Acts 27

Zande

← Chapter 26 Jump to: Chapter 28 →

1Ho i aya ni wẽ, ani ndu bakurungba yo ku Itaria yo, i ki fu Pauro na kura kisikisi aboro fu gu barukuri aboro 100 rimoko angia Yurio nadu dagba ga Auguseto rikavura.

2Ani ki zorõ ku bakurungba yo naye Aduramutiona yo nikandu ku rogo agu akporo du ti ngbanda Asia yo, ani ki ndu bangiri baime yo, Arisitaruko ki du na ani nangia Makedonio naye Tesaronike yo.

3Rago ki ya giri ani ki da Sidona yo. Yurio ki mangi fu Pauro wenengaĩ ki idi he fu ko ko ndu koyo du abadiangbako ni ki nyakasi tiko.

4Ani ki guari yo ki ndu bangiri baime yo ku pati Kupurio ti vuru yuge bambiko yuge amangi rani.

5Ho ani asi gu baime ni du pati Kirikia na Pamburia, ani ki ye ku Mura yo, du Rukia yo.

6Yo barukuri aboro 100 abi bakurungba Aresanduria ni nikandu ku Itaria yo; ko ki rogo rani ku rogo.

7Ho ani andu ni yee kuti dungu rame, da ku pati Kinido ki kpakara akpakara fu rani, yuge ki za rani ani ki ndu ku pati Kurete ti vuru yuge, pati Saremone.

8Ani ki nipeke he ni kpakara, ki ye ku rogo ba rimoho angia Wene Agbuduru; gu bakporo nga Rasea nadu pati he mbembedi.

9Ho rago asusi ni gbe, ndu ri baime ki du ngba pai, bambiko rago Gina riahe aima susa, Pauro ki rugu yo,

10ki ya fu yo, “Abaira mi ini ya ũbakurungba na bakurungba nikagberã be gi nduge ri ime re, na ungarani a.”

11Ono barukuri aboro 100 agi pa babanda bakurungba na iraha, susi agu apai Pauro agumba.

12Bambiko gbuduru angba nga ti sunga ti ragozere wenengaĩ te, agu yo ni dungu yo ki ya i ndu ri baime yo si ngia ka i da ku Foinko yo, ki nye yo ti ragozere; si nga gu gbuduru du Kurete yo, bangirihe du pavururago ku uroyo, na pavururago ku dioyo.

13Ho yuge aya ni yee pavururago, i ki berẽ ya gu pai i akpi nyemu he si du be yo, i ki tumba gu marã nazada bakurungba ki ndu pati Kurete ti gango ime mbembedi.

14Ono fuo ima rago ngbutuko, gbegberẽ bayuge ki ya ti ni, rimoho nga Eurakuro.

15Ho yuge azi bakurungba ni, ka si andu nga ku barangba yuge ya, ani ki mbu tirani fu he, si ki do rani.

16Ani ki oro pati toni kisanga ti vuru yuge, rimoho nga Kauda, ani ki zadi toni kurungba ni kpakara.

17Ho i atumba ha ni, i ki di kikii agire ki vodi katakpa bakurungba na ni; i ki zogo pupoho ki oro were bambiko i agunde ya si nikaba yo ku Saruti yo.

18Wa bazigizo yuge amangi rani bakere gbe, rago ya giri i ki tona bafa ũbakurungba ku baime yo;

19rame ki du ue i ki bafu úruga bakurungba ni beyo tigayo.

20Ho uru ahasa nga rago ni fu rani na akerekuru kuti dungu rame ya, ka bazigizo amanga nga rani ni toni he ya, maabangirise sa bata ki gbataka ti rani awere dunduko.

21Ho i agina riahe ni ni gbanga ha, Pauro ki ru dagba yo yo tie, ki ya. “Abaira, ka oni agi sangbare si ka ngba, oni ki he guari Kurete yo, ki he dia gi gberãrago re.

22Awere mi zungadi roni oni ngárã angarã; bambiko ungaroni ainga nga te ono kina bakurungba.

23Bambiko ga gu Mbori maraika mi nga gako ko, mi namanga pa ko, niru pati re ni gi yuru re,

24ki ya, ‘Ka mo gúnde nga ya, Pauro; mo arú barangba Kaisara; mo ngére, Mbori fu agu yo dunduko foro du bakurungba yo na mo.’

25Were, abaira, oni ngárã angarã; bambiko mi idi pa Mbori ya si adú a wa ko agumba ha fere.

26Ono ani adú ni baba rani ku kisanga yo.”

27Ho yuru aye ni nangia bawe na biama ha, wa ani aotoka rogo gu baime yo nga Aduria, si ki du wa bebere yuru nadu aboro bakurungba ki berẽ ya i nambeda ku pati migara;

28i ki asadi ime ki bi he badunguraha ki du wa ametere 37; fuo ho ki ima ngbutuko i ki asadi he, ki bi he badunguraha ki du wa ametere 28.

29I ki zogo agu amarã nazada bakurungba biama ti mburuhe, bambiko i agunde si ngia he nikagbia rani kuti mbia, i ki nikpi nyemu rago giri.

30Wa aboro bakurungba aasadi ora ti bakurungba, ki zogo toni kurungba ni biriki, ya i nakpi nyemu ka maa agu amarã nazada bakurungba ti ngba bakurungba,

31Pauro aya fu barukuri aboro 100 na abanzengere, “Ka agi yo anye nga bakurungba yo re ya, ka oni bati nga te.”

32Abanzengere ki yere giri toni kurungba tie si ki ndu ni sa ha.

33Wa rago agiri, Pauro ki zungadi yo dunduko i ri riahe, ki ya, “Areme nga gu bawe na biama rame oni ta kparia rago nigina riahe, oni ari nga he wa sa te.

34Were mi zungadi roni, oni ri riahe; bambiko si oni ka nyaka mbiko ho; bambiko mangerironi amo nga ti roni wa sa te.”

35Ho ko agumba ha ni were, ko ki di kpokuta, ki tambua Mbori barangba yo dũ; ki kuadi he ki tona ri he.

36I ki ngarã angarã dunduko, i ki ri riahe tigayo a.

37(Ani ki du bakurungba yo wa aboro 276.)

38Ho i ambiki ni, i ki aakpurasi bakurungba nibafu morú ku baime yo.

39Ho rago agiri ni i aina nga gu ringara te re; ono i abi durugaduruga ime na ngume pati he, i ki saki he dagba yo si ngia ka i oro na bakurungba ku auru he.

40I ki bafu agu amarã nazada ha ki he he ime yo, ki zaki gu gire du ti angua ruga ha; ki gbe gu pupoho du barangba ha ku ari sa yuge, i ki ndu sa ngume.

41Ono i ki ye ku ho abaime afo tiru ni ue, i ki oro na bakurungba ku auru sende ngbaha ki kongo ki nye nyanyaki, ono mburuhe ki tona kuadi akuadi be rikito baime.

42Abanzengere ki ya i imi kisikisi aboro, agu yo ka wagia ki oro.

43Ono barukuri aboro 100 ki za yo ti gu pai i aberẽ manga ha, bambiko ko akpi nyemu ka batasa Pauro. Ko ki ya agu yo ini wagia i tiwi ku ime yo ki wagia ku pia yo mbata;

44akura yo ki sungu auru apurangi na gu kura ahe ka du bakurungba yo. Were si ki du ya i ada ku pia yo dunduko nzunzu.

← Chapter 26 Jump to: Chapter 28 →