2 Samuel 4

Zande

← Chapter 3 Jump to: Chapter 5 →

1Ho Isa-bosete wiri Saura agi he ni ya Abinera kpi Eburone yo, ko ki rungbura arungbura dũ, aYisaraere dunduko si ki fudi yo a.

2Ono Isa-bosete wiri Saura adu na abarutiri rikavura ue; rimo gu ko nangia Bana, rimo gu kura ko ki ngia Rekaba, nangia wiri Rimona boro Berota, nga ngbatunga awiri Benyamina. Bambiko i agedi Berota ku dagba ngbatunga Benyamina yo;

3ono aboro Berota ki oro ku Gitaima yo, ki nye yo daku awere.

4Yonatana nangia wiri Saura, wiriko adu ho na gbarigbarĩ anduko. Garãko adu bisue ho pa kpio aSaura na Yonatana aye ni Yizerere yo; nasambako ki tuka ko, ki oro na ko. Si ki ta du wa gere, wa ri aipisi tiri ka ora, ko ki ti be ri, anduko ue ki gbarĩ. Rimoko nangia Mefibosete.

5Awiri Rimona boro Berota nangia aRekaba na Bana ki ndu, ki da ti ga Isabosete bambu ho uru nafaa ni, ho ko aongodi ni bebere uru.

6I ki rimi ku dimo yo, wa ka i agbata zende nganu. I ki ru ko ti vuko. ARekaba na Bana nangia tameko ki merẽ.

7Bambiko i ada ku dimo yo, wa ko api auru gako barame, i ki ru ko, ki imi ko, ki kati riko, ki di riko, ki ga na ni ngba gene kpasakpasa rago yo yuru sasasa.

8I ki ye na ri Isa-bosete fu Dawidi ku Eburone yo. I ki ya fu bakindo, “Mo ngére ri Isa-bosete du re nangia wiri Saura naadu ni vuraro, nga gu ko naagbata ungaro. Ono Yekova iri bape gi gbia nga bakindo areme ti Saura, na ti ngbatungako.”

9Ono Dawidi ki karaga ha fu aRekaba na Bana nangia tameko, nangia awiri Rimona boro Berota, ki ya fu yo, “Wa du Yekova ni ungako, nabatasi torore be arungosi dunduko,

10ho boro agumba ha ni fere, ki ya, ‘Mo ngére, Saura kpi,’ ni niberẽ he tigani niya ni ye na wene pangbanga, ono mi azi ni, ki imi ni Zikeraga yo, gure nangia gu mosoro mi afu fu ni tipa gani pangbanga.

11Waĩ susi he, ho gbegberẽ aboro niimi ruru boro ni kina dimo kpuni yo ku auru gani ba, mi aíra nga bape kpioko ku ri roni awere te? ki rogo roni ku sa yo auru kpotosende?”

12Dawidi ki gumba pai fu gako aparanga, i ki imi yo, ki kafu abeyo na anduyo, ki asi yo ku ari pangba munga Eburone yo. Ono i ki di ri Isa-bosete, ki kpisidi he rogo ga Abinera murã Eburone yo.

← Chapter 3 Jump to: Chapter 5 →