Acts 11

Zande

← Chapter 10 Jump to: Chapter 12 →

1Were agu amokedi nadu Yuda yo na awirina i ki gi he ya aGendiria adi ga Mbori pai a.

2Ho Petero aye ni ku Yerusarema yo agu aYudo naidi pase ki saki gu pai na ko,

3nga, “Tipagine mo arimi ti ni koyo du agu aboro ni i ayera nga yo ya ki ri riahe na yo.”

4Ono Petero ki ru pai, ki ringbisi he fu yo a wa si aenge, ki ya,

5“Mi adu rogo gu bakporo nga Yapo nikpari; ki bi yuguyugupai rogo musumo yo, nga, he niye ari yo, wa kina bakere remu i nizogo ho ngbangbaturũ yo ti pangbaha biama; si aye fu kina re.

6Ho mi adua bangire ni ti ni mi ki nibaki bangire abaka, mi ki bi agu anya sende nadu na ndura ni ba biama na anya nvuo, na agbiro a azire ari.

7Mi ki gi fugo a si niya fere, ‘Mo gúari Petero; mo imi agu ra ka ri ra.’

8Ono mi ki ya, ‘Wo te Gbia; bambiko nyakorokpa ada nga ngbare yo mbata na birikobiriko he wa sa te.’

9Ono fugo ki karaga ha berewe fere ni ue he ngbangbaturũ yo, ki ya, ‘Gu girisi Mbori ka mo sá nga ha ni nyakorokpa ya.’

10I amangi he bara biata, i ki gbe he agbe dunduko ku ngbangbaturũ yo berewe.

11Oni ngére, akumba ki ye aye biata ni ba sa ki ru pati gu bambu ani adu tii he yo i akedi yo Kaisaria yo koyo du mi ni.

12Zia zia Toro ki ya fere ani ndu na yo, ka mi kpara nga boro ya. Agi awirina adu sita re ani andu andu na yo; ani ki da rum ku tii ga gu kumba bambu yo re.

13Ko ki gumba pa maraika fu rani wa ko abi ko niru ti gako bambu yo, ki ya, ‘Mo kédi sunge ku Yapo yo, i ye na gu Simona du kura rimoko nga Petero;

14ko nikagumba agu apai foro mo ka bata mbiko ho na kpuro dũ.’

15Wa mi aru pai ka gumba ha, Ziazia Toro ki zorõ ku ri yo, wa kina rani ho si aenge ni.

16Mi ki tingidi gu ga Gbia pai, wa ko agumba ha, ya, ‘Yoane nanabapatizi aboro ni ime ni rengo, ono i abapatizi roni ni Ziazia Toro.’

17Ka si du wa Mbori afu kina gu gamahe fu yo a ko afu fu rani, ho ani aidi pa Gbia ni Yesu Kristo, da ka ngia mi ka za Mbori?”

18Ho i agi agi apai ni re, i ki ongo aonga, ki taasi rimo Mbori, ki ya, “Mbori fu saberã sa unga fu aGendiria a tie.”

19Were agu yo nagbandaka be gu rungosi namanga tipa Setefano i ki ndu andu dati kina Poinike na Kupurio a Andiokia nitungusi pai fu kura aboro te, fu kina aYudo.

20Agu yo adu dagba yo nangia aboro Kupurio na Kurene ho i ada ni Andiokia yo i ki gumba pai fu agu aYudo i abatika yo rogo kura aringara a ki nitungusi pa Gbia Yesu.

21Be Gbia adu adu na yo; agu aboro naidi pase ni dungu yo i ki sa tiyo fu Gbia.

22Gayo pangbanga ki da ku tu gu kanisa yo nadu Yerusarema yo i ki kedi Barunaba ko ndu andu da Andiokia yo.

23Ko, ho ko ada ni, ki bi ga Mbori undahe, rago ki ngba angba ti ko. Ko ki ngarasi yo angarasa dunduko, ki ya i ká kuti Gbia ni nyaka kpotoyo yo;

24bambiko ruru boro nangia ko, ko ahi ahi be Ziazia Toro na idapase. I ki gedi dungu aboro fu Gbia.

25Ko ki ndu ku Taruseu yo ka gbata Saura.

26Ho ko abi ko ni, i ki ye na ko ku Andiokia yo. Were i ki dungura tiyo na kanisa ti kina gu garã sa, ki niyugu pai fu dungu aboro; i ayambu gu rimo abawiriki nga Akristano mbata kina Andiokia yo.

27Were ni gu rago re anebi aye Yerusarema yo ku Andiokia yo.

28Gu ko ki ru ku ari sa dagba yo yo rimoko angia Agabo, ko ki yugu gu pai fu yo sangba Toro yo nga bakere gberãngbi amánga amanga rogo ngbi dũ. Si ki da ti rengo ni gu rago Kuraudio azogo rago ni.

29Abawiriki ki ya i nikakeda úgomoro fu agu awirina nadu Yuda yo, gu ni ki niringbisi gani na kina omeni.

30I ki mangi he a, ki kedi he fu ga aYudo abaakumba ku be aBarunaba na Saura.

← Chapter 10 Jump to: Chapter 12 →