2 Samuel 9

Zande

← Chapter 8 Jump to: Chapter 10 →

1Dawidi ki ya, “Boro anye nga sa dagba ngbatunga Saura yo, ka mi yugu weneringise fu ni mbiko ga Yonatana pai, te?”

2Kumba adu yo rimoko angia Ziba ni ngbatunga ga Saura moyambu, i ki yambu ko koyo du Dawidi ni; bakindo ki ya fu ko, “Ziba nga mo?” Ko ki ya, “Mi nga ko nga ga moyambu.”

3Bakindo ki ya, “Boro anye nga sa dagba ngbatunga Saura, ka mi yugu ga Mbori weneringise fu ni, te?” Ziba ki ya fu bakindo, “Wiri Yonatana kina ho sa, nga gu ko nagbarĩ ti nduko.”

4Bakindo ki ya fu ko, “Wari du ko ni?” Ziba ki ya fu bakindo, “Ko dimo ku Makera yo wiri Amiere, ku Ro-debara yo.”

5Bakindo Dawidi ki kedi sunge, ki di ko dimo ku Makera yo wiri Amiere, ku Ro-debara yo.

6Mefibosete ki ye koyo du Dawidi ni, nangia wiri Yonatana, Yonatana ki ngia wiri Saura. Mefibosete ki vagadi ni kpakpuko ku sende, ki tumusa fu ko. Dawidi ki ya “Ako Mefibosete!” Ko ki karaga ha ki ya, “Mo ngére, ga moyambu du re!”

7Dawidi ki ya fu ko, “Ka mo gúnde nga ya; bambiko mi ayúgo weneringise ni rengo foro bambiko bamo nangia Yonatana, mi akáraga gu ringara foro nangia ga titaro nangia Saura; mo ki niri riahe ri gi mbisa dedede.”

8Ko ki tumusa fu ko, ki ya, “Ga moyambu nga da, mo angera kono du mi ni wa du mi wa kina kurugbo ango?”

9Bakindo ki yambu Ziba, nangia ga Saura moyambu, ki ya fu ko, “Agu ahe dunduko nangia ga Saura na ga ngbatungako mi fu he dunduko fu wiri bairaro.

10Oni nisópo bino fu ko, mo tigamo, na awiro, na avururo dunduko. Mo ki niye na zuzuhe, ya wiri bairaro du na riahe be ko ka ri he. Ono Mefibosete nga wiri bairaro nikaari riahe ri gi mbisa kindi.” Were awiri Ziba adu wa 15, avuruko ki du wa 20.

11Ziba ki ya fu bakindo, “Gi gbia nga bakindo, a wa rugu mo ga moyambu, ga moyambu amánga ha kina wo dunduko.” Mefibosete ki niri riahe ri ga Dawidi mbisa, wa gu wiri bakindo.

12Wiri Mefibosete adu ho sa ni wiri paranga, rimoko angia Mika. Agu aboro dunduko naaraka rogo ga Ziba kporo i adu ni avuru Mefibosete.

13Si du Mefibosete araka kina Yerusarema yo; bambiko ko ari riahe ri ga bakindo mbisa dedede. Anduko ue adu ni gbarĩgbarĩ he.

← Chapter 8 Jump to: Chapter 10 →