump to: Chapter 21 →