Acts 8

Zande

← Chapter 7 Jump to: Chapter 9 →

1Ni gu rago re bakere rungosi ki ye kuti gu kanisa nadu Yerusarema yo; si ki gbandaka yo agbandaka rogo ngbi Yuda na ngbi Somorona dunduko, kina amokedi ki nye.

2Ruru akumba ki kpisidi Setefano, ki kpari ko akpara gbe.

3Ono Saura ki nimangi kanisa amanga niririmi ku rogo abambu dunduko, ki nigbefe akumba na ade ki nikisi yo ku bambukisa yo.

4Agu yo nagbataka i ki tona ka ndu kirikiri nitungusi Pai.

5Firipo ki ndu ku rogo gu bakporo yo nga Somorona, ki tungusi pa Kristo fu aboro.

6Arimbasa ki mongo ye tuyo fu agu apai Firipo agumba re ho i agi he ni, ki bi agu apai i aina pai ti ni ko amanga.

7Bambiko gbigbita atoro ago ti agu yo ni dungu yo ami aima zia yo, nipoi ku ari; agu yo nadu na ngbaramoni, na agu yo nagbarĩ ni dungu yo i ki nihuhuku.

8Ngbarago ki du adu rogo gu bakporo re gbe.

9Ono kumba adu yo, rimoko angia Simona, ko anasoroka bakporo yo mbata, ki niiriwosi aboro Somorona ki ya bakere boro nga ko.

10I ki nidege tuyo kina koyo du ko ni dunduko, niya, “Gi kumba re nga gu tandu Mbori i niya ti ni, Bahe.”

11I ki nidege tuyo koyo du ko ni bambiko ko anairiwosi yo ti dungu rame ni gako soroka.

12Ono ho i aidi pa Firipo ni wa ko atungusa wene pangbanga tipa ga Mbori ngbi na pa rimo Yesu Kristo, i ki bapatizi yo, akumba na ade a.

13Simona ki idi paha a tigako; i ki bapatizi ko ko ki nye na Firipo. Simona ki ta bi agu apai du na tandu na agu apai i aina pai ti ni i amanga nikigi akiga.

14Were ho agu amokedi agi he ni nadu Yerusarema yo ya aboro Somorona aka kuti ga Mbori Pai, i ki kedi aPetero na Yoane koyo du yo ni.

15Ho i ada ni, i ki kpari tipa yo ya i du na Ziazia Toro;

16bambiko ko azorã nga ho ku ri yo wa sa te; kina bapatizi yo ku rogo rimo Gbia Yesu yo.

17I ki mamoi beyo ti yo i ki du na Ziazia Toro.

18Were ho Simona abi he ni ya fu yo Ziazia Toro ti maa amokedi beyo, ko ki kido yo tipa marã,

19ki ya, “Oni fú gi tandu fere a re, mi ya moi bere ti gu ni, ni du na Ziazia Toro.”

20Ono Petero ki ya fu ko, “Mo kpi akpi na ga marã bambiko mo berẽ pa dia ga Mbori gamunihe ni marã.

21Gamunihe tipa ro te, ga pai adu nga rogo gi sunge re wa sa te; bambiko kpotoro yo ni ruru he bangiri Mbori te.

22Mo zúngadi tiro ti gi gamo gbegberẽpai re, ki kpari fu Gbia, si ngia ko avú ro ti sangba kpotoro yo.

23Bambiko mi bi he ya nirãnirã kere he nga mo, gbegberẽpai vo ro.”

24Simona ki karaga ha ki ya, “Oni kpári fu Gbia tipa re ya agi apai oni agumba re ka si ye nga sa re wa sa ya.”

25Were ho i apeke pai ni ki gumba pa Gbia, i ki karaga tiyo ku Yerusarema yo, ki nitungusi wene pangbanga rogo agu akporo nga ga aSomorono.

26Ga Gbia maraika ki gumba pai fu Firipo, ya, “Mo gúari ki ndu ku pavururago yo sa gu gene mo Yerusarema yo ka ndu ku Gaza yo; gu nga ngbakungba.”

27Ko ki guari ki ndu; ki bi kumba nga boro Etiopia nga banyaki nadu na bakere tandu fu Kandake, nangia nakindo aEtiopio, ko du ni ira gari ũkumuko dunduko, ko aye ku Yerusarema yo ka irisa Mbori.

28Ko ki ta ga ki sungu rogo gako ngbagida yo, nigedi gu pai gu nebi ake nga Yesaya.

29Ziazia Toro ki ya fu Firipo, “Mo mbédi ki gbia tiro kuti gi ngbagida re.”

30Firipo ki oro koyo du ko ni, ki gi pako ko nigedi gu pai Yesaya ake nga nebi. Firipo ki ya, “Mo rúgu tiro na gu pai mo ageda?”

31Ko ki ya. “Ka mi wiri pa ina ha wãi? kina boro ka yugu he fere.” Ko ki kpari fu Firipo ko biti i sungu na ko.

32Were ba gu pai ko agedi rogo Ziazia Kekeapai yo si nangia gere, ya, “I aye na ko wa kandoro sa imo ru; wa wiri kandoro nakpara nga barangba gu boro nakpe mangeru ya, wo ko aza nga ngbako a ya.

33Rago payasi pa ko i aida nga pa ruru sarangbanga fu ko te. Da ka yugu ngbatungako? Bambiko i adi ungako ti kpotosende.”

34Banyaki ki karaga ha fu Firipo ki ya, “Mo gúmba ha fere, nebi nagumba gere tipa da? Watadu ko na kura boro, da du?”

35Firipo ki tuka ngbako, ki tungusi pa Yesu fu ko ki tona ha ti kina gi Ziazia Kekeapai re.

36Wa i andu gene i ki da ti ime; banyaki ki ya, “Mo bi, ime du re! Gine naza re ti bapatiza?” [

37Firipo ki ya, “Ka mo idi paha na kpotoro yo dunduko, i idi he aida foro.” Ko ki karaga ha ki ya, “Miidiheya Yesu Kristo nga Wiri Mbori.”]

38Ko ki ya i rugu ngbagida si ru zaa; i ki zorõ ku ime yo ue, aFiripo na banyaki, Firipo ki bapatizi ko.

39Ho i akuru ni ime yo, Toro Gbia ki tuka Firipo ka banyaki abi nga ko berewe ya, bambiko ko andu gako nunguro na ngbarago.

40Ono i abi Firipo Azoto yo; ko ki ta ndu nitungusi wene pangbanga rogo abaakporo dunduko, dati kina ho ko ada ni Kaisaria yo.

← Chapter 7 Jump to: Chapter 9 →