Acts 26

Zande

← Chapter 25 Jump to: Chapter 27 →

1Aguripa ki ya fu Pauro. “I idi he foro mo gumba gu pai dũ ti ro.” Pauro ki tãi beko tie ki gumba gako pai, ya:

2“Aguripa, bakindo, mi berẽ ya si ngba ti re, mi gumba gi pai areme barangba ro tipa agu apai dunduko aYudo nakita ngbanga re ti ni;

3bambiko mo ini agu asino na agu apai du dagba aYudo yo dunduko wenengaĩ. Si du mi azúngadi ro ti ni mo gi gi pai zezeredi.

4“AYudo atona ina agu apai mi anamanga ni ungare dunduko ho mi adu ni ni gude, si adu dagba ngbatungare ti tonatona ha, na Yerusarema yo a.

5Si ngia i nakpi nyemu ka gumba ha wo, i gúmba ha ya i aini pa re ti bambata ha wa mi adu ni Farusi nipeke agu yo naru nyanyaki tipa gaani dini.

6Awere mi naru erẽ i sapu ngbanga re tipa maa bangirise kuti gu kidohe Mbori akido fu abarani;

7nga gu rikarani du bawe na ue namaa bangiriyo kuti dia ha a, nimangi pa Mbori yuru na uru kakaka. Ako bakindo, aYudo nakita ngbanga re kina kuti gi maabangirise re!

8Tipagine adu nga gu pai ti ni bangironi ni rengo, ya Mbori nazingisa aboro be kpio ya?

9“Mi aberẽ he a tigu ya ngba manga mi dungu apai angba kuti rimo Yesu nangia boro Nazareta.

10Wo mi amangi a Yerusarema yo: abairamotumo aasia pai fere mi ki nikisi ga Mbori aboro ku bambukisa yo ni dungu yo, ho i aimi yo ni, mi ape fugo kuti yo a.

11Mi aasadi manga yo i gberẽ ngbayo yo, nimbusa yo dedede rogo abambutiria yo dunduko; mi ki rungosi yo da rogo abaakporo nga ga kura aringara a, bambiko wa mi azingi kuti yo bakere gbe.

12“Were wa mi anunga ku Damaseke yo na gu pai be re abairamotumo aasia pa ha fere,

13bebere uru, bakindo, mi abi imarago ngbangbaturũ yo gene yo, nga gu susi ima uru, si ahasi rago pati rani kirikiri na agu yo ani anunga na yo.

14Ho ani ati ni ku sande dunduko, mi ki gi fugo si niya fere rogo pa Ebere yo, ‘Saura, Saura, tipagine mo narungosi re ti ni? kpakara si mo para akpakara foro.’

15Mi ki ya, ‘Da nga mo Gbia?’ Gbia ki ya, ‘Mi nga Yesu nga gu ko mo narungosi ko.

16Ono mo gúari, ki ru ku ngba nduro; bambiko mi yugu tire foro tipa gi pai re, nga, mi sa ro ni ira manga pa agu apai mo nibi re ti ni, na agu apai mi mkayugo tire foro ti ni, mi ki sa ro ni dezirehe a;

17ki batasi ro be aboro na aGendiria ― nga agu yo mi nakeda ro koyo du yo ni.

18Mo zá bangiriyo, i sa tiyo ti bitimo ku imarago yo, ti ga Satana tandu koyo du Mbori ni, i gbandaka gayo ingaapai, i ki di kumbo dagba agu yo i nasa yo ni ziazia yo mbiko ida pa re.’

19“Were Aguripa, bakindo, mi akeretu nga fu gu yuguyugupai naye ngbangbaturũ yo te.

20Ono mi agumba pa ha fu agu yo mbata du Damaseke yo, na Yerusarema yo, na rogo ringara Yuda dunduko, ki gumba ha fu aGendiria a, ya i sa gayo berã ki sa tiyo fu Mbori, ki nimangi agu apai rengbe na saberã.

21Bambiko gere, aYudo azi re ti ni yekaru yo i ki asadi imo re.

22Were mi naru da areme nidu ni dezirehe fu rungorungo aboro na aboro kumuko a, bambiko mi di gu undahe nga ga Mbori, mi agumba nga kungba pai te kina gu anebi aya na Mose si aye:

23ya, Kristo ahi pai, ya ko azínga be kpio ni bambata yo ki tungusi pa imarago fu aboro na aGendiria.”

24Wa ko agumba gako pai ni were, Feseto ki poi ku ari, ya, “Pauro, iranzanga nga mo; ga bakere tatamana pai nasa ro ni nzanga.”

25Ono Pauro ki ya, “Ako Feseto ngba mo gbe, iranzanga nga mi te; mi natungusa agu apai nga rengo na zezeredi pai.

26Bambiko bakindo ini pa agi apai re, ko mi agumba ha fu ko zukazuka a: bambiko mi berẽ he ni rengo ya agi apai re adu nga ni okooko ho ti ko wa sa te; bambiko i amanga nga gere ni gbuko te.

27Ako Aguripa, bakindo, mo idi pa anebi? Mi ini ya mo idi pa yo.”

28Aguripa ki ya fu Pauro, “Mo nakpi nyemu ka sa re ni Kristano ni toni zungadihe!”

29Pauro ki ya, “Watadu toni he na bakere he, mi nakpi nyemu he fu Mbori ya mo du wa kina re, kina ro ni sa ro a te, ono agu yo nagia pa re areme dunduko a, ono ka oni du nga ni vodivodi roni ya.”

30Bakindo ki ru ku ari, na banyaki, na Berunike, na agu yo nasungu na yo.

31Ho i andu ni ku sa yo, i ki gumba pai dagba yo ki ya, “Gi kumba amanga nga pai re rengbe na kpi ko na vo ko wa sa te.”

32Aguripa ki ya fu Feseto, “Ka gi kumba akpara nga fu Kaisara re ya, ka i kusi ko.”

← Chapter 25 Jump to: Chapter 27 →