Acts 10

Zande

← Chapter 9 Jump to: Chapter 11 →

1Were kumba adu Kaisaria yo rimoko angia Korunerio, barukuri aboro 100 dagba gu rika vura i aniya ti ni Itaria,

2ni ruru kumba, ko anagunde agunde ti Mbori na kpuko du, ko anagama ahe agama fu aboro ni rengo, ki nikpari fu Mbori dedede.

3Ko ki bi ga Mbori maraika abi rogo yuguyugupai gbayaga ko niya fu ko, “Korunerio.” Si ki dũ wa ka saa biata nga ga nyemu nadu.

4Ko ki ta ngana ko, nigunde agunde, niya, “Gine du, Gbia?” Ko ki ya fu ko, “Gamo akpe na gamo agamahe si da ari yo barangba Mbori i nitingidi he.

5Awere mo kédi akumba ku Yapo yo, i ye na gu kumba nga Simona, du kura rimoko nga Petero;

6ko ku Simona yo nga barungburasi kpoto, du kpuko pavuru baime.”

7Ho gu maraika aga ni nagumba pai fu ko, Korunerio ki yambu gako amoyambu ue na ruru banzengere dagba agu yo yo nanamanga gako pai dedede;

8ho ko apeke agi apai ni re dunduko fu yo, ko ki kedi yo ku Yapo yo.

9Were rago ki ya giri wa i andu gayo nunguro, ki nimbedi ku bakporo yo, Petero abiti ku ri bambu yo ka kpara, si ki du wa ka bebere uru du.

10Gomoro ki nimangi ko amanga, ko ki nikpi nyamu ri he; wa i amanga ha ko ki rari musumo.

11Ko ki bi ngbangbaturũ si naza, ko ki bi he si niye ari yo, wa kina bakere remu i nizogo ho ti pangbaha biama ku sende;

12yo ngbatunga agu anya adu ni nadu na ndura ni ba biama, na agbiro sende a azire ari, dunduko.

13Fugo ki poi koyo du ko ni, ya, “Mo gúari Petero; mo imi agu ra ka ri ra.”

14Ono Petero ki ya, “Wo te Gbia, bambiko mi ari nga nyakorokpa na birikobiriko he mbata te.”

15Fugo ki poi koyo du ko ni berewe ni ue he, ya, “Gu girisi Mbori ka mo sá nga ha ni nyakorokpa ya.”

16I amangi he bara biata; i ki di gu he adia ku ngbangbaturũ yo re ni ba sa.

17Were wa Petero abaka bangiriko ti gi yuguyugupai ko abi re ya gini pai dũ ti ni, mo ngére, agu akumba Korunerio akedi yo, i asana he tipa ga Simona bambu ki ru ngbadimo ho,

18ki yambu he ki sana he ya Simona du ho, du kura rimoko nga Petero.

19Wa Petero aberẽ pa yuguyugupai Ziazia Toro ki ya fu ko, “Mo ngére akumba biata nagbata ro.

20Mo gúari ki zorõ ki ndu na yo, ka si du nga bangiro ya; bambiko mi akedi yo.”

21Petero ki zorõ koyo du agu akumba ni re, ki ya, “Oni ngére, mi oni agbata re; gini pai oni aye ti ni?”

22I ki ya, “Korunerio, nga barukuri aboro 100, nga ruru kumba, nagunde ti Mbori, rika a Yudo nataka pande ko ataka na wene pai, ziazia maraika arugu ko ko kedi sunge fuo ro, mo ye ku kpuko yo, ko gi pai ngbaro.”

23Ko ki yambu yo ku dimo yo tie, ki fu ba fu yo. Rago ki ya giri ko ki guari ki ndu na yo, agu yo ki ndu na ko dagba awirina Yapo yo.

24Rago ki ya giri i ki rimi ku Kaisaria yo, Korunerio asunguda kina yo, ko nadungura agumeko na wene abadiako.

25Were ho Petero arimi ni Korunerio ki gbia ko ki ti sande pati nduko ki irisi ko.

