Acts 22

Zande

← Chapter 21 Jump to: Chapter 23 →

1“Awirinami, aba, oni gí gu pai mi nikagumba ha fu roni re.”

2Ho i agi he ni ya ko nagumba ha rogo pa Ebere yo i ki ongo kii; ko ki ya,

3“Yudo nga mi, i avungu re Taruseu yo du Kirikia yo, ono mi asono rogo gi bakporo yo re, mi asungu pati ndu Gamariere, i ayugu pa ga abarani rugute fere nyanyaki wa du sinoho, mi ki du ni iranyaka tipa Mbori, a wa du oni erẽ dunduko areme.

4Mi ki rungosi aboro gi Gene re kina kuti kpio, nivodi akumba na ade ki nimoi yo ku bambukisa yo.

5Gbiamotumo du ni dezirere tipa gi pa, re a, na rika ga aYudo abaakumba dunduko. I afu awaraga fere a tipa awirina nga aYudo, mi ki nungu ku Damaseke yo, ka ye na agu yo nadu yore a ku Yerusarema yo ni vodivodi yo, i mbusi yo.

6“Si ki du wa mi andu gi nunguro ki mbedi ku Damaseke yo wa bebere uru, rure bakere imarago ki ye ngbangbaturũ yo ki hasi rago pati re kirikiri.

7Mi ki ti sande ki gi fugo si niya fere, ‘Saura, Saura, tipagine mo arungosi re ti ni?’

8Mi ki karaga ha ki ya, ‘Da nga mo, Gbia?’ Ko ki ya fere, ‘Mi nga Yesu nangia boro Nazareta, nga gu ko mo arungosi ko.’

9Agu yo nadu na mi, i abi imarago tigu, ono i agia nga fugo gu ko nagumba pai fere te.

10Mi ki ya, ‘Mi amánga wãi, Gbia?’ Gbia ki ya fere, ‘Mo gúari ki ndu ku Damaseke yo; i agúmba pa agu apai dunduko foro yore nga gu i aringbisi mo mangi he.’

11Ho ka mi abi nga he ni ya bambiko gu imarago du ni ngenzerengenzere he re, agu yo nadu na mi i ki zadi bere, mi ki ye ku Damaseke yo.

12“Anania nangia ruru kumba tipa rugute, agu aYudo nadu yo i agumba ruru pai kuti ko dunduko,

13ko aye koyo du mi ni, ki ta ru pati re niya fere, ‘Wirinami, Saura, mo ngere.’ Ni kina gu rago re mi ki ngere ki bi ko.

14Ko ki ya, ‘Ga abarani Mbori aya ti ro, mo ini agu apai ko akpi nyemu he re ki bi Ruru Boro ki gi fugo ngbako.

15Bambiko mo nikadu ni dezire agu apai mo abi ki gi he fu aboro dunduko tipa ko.

16Awere mo nasunga tipagine? Mo gúari, i ki bapatizi ro ki ta zunda ga gbegberẽapai ti ro, nikpari ti rimoko.’

17“Were ho mi akaraga tire ni ku Yerusarema yo, wa mi akpari yekaru yo mi ki bi yuguyugupai,

18ki bi Gbia, ko niya fere, ‘Mo ípisi tiro ki guari Yerusarema yo bambiko i adia nga ga dezire tipa re te.’

19Mi ki ya, ‘Gbia, i ini tigayo ya mi akikisi agu yo naidi pa ro ki nitaki yo rogo abambutiria dunduko.

20Ho i auka kure Setefanio ni nangia dezirero, mi aru pati yo a ki idi he, ki banda ga agu yo remu naimi ko.’

21Ko ki ya fere, ‘Mo gúari; bambiko mi akéda ro tuturu koyo du aGendiria ni.’ ”

22I ki ye tuyo fu ko dati kina gi pai re; i ki poi apaa ku ari, ki ya, “I dí gi irawia auru kpotosende re! Bambiko ngba nga nye ko ni ungako te.”

23Wa i apoi ku ari, ki ba gayo aremu, ki mi nvutu ku yuge yo,

24bairarivura ki ya, i ndu na ko ku gbata yo, ki ya i sana ko nita ko, ko ini ndu gu pai poi aboro ku ari ti ni kuti ko.

25Ho i avo ko ni ni agiri kpoto, Pauro ki ya fu gu barukuri aboro 100 naru ho, “Ru taka oni gu boro nga Romo, wa i ata sapa nga ngbanga ni ya?”

26Ho barukuri aboro 100 agi he ni, ko ki ndu koyo du bairarivura ni, ki gumba ha fu ko, niya, “Gini pai mo aye ka manga? bambiko gi kumba re nga Romo.”

27Bairarivura ki ye ki ya fu ko, “Mo gúmba ha fere, Romo nga mo?” Ko ki ya, “Ii.”

28Bairarivura ki karaga ha ki ya, “Mi angbe gi pa du ni Romo re ni dungu marã.” Pauro ki ya, “Ono i avungu re ni Romo.”

29Agu yo naye ka sana ko nita ko i ki guari pati ko tie ni ba sa; bairarivura ki gunde a ho ko aini ni ya Romo nga ko, bambiko wa ko avo ko.

30Ono ho rago agiri ni, bairarivura akpi nyemu ka ruga tiko na ndu gu pai aYudo akiti ngbanga Pauro ti ni, ko ki zaki ko, ki ya fu abairamotumo na abororondo dunduko i tiria tiyo, ko ki zorõ na Pauro ki moi ko barangba yo.

← Chapter 21 Jump to: Chapter 23 →