Acts 24

Zande

← Chapter 23 Jump to: Chapter 25 →

1Fuo rame bisue gbiamotumo ki ye, nangia Anania, na agu abaakumba na bainigumbapai sa, rimoko angia Teruturo; i ki yugu pai fu banyaki kuti Pauro.

2Ho i ayambu ko ni, Teruturo ki tona gumba pai kuti ko, niya, “Ako Ferika, ngba mo gbe, wa du ani mbiko ro zezeredi, na wa du gbegberẽapai ni rugurugu he fu gi rika aboro re mbiko wa mo nakparia rago,

3ani naida ha aedede rogo arago nitambua ro.

4Ono bambiko mi akpi nga nyemu ka fuda ro ni gbanga pai te, si du mi azungadi ro ti ni mo gi umba parani ni wene ringiro.

5Bambiko ani abi gi kumba re ko nga kere boro, nga irasamungu dagba aYudo zegino dũ, nga barumbatayo fu rika aNazareto.

6Ko aya gbarasi rago yekaru yo; ani ki zi ko a. [Ani aidi ka sapa ngbanga ko wa du pa gaani rugute.

7Ono bairarivura nga Rusia ki ye ki di ko be rani ni bakere zuu,

8ki ya akitingbanga ko ye kono du mo ni.] Ka mo wisigi gako pai ni tiro mo abi he ki ini agi apai dunduko re ani nakita ngbanga ko kuti ni.”

9AYudo ki kpamia gayo pai kuti gi kitangbangase re, niidi he ya wo du agi apai re.

10Ho banyaki abaya Pauro ni ko gumba pai ko ki karaga ha, ki ya, “Bambiko mi ini ya mo adu ni boro sapangbanga fu gi rika aboro re kuti dungu garã, si du gumba mi gimi apai ti ni foro ni ngbarago;

11bambiko ka mo ini he aina, wa ye mi ku Yerusarema yo ka irisa Mbori rame asusa nga bawe na ue te.

12I abi nga re mi nidarĩ kangu na boro ki zingisi rimbasa yekaru yo na abambutiria yo na bakporo yo a te.

13Ka i yugu nga ha foro agi apai i nakita ngbanga re ti ni re ya si du ni rengo a te.

14Mi idi gere foro, ya, mi ta manga pa ga abarani Mbori wa du pa gu pai i niya ti ni re si akia, niidi pa agu apai du ti rugute, na gu anebi ake dunduko;

15ni maa bangire kovo du Mbori ni ya ruru aboro azinga be kpio na iraira yo a, a wa agi yo namaa bangiriyo re a tigayo.

16Mi naruga tire kuti gi pai a re, sangba kpotore yo du ni ruru he fu Mbori na aboro dedede.

17Were garã adu ni dungu he mi ki ye na gamahe fu ngbatungare na ũmotumo.

18I ki bi re na agi ahe re yekaru yo ni gigiri re, rimbasa adu nga ho te na gbarakagbaraka pai a te; ono agu aYudo naye Asia yo i adu ho,

19ka i adu erẽ barangba ro si ka ngba, i ki kiti ngbanga re, si ngia pai ngbayo kuti re.

20Ono agi aboro du re i gumba ha tigayo, gini gbegberẽpai i abi, ho mi aru barangba abororondo ni,

21ka si ngia kina gu fugo sa re wa mi aru dagba yo ki poi ku ari, ya, ‘I nasapa ngbanga re barangba roni areme tipa zinga aboro be kpio.’ ”

22Ono Ferika aini pa gu Pai re wenengaĩ, ko ki he yo i ga, ki ya, “Ho Rusia ka ye ni nga bairarivura, mi ki sapu gaoni ngbanga.”

23Ko ki ya fu barukuri aboro 100 i nibánda Pauro abanda, ki niini pai fu ko; Ka i za nga abadiangbako ti manga pa ko wa sa ya.

24Fuo ra yo ngbutuko, Ferika ki ye na Durusira, nga diako, nangia Yudo, ki kedi sunge fuo Pauro, ki gi pako tipa idapa Kristo Yesu.

25Wa ko asaki pa rurupai na rugatise, na gu sapangbanga nikaye, Ferika ki gunde agunde, ki karaga ha ki ya, “Mo gá awere, ni gu rago kura pai adú nga be re ya mi ki yambu ro kono du mi ni.”

26Ko amaa bangiriko ya Pauro afu marã mobirimo fu ko; si du ko ayambu ko ti ni dedede a, ki nifura na ko.

27Ono ho garã asusi ni ue, Porukio Feseto ki di ba Ferika; Ferika ki he Pauro ni kisikisi ko, bambiko ko akpi nyemu ka ngba na aYudo.

← Chapter 23 Jump to: Chapter 25 →