26Ono Petero ki ta tumba ko, niya, “Mo rú; mi tigimi kina boro nga mi a.”

27Wa i afura na ko, ko ki rimi ki bi dungu aboro natiria;

28ko ki ya fu yo, “Oni ini tigaoni ya ru nga kpamiati kuti gu boro nga kura rika aboro na ndu koyo du ni ni fu gu boro nga Yudo te; ono Mbori ayugu gu pai fere nga ka mi ya nga ti boro wa sa nyakorokpa nga ni nga birikobiriko he ya.

29Si du mi aye ti ni a ka pai adu nga ya ho i akedi sunge fuo re ni. Mi nasana he ti gu pai nga ha, mo akedi sunge fuo re sa gine?”

30Korunerio ki ya, “Mbata rame fuo ho biama, dati kina gi saa re, mi akpari ti gu saa kpe nga biata nga ga nyemu. Mo ngére kumba ki ru barangba re na imaima remu,

31ni ki ya, ‘Korunerio, i agi ga kpe agia, i natingida pa gamo agamahe atingida ku bangiri Mbori.

32Mo kédi sunge mbiko gere ku Yapo yo, i yambu gu Simona du kura rimoko nga Petero kono du mo ni; ko du ti gu bambu nga ga gu Simona nga barungburasi kpoto, du pavuru baime.’

33Si du mi akedi sunge akeda ti ni fuo ro ni ba sa, mo mangi he wenengãi niye mo. Si du du ani ti ni erẽ bangiri Mbori dunduko ka gia agu apai dunduko Gbia arugu ro kuti ni.”

34Petero ki tuka ngbako ki ya, “Mi ini ni rengo ya Mbori akpara nga aboro te;

35ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.

36Gu pai ko akedi koyo du awiri aYisaraere ni, ko atungusi ni wene pangbanga zereda rogo Yesu Kristo yo nga Gbia aboro na ahe dú.

37Oni ini gu pai aina ni tironi, nga gu i atungusi atungusa rogo Yuda dunduko, tona ti kina Gariraya, fuo pa gu bapatiza Yoane atungusi,

38wa Mbori ambedi Yesu nga boro Nazareta ni Ziazia Toro na tandu; ko nanita ndu kirikiri nimangi wenepai, nihusi agu aboro dunduko bakitingbanga amangi yo; bambiko Mbori adu na ko.

39Ani nga adezire agu apai ko anamanga ringara aYudo yo na Yerusarema yo, ko i aimi ko a niasa ko ti ngua.

40Ko rame adu ue Mbori ki zingisi ko, ki yugu ko ayugo gbayaga,

41fu aboro dunduko te, fu kina agu adezire Mbori asia yo mbata, fu kina rani, nga agu aboro nari riahe ki mbiri he na ko fuo zinga ko be kpio.

42Ko ki ya fu rani ani nitungusi he fu aboro, ki nigumba gu pai nga, ko du re nga gu ko ya Mbori ko du ni basapungbanga unga aboro na kangba aboro.

43Ko anebi aya ni adezire, gu ni ka idi pa ko i gbandaka gani ingaapai agbandaka ni rimoko.”

44Wa Petero agumba agi apai re, Ziazia Toro ki zorõ ku ri agu yo dunduko naagia ha.

45Agu aYudo naidi pa ko si ki niiriwo airiwo ti yo a wa i aye na Petero, bambiko i afu gu gamahe nga Ziazia Toro fu aGendiria a.

46Bambiko i agi payo i nifura afura ni ngbatunga afugo, i nitaasi rimo Mbori. Petero ki karaga ha, ki ya,

47“Ka boro ka na ime ya i abapatizi nga agi yo fu yo Ziazia Toro fu yo wa kina rani te?”

48Ko ki ya i bapatizi yo ni rimo Yesu Kristo. I ki kpari fu ko ya ko ima na yo ngbutuko.

← Chapter 9 Jump to: Chapter 11 →