2 Samuel 24

Zande

← Chapter 23 Jump to:

1Ga Yekova zinga ki rungudi berewe kuti aYisaraere. Ko ki zingisi Dawidi kuti yo, ki ya, “Mo ndú, ka geda bange aYisaraere na aYudo.”

2Bakindo ki ya fu Yoaba na fu abarutiri rimbasa aborosovura, naadu na ko, “Oni ndú awere koyo na kono rogo angbatunga aYisaraere dunduko, tona Dana yo ki da ku Bera-seba yo, ki gedi aboro, mi ini pa waĩ du bange aboro.”

3Yoaba ki ya fu bakindo, “Yekova ga Mbori gbía kura aboro kuti yo wa bara kama sa ku ri agu yo du awere, bangiri gi gbia nga bakindo bí nga ha. Ono tipagine ngba gi pai ti ni re ti gi gbia nga bakindo?”

4Wa si avura du wo, ga bakindo pai adi be Yoaba, na agu abarutiri rimbasa aborovura. Yoaba na abarutiri rimbasa aborovura ki guari bara bangiri bakindo, ka ndu ka geda bange aYisaraere.

5I ki si Yaradene, ki zi bataya Aroere yo, ki ndu pavuru bakporo gu du bebere ngboongboorago ku Gada yo, na ku Yazera yo.

6I ki da Girada yo, na ku Kadesa ringara aIto yo. I ki da ku Daba-yana yo, ki ndu kirikiri ku Sidona yo.

7I ki da ti gu nyanyaki gbata nga ga Tura, ku rogo agu abaakporo dunduko nga ga aIvo, na ga aKanano. I ki kuru ku Negebe Yuda yo, na Bera-seba.

8Si du ho i andu ni koyo na kono rogo aringara dunduko, i ki da ku Yerusarema yo diwi anyasi yo ribua na rame 20.

9Yoaba ki fu gedigedi bange aboro fu bakindo: eerẽ aboro adu dagba aYisaraere yo wa 800,000 nga agu yo rengbe na mo basape. Aboro aYudo adu wa 500,000.

10Ngbadu Dawidi ki kiti fuo geda ko aboro. Dawidi ki ya fu Yekova, “Mi mangi bakere ingapai, ni gu pai mangi mi he re. Ako Yekova, ono awere, mi nazungadi ro, mo dí gu irairapai nga ga ga moyambu ku sa yo; bambiko mi mangi pai ni mumungo ho.”

11Ho Dawidi aguari ni wiso, sangba Yekova ki ye koyo du nebi ni nangia Gada, ga Dawidi babiapai, ki ya,

12“Mo ndú ka gumba pai fu Dawidi, ki ya, ‘Ya Yekova wẽ, mi ringbisi apai foro biata; mo sía gu sa dagba ha yo, mi mángi he foro.’ ”

13Si du Gada ki ye koyo du Dawidi ni, ki gumba ha fu ko, ki ya fu ko, “Garã gberãngbi ye saba foro ku rogo ga ringara? Watadu mo oro tipa diwi biata be avuraro ho i ado fuo ro ni? Watadu tata kaza gberãngbi ti ku rogo ga ringara uru ki du biata? Awere mo bérẽ pa ha, mo ki berẽ pa gu karagapai mi ka karaga ha fu gu ko nikedi re.”

14Dawidi ki ya fu Gada, “Mi awere ngba bakere kpakarakpakara pai; ani fú tirani awere ku be Yekova bambiko nunga aboro ti ko ni bakere he; ka mi ti nga ku be boro ya.”

15Si du Yekova akedi tata kaza gberãngbi ti ni ku ri aYisaraere tona wiso ki da ti kina gu rago ko aringbisi he. Aboro ki tona kpi Dana yo ki da ku Bera-seba yo wa akumba 70,000.

16Ho maraika ataĩ beko ni sa Yerusarema ka gbarasa ha, Yekova ki birĩ tiko ti gu gbigbitapai re, ki ya fu gu maraika naimo aboro, “Si rengbe, mo zógo bero awere.” Ga Yekova maraika ada pati gu bataka zende ahe nga ga Arauna boro Yebuso.

17Dawidi ki gumba pai fu Yekova ho ko abi gu maraika ni namanga aboro, ko ki ya, “Mo ngére, mi ni tire mangi ingapai, mi mangi pai ni waka a: ono agi akandoro re, gini pai mangi yo? Mi nakpara foro, mo mangi kina re, na kina angbatunga buba a.”

18Gada ki ye ni gu uru re koyo du Dawidi ni, ki ya fu ko, “Mo ndú, ki dua bamotumo fu Yekova rogo gu bataka zende ahe nga ga Arauna boro Yebuso.”

19Dawidi ki ndu koyo wa Gada agumba ha, wa Yekova arugu he.

20Arauna ki ya ngere, ko ki bi bakindo na amoyambu i niye koyo du ko ni. Arauna ki kuru, ki nugadi ni irisa ku bara bangiri bakindo ni kpakpuko ku sende.

21Arauna ki ya, “Tipagine gi gbia nga bakindo aye ti ni kono du gako moyambu ni?” Dawidi ki ya, “Ka ngbe bataka zende ahe be ro; ka dua bamotumo ho fu Yekova, gberãngbi guari ti aboro.”

22Arauna ki ya fu Dawidi, “Gi gbia nga bakindo di he adia ka tumo na gu he ngba bangiriko. Mo ngére, abaabagara du re tipa zozo motumo, na aũtaka ahe nga ga abaabagara tipa nyake.

23Ako bakindo, agi ahe dunduko re Arauna nafu he fu bakindo.” Arauna ki ya fu bakindo, “Yekova ga Mbori idi pa ga pai.”

24Ono bakindo ki ya fu Arauna, “Ai, ono mi angbé he be ro kuti kina ndikidi genoho. Ka mi fú nga zozo amotumo fu Yekova gi Mbori nga gu mi angbe nga ha angbe ya te.” Si du Dawidi ki ngbe gu bataka zende ahe re na abaabagara tipa sekere feda 50.

25Dawidi ki dua bamotumo ho fu Yekova, ki tumo ni zozo amotumo na amo tumo zereda. Si du Yekova agi gu kpe zungaditi re tipa ringara, gberãngbi ki guari ti aYisaraere.

← Chapter 23 Jump to: